KUMHPA amyu myu jaw da ai sha n-ga, dai kumhpa ni hpe gara hku akyu jashawn na hpe, wanglu wanglang dawdan na ahkang jaw da ai majaw mung, Yehowa hpe chyeju dum na re. Chyum Laika hta, tsa chyaru hpe Karai jaw da ai kumhpa hku nna tsun da ai gaw myit lawm hpa re. “Tsabyi jahku ngwi pyaw shangun nga ai” ngu tsun da ai. (Hpj 10:19; Shk 104:15) Raitim tsa chyaru a majaw, nkau mi jamjau hkrum nga ai hpe nang mu ga na re. Dai hta n-ga, tsa chyaru lu ai hte seng nna mungkan ting hta ningmu amyu myu, tsang madang amyu myu nga ai. Hkristan ni hku nna, gara hku dawdan ai gaw hpaji rawng na kun?

Gara shara kaw mi nga nga, gara htung hking kaw na mi rai rai, Karai a ningmu hpe madung tawn nna dawdan ai gaw, grai akyu nga ai.

Mungkan hta masha law law gaw, tsa chyaru chyahkring hkring lu ai, grai law hkra lu ai hpe sadi hkrup na re. Nkau gaw ban sa na matu lu ai, nkau gaw manghkang ni hpe malap kau mayu ai majaw lu ai. Buga ginra nkau hta tsa grai lu jin ai hpe, prat dep ai, la jet ai ngu mu mada ma ai.

Raitim, Hkristan ni hta chyawm gaw, tsawra myit nga ai Hpan Madu kaw nna, hpaji rawng ai lam matsun lu da ai. Ga shadawn, lu lai ai majaw yawn hpa hkra machyi lam ni byin chye ai hpe Karai Kasang sadi jaw da ai. Chyaru nang ai wa hte chyaru nang ai majaw byin ai manghkang ni hte seng nna, Ga Shagawp 23:29-35 hta ahkri ahkrai hti lu ai. a Urawpa na myitsu salang Deniye gaw, tengman lam n chye shi yang na prat hkrun lam hpe naw dum nga ai. “Nang hkra lu ai majaw dawdan lam ni jahkrat shut ai, hkra machyi ai lam ni hkrum ai, bai myit dat shagu naw hkrit taw ai” ngu tsun ai.

Tsa chyaru lu ai hte seng nna, Hkristan ni hpaji rawng ai hku dawdan lu na matu, lu lai ai ni hkrum chye ai manghkang hpe koi lu na matu, hpa gaw karum ya ai kun? Karai a ningmu hpe madung tawn nna myit ai, galaw ai hku nna re.

Tsa chyaru hte seng nna Chyum Laika hta hpa tsun ai, masha ni hpa majaw tsa chyaru lu ai ngu ai lam nkau hpe yu yu ga.

Tsa ram daw lu ai hpe Chyum Laika hta n hkum pat da ai. Tsabyi jahku lu ai gaw, masha hpe myit pyaw shangun ai ngu tsun da ai. “Kabu gara ai hte shat sha u, ngwi pyaw ai hte na a tsabyi jahku lu u” ngu nna hti lu ai. (Hpj 9:7) Yesu hte Yehowa a kaga sadi dung ai mayam ni mung, tsabyi jahku lu wa ai.—Mat 26:27-29; Luk 7:34; 1 Tm 5:23.

Tsa chyaru lu ai hpe Chyum Laika hta n hkum pat tim, nang hkra lu ai hpe hkum pat da ai. “Chyaru hkum nang mu” ngu nna asan sha tsun da ai. (Ehp 5:18) “Chyaru ya shang ai ni . . . Karai Kasang a mungdan a sali wunli hpe hkam la lu na n rai” ngu nna pyi tsun da ai. (1 Ko 6:10) Nang hkra lu ai, ladu lai lu ai hpe Yehowa ja ja hkum pat da ai. Makau grupyin na masha ni a ningmu hpe n re ai sha, Karai a ningmu hpe madung nna anhte dawdan ai.

Nkau gaw grai law hkra lu tim n nang ai. Dai gaw shoihpa nga ai. La rai rai, num rai rai “chyaru a mayam” byin taw yang, shut ai hku galaw hkrup chye ai, Yehowa hte hku hkau lam htenza chye ai ngu, Chyum Laika hta asan sha tsun da ai. (Tit 2: 3, JCLB; Gsh 20:1) “Lu lai” yang, mungkan nnan n shang lu ai ngu nna pyi Yesu sadi jaw ai. (Luk 21:34-36) Tsa lu ai majaw byin ai manghkang ni hpe koi na matu, hpa gaw karum ya lu ai kun?

Tsa chyaru hte seng nna tinang a htung hking kaw na masha law malawng mu ai zawn mu ai gaw shoihpa nga ai. Lu ai, sha ai hte seng nna Yehowa ra sharawng ai hpe Hkristan ni lata ai. Chyum Laika hta ndai hku sadi jaw da ai: “Nanhte sha ti mung, lu ti mung, hpa galaw ti mung, nga manga hta Karai Kasang a hpung shingkang tam let, galaw nga mu.” (1 Ko 10:31) Myit yu ging ai ga san nkau mi hte Chyum Laika npawt tara nkau hpe yu yu ga.

Kaga Ni Ra Na Matu Lu Ai Kun? Pru Mat 23:2 hta ndai hku tsun ai: “Masha law ai maga de hkum hkan et.” Shi hpe n nawku ai ni hpe Israela ni kasi n la na matu, Yehowa sadi jaw nga ai re. Dai ni aten na Hkristan ni a matu mung grai kaja ai sadi jaw ga re. Tsa hte seng nna makau grupyin na masha ni myit ai, dawdan ai zawn, myit na, dawdan na nga yang, Yehowa a tsang madang ni hte shai wa nna, shi hte tsan gang mat na re.—Rom 12:2.

Tsa kade daram lu jin ai hpe madun mayu nna ngai lu ai kun? Htung hking nkau hta tsa chyahkring hkring lu ai, grai lu ai hpe hkap la ai. Yu maya sha mu ai. (1 Pe 4:3) Raitim, “a maja nga mu, dai makam masham hta dakring dalang tsap nga mu, wa-ngan marai shapraw mu, n-gun lagaw shagrin nga mu” ngu nna, 1 Korinhtu 16:13 hta n-gun jaw da ai hpe sadi yu u. Tsa chyaru gaw, gaja wa n-gun lagaw nga shangun ai kun? N re. Nang mat n na, myit mak mat ai majaw atsawm n lu galaw sai, n lu dawdan sai. Tsa chyaru a majaw lam shai mat ai wa hpe ndi nda hkawm ai wa, teng man ai hku n lu dawdan ai wa ngu Esaia 28:7 hta tsun da ai.

A maja nga mu, dai makam masham hta dakring dalang tsap nga mu ngu ai hte maren galaw lu na matu, Yehowa kaw na n-gun atsam ra ai. (Shk 18:32) Shoihpa ni hpe koi na matu, Yehowa hte hku hkau lam hkra machyi shangun ai dawdan lam ni hpe n jahkrat na matu, sadi ai hku  nna n-gun atsam nga lu ai. Dai zawn n-gun atsam hpe, mungkan ga ntsa nga ai aten Yesu madun wa ai. Jaw ai hpe galaw na matu dawdan lam ngang kang ai wa, nden marai nga ai wa hku nna masha law law shi hpe hkungga ai.

Manghkang ni hpe malap kau mayu nna tsa lu ai kun? “Nye a kraw lawang na myit law ai shaloi e, Nang [Yehowa] shakawp ya nna, nye a myit masin hpe kabu shangun ya nngai” ngu shakawn kungdawn sara tsun ai. (Shk 94:19) Grai myit tsang ai shaloi, myit simsa na matu, tsa chyaru hpe n re ai sha, Yehowa hpe kamhpa u. Yehowa kaw chyahkring hkring akyu hpyi ai gaw myit simsa shangun ai. Nawku hpung kaw na kunghpan ai manang langai ngai kaw hpaji hpyi ai mung akyu nga ai. Gaja nga yang, manghkang ni hpe malap kau mayu nna tsa chyaru lu yang, jaw ai hpe galaw mayu ai myit pyi mat mat chye ai. (Hos 4:11) Shawng hta lawm ai Deniye ndai hku tsun ai: “Ngai hta myit tsang lam ni, tinang hkum tinang mara shagun ai myit ni nga ai. Dai ni hpe malap kau na matu tsa chyeru lu ai. Masa grau pyi sawng mat ai. Manang ni hte hku hkau lam hten mat ai. Tinang hkum tinang hkungga ai lam n nga mat ai.” Deniye hpe hpa gaw karum ya ai kun? “Tsa chyaru hpe n re ai sha, Yehowa hpe kamhpa ra ai lam ngai chye mat ai. Yehowa hpe kamhpa ai shaloi she, manghkang ni hparan lu mat ai” ngu tsun ai.—Hpl 4:6, 7; 1 Pe 5:7.

Tsa chye lu ai rai yang, kade lang lu ai, kade daram lu ai hte seng nna tinang hkum tinang ndai hku san jep u: ‘Ngai tsa lu ai hte seng nna myit tsang ai ngu nta masha (sh) manang langai tsun ga ai kun?’ Rai yang, tinang n sadi hkrup tim, manghkang nga nga sai ngu ai lachyum re. Shawoi na hta grau lu taw ai kun? Dai gaw tsa ya byin hkyen ai kumla re. N lu ai nhtoi loi na wa yang, n lu ai sha n nga lu sai kun? Rai yang, akyang byin nga sai. Tsa ya tai nga sai. Tsa dawn na matu, sarawun a karum shingtau ra chye ai.

Tsa chyaru lu ai gaw manghkang law ai majaw, Hkristan nkau tsep kawp n lu na matu dawdan da  ai. Nkau gaw n ra ai majaw n lu ai. Hpa mi rai rai, manang ni hta tsa n lu ai langai ngai lawm yang, shi hpe mara hkum tam. Shi a dawdan lam hpe hkungga nna, tsawra myit madun u.

Kade sha lu na ngu ai hpe masat da ai gaw hpaji rawng ai. Bat mi hta kalang sha lu na, shat sha let kachyi mi lu na ngu masat da mai ai. Nkau mi gaw, tinang lu na tsa amyu hpan hpe masat da ai. Tsabyi jahku, biya loi li lu ai raitim, tsa jap hpe n lu ai, kayau nna mung n lu ai. Dai zawn asan sha masat da yang, masat da ai hte maren hkan na matu loi ai. Kunghpan ai Hkristan langai dai zawn tinang hkum tinang masat da ai, masat da ai hte maren hkan ai gaw kaya hpa n re.

Tsa chyaru lu ai hte seng nna dawdan ai shaloi, kaga ni a hkamsha lam hpe mung myit ra ai. “Shan sha na hte tsabyi lu na rai ti mung, na nhpu nnau hpe myit kataw shangun na lam hpa rai ti mung koi gam kau na gaw, mai kaja nga ai” ngu Roma 14:21 hta tsun da ai. Dai hpe gara hku hkan sa lu ai kun? Tsawra myit madun u. Tinang tsa lu ai majaw, langai ngai myit shanut ai nga yang, dai kalang n lu ai sha nga na matu tsawra myit gaw shadut ya na re. Dai gaw kaga ni hpe hkungga ai, tsawra ai lam madun ai re. Tinang a akyu hta na kaga wa a akyu tam ai hte bung ai.—1 Ko 10:24.

Dai hta n-ga, tsa chyaru hte seng nna asuya a upadi ni nga chye ai. Asak n hpring shi ai ni tsa n mai lu ai, tsa lu nna mawdaw, sengke n mai gawt ai, jak rai nkau n mai lang ai ngu ai zawn re ai upadi ni shapraw da chye ai. Dai upadi ni hpe Hkristan ni hkan sa ra ai.—Rom 13:1-5.

Yehowa gaw anhte hpe kumhpa law law jaw da ai. Langai gaw, dai kumhpa ni hpe gara hku akyu jashawn na kun? ngu ai hpe wanglu wanglang lata lu ai ahkang re. Dai hta, hpa sha na, hpa lu na ngu ai dawdan lam lawm ai. Sumsing Kawa ra sharawng na hku dawdan nna, wanglu wanglang lata lu ai ahkang hpe manu shadan ai lam madun mat ga.