1. Ga shadawn hparadisu ngu ai gaw hpa rai kun? Anhte hpa dawdan da ging ai kun?

 DAI ni aten na hparadisu hta bungli grai law ai. Dai kaw nga ai wan hku law ai masha ni gaw, jet ai ngwi pyaw simsa lam lu nga ai. Shanhte gaw, galoi n pru mat na matu dawdan da ai. Masha law law hpe mung du wa shangun mayu ai. Dai gaw ga shadawn hparadisu re. a

2. Ga shadawn hparadisu gaw hpa majaw laklai ai kun?

² Nju ndawng ai lam ni, shoihpa ni hpring nga hkra Satan galaw da ai mungkan hta, ga shadawn hparadisu hpe Yehowa hpan da ya ai gaw, grai laklai ai. (1 Yh 5:19; Shr 12:12) Ndai nhkru ai mungkan kade daram hkra machyi shangun ai hpe Yehowa chye ai. Raitim, shi a masha ni hpe kabu gara let magam gun shangun mayu ai majaw, ngwi pyaw simsa ai shara jaw da ai. Simsa ai “shingbyi” shara, “hka rawng ai sun” ni hte Chyum Laika hta shingdaw da ai. (Esa 4:6; 58:11) Yakhkak ai jahtum nhtoi hta asak hkrung ra tim, ga shadawn hparadisu kaw nga ai ni gaw ngwi pyaw simsa ai.—Esa 54:14; 2 Tm 3:1.

3. Esaia 65 gaw moi na Israela aten hta gara hku hpring tsup wa ai kun?

³ Ga shadawn hparadisu a lam, myihtoi Esaia hku nna Esaia daw kaba 65 hta Yehowa tsun dan ai. Myit malai lu ai Yuda ni gaw, Babelon bawng dung ai prat kaw na lawt nna, tinang a buga de bai wa ai B.C. 537 hta myihtoi ga shawng nnan hpring tsup ai. Yerusalem mare jahten bai tsawm wa hkra, nawku htingnu hpe chyoi pra ai nawku dawjau lam a  madung shara bai byin hkra galaw na matu, Yehowa karum ya ai, shaman chyeju jaw ai.—Esa 51:11; Zeh 8:3.

4. Dai ni aten hta Esaia 65 gara hku hpring tsup nga ai kun?

⁴ Galu Kaba Ai Babelon hta bawng dung ai prat kaw nna Karai a masha ni lawt wa ai 1919 hta, Esaia a myihtoi ga lahkawng lang hku nna hpring tsup wa ai. Dai aten kaw nna, ga shadawn hparadisu gaw mungkan ting chyam bra wa ai. Ga shadawn hparadisu kaw nga ai ni gaw kabu gara shiga hpe myit rawt let hkaw tsun ai, nawku hpung nnan ni hpawng de ai, Hkristan atsam ningja ni madun ai. Akyang hten ai, nhkru ai prat hkrun lam nga ai ni gaw, “Karai Kasang hpan tawn da ai gawng shingyan ningnan hpe dagraw” wa ma ai. (Ehp 4:24) Mungkan nnan hta Esaia a myihtoi ga naw hpring tsup wa na re. Raitim, ga shadawn hparadisu kaw nga ai majaw, ya kaw nna akyu law law lu nga ai. Hpa akyu ni kun? Dai kaw na hpa majaw n pru mat ging ai kun?

GA SHADAWN HPARADISU KAW NGA AI NI AKYU LU

5. Esaia 65:13 kaw ga sadi jaw da ai hte maren, ga shadawn hparadisu kaw hpa ni hkamsha lu na kun?

⁵ Hkam kaja nna shalan shabran lam lu. Ga shadawn hparadisu hta nga ai wa hte n nga ai wa a shai ai lam hpe Esaia myihtoi ga hta tsun da ai. (Esaia 65:13 hpe hti u.) Yehowa gaw, ga shadawn hparadisu hta nga ai ni hpe shi hte hku hkau na matu, ra ai lam yawng jaw da ai. Chyoi pra ai wenyi, Chyum Laika, wenyi malu masha ni jaw da ai. Dai re ai majaw anhte “sha lu . . . lu lu . . . kabu gara” lu ai. (Shingran 22:17 hte shingdaw u.) Ga shadawn hparadisu shinggan kaw nga ai ni gaw, Karai hte hku hkau lam n nga ai. Dai re ai majaw, “kawsi hkrum” ai, “hpang kara” hkrum ai, “kaya kahpa hkrum” nga ai.—Amo 8:11.

6. Yehowa hkyen lajang ya ai lam ni hpe Yoela 2:21- 24 hta gara hku tsun da ai kun? Dai lam ni kaw nna gara hku akyu lu mai ai kun?

⁶ Hkaulan mam, tsabyi jahku, tsanlun sau zawn re ai madung malu masha ni hpe Yehowa nhpaw n ya jaw ai ngu, Yoela myihtoi ga hta tsun ai. (Yoe 2:21-24) Chyum Laika, Chyum Laika hpe npawt tawn ai laili laika ni, website hta n-ga, zuphpawng ni, zuphpawng kaba ni hku nna hkyen lajang ya ai. Dai lam ni kaw na shani shagu akyu lu nga ai majaw, anhte hkam kaja nna shalan shabran lam lu nga ai.

7. Hpa lam ni gaw anhte hpe “kabu gara ai myit” byin shangun ai kun? (Esaia 65:14)

⁷ Ngwi pyaw myit dik ai lam. Yehowa hpe grai chyeju dum ai majaw, Karai a masha ni gaw “kabu gara ai myit hte mahkawn mangoi” ma ai. (Esaia 65:14 hpe hti u.) N-gun lu shangun ai Chyum Laika tengman lam ni, Chyum ga sadi ni, gawng malai jahpu a majaw lu wa ai myit mada lam ni gaw, “kabu gara ai myit” byin shangun ai. Hpunau nauna ni hte dai lam ni tsun jahta ai gaw grai pyaw shangun ai.—Shk 34:8; 133:1-3.

8. Ga shadawn hparadisu a laklai ai lam lahkawng gaw hpa rai kun?

⁸ Ga shadawn hparadisu a laklai ai lam lahkawng gaw, tsawra myit hte kahkyin gumdin lam re. “Hkum tsup re ai makyit sumri” gaw mungkan nnan prat hkrun lam hpe shingran mu shangun ai. Mungkan nnan hta grau kahkyin gumdin nna tsawra myit grau law nga na re. (Kol 3:14) Yehowa Sakse ni hte shawng nnan hkrum ai aten a lam nauna langai ndai hku tsun dan ai: “Nye nta  hta gara hku pyaw mai ai hpe pyi ngai n chye wa ai. Tatut madun ai tsawra myit hpe shawng nnan mu lu ai gaw, Yehowa Sakse ni a kaang hta re.” Jet ai ngwi pyaw myit dik lam lu mayu ai ni yawng, ga shadawn hparadisu kaw nga ging ai. Mungkan gaw tinang hpe gara hku mi shadu tim, Karai Kasang hte hpunau nauna ni a man hta Yehowa Sakse ni mying kaja lu da ai.—Esa 65:15.

9. Yawn hpa lam ni hte seng nna Esaia 65:16, 17 hta hpa ga sadi jaw da ai kun?

⁹ Nga manu ai hte simsa ai lam. Ga shadawn hparadisu shinggan kaw nga ai ni gaw, “myit yawn ai hte jahtau hkrap nna, myit htum ai hte sharung shayawt na” re ngu Esaia 65:14 hta tsun da ai. Karai a amyu masha ni mung myit yawn hpa lam ni hkrum chye ai. Hkrum mung hkrum nga ai. Raitim, dai ni angwi ngwi “malap kau ai hte, [Karai Kasang] dai hpe n mu” mat na re. (Esaia 65:16, 17 hpe hti u.) Mayak manghkang ni hpe Yehowa jahtum kau ya sana re. Myit hta pru wa sana n re.

10. Karai a uhpung hta nga lu ai gaw shaman chyeju re ai ngu hpa majaw hkamsha ai kun? (Sumla hpe mung yu u.)

¹⁰ Ya aten hta pyi Hkristan zuphpawng ni lung ai shaloi anhte nga manu ai hte simsa lam hkamsha lu ai. Pu ba ai lam ni hkoi mat ai. Tsawra ai, kabu gara ai, ngwi pyaw ai, matsan dum ai, myit nem ai zawn re ai chyoi pra ai wenyi atsam ningja ni hpe madun ai shaloi, hpunau nauna ni nga manu ai hte simsa lam hkamsha ai. (Gal 5:22, 23) Karai a uhpung hta nga lu ai gaw, shaman chyeju re. Ga shadawn hparadisu hta matut nga yang, “sumsing lamu ningnan, ginding aga ningnan” hte seng ai Karai a ga sadi hpring tsup wa ai hpe mu lu na re.

11. Esaia 65:18, 19 hku nga yang, Yehowa hpan da ai ga shadawn hparadisu hta nga ai majaw gara hku hkamsha ging ai kun?

¹¹ Arawng la chyeju dum ai lam. Ga shadawn hparadisu kaw nga ai majaw, “kabu gara sharawng awng” lu ai lam ni hpe, Esaia matut tsun da ai. Ga shadawn hparadisu a sun madu gaw Yehowa re. (Esaia 65:18, 19 hpe hti u.) Karai Kasang a lam tengman ai hku n sharin ya ai uhpung ni kaw na masha ni pru wa na matu, ga shadawn hparadisu de shang wa na matu, anhte hpe Yehowa akyu jashawn nga ai. Ga shadawn hparadisu hta shaman chyeju ni hkamsha lu ai majaw, anhte arawng la chyeju dum ai. Dai shaman chyeju ni a  lam, kaga ni hpe bai tsun dan mayu ai.—Yer 31:12.

12. Esaia 65:20-24 hta lawm ai myit mada lam a majaw nang gara hku hkamsha ai kun?

¹² Mungkan nnan myit mada lam a majaw mung, anhte grai “kabu gara sharawng awng” ai. Mungkan nnan asak aprat gara hku rai nga na kun, ngu ai hpe shingran yu u. “Dai hta ma chyangai e si na n rai, asak n dik ai dingla mung nga na n rai,” “tinang galaw ai nta hta shanu nga nna, tinang hkai ai tsabyi sun na asi, sha na.” “Be be kaman sha amu galaw na n rai.” Hpa majaw nga yang, “Yehowa kaw na shaman lu la ai” majaw re. Shimlum nna ngwi pyaw ai prat lu na, karum hpyi na matu “garai n shaga yang” anhte ra kadawn ai lam ni hpe Yehowa chye nga na re. “Hkrung mahkrung ni hpe kaja ai hte shakat da na re.”—Esa 65:20-24; Shk 145:16.

13. Esaia 65:15 hku nga yang, Yehowa hpe nawku na matu gara galai shai lam ni galaw wa ai kun?

¹³ Simsa nna shimlum ai lam. Dusat akyang nga ai ni gaw, chyoi pra ai wenyi karum shingtau ya ai majaw, kaba ai galai shai lam ni galaw lu wa ai. (Esaia 65:25 hpe hti u.) N kaja ai akyang ni hpe raw kau lu wa ai. (Rom 12:2; Ehp 4:22-24) N hkum tsup nga dingsa shut ai lam ni hpe naw galaw hkrup na re. Raitim, shi hpang de lau la da ai “masha yawng hpe” tsawra myit, kahkyin gumdin ai “makyit sumri” hte Yehowa gyit da ai majaw, simsa nna shimlum nga ai re. (Tit 2:13) Grai mauhpa re. Chyahtum chyalai n-gun rawng ai Karai Kasang sha ndai zawn galaw lu ai re.

14. Esaia 65:25 gaw hpunau langai hta gara hku hpring tsup wa ai kun?

¹⁴ Masha ni gaw gaja wa akyang lailen galai shai lu ai kun? Ramma langai a mahkrum madup hpe myit yu u. Shi gaw aten tup masha hpe htawng mayu, gasat mayu ai. Akyang hten nna nhkru ai, mawdaw lagu ai, nta ni seng ni hkan shang lagu ai, kaga mara kaba ni hpe tawt lai ai. Asak 20 ning sha raitim, htawng gaw shi nta zawn rai nga sai. Raitim, tengman lam chye ngut ai hpang zuphpawng ni lung hpang ai. Ga shadawn hparadisu gaw ngai nga ra na shara re ngu hkamsha wa ai. Dai majaw hkalup hkam ai. Tinang hta Esaia 65:25 hpring tsup wa ai lam chyahkring hkring myit yu ai. Hkanghkyi zawn nhkru ai masha kaw na, sagu zawn sumnung ai wa byin wa ai.

15. Ga shadawn hparadisu de kaga ni hpe hpa majaw du wa shangun mayu ai kun? Gara hku karum ya mai ai kun?

¹⁵ Esaia 65:13 hpe “dai re ai majaw Madu Yehowa gaw” ngu nna hpang da ai. “Yehowa tsun ai” ngu nna daw kaji 25 hta hpungdim dat da ai. Yehowa tsun ai hte maren gaja wa byin nga sai. (Esa 55:10, 11) Ga shadawn hparadisu nga taw sai. Ga shadawn hparadisu kaw kahkyin gumdin ai mungkan grup nta masha ni hku nna Karai a masha ni nga nga ai. Nhkru ai mungkan a ka-ang hta asak hkrung nga ai raitim, simsa nna shimlum nga ai. (Shk 72:7) Dai majaw, kaga ni hpe mung ga shadawn hparadisu de du wa shangun mayu ai. Sape shatai ai bungli hku nna du wa na matu karum ya mai ai.—Mat 28:19, 20.

GA SHADAWN HPARADISU DE KAGA NI HPE GARA HKU LAU LA NA?

16. Ga shadawn hparadisu de masha ni gara hku lau la hkrum ai kun?

¹⁶ Ga shadawn hparadisu hpe kaga masha ni myit lawm wa na matu anhte yawng hta lit nga ai. Lit kang ka na matu Yehowa hpe kasi la ra na re. Ga shadawn hparadisu de  masha ni hpe, Yehowa atik anang n shaga la ai. Sumnung ai hku “lau la” ai. (Yhn 6:44; Yer 31:3) Karai a tsawra myit, sharawng awng hpa atsam ningja ni hpe chye wa ai shaloi, myit ding man ai ni myit lawm wa ai. Karai Kasang hte hku hkau mayu wa ai. Anhte mung kaga ni hpe kaja ai atsam ningja ni, kaja ai arawn alai ni hku nna gara hku lau la mai ai kun?

17. Ga shadawn hparadisu de kaga ni myit lawm wa hkra gara hku galaw mai ai kun?

¹⁷ Anhte shada da tawra myit, matsan dum myit hte kanawn mazum ai shaloi, kaga masha ni ga shadawn hparadisu hpe myit lawm wa ai. “Gaja wa Karai Kasang gaw nanhte hte rau a nga nga ai” ngu moi na Korinhtu nawku hpung hta zuphpawng sa lung ai masha nnan ni sawn la ai. Anhte a zuphpawng sa lung ai masha nnan ni hpe mung, dai zawn sawn la shangun mayu ai. (1 Ko 14:24, 25; Zeh 8:23) Dai zawn sawn la shangun mayu yang, Chyum Laika hpaji jaw ai hte maren “shada da ngwi pyaw” nga ra ai.—1 Ht 5:13.

18. Ga shadawn hparadisu de gara hku lau la lu ai kun?

¹⁸ Hpunau nauna ni hpe Yehowa mu ai zawn mu u. Shanhte a kaja ai lam ni hpe sha yu u. Kade n na yang mat mat sana gawngkya lam ni hpe hkum yu. N htuk hkat ai lam ni nga yang tsawra myit madun u. “Shada da mai kaja ai, matsan dum ai myit madun hkat nna, . . . shada da a mara raw dat kau” u. (Ehp 4:32) Dai zawn kanawn mazum hkrum mayu ai wa rai yang, ga shadawn hparadisu de shang wa na re. b

 GA SHADAWN HPARADISU HTA NGA U

19. (a) Ga shadawn hparadisu de bai wa ai hpang nkau hpa tsun ai kun? “ Pru Mat Tim Bai Nhtang Wa” lawk hpe mung yu u. (b) Hpa dawdan da ging ai kun? (Sumla hpe mung yu u.)

¹⁹ Ga shadawn hparadisu grau tsawm wa sai. Nga ai masha ni grau law wa sai. Ga shadawn hparadisu galaw da ya ai majaw Yehowa hpe galoi mung chyeju dum nga na re. Shalan shabran lam, myit dik lam, simsa lam, shimlum lam hkamsha mayu ai ni yawng, ga shadawn hparadisu de shang wa ging ai. Galoi n pru mat ging ai. Pru mat hkra Satan shakut nga ai majaw sadi u. (1 Pe 5:8; Shr 12:9) Satan hpe ahkang hkum jaw. Tsawm htap ai, chyoi pra ai, simsa ai ga shadawn hparadisu hpe shakut nna makawp maga mat ga.