1. Yehowa a lam matsun hpa majaw ra ai kun? Ga shadawn jaw u.

 NAM maling hta lam dam nga ai ngu shingran yu u. Matse labye ni, tuk rawng ai hpun ni, hkrung kanu ni nga ai majaw shoihpa nga ai, hkaraw de mung hkrat chye ai. Gara shara kaw shoihpa nga ai, gara hku koi mai ai hpe atsawm chye nna mahkrum madup nga ai lam madun gaw, tinang hte rau lawm wa yang grai chyeju dum na re. Ndai mungkan gaw nam maling hte bung ai. Grau nna gaw, Karai Kasang hte hku hkau lam hten shangun ai shoihpa ni grai law hkra nga ai. Raitim, anhte hta hkum tsup ai Lam Madun Yehowa nga ai. Shi gaw shoihpa ni hpe koi nna, mungkan nnan hta htani htana asak hkrung na bandung de du hkra woi mat ya na re.

2. Anhte hpe Yehowa gara hku lam matsun ai kun?

² Anhte hpe Yehowa gara hku lam matsun ai kun? Madung gaw Chyum Laika hku nna re. Anhte hpe lam matsun na matu, shinggyim masha ni hpe mung akyu jashawn ai. Ga shadawn, hpaji rawng ai dawdan lam ni jahkrat lu hkra aten dep wenyi lusha lajang ya na matu, “sadi ai hte myit su ai mayam” hpe akyu jashawn ai. (Mat 24:45) Atsam rawng ai kaga la ni hpe akyu jashawn nna mung lam matsun ai. Ga shadawn, ninghtawn hpung kawan, nawku hpung myitsu salang ni kaw nna, shalan shabran lam, lam matsun ni jaw ai. Ndai zawn yakhkak ai hpang jahtum nhtoi ni hta, kam mai ai lam matsun lu nga ai majaw grai chyeju dum hpa re. Dai gaw Karai hte matut hku hkau lu hkra, asak lam ntsa matut hkawm lu hkra karum ya ai.

3. Ndai sumhpa hta hpa lam bawngban na kun?

 ³ N hkum tsup ai la ni kaw na Yehowa lam matsun ai hpe madat na matu, kalang lang yak chye ai. Hpa majaw kun? Shanhte jaw ai lam matsun hpe n ra ai mung rai chye ai. Lam matsun ni gaw tatut n re ai, Yehowa kaw na sa ai n re ai ngu myit la chye ai. Yehowa lam matsun nga ai, lam matsun hpe madat yang she, shaman chyeju lu na hpe kam ra ai. Kam lu na matu (1) Chyum Laika prat na shi a masha ni hpe Yehowa gara hku lam matsun ai kun? (2) dai ni aten gara hku lam matsun ai kun? (3) lam matsun hpe matut hkan sa yang hpa akyu lu na kun? ngu ai hpe ndai sumhpa hta bawngban na re.

ISRAELA NI HPE YEHOWA LAM MATSUN AI LAM

4-5. Israela ni hpe woi awn lam matsun na matu, Mawshe hpe akyu jashawn nga ai lam Yehowa gara hku madun ai kun? (Makawp sumla hpe yu u.)

⁴ Israela ni hpe Egutu mung kaw na shapraw la na matu, Mawshe hpe Yehowa lit jaw ai. Yehowa gaw Mawshe hpe akyu jashawn nna lam matsun ya nga ai hpe, Israela ni asan sha mu lu ai. Ga shadawn, shani aten sumwi shadaw hte lam madun nna, shana aten wan shadaw hte nhtoi jahtoi ya ai. (Pru 13:21) Sumwi shadaw lam madun ai hpe Mawshe hkan ai. Dai hku nna Nawng Hkyeng Hka de du wa ai. Hkan shachyut ai Egutu hpyen hpung hte Nawng Hkyeng Hka a lapran matep mat sai ngu shadu nna, Israela ni grai hkrit mat ai. Mawshe shut nna shaga sa ai ngu shadu ai. Raitim, n shut ai. Yehowa gaw shi a masha ni hpe dai hku shaga sa na matu, Mawshe hpe lam matsun ai re. (Pru 14:2) Yehowa gaw shanhte hpe mauhpa lam hte hkye la ai.—Pru 14:26-28.

⁵ Mawshe gaw, nam maling hta shaning 40 ting, sumwi shadaw lam matsun ai hpang sharawng awng let hkan ai. a Kalang lang, Mawshe a sum chyinghka lam hta sumwi shadaw du nga ai hpe Israela yawng mu lu ai. (Pru 33:7, 9, 10) Yehowa gaw sumwi shadaw kaw na Mawshe hpe ga shaga ai. Yehowa tsun ai ni hpe, Mawshe gaw Israela ni hpe bai tsun dan ai. (Shk 99:7) Lam matsun na matu Mawshe hpe Yehowa akyu jashawn ai lam Israela ni asan sha mu lu ai.

6. Yehowa lam matsun ya ai hpe Israela ni gara hku bai htang ai kun? (Bu Hkawm 14:2, 10, 11)

⁶ Yawn hpa gaw, Mawshe kaw nna Yehowa tsun nga ai lam sakse law law nga tim pyi, Israela law malawng n hkap la ma ai. (Bu Hkawm 14:2, 10, 11 hpe hti u.) Mawshe a lam matsun hpe shanhte chyahkring hkring n gawn n sawn galaw ai. Dai majaw, Yehowa gaw shanhte hpe Ga Sadi Tawn Ai Mung de shang na ahkang n jaw ai.—Bhk 14:30.

7. Yehowa a lam matsun hkan sa wa ai ni a lam tsun dan u. (Bu Hkawm 14:24) (Sumla hpe mung yu u.)

⁷ Israela nkau mi gaw, Karai a lam matsun hpe hkan sa ai. Ga shadawn, “Hkaleb chyawm gaw, . . . nye a hpang htep Iahti hkan nang ai” ngu Yehowa tsun ai. (Bu Hkawm 14:24 hpe hti u.) Dai majaw, Hkaleb hpe kumhpa jaw ai. Ga Sadi Tawn Ai Mung a nga mayu ai shara hpe lata na ahkang pyi jaw ai. (Ysh 14:12-14) Ga Sadi Tawn Ai Mung de shang na ahkang lu ai Israela ni mung, Yehowa a lam matsun hpe madat ma ai. Mawshe a shara hta aya tang hkrum ai Yawshu hpe “shi a prat tup hkrit hkungga mu ai.” (Ysh 4:14) Dai majaw, Yehowa shaman chyeju jaw ai. Ga Sadi Tawn  Ai Mung de shang na ahkang jaw ai.—Ysh 21:43, 44.

8. Hkawhkam ni a prat hta shi a masha ni hpe Yehowa gara hku lam matsun ai kun? (Sumla hpe mung yu u.)

⁸ Shaning grai na ai hpang, shi a masha ni hpe lam matsun na matu, tara agyi ni hpe Yehowa aya tang ai. Dai hpang, hkawhkam prat du ai shaloi gaw, myihtoi ni hpe aya tang ai. Sadi dung ai hkawhkam ni gaw, myihtoi ni a hpaji jaw ga hpe hkan sa ai. Ga shadawn, Hkawhkam Dawi gaw myihtoi Nahtan shading sharai ai hpe shagrit shanem let hkap la ai. (2 Sa 12:7, 13; 1 Hl 17:3, 4) Myihtoi Yehaziela lam matsun ai hte maren, hkawhkam Yehosahpat hkan sa ai. “[Karai Kasang] a myihtoi ni hpe mung kam sham nga mu” ngu Yuda mung masha ni hpe n-gun jaw ai. (2 Hl 20:14, 15, 20) Yakhkak hkrum ai aten hta Hkawhkam Hezekia gaw myihtoi Esaia hpe karum hpyi ai. (Esa 37:1-6) Yehowa a lam matsun hpe hkawhkam ni madat ai aten shagu, shaman chyeju lu ai, mungdan mung ngwi pyaw simsa ai. (2 Hl 20:29, 30; 32:22) Shi a masha ni hpe lam matsun na matu myihtoi ni hpe Yehowa akyu jashawn nga ai lam, masha yawng asan sha chye lu ai. Dai pyi, hkawhkam hte Israela law malawng, myihtoi ni a ga hpe n madat ai.—Yer 35:12-15.

TSA BAN LANGAI NA HKRISTAN NI HPE YEHOWA LAM MATSUN AI LAM

9. Tsa ban langai na Hkristan ni hpe lam matsun na matu kadai ni hpe Yehowa akyu jashawn ai kun? (Sumla hpe mung yu u.)

⁹ A.D. 33 Pentekoti poi hta, Hkristan nawku hpung hpe Yehowa hpawng de wa ai. Gara hku lam matsun ai kun? Nawku hpung a baw hku nna Yesu hpe aya tang ai. (Ehp 5:23) Marai langai hpra hpe, hpa galaw ra na lam Yesu n hkan tsun ai. Yerusalem mare na kasa ni, salang ni hku nna lam matsun ai. (Kas 15:1, 2) Nawku hpung myitsu salang ni hpe aya tang ai.—1 Ht 5:12; Tit 1:5.

10. (a) Lam matsun hpe tsa ban langai na Hkristan ni gara hku bai htang ai kun? (Kasa 15:30, 31) (b) Lam madun na matu Yehowa akyu jashawn nga ai ni hpe Chyum Laika prat na masha nkau hpa majaw n hkap la ai kun? (“ Dan Leng Ai Madi Madun Lam Hpe Nkau Hpa Majaw N Hkap La Ai Lam” ngu ai lawk hpe yu u.)

¹⁰ Tsa ban langai na Hkristan ni gara hku bai htang ai kun? Law malawng gaw, lu la ai  lam matsun ni hpe kabu gara hte hkan sa ai. “Shalan shabran ga majaw, shanhte kabu gara nga ma ai.” (Kasa 15:30, 31 hpe hti u.) Dai ni aten hta, Yehowa gara hku lam matsun nga ai kun?

ANHTE HPE YEHOWA LAM MATSUN AI LAM

11. Woi awn ai ni hpe Yehowa lam madun ai hte seng nna ga shadawn jaw u.

¹¹ Dai ni aten hta mung shi a masha ni hpe Yehowa matut lam madun nga ai. Chyum Laika, nawku hpung a baw Yesu hku nna re. Dai ni aten hta mung, shinggyim masha ni hpe akyu jashawn nga ai, ngu ai madi madun lam ni nga ai kun? Nga ai. 1870 hpang na mabyin ni hpe yu yu ga. Karai a Mungdan gawde ai hte seng nna, 1914 gaw laklai ai shaning rai na ngu ai hpe, Chya Te Rase hte manaw manang ni chye na wa ai. (Dan 4:25, 26) Chyum myihtoi ga ni hkaja ai shaloi chye na wa ai re. Yehowa lam matsun ya ai majaw kun? Re ai. Mungkan a mabyin ni gaw, 1914 hta Karai a Mungdan uphkang hpang sai lam madun ai. Nambat Langai mungkan majan byin ai, ana zinli ni, nnang nawn ai ni, lusha hku hku ai lam ni byin wa ai. (Luk 21:10, 11) Shi a masha ni hpe karum ya na matu, myit ding man ai la ni hpe Yehowa akyu jashawn wa ai re.

12-13. Nambat Lahkawng mungkan majan laman, hkaw tsun ai hte sharin achyin ai bungli grau galaw lu na matu hpa ni galaw wa ai kun?

¹² Nambat Lahkawng mungkan majan laman hpa byin ai hpe mung yu yu u. Shingran 17:8 hpe maram yu ngut ai hpang, Nambat Lahkawng mungkan majan ngut ai hte kalang ta Hara Magedon du na n re ai lam, masha law lu ai daram law law hpe hkaw tsun lu na simsa ai aten naw nga na lam, mungkan ginjaw rung na lit nga ai hpunau ni chye na wa ai. Dai majaw, dai aten hta tatut n re ai zawn rai nga tim, Gilead Jawng hpaw ai, sasana ni hpe shaman ya nna mungkan shara shagu de dat dat ai. Dai hta n-ga, nawku hpung shagu kaw na hkaw tsun masha ni, hkaw tsun ai hte sharin achyin ai bungli hpe tang du hkra galaw lu na matu, Theocratic Sharin Hpawng b hpe sadi dung ai mayam  lajang ya wa ai. Dai hku nna Karai a masha ni gaw, htawm hpang magam bungli a matu jin jin rai wa ai.

¹³ Dai yakhkak ai aten ni laman, shi a masha ni hpe Yehowa lam matsun ya ai hpe asan sha mu lu ai. Nambat Lahkawng mungkan majan ngut ai hpang, mungdan law law hta wanglu wanglang hkaw tsun lu wa ai, masha law law Yehowa a lam chye wa ai.

14. Yehowa a uhpung hte aya tang hkrum ai myitsu salang ni kaw na lu la ai lam matsun hpe hpa majaw kam mai ai kun? (Shingran 2:1) (Sumla hpe mung yu u.)

¹⁴ Dai ni aten na Uphkang Hpung shang ni mung, Yesu a lam matsun hpe matut tam nga ai. Hkristu gara hku lam matsun nga ai hpe chye hkra galaw ai. Ninghtawn hpung kawan ni, myitsu salang ni kaw nna nawku hpung de lam matsun ni jaw ai. c Namman chya hkam ai myitsu salang ni gaw, Hkristu a “hkra lata” e nga nga ai. (Shingran 2:1 hpe hti u.) Myitsu salang ni gaw n hkum tsup ai majaw shut chye ai. Mawshe, Yawshu, kasa ni mung galaw shut ai aten ni nga ai. (Bhk 20:12; Ysh 9:14, 15; Rom 3:23) Raitim, sadi dung ai mayam hte aya tang hkrum ai myitsu salang ni hpe Hkristu lam matsun ya nga ai. “Lamu ga aprat htum hkra” matut nna lam matsun ya na re. (Mat 28:20) Dai majaw, woi awn na matu aya tang da ai ni kaw nna, Yesu lam matsun ya nga ai hpe kam mai ai.

YEHOWA A LAM MATSUN MATUT HKAN SA YANG AKYU LU

15-16. Yehowa a lam matsun hkan ai ni kaw nna hpa sharin la lu ai kun?

¹⁵ Yehowa a lam matsun hkan yang, ya aten hta mung akyu lu ai. Ga shadawn, Endi hte Raban gaw, sadi dung ai mayam hpaji jaw ai hte maren, prat hpe asan sha tawn ai. (Heb 13:5) Dai majaw, uhpung a gawgap masing ni hta shang lawm lu ai. “Kalang lang, shat gawk n lawm ai gawk kaji hta nga ra ai. Sumla dem ai hpe ngai grai ra ai raitim, sumla dem ai hkingrai ni hpe dut kau ra ai. Dai shaloi ngai grai hkrap wa ai. Raitim, Abraham a madu jan Sara zawn kau da ai lam ni hpe n marit nga ai sha, shawng kaw nga ai lam ni hpe sha myit mada na matu dawdan wa ai” ngu nauna Raban tsun ai. (Heb 11:15) Hpa akyu lu ai kun? “Lu malu Yehowa hpe sak jaw da ai majaw grai pyaw ai. Karai jaw ai magam  lit ni gun hpai let, mungkan nnan prat hpe chyim lu ai” ngu nauna Raban tsun ai. “An a aten, n-gun atsam yawng Yehowa a magam hta sak jaw ai majaw grai pyaw ai” ngu Endi tsun ai.

¹⁶ Yehowa a lam matsun matut hkan yang hpa akyu naw lu ai kun? Lahta tsang jawng ngut mat ai shaloi, nauna Masiya ningshawng galaw mayu ai. (Mat 6:33; Rom 12:11) “Dakkasu hta 4 ning hpaji sharin kumhpa lu ai. Raitim, Yehowa hpe kaja htum sak jaw mayu ai majaw, ningshawng prat hpe madi shadaw ya lu ai kan bau hpaji sharin la na matu dawdan kau ai. Dai gaw jahkrat wa ai dawdan lam ni kaw na kaja htum dawdan lam langai re. Ya, aten galu ningshawng magam hta grai pyaw nga sai. Bungli ten hpe tinang hkrai masat lu sai. Behtela hta shawang lit gun na ahkang lu ai. Laksan ahkaw ahkang ni mung lu wa ai” ngu Masiya tsun ai.

17. Yehowa a lam matsun matut hkan yang hpa shaman chyeju ni naw lu na kun? (Esaia 48:17, 18)

¹⁷ Kalang lang, uhpung kaw na anhte hpe makawp maga na matu lam matsun wa chye ai. Ga shadawn, gumhpraw n marin na matu, Karai a tara tawt lai hkrup chye ai shoihpa ni hpe koi na matu sadi jaw chye ai. Dai lam ni hta mung, Yehowa lam matsun ai hte maren hkan yang akyu lu na re. Myit nsam san seng nga na, manghkang ni hpe koi lu na re. (1 Tm 6:9, 10) Rai yang, Yehowa hpe myit masin mahkra hte sak jaw lu na. Grau pyaw na, grau myit dik na, grau myit simsa na re.—Esaia 48:17, 18 hpe hti u.

18. Yehowa a lam matsun matut hkan na matu hpa majaw dawdan da ai kun?

¹⁸ Yehowa gaw ru tsang kaba laman hta mung, shaning 1000 uphkang ai aten hta mung, shinggyim masha ni hpe akyu jashawn nna lam matsun ya mat na re. (Shk 45:16) Tinang n ra sharawng ai lam matsun rai yang pyi madat na kun? Dai aten hta madat na, n madat na gaw, ya aten Yehowa a lam matsun hpe gara hku bai htang nga ai hta grai madung nga ai. Dai majaw, aya tang hkrum ai la ni a lam matsun hpe hkan ga. (Esa 32:1, 2; Heb 13:17) Shoihpa ni hpe koi lu nna, htani htana asak lu shangun ai mungkan nnan de woi awn ya ai Lam Madun Yehowa hpe kam mai ai lam law law nga ai.