1, 2. Hpunau langai gaw shi hkum shi hpa hpe chye wa ai kun? Dai hte seng nna shi hpa galaw wa ai kun?

RAMMA aten hta Robat hkalup hkam wa ai. Raitim, teng man ai lam gaw, shi a aprat hta ahkyak htum ai lam n byin wa ai. Shi ndai hku tsun ai: “Shut ai lam hpa mung n galaw tim, masha yu tsawm na daram sha ngai galaw wa ai. Zuphpawng yawng hpe lung nna, kalang lang aten kadun ningshawng mung galaw wa ai majaw, wenyi lam kaja nga ai zawn gaw rai nga ai. Raitim, lama ma gaw naw ra taw nga ai.”

² Robat hkungran ngut ai aten du hkra, hpa ra nga ai hpe shi n chye shi ai. Shi hte shi madu jan gaw, kalang lang Chyum Laika ga san ni san hkat ma ai. Shi madu jan gaw, Chyum Laika hpe atsawm chye nna, ga san ni hpe mung aloi sha lu htai ai. Raitim, Robat gaw mahtai ni hpe kalang lang n chye ai majaw kaya ai. Shi ndai hku tsun ai: “Ngai hpa mung n chye ai. Ngai hkrai ngai myit ai, ‘nye madu jan hpe wenyi lam hta woi awn na matu, ngai lama ma hpe galaw ra sai.’” Dai majaw, ra ang ai lam shi galaw wa ai. Shi ndai hku tsun ai: “Chyum Laika hpe grau hkaja magang, ngai hkaja ai lam ni gaw, langai hte langai matut mahkai lam nga wa ai. Hkaja ai lam ni hpe ngai chye na wa ai. Ahkyak htum re ai Yehowa hte hku hkau ai lam mung grau ngang wa ai.”

3. (a) Robat a mabyin kaw nna anhte hpa lam sharin la lu ai kun? (b) Ya anhte hpa ahkyak ai lam ni hpe hkaja na kun?

 ³ Robat a mabyin kaw nna grai ahkyak ai lam anhte sharin la lu ai. Anhte hta Chyum Laika machye machyang nkau mi nga na re. Zuphpawng ni hte hkaw tsun bungli hta mung ayan shang lawm nga na re. Raitim, dai daram hte sha gaw, anhte hpe wenyi myit rawng ai wa n byin wa shangun ai. Shing nrai, anhte hta wenyi myit grau nga wa na matu shakut nga ai mung mai byin ai. Raitim, anhte hkum anhte bai san jep ai shaloi, anhte rawt jat lu ai lam ni naw nga ai hpe mu wa na re. (Hpilipi 3:16) Ndai sumhpa hta, ahkyak ai ga san masum a mahtai hpe lu la na re: (1) Wenyi myit rawng ai wa re ai lam gara hku chye lu na kun? (2) Anhte a wenyi lam gara hku rawt jat wa lu na kun? (3) Wenyi lam hta rawt jat ai gaw anhte a aprat hpe gara hku karum ya lu ai kun?

4. Ehpesu 4:23, 24 hta lawm ai lam ni hpe hkan sa na matu kadai hpe tsun nga ai kun?

⁴ Karai Kasang hpe shawng nnan nawku wa ai shaloi, anhte a prat ting hpe galai shai wa ai. Ndai hku galai shai ai gaw hkalup hkam ai hte ngut mat sai n re. Chyum Laika hta anhte hpe ndai hku tsun da ai: “Myit jasat hpe nnan byin hkra matut nna galai shai ra ai.” (Ehpesu 4:23, 24, NW) Anhte gaw n hkum tsup ai majaw, matut nna naw galai shai ra ai. Yehowa hpe anhte nawku wa ai shaning grai na sai raitim, shi hte hku hkau lam gaw matut nna ngang kang hkra galaw ra ai.​—⁠Hpilipi 3:12-14.

5. Anhte gaw wenyi myit rawng ai wa re ai hpe chye na matu hpa ga san ni gaw anhte hpe karum ya lu ai kun?

⁵ Anhte gaw asak kaji ai raitim, kaba ai raitim, tinang hkum tinang myit madung hte san jep ra ai. Anhte hkum anhte ndai hku san mai ai: ‘Ngai hta wenyi myit grau nga wa sai kun? Hkristu hte grau bung wa sai kun? Zuphpawng ni hta ngai galaw ai lam ni hte ngai madun ai myit jasat ni gaw gara hku rai nga ai kun? Nye a prat hta teng sha byin mayu ai lam hpe, nye a tsun shaga ai lam ni gaw madun nga ai kun? Nye a hkaja ai lam, bu hpun mawn sumli ai lam hte sharin shaga hkrum ai shaloi ngai bai htang ai lam ni gaw, ngai hte seng nna gara hku madun nga ai kun? Shut ai lam lama ma galaw na matu chyam dinglik hkrum ai shaloi, ngai gara hku bai htang ai kun? Kunghpan ai Hkristan byin wa sai kun?’ (Ehpesu 4:13, NW) Ndai ga san ni gaw, anhte hta wenyi lam kade daram rawt jat nga ai hpe chye na matu karum ya lu ai.

6. Anhte gaw wenyi myit rawng ai wa re ai hpe chye na matu anhte hpa gaw karum ya lu ai kun?

⁶ Kalang lang, anhte hta wenyi myit rawng ai, n rawng ai hpe chye na matu, kaga masha ni a karum shingtau lam ra ai. Wenyi myit n rawng ai wa gaw, shi galaw ai lam a majaw Karai Kasang myit n pyaw mat ai hpe, n chye ai ngu kasa Pawlu sang lang dan ai. Raitim, wenyi myit rawng ai wa gaw mabyin masa ni hpe Karai Kasang gara hku mu mada ai lam hpe chye na ai. Wenyi myit n rawng ai prat hkrun lam hpe Yehowa n ra sharawng ai hpe mung chye ai. (1 Korinhtu 2:14-16; 3:1-3) Hkristu a myit jasat rawng ai myitsu salang ni gaw, hpunau nauna ni hta wenyi myit n rawng wa ai  hpe sadi hkrup yang, karum ya na matu shakut ai. Myitsu salang ni anhte hpe karum ya ai shaloi, dai hpe hkap la nna, ra ang ai galai shai lam ni hpe galaw na kun? Anhte galaw ai nga yang, wenyi lam hta teng sha rawt jat mayu ai lam anhte madun ai re.​—⁠Hpaji 7:5, 9. 

7. Chyum Laika machye machyang hte sha, wenyi myit rawng ai masha langai n re ai hpe gara hku chye lu ai kun?

⁷ Chyum Laika machye machyang hte sha, wenyi myit rawng ai wa n byin lu ai. Hkawhkam Shawlumon gaw, Yehowa hte seng ai lam law law hpe chye nna, Shawlumon a hpaji rawng ai ga si nkau mi gaw Chyum Laika a adaw achyen hku nna pyi byin wa ai. Hpang hta gaw, Yehowa hte shi a hku hkau lam gawng kya wa nna, shi sadi n dung wa ai. (1 Hkawhkam 4:29, 30; 11:4-6) Dai majaw, Chyum Laika machye machyang hta n-ga, kaga hpa naw ra ai kun? Anhte a makam masham hpe matut nna ngang kang hkra galaw ra ai. (Kolose 2:6, 7) Dai hpe anhte gara hku galaw lu na kun?

8, 9. (a) Anhte a makam masham ngang kang na matu hpa gaw karum ya na kun? (b) Anhte hkaja ai lam hte sumru ai lam galaw ai shaloi anhte a bandung gaw hpa rai kun? (Ndai sumhpa shawng na sumla hpe yu u.)

⁸ Tsa ban langai hta, Pawlu gaw Hkristan ni hpe “hkum tsup re ai de dep hkra hkan shachyut” na matu n-gun jaw wa ai. (Hebre 6:1, 2) Ndai hpaji jaw ga hpe anhte gara hku hkan sa lu na kun? Ahkyak ai lam langai gaw, Karai Kasang A N-Gaw Nwai Ai Myit Hta A Nga Nga Mu ngu ai laika buk hpe hkaja ai hku nna re. Dai hku hkaja ai gaw, na a aprat hta Chyum Laika tara ni hpe gara hku hkan sa mai ai lam hpe chye na hkra, nang hpe karum ya na re. Dai laika buk hpe nang hkaja ngut sai nga yang, na a makam masham hpe ngang kang shangun ai kaga laili laika ni naw hkaja mai ai. (Kolose 1:22, 23) Anhte hkaja ai lam ni hpe myit sumru ra nna, dai hpe hkan sa lu na matu, Yehowa hpang karum hpyi u.

⁹ Anhte hkaja nna myit sumru ai shaloi, anhte a bandung gaw Yehowa a ga madat mayu nna shi hpe myit pyaw hkra galaw na matu sha rai ra ai. (Shakawn 40:8; 119:97) Wenyi lam rawt jat ai hpe, pat shingdang shangun ai lam yawng hpe mung nyet kau ra ai.​—⁠Titu 2:11-13.

10. Wenyi lam hta grau nna rawt jat wa na matu ramma ni hpa galaw ra ai kun?

¹⁰ Nang gaw ramma langai rai yang, wenyi bandung nga ai kun? Behtela hta magam gun  nga ai hpunau langai gaw, ninghtawn zuphpawng ni hta hkalup hkam la na ramma ni hpe, shanhte a wenyi bandung ni hte seng nna san yu ai. Htawm hpang hta Yehowa hpe gara hku magam gun mayu ai lam atsawm myit nga ai ni law law hpe shi mu ai. Nkau mi gaw, Yehowa hpe aten hpring magam gun na matu (sh) hkaw tsun masha grau ra ai shara de htawt na matu lajang da ma ai. Raitim, nkau mi gaw, shi a ga san hte seng nna gara hku htai na hpe n chye ma ai. Dai hpe yu yang, shanhte hta wenyi bandung n nga ra ai ngu nna shanhte sawn la ai majaw kun? Nang gaw ramma langai rai yang, na hkum nang ndai hku san yu u: ‘Nye kanu kawa ni sa shangun ai majaw sha, zuphpawng ni hte hkaw tsun magam sa ai kun? Shing nrai, Karai Kasang hte ngai hku hkau lam nga ai kun?’ Anhte gaw asak kaji ai raitim, kaba ai raitim, anhte yawng hta wenyi bandung ni nga ra ai. Dai bandung ni gaw, wenyi lam rawt jat wa hkra anhte hpe karum ya lu ai.​—⁠Hpaji 12:1, 13.

11. (a) Wenyi myit rawng wa na matu anhte hpa galaw ra ai kun? (b) Gara Chyum Laika kasi ningli hpe anhte hkan sa ra ai kun?

¹¹ Anhte rawt jat na matu ra nga ai lam hpe mu yang, galai shai ra ai lam ni hpe kalang ta galai shai ra ai. Anhte asak hkrung na (sh) si na lam gaw dai hta madung nga ai majaw, grai ahkyak ai. (Roma 8:6-8) Yehowa gaw, ya aten hta anhte hpe hkum tsup ai masha byin na matu n myit mada ai. Anhte hpe karum na matu chyoi pra ai wenyi jaw da ai. Raitim, anhte nan mung grai shakut ra ai. Uphkang Hpung hta magam gun wa ai hpunau John Barr gaw, Luka 13:24 hpe lakap nna ndai hku tsun wa ai: “Wenyi lam hta rawt jat wa na matu n shakut ai majaw, masha law law hkrat  sum nga ai.” Lamu kasa hte kamu hkat wa ai Yaku hte anhte bung ra ai. Yaku gaw shaman chyeju n lu dingsa asum n jaw wa ai. (Ningpawt 32:27-29) Chyum Laika hkaja ai gaw pyaw hpa lam byin ging ai raitim, Chyum Laika hpe sumroi laika zawn shangwi shapyaw lam jaw ai laika buk hku nna gaw n mai sawn la ai. Anhte gaw manu dan ai teng man lam ni hpe tam ra ai. Dai gaw anhte hpe karum ya na re.

12, 13. (a) Hpilipi 2:5 hpe hkan sa lu na matu hpa gaw anhte hpe karum ya na kun? (b) Petru a kasi ningli hte hpaji jaw ga gaw anhte hpe gara hku karum ya lu ai kun? (c) Wenyi lam grau nna rawt jat wa na matu nang hpa galaw mai ai kun? (“ Wenyi Lam Rawt Jat Hkra Galaw Lu Ai Lam” ngu ai lawk hpe yu u.)

¹² Anhte gaw wenyi lam rawt jat na matu shakut yang, chyoi pra ai wenyi gaw, anhte myit ai lam hpe galai shai na matu anhte hpe karum ya na re. Angwi ngwi hte, Hkristu myit ai zawn myit chye na matu sharin la lu na re. (Hpilipi 2:5) Chyoi pra ai wenyi gaw, shut shai ai ra marin lam ni hpe nyet kau na matu hte, Karai Kasang ra sharawng ai atsam ningja ni grau nga wa na matu, anhte hpe karum ya lu ai. (Galati 5:16, 22, 23) Lama na, anhte gaw arung arai ni (sh) pyaw hpa lam ni hpe myit maju jung nga ai ngu sadi hkrup yang, asum hkum jaw u. Teng man ai lam ni hta myit maju jung lu na matu, Yehowa a chyoi pra ai wenyi hpe anhte matut hpyi shawn ra ai. (Luka 11:13) Kasa Petru hpe myit dum u. Shi gaw Hkristu myit ai zawn, ayan myit wa ai gaw n re. (Mahte 16:22, 23; Luka 22:34, 54-62; Galati 2:11-14) Raitim, shi asum n jaw wa ai. Yehowa shi hpe karum ya wa ai. Angwi ngwi hte Petru gaw, Hkristu zawn myit na matu sharin la wa ai. Anhte mung dai zawn galaw lu ai.

¹³ Anhte hpe karum ya lu ai atsam ningja ni hpe Petru tsun dan wa ai. (2 Petru 1:5-8 hpe hti u.) Anhte gaw, tinang hkum tinang hkang lu ai lam, hkam sharang ai lam, hpunau nauna shada tsawra myit hte kaga kaja ai atsam ningja ni hta rawt jat na matu shakut ra ai. Shani shagu anhte hkum anhte ndai hku san mai ai: ‘Wenyi lam hta grau nna rawt jat wa shangun ai gara atsam ningja hpe dai ni ngai madun na kun?’

14. Wenyi myit rawng ai nga yang, anhte a prat hpe gara hku karum ya lu ai kun?

¹⁴ Hkristu zawn anhte myit na nga yang, dai hpe bungli (sh) jawng hta anhte tsun ai, galaw ai, dawdan ai lam ni hta shani shagu mu lu na re. Anhte a dawdan lam ni gaw, Hkristu hpe kasi la na matu shakut nga ai hpe madun na re. Anhte gaw wenyi myit rawng ai ni re ai majaw, Yehowa hte hku hkau lam hten za shangun ai lam ni hpe galaw mayu na n re. Shut ai lam lama ma galaw na matu anhte gunglau hkrum ai shaloi, anhte hta nga ai wenyi myit gaw gunglau ai lam hpe ning hkap ya na re. Anhte garai n dawdan shi yang, chyahkring mi myit yu nna tinang hkum tinang ndai hku san u: ‘Gara Chyum Laika tara ni gaw ngai hpe karum ya lu ai kun? Ndai zawn masa hta Hkristu rai yang gara hku galaw na kun? Gara lam gaw Yehowa hpe myit shapyaw ya lu ai kun?’ Dai zawn anhte ayan myit ra ai. Dai majaw, byin chye ai masa nkau mi hpe anhte hkaja yu ga. Lam langai hpra a matu, Chyum Laika tara hpe yu na nga yang, dai gaw hpaji rawng ai dawdan lam jahkrat na matu anhte hpe karum ya na re.

15, 16. (a) Ningrum ningtau lata ai hta (b) manang lata ai hta Hkristu zawn myit ai gaw hpaji rawng ai hku dawdan lu na matu nang hpe gara hku karum ya lu ai kun?

¹⁵ Ningrum ningtau lata ai lam. Chyum Laika npawt tara hpe 2 Korinhtu 6:14, 15 (Hti u) hta mu lu ai. Wenyi myit rawng ai wa gaw, wenyi myit n rawng ai wa galaw ai zawn hkan galaw na n re. Ningrum ningtau lata ai shaloi, ndai npawt tara gaw, nang hpe gara hku karum ya lu ai kun?

¹⁶ Manang lata ai lam. Chyum Laika npawt tara hpe 1 Korinhtu 15:33 (Hti u) hta mu lu ai. Wenyi myit rawng ai wa gaw, shi a makam  masham hpe gawng kya shangun ai ni hte kanawn na n re. Ndai npawt tara hpe masa amyu myu hta, gara hku hkan sa mai ai lam myit yu u. Ga shadawn, internet lang ai hte seng nna dawdan lam jahkrat ai shaloi, ndai npawt tara gaw nang hpe gara hku karum ya lu ai kun? Online hta masha tsasam ni hte game ginsup ai hte seng nna dawdan ai shaloi, ndai npawt tara gaw nang hpe gara hku karum ya lu ai kun?

17-19. Wenyi myit rawng ai wa byin ai gaw (a) akyu n nga ai lam ni hpe koi lu na matu (b) kaja ai bandung ni nga na matu (c) myit n hkrum ai lam ni hpe hparan na matu, nang hpe gara hku karum ya ai kun?

¹⁷ Anhte a wenyi lam hpe hten za shangun ai lam ni. Ahkyak ai sadi jaw lam langai hpe Hebre 6:1, 2 (Hti u) hta mu lu ai. Anhte koi ra ai “si ging ai magam bungli” gaw hpa rai a ta? Dai ni gaw manu n dan ai lam ni rai nna, wenyi lam rawt jat na matu n karum ya lu ai. Ndai si ging ai magam bungli hte seng nna sadi jaw ga gaw, ndai zawn ga san ni a mahtai lu na matu nang hpe karum ya lu ai: ‘Ndai lam gaw akyu jaw ai kun? (sh) akyu n jaw ai kun? Ndai hpaga lam hta ngai shang lawm ging ai kun? Mungkan a masa ni galai shai na matu shakut ai hpung hta ngai hpa majaw n lawm ging ai kun?’

¹⁸ Wenyi bandung ni. Bum Ntsa Na Mungga hta, Yesu gaw anhte hpe bandung ni hte seng nna kaja ai hpaji jaw ga ni tsun wa ai. (Mahte 6:33) Wenyi myit rawng ai wa gaw, shi a prat hta Mungdan lam hpe shawng tawn ai. Ndai npawt tara gaw ndai zawn ga san ni a mahtai lu na matu nang hpe karum ya lu ai: ‘Lahta tsang hpaji sharin la ngut ai hpang ngai dakkasu lung ging ai kun? Ndai bungli hpe ngai hkap la ging ai kun?’

¹⁹ Myit n hkrum ai lam ni. Roma hta nga ai Hkristan ni hpe tsun wa ai Pawlu a hpaji jaw ga gaw, kaga masha ni hte myit n hkrum ai lam ni nga wa ai shaloi, anhte hpe karum ya lu ai. (Roma 12:18) Hkristu hpe anhte kasi la ai majaw, “masha nlang hte hte myit hkrum” na matu shakut ai. Kaga ni hte myit n hkrum ai lam ni nga ai shaloi anhte gara hku bai htang ai kun? Marai langai ngai a ningmu hpe hkap la na matu yak taw ai kun? Shing nrai, simsa lam nga hkra shakut ai masha ngu nna anhte hpe chye ai kun?​—⁠Yaku 3:18.

20. Wenyi lam hta rawt jat na matu nang hpa majaw shakut mayu ai kun?

²⁰ Chyum Laika npawt tara ni gaw dawdan lam jahkrat ai hta, anhte hpe kade daram karum ya lu ai lam dai ga shadawn ni gaw madun nga ai. Chyoi pra ai wenyi hku nna anhte lam matsun hkrum nga ai hpe mung sakse madun nga ai. Anhte gaw wenyi myit rawng ai ni rai yang, anhte a aprat gaw ngwi pyaw nna myit dik lam lu la na re. Robat ndai hku tsun wa ai: “Yehowa hte hku hkau lam ngang kang wa ai hpang, ngai gaw kaja ai dinghku la hte kaja ai kawa langai byin wa ai. Ngwi pyaw nna myit dik lam mung lu wa ai.” Anhte gaw wenyi myit rawng ai wa byin na matu shakut ai nga yang, kaja ai akyu law law hkam la lu na re. Ya mung grau ngwi pyaw ai asak aprat lu la nna, htawm hpang hta mung “asak majing” lu la na re.​—⁠1 Timohti 6:19.