1. Moi aten kaw nna Karai a mayam ni hta gara zawn myit jasat nga ai kun?

 YEHOWA hte na a hku hkau lam hpe manu shadan ai kun? Manu shadan na re. Dai zawn manu shadan ai ni moi aten kaw nna law law nga wa ai. (Shk 104:33, 34) Moi na Israela prat hta, Yehowa hpe nawku na matu law law sak jaw wa ai. Shanhte gaw kadai ni kun? Anhte hpa sharin la lu ai kun?

2. (a) Naziri masha ni gaw kadai ni kun? (Bu Hkawm 6:1, 2) (b) Naziri masha hku nga na matu Israela nkau hpa majaw ga shaka tawn ai kun?

² “Naziri” ngu ai gaw, “Lata Da Ai Wa,” “San Tawn Da Hkrum Ai Wa,” shing nrai, “Apnawng Da Ai Wa” ngu lachyum nga ai, Hebre ga si kaw na yu hkrat wa ai re. Dai majaw, Yehowa a magam hpe laklai ai hku magam gun na matu, sak jaw wa ai Israela ni hpe Naziri masha ngu shaga ai gaw, grai htap htuk ai. Mawshe a tara hta, la rai rai, num rai rai aten ladaw langai daram du hkra, Naziri masha hku laksan ga shaka tawn nna nga na matu ahkang jaw ai. a (Bu Hkawm 6:1, 2 hpe hti u.) Naziri ga shaka hkam la da ai wa gaw, kaga Israela ni n hkan sa ra ai lam matsun ni hpe hkan sa ra ai. Rai yang, hpa majaw Naziri masha hku nga na matu ga shaka tawn ai kun? Yehowa hpe grai tsawra nna, Karai jaw na shaman chyeju a matu, chyeju dum ai majaw re.—Trj 6:5; 16:17.

3. Dai ni aten na Karai a mayam ni gaw, Naziri masha ni hte gara hku bung ai kun?

 ³ Mawshe a Tara hpe “Hkristu a tara” hte malai bang kau ai hpang, Naziri masha lamang n nga sai. (Gal 6:2; Rom 10:4) Raitim, dai ni aten Karai a mayam ni gaw, Naziri masha ni zawn sha, myit kraw lawang, myit masin, myit mang lam, n-gun lagaw mahkra hte magam gun mayu ai. (Mrk 12:30) Dai majaw, tinang hkum hpe Yehowa kaw apnawng ai hku nna, sharawng awng let ga sadi tawn ai. Ga sadi dung lu hkra, Karai a magam gun ra na, sak jaw ai lam galaw ra na re. Naziri masha ni shanhte a ga shaka hte maren, gara hku nga wa ai hpe maram yu ai shaloi, tinang mung ga sadi tawn da ai hte maren, gara hku nga lu ai lam chye wa na re. b—Mat 16:24.

SAK JAW U

4. Bu Hkawm 6:3, 4 hku nga yang, Naziri masha ni hpa hpe koi ai kun?

⁴ Bu Hkawm 6:3, 4 hpe hti u. Naziri masha gaw, tsa chyaru yawng, tsabyi hpun na lu malu yawng hpe koi ai. Tsabyi si katsing, jahkraw n sha ai. Kaga Israela ni gaw, tsabyi hpun na lu ai ni hpe lu ai, sha ai. Dai gaw n shut ai. Tsabyi jahku hpe Karai jaw ai kumhpa hku nna Chyum Laika hta tsun da ai. “Tsabyi jahku masha a myit hpe shapyaw ya nga ai” ngu tsun ai. (Shk 104:14, 15) Naziri masha ni chyawm gaw, dai zawn myit pyaw shangun ai lam ni hpe sharawng awng let koi ai. c

5. Midiyam hte Masela gara hku sak jaw wa ai kun? Hpa majaw kun?

⁵ Anhte mung Karai a magam grau gun lu hkra, Naziri masha ni zawn sak jaw ai. Hpunau Midiyam hte madu jan Masela a lam myit yu u. d Shan gaw, bungli, shang gumhpraw kaja ai. Grai hkrak ai nta hte nga lu ai. Raitim, Karai a magam grau gun lu hkra, galai shai lam nkau galaw wa ai. “Jai gumhpraw ni shayawm kau ai. Nta kaji de htawt nga ai. Mawdaw mung dut kau ai” ngu tsun ai. Dai zawn sak jaw ai lam ni n galaw tim mai ai. Raitim, Karai a magam grau gun mayu ai majaw sak jaw  wa ai. Dai majaw, ngwi pyaw myit dik ai prat lu nga ai.

6. Dai ni aten na Hkristan ni hpa majaw sak jaw ma ai kun? (Sumla hpe mung yu u.)

⁶ Karai a magam grau gun lu hkra, dai ni aten na Hkristan ni sak jaw nga ai. (1 Ko 9:3-6) Shut taw ai majaw, Karai Kasang hpyi shawn ai majaw, sak jaw ai n re. Ga shadawn, nkau mi nga yang, ra sharawng ai bungli nga tim n galaw sai. Nga mayu ai nta nga tim n nga sai. Rem mayu ai dusat nga tim n rem sai. Dinghku n de ai sha grai na hkra nga ai. Kashu kasha n la ai. Nta, manaw manang ni hte hka ra tim, grau ra kadawn ai shara hta sa magam gun ai. Yehowa hpe kaja htum sak jaw mayu ai majaw, dai zawn sharawng awng let sak jaw ai re. Karai a magam grau gun lu hkra, nang sak jaw ai lam yawng hpe Yehowa manu shadan ai hpe kam u.—Heb 6:10.

KAGA NI HTE SHAI HKRA SHARAWNG AWNG LET NGA U

7. Naziri masha ni ga shaka grin na matu hpa majaw yak chye ai kun? (Bu Hkawm 6:5) (Sumla hpe mung yu u.)

⁷ Bu Hkawm 6:5 hpe hti u. Naziri masha gaw, Yehowa a matu ga shaka tawn da ai lam madun ai hku nna, kara n zen ai. Dai majaw, Naziri ga shaka tawn ai aten na ai daram, kara galu nga ai majaw, kaga masha ni hte shai nga na re. Lama na, shi hpe hkungga nna, n-gun jaw ai rai yang, shi a ga shaka hte maren nga lu na, kaga ni hte shai hkra nga lu na re. Raitim, Israela labau hta, Naziri masha ni hpe dai zawn n galaw ai aten ni mung nga ai. Myihtoi Amo prat hta, makam masham htak ai Israela ni gaw, “Nazari masha ni hpe tsabyi jahku lu shangun” ai. Tsabyi jahku koi na ngu ai Naziri ga shaka hpe tawt lai shangun mayu ai majaw mai byin ai. (Amo 2:12) Dai majaw, ga shaka grin na matu, kaga ni hte shai na matu nden marai ra ai.

8. Benjamin a mahkrum madup gaw, nang hpe gara hku n-gun jaw ai kun?

⁸ Anhte gaw, kaya chye ai, hkrit chye ai rai yang pyi, Yehowa karum ya ai majaw, kaga ni hte shai hkra nga gwi ai. Nawwe mungdan na asak 10 ning rai sai hpunau Benjamin a lam myit yu u. Majan tsin-yam hkrum nga ai Yukaring mung masha ni maga tsap nga ai lam madun na matu, jawng hta lamang langai galaw ai. Jawng ma ni hpe Yukaring mungdan hpe malai madun ai palawng ni hpun shangun nna, mahkawn hkawn shangun ai. Benjamin gaw lamang kaw n lawm ra hkra, loi tsan ai shara kaw sa  tsap nga ai. Raitim, sarama mu mat nna, “sa wa u, yawng la taw sai” ngu shaga ai. “Ngai gaw mung masa lam hta lapran nga ai. N-gun madun poi ni hta n lawm ai majaw, majan gasat ai hpe madi shadaw ai gaw n re. Anhte Yehowa Sakse ni hta, majan kaw n lawm ai majaw, htawng jahkrat hkrum ai ni grai law hkra nga ai” ngu gwi gwi tsun dat ai. Shi tsun ai hpe sarama hkap la ai. Lamang kaw n lawm shangun sai. Raitim, hpa majaw n lawm ai hpe gawk manang ni san ai. Benjamin hkrit nna, ganoi hkrap ai. Raitim, sarama hpe tsun dan ai zawn, gawk manang yawng hpe bai tsun dan ai. Dai zawn tsun dan gwi hkra, Yehowa karum ya ai ngu hkamsha ai lam, nu yan wa hpe hpang hta tsun dan ai.

9. Gara lam ni hte Yehowa a myit shapyaw ya lu ai kun?

⁹ Yehowa a ga madat mayu ai majaw, mungkan na masha ni hte anhte shai nga ai re. Bungli hta, jawng hta, Yehowa Sakse re ai ngu tsun gwi na matu nden marai ra ai. Mungkan masha ni a myit jasat, arawn alai, grau grau nhkru wa ai majaw, Chyum Laika tsang madang hte maren, anhte asak hkrung na matu, kabu gara shiga hkaw tsun na matu, grau yak wa chye ai. (2 Tm 1:8; 3:13) Raitim, nden marai rawng let, Yehowa hpe n nawku ai ni hte shai hkra nga ai gaw, “[Yehowa] a myit shapyaw ya” lu ai hpe ayan dum nga u.—Gsh 27:11; Mal 3:18.

PRAT HTA YEHOWA HPE SHAWNG TAWN U

10. Bu Hkawm 6:6, 7 hta hpyi shawn da ai hpe hkan sa na matu, Naziri masha hpe hpa majaw yak shangun chye ai kun?

¹⁰ Bu Hkawm 6:6, 7 hpe hti u. Naziri masha gaw, si mang makau de n mai sa ai. Sak jaw lam kaba n re ai ngu shadu na re. Raitim, Chyum Laika prat na makoi mayang htung hta, mang makau de sa nna galaw ra ai lam ni nga ai. Dai majaw, nta masha si ai shaloi, Naziri masha ni a matu grai yak na re. (Yhn 19:39, 40; Kas 9:36-40) Naziri ga shaka tawn da ai majaw, makoi mayang htung ni n mai galaw sai. Grai yawn hkyen nga ai raitim, ga shaka hte maren nga ra ai. Hkamjan lu na matu Yehowa n-gun jaw na gaw teng sha re.

11. Dinghku hte seng nna Hkristan ni hpa hpe dawdan da ra ai kun? (Sumla hpe mung yu u.)

¹¹ Hkristan re ai anhte gaw, apnawng ga shaka hpe ahkyak shatai ai. Dinghku a matu  dawdan ai, galaw ai lam ni hta, dai ga sadi hpe myit shalawm ai. Dinghku lit kangka hkra shakut nga ai raitim, nta masha ni a myit ra ai lam hta na, Yehowa a myit ra ai lam hpe shawng tawn ai. (Mat 10:35-37; 1 Tm 5:8) Kalang lang, Yehowa a myiman lu na matu, nta masha, jinghku ni n ra sharawng ai dawdan lam ni jahkrat ra chye ai.

12. Alezendru hpa galaw ai kun? Hpa n galaw ai kun?

¹² Alezendru hte madu jan Dorina a lam hpe myit yu u. Shan yan laning mi Chyum Laika hkaja ngut ai hpang, Dorina matut n hkaja mat ai. Madu wa hpe mung n hkaja shangun mayu ai. Raitim, Alezendru gaw, matut hkaja mayu ai lam madu jan hpe atsawm tsun dan ai. Dorina gaw n ra ai majaw, matut n hkaja lu hkra galaw ai. Madu jan na hkamsha lam hpe chye na ya na matu shakut yu ai raitim, grai yak ai ngu Alezendru tsun ai. Dorina mara tam ai, grai ninghkap ai majaw, matut n hkaja na matu myit ai aten ni pyi nga ai. Raitim, Yehowa hpe shawng tawn ai. Madu jan hpe mung, tsawra ai, hkungga ai lam madun ai. Alezendru a kaja ai kasi ningli a majaw, Dorina Chyum Laika bai hkaja nna hkalup hkam ai.—“Teng Man Ai Tara Gaw Prat Hpe Galai Shai Ya” (Myen) matut manoi video kaw na, Alezendru hte Dorina Waka: “Tsaw Ra Ai Myit Gaw Galu Kaba Nga Ai, Sumnung Shingdi Nga Ai” (Myen) video hpe jw.org hta yu u.

13. Yehowa hte anhte a nta masha ni hpe tsawra myit gara hku madun lu ai kun?

¹³ Yehowa gaw, dinghku lamang hpe nnan hpang da ya ai. Anhte hpe ngwi pyaw ai dinghku lu shangun mayu ai. (Ehp 3:14, 15, NWT) Dinghku ngwi pyaw mayu yang, Yehowa galaw shangun ai ni hpe galaw ra ai. Dinghku hpe tsawra ai, hkungga ai lam madun nna, shi hpe nawku na matu nang sak jaw ai lam yawng hpe Karai Kasang manu shadan ai.—Rom 12:10.

NAZIRI MASHA A MYIT JASAT NGA NA MATU SHADA DA N-GUN JAW U

14. Kadai ni hpe grau nna n-gun jaw ga tsun na matu shakut ging ai kun?

¹⁴ Yehowa hpe tsawra yang, sharawng awng let sak jaw ra ai. Kalang lang, dai hku galaw na matu n loi ai. Yehowa a matu sak jaw lu hkra, shada da gara hku karum ya lu ai kun? Shada da n-gun jaw hkat ra ai. (Yob 16:5) Nawku hpung hta, Karai a magam grau gun mayu ai majaw, prat hpe asan sha  tawn ai ni nga ai kun? Yak ai raitim, jawng kaw na kaga ni hte shai hkra, nden marai hte nga ai ramma ni hpe chye ai kun? Nta masha ni a ninghkap ai lam hkrum tim, matut sadi dung na matu shakut taw ai Chyum ga sharin ni, hpunau nauna ni nga ai kun? Ahkaw ahkang lu shagu, n-gun jaw ga tsun ga. Shanhte a sak jaw ai lam, nden marai nga ai lam hpe, manu shadan ai lam madun ga.—Hpm 4, 5, 7.

15. Aten hpring magam gun ni hpe nkau gara hku karum ya nga ai kun?

¹⁵ Kalang lang, aten hpring magam gun ni hpe tatut karum ya mai ai. (Gsh 19:17; Heb 13:16) Sri Lanka mungdan na sadi dung ai asak kaba ai nauna langai a lam myit yu u. Shi a pinsin gumhpraw grau jat wa ai. Dai majaw, ja gumhpraw yakhkak tim, Karai a magam hpe matut galaw nga ai, ramma ningshawng nauna lahkawng hpe karum ya mayu ai. Shata shagu, shanhte a matu phone be jaw ya ai. Grai kaja ai myit jasat re.

16. Moi prat na Naziri masha ni a lam kaw na hpa sharin la lu ai kun?

¹⁶ Moi prat na Naziri masha ni a lam kaw nna grai sharin la lu ai. Sumsing kawa Yehowa a lam hpe mung chye wa ai. Anhte gaw Karai a myiman lu mayu ai. Apnawng ga sadi hte maren galaw na matu, sharawng awng let sak jaw mayu ai hpe Karai Kasang kam ai. Shi hpe tsawra ai lam gara hku madun na hpe lata na ahkang jaw ai hku nna anhte hpe shagrau ai. (Gsh 23:15, 16; Mrk 10:28-30; 1 Yh 4:19) Anhte sak jaw ai hpe Yehowa sadi hkrup ai, manu shadan ai ngu ai hpe Naziri masha lamang gaw madun dan ai. Anhte kaja htum sak jaw ai hku nna, Karai a magam matut gun na matu dawdan da ga.