1. Abraham a lam myit ai shaloi, hpa hpe myit hkrup chye ai kun?

 ABRAHAM a mying masha law law na ga tim, shi a lam loi mi sha chye ai. Raitim, anhte gaw shi a lam law law chye ai. Ga shadawn, “kam sham ai a majaw ding hpring ngu ya hkrum ai nlang hte a kawa” ngu ai hpe chye ai. (Rom 4:11) Abraham a hkang hta hkan lu na kun? Shi zawn makam masham nga lu na kun? ngu myit hkrup chye ai. Nga lu ai.

2. Abraham a lam hkaja na matu hpa majaw ahkyak ai kun? (Yaku 2:22, 23)

² Abraham a lam hkaja nna shi zawn makam masham nga hkra galaw lu ai. Karai Kasang tsun ai hte maren, grai tsan ai mung de htawt wa ai. Dai hta sum hte shaning law law nga wa ai. Grai tsawra ai kasha Isak hpe hkungga nawng na matu shajin wa ai. Dai ni hpe yu yang, ngang kang ai makam masham nga ai lam dan dawng ai. Abraham a makam masham hte magam bungli a majaw, Karai a myiman lu nna jinghku wa ngu shaga hkrum ai. (Yaku 2:22, 23 hpe hti u.) Yehowa gaw nang hte hpawn, anhte yawng hpe dai zawn shaman chyeju lu shangun mayu ai. Dai majaw, Abraham a kasi ningli a lam ka na matu, Pawlu hte Yaku hpe shatsam ya wa ai. Roma daw kaba 4 hte Yaku daw kaba 2 hpe bawngban ai shaloi, shi a lam hpe myit maju jung ga. Daw kaba lahkawng yan hta Abraham hte seng nna laklai ai lam ni lawm ai.

3. Gara chyum daw hpe Pawlu hte Yaku lakap wa ai kun?

³ “[Abraham] mung Yehowa hpe kam sham wu ai rai nna, dai gaw shi a ding hpring ai lam ngu nna nawn ya wu ai” ngu  ai Ningpawt 15:6 hpe Pawlu hte Yaku lakap wa ai. Yehowa gaw shi sharawng awng ai wa hpe ding hpring ai wa, mara n nga ai wa ngu mu ai. N hkum tsup ai, yubak kap ai masha hpe mara n nga ai wa ngu Karai Kasang mu mada ai gaw grai mauhpa re. Nang mung dai zawn hkrum mayu na re. Gara hku nna kun? Ding hpring ai ngu shaga hkrum ai Abraham a lam hpe yu yu ga.

4. Shinggyim masha ni hpa majaw n lu ding hpring ai kun?

⁴ Pawlu gaw Roma de ka ai laika hta, shinggyim masha yawng yubak masha re ai lam ka da ai. (Rom 3:23) Anhte yawng gaw, ding hpring ai wa, mara n nga ai wa, Karai a myiman lu ai wa gara hku byin lu ai kun? Abraham hpe lakap nna Pawlu mahtai jaw da ai.

5. Hpa hpe yu nna Abraham hpe ding hpring ai wa ngu Yehowa shaga ai kun? (Roma 4:2-4)

⁵ Hkanan mung hta Abraham nga ai shaloi, ding hpring ai wa ngu shi hpe Yehowa shaga wa ai. Hpa majaw kun? Mawshe A Tara hpe hkan ai majaw kun? N re. (Rom 4:13) Abraham hpe ding hpring ai wa ngu shaga ngut ai hpang, shaning 400 jan hta she, Israela ni hpe dai Tara jaw wa ai. Rai yang, hpa hpe yu nna Abraham hpe ding hpring ai wa ngu Karai Kasang shaga wa ai kun? Yehowa a kaba la ai tsawra myit a majaw, Abraham a makam masham hpe yu nna, ding hpring ai wa ngu shaga wa ai re.—Roma 4:2-4 hpe hti u.

6. Yubak kap ai wa hpe ding hpring ai wa ngu Yehowa hpa majaw shaga ai kun?

⁶ Karai Kasang hpe kamsham yang, ‘shi a kam sham ai hpe, ding hpring ai ngu ya wu ai’ ngu Pawlu tsun ai. (Rom 4:5) Shi ndai hku matut tsun ai: “Karai Kasang gaw magam bungli hpe n tau yu ai sha, ding hpring ngu ya wu ai wa hpe, Dawi mung shaa nga nna tsun ai gaw: Tara shut hpyit ai hta na raw dat ai hte, Yubak hpe makoi kau ya ai hkrum ai ni gaw, a nga ma ai; Madu e yubak n shagun ai wa gaw a nga ai, nga ai.” (Rom 4:6-8; Shk 32:1, 2) Karai Kasang gaw, shi hpe kamsham ai ni a mara hpe magap kau ya ai (sh) raw dat kau ya ai. Mara nga ai ngu n sawn la sai. Makam masham hpe yu nna, ding hpring ai wa, mara n nga ai wa ngu sawn la ai.

7. Moi na Karai a mayam ni hpe ding hpring ai ngu hpa majaw lu tsun ai kun?

⁷ Abraham, Dawi hte kaga sadi dung ai mayam ni hpe ding hpring ai ni ngu shaga wa ai raitim, shanhte gaw n hkum tsup ai yubak masha ni naw re. Raitim, shanhte a makam masham hpe yu nna, mara n nga ai ni ngu Karai Kasang sawn la ai. Grau nna gaw, Karai hpe n nawku ai ni hte shingdaw dat yang re. (Ehp 2:12) Karai a jinghku byin na matu, makam masham gaw madung re ai ngu Pawlu tsun ai. Abraham hte Dawi makam masham nga ai majaw, Karai a jinghku byin lu ai. Anhte mung makam masham nga yang, Karai a jinghku byin lu ai.

8-9. Pawlu hte Yaku ka ai lam ni hpe masha nkau gara hku sawn la ai kun? Hpa majaw kun?

⁸ Makam masham hte magam bungli a matut mahkai ai lam hte seng nna, nawku htung ningbaw ni dangrang hkat wa ai gaw, tsa ban shaning grai na sai. Yesu Hkristu hpe kam yang, hkye hkrang la hkrum na ngu hpung sara nkau tsun ai. “Yesu hpe hkap la yang, hkye hkrang la hkrum sai” ngu tsun ai hpe na ga na re. “Karai Kasang gaw magam  bungli hpe n tau yu ai sha, ding hpring ngu ya wu ai” ngu tsun ai Pawlu a ga hpe lakap da ai re. (Rom 4:6) Masha nkau gaw, nawku hpung kaw na chyoi pra ai ngu masat da ai shara ni de sa chyai nna, kaja ai lam ni galaw yang, “hkye hkrang la” hkrum na ngu tsun ai. Dai gaw, “kam sham ai hte sha n rai, magam bungli hte masha gaw ding hpring wa lu nga ai” ngu ai Yaku 2:24 hpe shanhte lakap nga ai re.

⁹ Dai zawn masa ni a majaw, Pawlu hte Yaku gaw, makam masham hte magam bungli matut mahkai ai hpe myit n hkrum hkat ai ngu, chyum hpaji du nkau sawn la ma ai. Karai a myiman lu na matu makam masham sha ra ai ngu Pawlu kam ai, Yaku gaw mai kaja ai lam ni galaw ra ai ngu nna kam ai lam, hpung sara nkau mi tsun ai. “Ding hpring ai ngu shaga hkrum na matu, makam masham sha ra ai ngu Pawlu hpa majaw tsun ai hpe Yaku n chye na ai, myit n hkrum ai” ngu nawku htung hte seng ai hpaji du langai tsun ai. Raitim, Pawlu hte Yaku yan gaw, chyoi pra ai wenyi lam matsun ai hte maren ka wa ai hpe dum u. (2 Tm 3:17) Dai majaw, shan tsun ai lam bung ai hpe chye na shangun lu ai lam nga na re. Laika a lawu lahta ga ni hpe hkaja ai hku nna chye na lu ai.

10. Pawlu gaw gara “magam bungli” a lam tsun nga ai kun? (Roma 3:21, 28) (Sumla hpe mung yu u.)

¹⁰ Roma daw kaba 3 hte 4 hta gara “magam bungli” a lam Pawlu tsun nga ai kun? Sina bum hta Israela ni hpe jaw ai Mawshe a “tara a magam bungli” hpe tsun nga ai re. (Roma 3:21, 28 hpe hti u.) Pawlu a aten hta, Yuda Hkristan nkau mi gaw, Mawshe a Tara hpe naw hkan sa ra ai ngu hkam la ma ai. Ding hpring ai wa ngu masat hkrum  na matu, Jep Ai Tara hpe n hkan sa ra ai lam Abraham a lam hpe lakap nna Pawlu tsun wa ai. De a malai, makam masham nga ra ai ngu tsun ai. Karai Kasang hte Hkristu hpe kamsham yang, Karai a myiman lu na hpe chye lu ai gaw grai n-gun lu hpa re.

11. Yaku gaw gara “magam bungli” a lam tsun ai kun?

¹¹ Yaku daw kaba 2 hta tsun ai “magam bungli” gaw, Pawlu tsun ai “tara a magam bungli” hpe tsun ai n re. Hkristan ni a shani shagu na prat hkrun lam hta, galaw ra ai lam ni, magam bungli ni hpe tsun ai re. Dai magam bungli ni gaw, jet ai makam masham nga ai, n nga ai hpe madun dan ai. Yaku lang wa ai ga shadawn lahkawng hpe yu yu ga.

12. Yaku gaw makam masham hte magam bungli matut mahkai ai hpe gara hku sanglang dan ai kun? (Sumla hpe mung yu u.)

¹² Langai, kaga masha ni hpe kanawn mazum ai shaloi, myiman n mai lata ai lam Yaku tsun wa ai. Lusu ai wa hpe myiman jaw nna, matsan ai wa hpe yu kaji ai marai langai a lam hpe ga shadawn tsun wa ai. Makam masham nga ai ngu shi tsun tim, gaja wa n nga ai hpe shi a lailen gaw madun nga ai. (Yak 2:1-5, 9) Lahkawng, hpunau nauna langai ngai, “singgu krin rai nga ma ai hte, shani shagu sha na lusha shahpa nhprut” nga ai hpe mu ti mung, tatut n karum ya ai wa hte ga shadawn tsun da ai. Makam masham nga ai ngu shi tsun tim, lailen n lawm ai majaw akyu n nga ai. Yaku ka wa ai hte maren, “makam masham hta magam bungli n lawm yang gaw, tinang dai chyasi rai nga ai.”—Yak 2:14-17.

13. Makam masham hta magam bungli lawm ra ai lam gara ga shadawn hte Yaku tsun wa ai kun? (Yaku 2:25, 26)

¹³ Makam masham hpe lailen hte madun wa  ai Rahab a lam hpe Yaku tsun wa ai. (Yaku 2: 25, 26 hpe hti u.) Yehowa a lam na ga ai, Israela ni hpe shi madi shadaw ya ai lam hpe chye da ai. (Ysh 2:9-11) Israela kin-yu lahkawng asak shoihpa nga ai shaloi, makawp maga ya ai hku nna, makam masham hpe lailen hte madun wa ai. Dai majaw, Rahab gaw Israela masha n raitim, n hkum tsup tim, Abraham zawn ding hpring ai wa ngu shaga hkrum ai. Makam masham hpe lailen hte madun na matu grai ahkyak ai lam Rahab kaw na sharin la lu ai.

14. Pawlu hte Yaku ka ai lam ni gaw bung ai ngu hpa majaw lu tsun ai kun?

¹⁴ Chyum Laika ka ai Pawlu hte Yaku gaw, makam masham hte magam bungli hpe n bung ai ningmu hte tsun wa ai re. Mawshe A Tara hpe hkan sa ai daram hte sha, Yehowa a myiman lu na n re ai lam, Yuda Hkristan ni hpe Pawlu tsun ai. Yaku gaw, kaga masha ni hpe mai kaja ai lam galaw ya ai hku nna, makam masham madun ra ai ngu tsun ai.

15. Magam bungli hte makam masham madun mai ai lam nkau gaw hpa ni kun? (Sumla hpe mung yu u.)

¹⁵ Ding hpring ai wa ngu shaga hkrum na matu, Abraham zawn tup hkrak hkan galaw ra na ngu Yehowa n tsun ai. Magam bungli hte makam masham madun mai ai lam law law nga ai. Nawku hpung na masha nnan ni hpe hkalum la mai ai, ra kadawn nga ai hpunau nauna ni hpe karum ya mai ai, nta masha ni a matu mai kaja ai lam ni galaw ya mai ai. Dai lam yawng gaw, Karai a myiman hte shaman chyeju lu shangun ai lam ni re. (Rom 15:7; 1 Tm 5:4, 8; 1 Yh 3:18) Ahkyak htum gaw, makam masham nga ai hpe myit rawt let hkaw tsun ai hku nna madun mai ai. (1 Tm 4:16) Yehowa galaw ai gaw kaja  htum re ai, shi a ga sadi ni teng sha hpring tsup wa na hpe kam ai lam, anhte yawng lailen hte madun mai ai. Rai yang, anhte hpe ding hpring ai wa, jinghku wa ngu nna Yehowa shaga na hpe kam mai ai.

16. Abraham a makam masham hte myit mada lam gara hku matut mahkai nga ai kun?

¹⁶ Roma daw kaba 4 hta, Abraham kaw na sharin la mai ai ahkyak ai lam langai lawm ai. Myit mada lam gaw ahkyak ai ngu ai hpe re. Abraham hku nna “masha amyu baw law law” shaman chyeju lu na ngu Yehowa ga sadi jaw ai. Abraham kade daram myit mada nga na hpe myit yu u. (Nin 12:3; 15:5; 17:4; Rom 4:17) Abraham asak 100, Sara asak 90 hta pyi, shan kasha n lu shi ai. Masha a ningmu hku nga yang, ma lu na lam n nga ai. Abraham a matu chyam dinglik lam re. “Myit mada shara n nga rai ti mung, amyu baw law law a kawa tai u ga, kam sham let, myit a mada nga ai.” (Rom 4:18, 19) Dai myit mada lam gaja wa byin wa ai. Shaning law law myit mada wa ai kasha Isak hpe lu wa ai.—Rom 4:20-22.

17. Ding hpring ai, Karai a jinghku ngu shaga hkrum lu ai lam gara hku chye lu ai kun?

¹⁷ Ding hpring ai Karai Kasang a jinghku ngu shaga hkrum lu ai, Karai a myiman lu mai ai. Dai majaw, Pawlu ndai hku ka wa ai: “Shi hpe shing ngu ya wa ai gaw, [Abraham] a matu sha ka da nga ai n rai: . . . Yesu hpe . . . hkrung sharawt la ai wa hpe kam sham nna, ngu ya hkrum na ra ga ai. Anhte a matu mung ka da nga ai.” (Rom 4:23, 24) Abraham zawn Yehowa hpe kam ra ai, mai kaja ai bungli ni galaw ra ai, ga sadi ni teng sha hpring tsup wa na hpe kamsham ra ai. Myit mada lam hte seng nna, Roma daw kaba 5 hta Pawlu matut nna tsun da ai. Dai hpe hpang na sumhpa hta hkaja na re.