Dai ning hta shapraw ai Sin Langchyi ni hpe nang atsawm hti wa ai kun? Lawu na ga san ni hpe lu htai ai kun? ngu ai hpe chyam yu u:

“Myit jasat hpe galai shai” ai hta hpa lawm ai kun? (Rom 12:2, NWT)

Kaja ai lam ni hpe galaw ai hta n-ga lawm ai. Tinang a kata na masha hpe atsawm san jep ra nna, Yehowa a tsang madang ni hte htep lahti rai hkra, ra ang ai hku galai shai ra ai lam ni lawm ai.—w23.01, lm. 8-9.

Mungkan mabyin ni hpe sadi yu nga ai laman rap ra ai lam nga ai hpe gara hku madun mai ai kun?

Mungkan hta byin nga ai lam ni gaw, myihtoi ga hpring tsup nga ai hpe mu lu ai majaw, dai lam ni hpe anhte myit lawm ai. Nawku hpung hpe nru nra byin shangun chye ai lam ni hpe tak tsun na malai, Yehowa a uhpung kaw na lajang ya ai laili laika ni hta madung tawn nna bawngban mayu ai. (1 Ko 1:10)—w23.02, lm. 16.

Yesu a hkalup hkam ai lam hte shi hpang hkan ai ni a hkalup hkam ai lam gaw gara hku shai ai kun?

Yesu gaw Karai Kasang kaw apnawng da ai amyu hku nna shangai wa ai majaw, anhte zawn Yehowa kaw tinang hkum tinang apnawng n ra ai. Yesu gaw hkum tsup ai, mara n nga ai. Dai majaw, mara a matu myit malai n la ra ai.—w23.03, lm. 5.

Zuphpawng hta kaga ni mahtai jaw lu hkra gara hku galaw mai ai kun?

Kaga ni mahtai jaw lu hkra, kadun dawk mahtai jaw mai ai. Lam law law tsun shalawm ai hpe koi mai ai. Ngam ai lam ni hpe kaga ni mahtai jaw lu na re.—w23.04, lm. 23.

Esaia 35:8 hta tsun da ai “Chyoi pra ai lam” gaw hpa hpe tsun mayu ai kun?

Ndai ga shadawn nmaw lam gaw, Babelon mare kaw na tinang a buga de bai wa ai Yuda masha ni a hkrun lam hpe tsun mayu ai re. Dai ni aten na matu hpa lachyum nga ai kun? 1919 garai n du shi ai tsa ban shaning ni kaw nna, Chyum Laika ga gale ai, dip shapraw ai, kaga lam ni galaw ai hku nna nmaw lam hpe shajin wa ai. Karai a masha ni gaw, wenyi hparadisu de lam woi ya ai “Chyoi Pra Ai Lam” ntsa hkawm nga ma ai. Dai gaw, htawm hpang hta mung Mungdan shaman chyeju ni lu shangun na re.—w23.05, lm. 15-19.

Num lahkawng a lam hpe madung tawn nna Ga Shagawp daw kaba 9 gaw gara hku hpaji jaw da ai kun?

“Myit n su ai num” saw shaga ai hpang hkan yang, “katsan ga” de du mat na, “hpaji byeng-ya” hpe malai tsun ai num a hpang hkan yang, “zai byeng-ya lam hta hkan hkawm” lu na, asak lu na ngu Ga Shagawp Laika hta tsun da ai. (Gsh 9:1, 6, 13, 18)—w23.06, lm. 22-24.

Lawt hte kanawn mazum ai lam hta Karai a shagrit shanem ai lam, rap ra ai lam gara hku dan dawng ai kun?

Lawt hpe Sodom mare kaw na bum de hprawng na matu Yehowa lam matsun ai. Zora mare de hprawng na matu shi hpyi shawn ai hpe Karai Kasang ahkang jaw ai.—w23.07, lm. 21.

Ningrum ningtau nse nsa sumla ni, video ni yu yang madu jan hpa galaw lu ai kun?

Tinang hkum tinang mara hkum shagun. Karai hte tinang a hku hkau lam hpe myit maju jung ging ai. Myit ru myit tsang hkrum ai shaloi, Karai a shalan shabran lam lu wa ai num ni a lam Chyum Laika hta lawm ai. Dai labau ni hpe myit ging ai. Nse nsa sumla ni, video ni yu hkrup chye ai masa ni hpe koi lu na matu madu wa hpe karum ya lu ai.—w23.08, lm. 14-17.

Makam masham a lam san hkrum ai shaloi, sadi sahka ai nyan gaw sumnung na matu gara hku karum ya lu ai kun?

Ga san san hkrum ai shaloi, shanhte a myit hta hpa nga ai hpe chye hkra karum ya ai lam re ngu mu mada u. Rai yang, sumnung shingdi ai hku tsun dan chye wa na re.—w23.09, lm. 17.

N-gun atsam lu na matu Mari galaw wa ai lam kaw na hpa sharin la lu ai kun?

Meshia hpe shangai nna, bau maka ra na hpe chye ai shaloi, kaga ni kaw na n-gun la ai. Gabriela hte Elisabet gaw Mari hpe n-gun jaw ai. Anhte mung hpunau nauna ni kaw na n-gun lu la mai ai.—w23.10, lm. 15.

Anhte a akyu hpyi ga ni hpe Yehowa gara hku htai ya ai kun?

Anhte a akyu hpyi ga ni hpe madat ya na ngu ga sadi jaw ai. Shi a yaw shada lam hte shingdaw yu ai. (Yer 29:12) Hpyi ai lam bung tim, Yehowa mahtai jaw ai gaw bung yang she bung na. Raitim, Yehowa galoi mung madi shadaw ya na re.—w23.11, lm. 21-22.

Roma 5:2 hta ‘myit mada lam’ hpe tsun dan da ai. Hpa majaw daw kaji 4 hta kahtap nna bawngban da ai kun?

Kabu gara shiga na lu ai shaloi, mungkan ga hparadisu hta asak hkrung na myit mada lam hpe chye wa ai. Tsin-yam tsindam hkrum ai shaloi shakut sharang yang, Karai a myiman lu nga ai ngu ai hpe chye ai. Dai gaw myit mada lam hpe shangang ya ai.—w23.12, lm. 12-13.