1. Kabu gara shiga hkaw tsun ai hte seng nna nkau gara hku hkamsha ai kun? (Sumla hpe mung yu u.)

 HPUNAU nauna law malawng gaw, kabu gara shiga hkaw tsun ai hta grai pyaw ai. Nkau gaw nau n pyaw ai. Kaya chye ai, hkrit chye ai majaw rai na re. Tsasam ni a nta de n kam sa ai majaw rai na re. Nju ndawng hkrum na, tinang a majaw kaga ni myit shanut mat na tsang ai majaw rai na re. Sumsing Kawa hpe tsawra yang, Kawa a lam masha ni hpe chye shangun mayu yang, kabu gara shiga hkaw tsun ra na hpe chye tim yak nga chye ai. Yak ai raitim, hkaw tsun na matu grai ahkyak ai hpe chye ai majaw hkaw tsun ai. Yehowa grai ra sharawng na re.

2. Hkaw tsun bungli hta n pyaw yang hpa majaw myit n daw ging ai kun?

² Nang mung dai lam ni a majaw, hkaw tsun bungli kaw pyaw na matu yak nga ai kun? Rai yang myit hkum daw. Kaya ai, hkrit ai ngu ai gaw, shagrit shanem ai, myit maju jung n hkrum mayu ai, ndang kalang n kam galaw ai wa re ai majaw rai na re. Kadai mung nju ndawng n hkrum mayu ai. Grau nna gaw, kaga ni a akyu hpe gun hpai nga ai ni re ai majaw re. Nang dai zawn hkamsha ai hpe sumsing Kawa atsawm chye ai. Karum ya mayu ai. (Esa 41:13) Mayak mahkak ni tawt lai lu na matu, hkaw tsun bungli hta pyaw na matu, lam matsun 5 hpe ndai sumhpa hta hkaja na re.

 KARAI A MUNGGA KAW NA N-GUN LA U

3. Hkaw tsun gwi hkra myihtoi Yeremia hpe hpa gaw karum ya ai kun?

³ Moi na sadi dung ai mayam ni yakhkak ai lit lu ai aten hta, Karai Kasang kaw nna lu la ai shiga a majaw n-gun lu mat ai. Myihtoi Yeremia a lam bawngban yu ga. Hkaw tsun na matu lit lu ai shaloi n gwi wa ai. Madu Yehowa e, “ngai ga n chye tsun nngai: ma naw rai nga nngai” ngu shi tsun ai. (Yer 1:6) Hkaw tsun gwi na matu hpa gaw karum ya ai kun? Karai a mungga re. “Shi a mungga . . . nye a myit masin hta wan zawn hkru nna, nye a nrut nra ni hta grung nga ai majaw, nye a myit grai gadau gadap nna n sharang lu nngai” ngu tsun ai. (Yer 20:8, 9) Hkaw tsun lawk n kaja tim, Karai Kasang hkaw tsun shangun ai shiga a majaw n-gun lu mat ai.

4. Chyum Laika hti ai shaloi, myit sawn sumru ai shaloi hpa byin wa na kun? (Kolose 1:9, 10)

⁴ Hkristan ni mung, Chyum Laika hta lawm ai Karai Kasang kaw na shiga a majaw n-gun lu la ai. Karai a myit ra ai lam hpe tup hkrak tengman ai hku chye chyang ai gaw, Yehowa hte “gingdan let hkawm nga” na matu, “tsawm pra ai lam shagu hte kaja ai bungli shagu” hpe galaw na matu, Kolose nawku hpung de ka ai laika hta kasa Pawlu tsun da ai. (Kolose 1:9, 10 hpe hti u.) Kaja ai bungli hta, kabu gara shiga hkaw tsun ai lam lawm ai. Chyum Laika hti na, myit sawn sumru na nga yang, Yehowa hpe grau kam wa na. Kabu gara shiga hkaw tsun na matu, grai ahkyak ai hpe grau chye na wa na.

5. Chyum Laika hti ai, hkaja ai kaw nna akyu hpring tup lu na matu hpa galaw mai ai kun?

⁵ Karai a Mungga kaw na akyu hpring tup lu mayu yang, Chyum Laika hti ai, hkaja ai, myit sawn sumru ai shaloi hkum tin. Aten la u. N chye na ai chyum daw ni nga yang hkum shalai kau. Yehowa Sakse Ni A Matu Hkaja Lam Matsun hpe akyu jashawn nna kahtap hkaja u. Aten la nna hkaja ai shaloi, Chyum Laika tsun ai lam teng ai hpe kam wa na. (1 Ht 5:21) Dai hku kam wa yang hkaw tsun ai lam hta grau pyaw wa na re.

 HKAW TSUN BUNGLI A MATU ATSAWM HKYEN LAJANG U

6. Hkaw tsun bungli a matu hpa majaw atsawm hkyen lajang ging ai kun?

⁶ Atsawm hkyen lajang da yang, myit atsang sha hte hkaw tsun lu na re. Hkaw tsun na matu sape ni hpe n shangun shi yang, Yesu hkyen lajang ya ai. (Luk 10:1-11) Yesu sharin ya ai hte maren sape ni tatut galaw ai majaw, kaja ai akyu ni lu wa nna grai kabu wa ai.—Luk 10:17.

7. Hkaw tsun bungli a matu gara hku hkyen lajang mai ai kun? (Sumla hpe mung yu u.)

⁷ Hkaw tsun bungli a matu gara hku hkyen lajang mai ai kun? Tinang a ga hte htap htuk ai hku gara hku tsun na kun? Nta madu gara hku bai htang na kun? Gara hku bai tsun ra na hpe tau hkrau myit da u. Myit atsang sha hte tsun u. Mani dan u. Hku hku hkau hkau tsun u.

8. Hkristan ni gaw ga di bu hte gara hku bung ai kun?

⁸ “Ndai sut gan gaw, ga di bu hta sha anhte rawng da gaw ai” ngu Kasa Pawlu tsun ai. (2 Ko 4:7) Sut gan ngu ai gaw hpa rai kun? Asak hkye bungli re ai Mungdan kabu gara shiga hkaw tsun ai lam re. (2 Ko 4:1) Ga di bu ngu ai gaw hpa rai kun? Kabu gara shiga hkaw tsun ai Karai a mayam ni re. Pawlu a aten hta malu masha, tsabyi jahku, gumhpraw ni zawn manu dan ai rai ni hpe ga di bu ni hta bang nna htaw sa ma ai. Anhte mung, manu dan ai kabu gara shiga hpe htaw sa ai. Karai jaw ai lit re ai majaw, kang ka hkra galaw lu na matu Karai Kasang karum ya na re.

NDEN MARAI A MATU AKYU HPYI U

9. Hkrit ai myit hpe gara hku shamat lu ai kun? (Sumla hpe mung yu u.)

⁹ Kalang lang, anhte masha hpe hkrit chye ai. Hkrit ai myit hpe gara hku shamat na? N hkaw tsun na matu aming jahkrat hkrum ai shaloi, kasa ni hpa galaw wa ai kun? Hkrit nna n hkaw tsun ai sha n nga ai. “Mungga hpe nden ja ai myit hte tsun dan nga lu hkra, karum ya mi law” ngu akyu hpyi ai. Yehowa kalang ta htai ya ai. (Kas 4:18, 29, 30) Anhte mung hkrit ai myit nga wa yang, Yehowa kaw akyu  hpyi ging ai. Masha ni hpe grau tsawra chye wa hkra karum hpyi ging ai.

10. Shi a lam sakse hkam lu na matu Yehowa gara hku karum ya ai kun? (Esaia 43:10-12)

¹⁰ Shi a sakse hku nna anhte hpe Yehowa aya tang da ai. Nden marai nga hkra karum ya na ngu ga sadi jaw ai. (Esaia 43:10-12 hpe hti u.) Lam mali hku nna karum ya ai. Langai, Yesu hpe anhte hte rau nga shangun ai. (Mat 28:18-20) Lahkawng, karum ya na matu lamu kasa ni hpe lit jaw da ai. (Shr 14:6) Masum, Chyum Laika lam ni bai matsing hkra karum ya lu ai chyoi pra ai wenyi jaw da ai. (Yhn 14:25, 26) Mali, hpunau nauna ni hpe shingdep shingtau hku nna jaw da ai. Yehowa hte hpunau nauna ni a karum shingtau a majaw, nden marai hte hkaw tsun lu ai.

RA ANG AI HKU GALAI SHAI U, KAJA AI NINGMU NGA U

11. Masha law law hte hkrum lu na matu hpa galaw lu ai kun? (Sumla hpe mung yu u.)

¹¹ Nta ni hkan masha nau n mu ai majaw myit daw ai kun? ‘Nta madu ni ya gara kaw du nga ai kun?’ ngu myit yu u. (Kas 16:13) ‘Bungli kaw kun? Shinggan sa ai kun?’ Lam ntsa sakse hkam yang masha grau mu na kun? Hpunau Jawshawa ndai hku tsun ai: “Gat mari ai shara, nampan sun ni zawn masha law ai shara ni hkan hkaw tsun na matu, ahkaw ahkang lu chye ai.” Shana maga hte Laban shani ka-ang ni zawn aten ni hta galai shai hkaw tsun ai majaw, Jawshawa hte madu jan Prijit gaw nta madu law law hte hkrum lu wa ai.—Ehp 5:15, 16.

12. Masha ni myit lawm ai, kamsham hkap la ai lam ni hpe gara hku chye lu ai kun?

¹² Tinang hkaw tsun ai hpe masha ni myit n lawm yang, shanhte hpa hpe myit lawm na kun? Hpa hpe kamsham hkap la da ai kun? Garan laika hta lawm ai ga san ni hpe akyu jashawn nna, Jawshawa hte Prijit ga shaga yu ai. Ga shadawn, Chyum Laika Hpe Nang Gara Hku Mu Mada Ai Rai? garan laika hpe akyu jashawn nna ndai hku san ai: “Nkau gaw Karai jaw ai Chyum Laika re ngu tsun ai. Nkau gaw dai hku n  tsun ai. Nang gaw gara hku kun?” Dai hku san ai majaw matut ga shaga lu ai.

13. Masha ni n madat yang pyi hkaw tsun bungli hpa majaw awng dang ai kun? (Ga Shagawp 27:11)

¹³ Anhte hkaw tsun ai hpe masha ni n madat tim pyi, hkaw tsun bungli awng dang nga ai. Hkaw tsun nga ai nan gaw, Yehowa hte Yesu jaw ai lit hpe gun hpai nga ai re. (Kas 10:42) Dai majaw, masha ni hpe n mu tim, hkaw tsun ai hpe n madat ya tim, sumsing Kawa hpe myit pyaw shangun nga ai hpe chye ai majaw anhte kabu ai.—Ga Shagawp 27:11 hpe hti u.

14. Kabu gara shiga myit lawm ai wa hte hpunau nauna ni hkrum ai shaloi anhte hpa majaw kabu ai kun?

¹⁴ Kabu gara shiga myit lawm ai wa hpe hpunau nauna ni hkrum ai shaloi anhte kabu ai. Hkaw tsun bungli gaw mat mat ai ma hpe hkan tam ai hte bung ai ngu Sin Langchyi hta tsun dan ga ai. Ma hpe mu na matu, hpung nawng shara shagu hkan tam ai. Mu ai shaloi tam mu ai wa sha kabu ai n re. Yawng kabu ai. Dai zawn sha sape shatai ai bungli gaw, hpung nawng galaw ra ai bungli re. Masha shagu hpe kabu gara shiga hkaw tsun lu na matu nga yang, hpunau nauna yang a n-gun ra ai. Myit lawm ai marai langai, zuphpawng sa lung yang anhte yawng kabu ai.

YEHOWA HTE HTINGBU HPE TSAWRA U

15. Mahte 22:37-39 gaw hkaw tsun bungli hta myit rawt na matu gara hku karum ya lu ai kun? (sumla hpe mung yu u.)

¹⁵ Yehowa hte htingbu hpe tsawra yang hkaw tsun bungli hta myit rawt wa na re. (Mahte 22:37-39 hpe hti u.) Karai jaw ai lit hpe gun hpai nga ai majaw, Karai myit pyaw na hpe shingran yu u. Chyum Laika hkaja ai shaloi masha ni myit dik myit pyaw na, kabu gara shiga hpe hkap la nna Karai Kasang hpe nawku na matu dawdan ai shaloi, htani htana asak lu na hpe shingran yu u.—Yhn 6:40; 1 Tm 4:16.

16. Nta kaw sha nga ra ai shaloi hkaw tsun bungli kaw na ngwi pyaw lam gara hku lu mai ai kun? Ga shadawn tsun dan u.

¹⁶ Lam amyu myu a majaw nta kaw sha nga ra ai kun? Rai yang, Yehowa hte htingbu hpe tsawra ai lam gara hku madun lu na? COVID-19 kap bra ana laman  Samuye hte Denya nta kaw sha nga ra mat ai. Mayak mahkak ni nga tim phone hte ayan sakse hkam ai. Laika ka nna sakse hkam ai. Zoom hte Chyum ga sharin galaw ai. Mawng ana tsi na matu tsi gawk sa ai shaloi, hkrum ai ni hpe Samuye sakse hkam ai. “Mayak mahkak a majaw hkum hkrang, myit, wenyi lam ni hta tsawmra mi gawng kya wa ai. Dai majaw, hkaw tsun bungli hta pyaw yang she mai na” ngu Samuye tsun ai. Dai hpang, Danya kashawt galau nna shata masum dam yupra kaw taw mat ai. Shata hku daram leng kap dung lahkum hte dung ra ai. “Ahkaw ahkang lu shagu shakut nna hkaw tsun ai. Sa yu ai tsi saranum hpe mung, arai sa ya ai ni hpe mung hkaw tsun ai. Tsi gungmani langai kaw na numsha hpe mung, phone hte Chyum Laika lam tsun dan ai” ngu Danya tsun dan ai. Samuye hte Danya nta kaw sha nga ra ai raitim, dang lu ai made galaw ai majaw ngwi pyaw wa ai.

17. Hpaji jaw ga ni kaw na akyu lu na matu hpa galaw ra ai kun?

¹⁷ Ndai sumhpa hta lawm ai hpaji jaw ga langai hpra gaw, shatmai shadu yang shalawm ra na shakau shaban, jum, majap ni hte bung ai. Dai yawng hpe bang shadu yang she, grai mu ai shatmai wan mi lu na re. Dai zawn sha, hpaji jaw ga yawng hpe tatut hkan sa yang, kaja ai akyu ni lu wa na, mayak mahkak ni tawt lai lu na, hkaw tsun bungli hta grau pyaw wa na.