1. Ga sadi hpring tsup wa na hpe Abraham hpa majaw matut myit mada wa ai kun?

 YEHOWA gaw jinghku Abraham hpe shi a aru arat a majaw, mungkan ga na amyu masha yawng shaman chyeju lu na ngu ga sadi jaw ai. (Nin 15:5; 22:18) Karai Kasang hpe kamsham ai majaw, Karai a ga sadi hpring tsup wa na hpe shi kam ai. Raitim, Abraham asak 100, madu jan asak 90 hta pyi kasha n lu shi ai. (Nin 21:1-7) Abraham gaw, “amyu baw law law a kawa tai u ga, kam sham let, myit a mada nga ai” ngu Chyum Laika hta tsun da ai. (Rom 4:18) Abraham a myit mada lam gaja wa byin wa ai. Aten na na myit mada wa ai kasha Isak hpe shangai wa ai. Myit mada lam hpring tsup wa na hpe Abraham hpa majaw kam ai kun?

2. Yehowa a ga sadi hpring tsup wa na hpe Abraham hpa majaw kam ai kun?

² Yehowa hte kaja ai hku hkau lam nga ai majaw, “ga ndat da ai hte maren [Karai Kasang] shabyin na” hpe Abraham kam ai. (Rom 4:21) Shi a makam masham a majaw, Yehowa a myiman lu nna ding hpring ai ngu shaga hkrum ai. (Yak 2:23) Roma 4:18 hta tsun da ai hte maren, Abraham a makam masham hte myit mada lam gaw matut mahkai nga ai. Myit mada lam hte seng nna Roma daw kaba 5 hta kasa Pawlu tsun da ai lam hpe hkaja yu ga.

3. Myit mada lam hte seng nna Pawlu hpa sanglang dan ai kun?

³ “Myit mada ai lam chyawm gaw anhte hpe myit daw shangun” na n re ai hpe hpa majaw kam mai ai lam Pawlu sanglang dan ai. (Rom 5:5, JCLB) Anhte a myit mada lam gara hku ngang kang lu ai hpe, chye na hkra mung karum ya ai. Roma 5:1-5 hpe hkaja ai shaloi, shaning ni na wa sai hte maren na a myit mada lam gara hku ngang kang wa ai hpe myit  yu u. Myit mada lam grau ngang kang hkra gara hku galaw lu ai hpe mung chye wa na re. Shawng nnan, Pawlu tsun ai myit n daw shangun ai mauhpa myit mada lam hpe hkaja yu ga.

4. Roma 5:1, 2 hta hpa lam bawngban da ai kun?

⁴ Roma 5:1, 2 hpe hti u. Dai ga ni hpe Roma nawku hpung de Pawlu ka wa ai. Dai kaw na hpunau nauna ni gaw, Yehowa hte Yesu a lam sharin la ai, kamsham wa ai, Hkristan ni byin wa ai. Shanhte gaw “kam sham ai hte ding hpring wa lu” ai ni ngu shaga hkrum ai. Chyoi pra ai wenyi hte namman chya hkrum ai. Mauhpa myit mada lam lu wa ai.

5. Namman chya hkam ai ni hta hpa myit mada lam nga ai kun?

⁵ Hpang de, Pawlu gaw, shaga la hkrum ai myit mada lam hte seng nna Ehpesu nawku hpung de laika ka ai. Dai myit mada lam hta “chyoi pra ai ni” lu la na “sali wunli” hte seng ai lam lawm ai. (Ehp 1:18) Gara shara hta sali wunli lu na hpe, Kolose nawku hpung de ka ai laika kaw na chye lu ai. “Sumsing lamu hta e nanhte a matu mara mahkawng da ai myit mada ai a marang e” ngu tsun da ai. (Kol 1:3, 5) Dai majaw, namman chya hkam ai Hkristan ni a myit mada lam gaw, htani htana asak hkrung na matu sumsing lamu de hkrung rawt nna, Hkristu hte rau uphkang lu na matu re.—1 Ht 4:13-17; Shr 20:6.

6. Myit mada lam hte seng nna namman chya hkam ai hpunau langai hpa tsun ai kun?

⁶ Dai myit mada lam hpe namman chya hkam ai Hkristan ni manu shadan ai. Shanhte kaw na hpunau Hpret Drik Hpren ndai hku tsun ai: “Anhte a myit mada lam gaw teng sha byin wa na re. Anhte shingran yu lu ai hta pyi grau nna, sagu hpung kaji kaw na 144,000 yawng dai myit mada lam hpe lu la na re.” Shaning law law Karai a magam gun ngut ai hpang, 1991 hta ndai hku tsun ai: “Dai myit mada lam hpe manu shadan ai lam n mat mat ai. . . . Anhte grau la ra magang, grau manu shadan wa magang re. Shaning  kade na hkra la ra tim pyi, anhte sharawng awng let la na re. Myit mada lam hpe ngai moi na hta grau manu shadan ai.”

7-8. Yehowa hpe nawku ai law malawng hta hpa myit mada lam nga ai kun? (Roma 8:20, 21)

⁷ Dai ni aten Yehowa hpe nawku ai ni law malawng hta, kaga myit mada lam langai nga ai. Abraham myit mada wa ai zawn, Karai a Mungdan uphkang ai mungkan ga hta, htani htana asak hkrung na matu re. (Heb 11:8-10, 13) Dai mauhpa myit mada lam hte seng nna Pawlu ka wa ai. (Roma 8:20, 21 hpe hti u.) Htawm hpang hte seng ai Chyum Laika ga sadi hpe shawng nnan chye ai shaloi, hpa hpe ra dik htum kun? Hkum tsup ai wa byin wa na aten hpe kun? Nang tsawra ai si mat ai ni mungkan hparadisu hta bai hkrung wa na hpe kun? Karai jaw ai “myit mada” lam a majaw, anhte myit mada lu ai mauhpa lam law law nga ai.

⁸ Sumsing lamu hta rai rai, mungkan ga hta rai rai, htani htana asak hkrung na matu myit mada ai ni gaw, dai myit mada lam a matu kabu lu ai. Kabu hpa dai myit mada lam grau ngang kang wa hkra galaw lu ai. Gara hku galaw lu ai hpe Pawlu tsun dan ai. Anhte a myit mada lam hte seng nna, shi gara hku ka ai hpe yu yu ga. Shi a ga ni gaw, anhte a myit mada lam ni gaja wa byin wa na hpe grau kam wa hkra karum ya ai.

9-10. Pawlu hkrum wa ai zawn Hkristan ni hpa hpe myit mada da mai ai kun? (Roma 5:3) (Sumla ni hpe mung yu u.)

⁹ Roma 5:3 hpe hti u. Myit mada lam hpe grau ngang kang shangun ai lam hta, tsin-yam tsindam mung lawm ai. Dai hku tsun ai majaw mau mat na re. Raitim, Hkristu a hpang hkan ai ni gaw, tsin-yam tsindam hpe myit mada da mai ai. Pawlu a lam hpe myit yu u. Htesaloni nawku hpung hpe shi ndai hku tsun ai: “Nanhte hte rau naw nga ai shaloi e, anhte tsin-yam tsindam hkrum na ga ai hpe, anhte nanhte hpe tsun dan magang ga ai rai nna, . . . shing rai mung byin wa sai.” (1 Ht 3:4) Dai  hta n-ga, “hpu nau ni e, . . . anhte hkrum sa gaw ai tsin-yam tsindam a lam, nanhte n chye ai nga na, an n ra ga ai; anhte a asak lawt na n nawn lu” na daram re ngu Korinhtu nawku hpung hpe tsun ai.—2 Ko 1:8; 11:23-27.

¹⁰ Dai ni aten na Hkristan ni mung, tsin-yam tsindam nkau hkrum na hpe myit mada mai ai. (2 Tm 3:12) Yesu hpe kamsham ai majaw, shi a hpang hkan ai majaw, zingri zingrat hkrum nga ai kun? Manaw manang ni, jinghku ni jahpoi asawng ai, ga law saw ai hpe hkrum nga ai kun? Lam shagu hta ding man ai hku galaw ai majaw, bungli hta mayak mahkak hkrum nga ai kun? (Heb 13:18) Myit mada lam hte seng nna kaga ni hpe tsun dan ai majaw, asuya a ninghkap ai lam hkrum nga ai kun? Hpa mayak mahkak hpe hkrum tim, kabu gara lu ai ngu Pawlu tsun ai. Hpa majaw kun?

11. Hpa mayak mahkak mi hkrum tim, shakut sharang na matu hpa majaw dawdan da ai kun?

¹¹ Mayak mahkak ni hkrum ai shaloi, ahkyak ai atsam ningja langai lu ai hpe chye ai majaw kabu lu ai. Roma 5:3 hta, “tsin-yam tsindam mahtang gaw shakut sharang ai” atsam jaw ai ngu tsun da ai. Hkristan yawng mayak mahkak hkrum na re. Dai majaw, mayak mahkak yawng hpe shakut sharang let hkam jan na matu dawdan da ra ai. Shakut sharang ai atsam nga yang she, myit mada nga ai shaman chyeju lu na re. Mungga hpe kabu gara ai myit hte kalang ta hkap la ai raitim, “ru tsang ai hte zingri zingrat hkrum jang” ahtu kataw mat ai ga n law ai lung rawk hta hkrat ai Yesu a ga shadawn hta lawm ai nli zawn, anhte n byin mayu ai. (Mat 13:5, 6, 20, 21) Mayak mahkak ni hkrum ai gaw kabu hpa n re. Raitim, shakut sharang ai rai yang akyu nga ai. Hpa akyu kun?

12. Shakut sharang ai gaw hpa ni hpe shangut kau ya ai kun?

¹² Mayak mahkak ni hpe shakut sharang let hkam jan ai a akyu hpe Yaku ndai hku ka wa ai: “Nanhte hkum hkum chyip chyip rai lu nna, hpa hta mung n kadawn myit ga, shakut sharang ai myit gaw tinang a atsup nga ai bungli hpe, shangut kau lu u ga.” (Yak 1:2-4) Shakut sharang ai hta, shangut kau ra na bungli nga ai zawn Yaku tsun da ai. Rai yang, shakut sharang ai gaw hpa ni hpe shangut kau ya ai kun? Grau myit galu shangun ai, makam masham grau law wa shangun ai, Karai Kasang hpe grau kamhpa chye shangun ai. Kaga akyu ni mung naw nga ai.

13-14. Shakut sharang yang hpa lu na kun? Myit mada lam hte gara hku matut mahkai ai kun? (Roma 5:4)

¹³ Roma 5:4, 5 hpe hti u. Shakut sharang ai gaw “Karai Kasang a tsaw ra ai myit” lu shangun ai ngu Pawlu tsun ai. Ngut nna Karai a myiman mung lu shangun ai. Nang mayak mahkak hkrum nga ai hpe Karai Kasang ra sharawng ai ngu tsun mayu ai gaw n re. Nang sadi dung let shakut sharang ai hpe Karai Kasang ra sharawng ai. Shakut sharang yang, Karai a tsawra myit lu na hpe chye lu ai gaw n-gun lu hpa re.—Shk 5:12.

¹⁴ Chyam dinglik ai lam hkrum ai aten, Abraham sadi dung let shakut sharang ai majaw Karai a myiman lu ai. Shi a jinghku, ding hpring ai wa ngu masat ai. (Nin 15:6; Rom 4:13, 22) Anhte mung Karai a myiman lu mai ai. Magam bungli hta kade daram shang lawm ai, gara shara kaw shang lawm ai lam hta n madung ai. Sadi dung let shakut sharang ai hta sha madung ai. Asak kade mi raitim, gara masa, gara atsam ningja ni nga ai raitim, anhte yawng shakut sharang lu ai. Nang mayak mahkak langai ngai hkrum nga ai kun? Hkrum ai shaloi Karai Kasang hpe matut sadi dung nga ai kun? Rai yang, Karai Kasang a myiman  lu nga ai ngu ai hpe dum nna n-gun la u. Karai a myiman lu ai hpe chye da ai gaw grai akyu jaw ai. Tinang myit mada da ai hte maren, Karai Kasang galaw ya lu ai ngu ai hpe grau kam wa shangun ai.

15. Roma 5:4, 5, JCLB hta Pawlu hpa tsun ai kun? Nkau mi hpa majaw myit shuk mat chye ai kun?

¹⁵ Sadi dung let shakut sharang ai gaw, Yehowa a myiman lu shangun ai ngu Pawlu tsun ngut ai hpang, “[Karai Kasang] a sharawng awng ai gaw myit mada ai lam shabyin nga ai hpe anhte chye ga ai. Dai myit mada ai lam chyawm gaw anhte hpe myit daw shangun mi ai n rai” ngu matut tsun ai. (Rom 5:4, 5, JCLB) Nkau mi a matu gaw myit shuk hpa re. Hpa majaw kun? Shawng hta, Roma nawku hpung na Hkristan ni “Karai Kasang a hpung shingkang hpe myit mada nga” ai lam Roma 5:2 hta Pawlu tsun da chyalu re. Rai yang, myit mada lam hte seng nna hpa majaw kahtap tsun ai kun?

16. Myit mada lam gara hku grau ngang wa ai kun? (Sumla ni hpe mung yu u.)

¹⁶ Pawlu hpa tsun ai hpe chye na na matu, myit mada lam ngu ai gaw, grau ngang kang wa lu ai lam re ai hpe dum ra ai. Chyum Laika hta lawm ai mauhpa myit mada lam hpe shawng nnan chye lu ai aten hpe naw matsing ai kun? Mauhpa myit mada lam raitim, gaja wa byin wa na hpe nau n kam ai rai na re. Raitim, Yehowa a lam, Chyum Laika ga sadi ni a lam grau chye wa ai shaloi, myit mada lam mung grau ngang wa ai.

17. Apnawng hkalup hkam ngut ai hpang, na a myit mada lam gara hku ngang wa ai kun?

¹⁷ Apnawng hkalup hkam ngut ai hpang, Yehowa a lam grau chye wa ai majaw, shi hpe grau tsawra wa ai. Myit mada lam mung grau ngang wa ai. (Heb 5:13–6:2) Roma 5:2-4 hta tsun da ai lam ni hpe tinang nan hkrum ai. Tsin-yam tsin dam amyu myu hkrum ai. Hkamjan ai, Karai a myiman lu ai hpe chye ai majaw, Karai jaw da ai ga sadi ni hkamsha lu na ngu ai hpe grau kam nga sai. Myit mada  lam grau ngang kang nga sai. Gaja wa lu na myit mada lam ngu hkamsha ai. Prat hkrun lam shagu hta akyu shabyin ya ai. Nta masha ni hpe gara hku kanawn mazum ai, dawdan lam ni gara hku jahkrat ai, aten hpe gara hku akyu jashawn ai, dai zawn lam ni hta galai shai wa ai.

18. Yehowa hpa amahkam ai kun?

¹⁸ Karai a myiman lu ngut ai hpang, lu wa ai myit mada lam hte seng nna, kasa Pawlu kahtap tsun ai. Myit mada ai hte maren teng sha lu na ngu tsun ai. Hpa majaw kun? “Dai myit mada ai lam chyawm gaw anhte hpe myit daw shangun mi ai n rai; hpa majaw nga yang anhte hpe Karai Kasang jaw da sai kumhpaw kumhpa ngu ai dai Chyoi Pra ai Wenyi e Karai Kasang a tsaw ra ai myit hpe anhte a kraw lawang hta e ru bang ya mani ai” ngu ai Karai a amahkam ai lam hpe Pawlu tsun ai. (Rom 5:5, JCLB) Yehowa jaw ai myit mada lam gaw teng sha byin wa na re.

19. Na a myit mada lam hte seng nna hpa hpe kam mai ai kun?

¹⁹ Abraham hpe Yehowa hpa ga sadi jaw ai, hpa majaw tsawra ai, jinghku ngu hpa majaw masat ai hpe myit yu u. Abraham myit mada ai hte maren byin wa ai. “Shakut sharang let la nga ai majaw, dai ga ndat a akyu [Abraham] hkam la lu wu ai” ngu Chyum Laika hta tsun ai. (Heb 6:15; 11:9, 17, 18; Rom 4:20-22) Abraham myit n daw ra wa ai. Anhte mung sadi dung yang, myit mada ai hte maren byin wa na hpe kam mai ai. Myit mada lam a majaw myit daw ra na n re. Kabu gara lu na gaw teng sha re. (Rom 12:12) Pawlu tsun ai zawn sha, “chyoi pra ai Wenyi a n-gun atsam hte myit mada ai lam hta nanhte gumring gumrat rai wa myit ga, myit mada npawt rai nga ai Karai Kasang gaw, kam sham ai lam hta e, chyeju hte ngwi pyaw ai amyu myu nanhte hpe jahpring shatsup ya myit ga law.”—Rom 15:13.