1-2. Sadi dung let nawku ai ni hpe Yehowa gara hku saw shaga da ai kun?

 YEHOWA gaw na a matu kaning re ai wa rai kun? Kawa, Karai Kasang, jinghku ngu htai na re. Shing nrai, kaga mahtai mung nga na re. Raitim, Nta Madu hku nna myit ga ai kun?

² Yehowa Karai hte sadi dung let nawku ai ni a hku hkau lam hpe, nta madu hte manam a hku hkau lam hte Hkawhkam Dawi shingdaw wa ai. “Yehowa e, na a Sum hta kadai shanu lu na rai nga a ta? Na a chyoi pra ai bum hta kadai nga lu na rai nga a ta?” ngu san wa ai. (Shk 15:1) Yehowa a manam, jinghku byin lu ai lam, dai chyum daw kaw na chye lu ai. Laksan ahkaw ahkang re.

YEHOWA GAW SHI A SUM HTA SA MANAM SHANGUN MAYU

3. Yehowa a shawng nnan manam gaw kadai kun?

³ Hpa hpe mung n hpan shi yang, ninggawn tawa hta Yehowa hkrai sha nga ai. Hpang e, kasha alat hpe hpan ai. Ga shadawn sum de shawng nnan manam hkap la ai lam re. Kasha hpe kabu gara let hkap la ai, “awng sharawng” ai ngu Chyum Laika hta tsun da ai. Kasha mung, “[Yehowa] a majaw shani shagu kabu gara nga ai.”—Gsh 8:30.

4. Kadai ni gaw Yehowa a jinghku bai byin wa ai kun?

⁴ Yehowa gaw lamu kasa ni hpe bai hpan ai. Shanhte gaw Karai a manam ni byin wa ai. “Karai Kasang a ali ama ni”  ngu shaga hkrum ai. Karai a man hta magam gun lu ai majaw kabu gara ai. (Yob 38:7; Dan 7:10) Shaning grai na ai du hkra, Karai a manam ni gaw, sumsing lamu kaw sha nga ai. Hpang de, mungkan ga hta masha hpe hpan ai shaloi manam jat wa ai. Manam byin wa ai nkau gaw, Enuk, Noa, Abraham, Yoba ni re. Shanhte hpe Karai a jinghku ni, “Karai Kasang hte rau” hkawm ai ni hku nna, Chyum Laika kaw ka da ai.—Nin 5:24; 6:9; Yob 29:4; Esa 41:8.

5. Ezekela 37:26, 27 hta lawm ai myihtoi ga kaw na hpa chye lu ai kun?

⁵ Shi a manam byin wa na matu, jinghku ni hpe tsa ban shaning law law Yehowa matut saw shaga nga ai. (Ezekela 37:26, 27 hpe hti u.) Ga shadawn, Ezekela myihtoi ga hte maren, sadi dung let nawku ai ni hte Karai Kasang hku hkau mayu ai. “Shanhte hte ngwi pyaw ga shaka tawn” na ngu ga sadi jaw ai. Sumsing lamu myit mada lam nga ai ni hte mungkan ga myit mada lam nga ai ni gaw, ga shadawn sum hta, “sagu hpung langai” hku nna kahkyin gumdin wa na aten hpe Ezekela myihtoi htoi wa ai. (Yhn 10:16) Dai aten gaw, ya aten re.

GARA KAW MI NGA TIM KARAI KASANG LANU LAHKU

6. Yehowa a manam gara hku byin lu ai kun? Yehowa a sum gaw gara kaw nga ai kun?

⁶ Chyum Laika prat hta, sum ngu ai gaw shingbyi shara, lamu marang kaw na makawp maga ya lu ai shara re. Tinang a sum hta sa shingbyi ai ni hpe, nta madu ni atsawm sha lanu lahku ya ai. Anhte apnawng hkalup hkam ai aten hta, Yehowa a ga shadawn sum hta manam byin wa ai. (Shk 61:4) Aten dep wenyi malu masha ni n hpaw n-ya lu sha ai. Yehowa a kaga manam ni hte hku hkau lu ai. Shi a ga shadawn sum hta, gara shara kaw na ni sha manam lu ai ngu n masat da ai. Laksan zuphpawng kaba lung na matu, kaga mungdan de du yang du ga na re. Ga shadawn sum hta grai pyaw nga ai ni hte hkrum ga wa na re. Sadi dung let nawku ai ni nga ai shara shagu gaw, Yehowa a sum re.—Shr 21:3.

7. Sadi dung let si mat ai ni gaw, ga shadawn sum kaw manam naw byin nga ai ngu hpa majaw lu tsun ai kun? (Sumla hpe mung yu u.)

⁷ Sadi dung let si mat ai ni hte seng nna gaw gara hku kun? Shanhte gaw ga  shadawn sum hta manam naw tai nga ai kun? Tai nga ai. Hpa majaw dai hku lu tsun ai kun? Yehowa a man hta shanhte asak hkrung nga ai majaw re. Yesu ndai hku tsun ai: “Mawshe pyi dai Madu hpe, Abraham a Karai Kasang, Isak a Karai Kasang, Yaku a Karai Kasang nga nna tsun ai ga hte, si ai ni bai hkrung rawt ai lam, dai singwum hte seng nna ka da ai hta, madun da nga ai. Karai Kasang chyawm gaw si nga ai ni a Karai Kasang n rai, hkrung nga ai ni a Karai Kasang she rai nga ai: yawng mayawng hte gaw, shi a man e hkrung nga ma ai.”—Luk 20:37, 38.

AKYU NI, HPYI SHAWN DA AI LAM NI

8. Yehowa a manam byin ai majaw, anhte hpa akyu lu ai kun?

⁸ Sum gaw shingbyi shara, lamu, marang kaw na makawp maga ya ai shara re. Dai zawn sha, Yehowa Karai Kasang a sum kaw sa manam ai ni gaw, Karai Kasang hte hku hkau lam hkra machyi shangun ai shoihpa ni kaw na, myit mada lam n nga ai lam kaw na makawp maga hkrum ai. Yehowa hte hku hkau nga dingsa, anhte htani htana hkra machyi mat hkra Satan n galaw lu ai. (Shk 31:23; 1 Yh 3:8) Mungkan nnan du ai shaloi, Yehowa gaw sadi dung ai jinghku ni hpe shi hte hku hkau lam hkra machyi shangun ai shoihpa ni kaw na makawp maga ya na. Dai sha n-ga, si hkrung si htan kaw na mung makawp maga ya na re.—Shr 21:4.

9. Manam ni hpe Yehowa hpa hpyi shawn ai kun?

⁹ Yehowa a manam, htani htana jinghku byin lu ai gaw, laksan ahkaw ahkang re. Manam, jinghku matut byin mayu yang, hpa galaw ra ai kun? Marai langai ngai a nta de sa ai shaloi, nta madu hpa ra ai, hpa n ra ai ngu ai hpe chye da mayu na re. Ga shadawn, nta de n shang shi yang, hkyepdin raw shangun mayu ai nga yang, sharawng awng let raw nna shang na re. Dai zawn sha, ga shadawn sum hta matut nga mayu ai ni hpe Yehowa hpa hpyi shawn da ai ngu ai hpe anhte chye mayu ai. Yehowa hpe tsawra nna, “shi a sharawng awng ai lam hpring tup lu la” hkra dang lu ai made shakut nna nga ai. (Kol 1:10, NWT) Yehowa gaw anhte a jinghku raitim, hkungga lara ging ai Karai, Kawa ngu ai hpe galoi mung dum ging ai. (Shk 25:14) Galoi mung hkungga lara ging ai. Hkungga lara ai nga yang, Karai Kasang myit n pyaw na lam ni hpe galaw na n re. Karai Kasang hte rau “myit nem let hkan hkawm” nga na re.—Mik 6:8.

NAM MALING KAW YEHOWA MYIMAN N LATA

10-11. Sina nam mali kaw Israela ni hpe kanawn mazum ai lam gaw Yehowa myiman n lata ai lam gara hku madun ai kun?

¹⁰ Manam ni hpe Yehowa myiman n lata ai. (Rom 2:11) Sina nam mali hta, Israela ni hpe kanawn mazum ai kaw na dai lam hpe chye lu ai.

¹¹ Israela ni hpe Egutu mayam prat kaw na hkye la ngut ai hpang, nawku sum hta magam gun na matu, hkinjawng ni hpe Yehowa san da ai. Lewi la ni hpe gaw, nawku sum hte seng ai kaga lit ni jaw ai. Dai kaw magam gun ai ni, dai makau hta dap jung ai ni hpe grau lanu lahku ai lam n nga ai, myiman n lata ai.

12. Nam mali hta Israela ni hpe kanawn mazum ai lam gaw, Yehowa myiman n lata ai lam kahtap nna gara hku madun ai kun? (Pru Mat 40:38) (Sumla hpe mung yu u.)

 ¹² Nawku sum kaw magam gun tim, n gun tim, dai makau kaw nga tim, n nga tim, dap kaw nga ai ni yawng Yehowa hte hku hkau lam maren lu ai. Ga shadawn, nawku sum ntsa kaw na, sumwi shadaw hte wan shadaw hpe Israela yawng mu lu ai. (Pru Mat 40:38 hpe hti u.) Nawku sum ntsa kaw na sumwi htawt mat ai shaloi, tsan dik htum shara kaw na ni pyi mu lu ai. Dai majaw, rai ni zing ai, sum hpe run ai, ngam ai ni hte rau pru mat wa lu ai. (Bhk 9:15-23) Dap htawt na matu, gumhpraw pahke (pahtau) lahkawng dum nna sadi jaw ai hpe masha shagu na lu ai. (Bhk 10:2) Nawku sum makau kaw dap jung ai majaw, Yehowa hte grau hku hkau mat ai n re ai gaw dan dawng nga ai. Israela amyu kadai raitim, Yehowa a manam mai byin ai. Lam matsun hte makawp maga lam lu mai ai. Dai ni aten hta mung, gara kaw nga ai raitim, Yehowa a tsawra myit, lanu lahku ai lam, makawp maga ai lam hpe anhte lu nga ai.

DAI NI ATEN YEHOWA MYIMAN N LATA AI LAM

13. Dai ni aten Yehowa myiman n lata ai lam gara hku madun nga ai kun?

¹³ Dai ni aten, Karai a mayam nkau gaw, mungkan ginjaw rung (sh) ginjaw garan rung makau kaw nga ai. Nkau nga yang, dai shara kaw magam gun ai. Dai majaw, dai shara kaw na bungli law law kaw shang lawm lu ai. Woi awn ai ni hte kanawn mazum lu ai. Nkau nga yang, hpung kawan bungli (sh) kaga laksan aten hpring magam bungli langai ngai hta shang lawm ai. Law malawng gaw dai zawn ahkaw ahkang n lu ai. Raitim, manam yawng hpe Nta Madu  Yehowa tsawra ai. Langai hpra hpe lanu lahku ai. (1 Pe 5:7) Aten dep malu masha lajang ya ai. Lam matsun jaw nna makawp maga ya ai.

14. Yehowa myiman n lata ai lam gara hku naw chye lu ai kun?

¹⁴ Yehowa myiman n lata ai lam chye lu ai kaga lam langai gaw, mungkan ting na masha ni hpe Chyum Laika lu shangun ai lam re. Madung Chyum Laika hpe Hebre, Aramik, Grik ngu ai amyu ga masum hte ka wa ai. Dai amyu ga ni hpe chye ai ni gaw, n chye ai ni hta na Yehowa hte grau hku hkau ai kun? N re.—Mat 11:25.

15. Yehowa myiman n lata ai lam gara madi madun lam naw nga ai kun? (Sumla hpe mung yu u.)

¹⁵ Mungkan hpaji chye ai majaw, Chyum Laika madung amyu ga masum hpe chye ai majaw, jinghku ngu Yehowa hkap la ai n re. Hpaji chye ai ni hpe sha nyan hpaji jaw ai n re. Hpaji chye tim, n chye tim, mungkan ting na masha ni nyan hpaji lu na matu lajang da ya ai. Chyum Laika hpe amyu ga hkying hku hte ga gale da ai. Dai majaw, Chyum Laika sharin achyin lam ni kaw na shanhte akyu lu la ai. Karai a jinghku byin lu ai lam ni hpe chye lu wa ai.—2 Tm 3:16, 17.

YEHOWA A MAN HTA MATUT MYIMAN PA HKRA NGA U

16. Kasa 10:34, 35 hku nga yang, Yehowa a man hta gara hku matut myiman pa lu ai kun?

¹⁶ Yehowa a ga shadawn sum kaw manam na matu saw shaga hkrum ai gaw shaman chyeju re. Yehowa gaw, matsan dum myit, tsawra myit nga dik htum, manam daw ai hta kangka dik htum Nta Madu re. Gara buga ginra, shingdu labau kaw na raitim, hpaji chye ai, n chye ai, amyu rusai, asak aprat, num, la yawng hpe myiman n lata ai sha saw shaga ai. Raitim, Yehowa gaw shi a tsang madang ni hpe hkan sa ai ni hpe sha, shi a manam hku nna hkap la ai.—Kasa 10:34, 35 hpe hti u.

17. Manam ni kaw na Yehowa a hpyi shawn da ai lam ni hpe gara kaw kahtap chye lu na kun?

¹⁷ Shakawn Kungdawn 15:1 hta tsun da ai hte maren, Dawi gaw ndai hku ga san san wa ai: “Yehowa e, na a Sum hta kadai shanu lu na rai nga a ta? Na a chyoi pra ai bum hta kadai nga lu na rai nga a ta?” Dai ga san hpe htai na matu, chyoi pra ai wenyi hku nna Dawi lam matsun hkrum wa ai. Yehowa a ra sharawng ai lam hpe matut lu na matu, anhte galaw ra na shi hpyi shawn da ai lam nkau hpe hpang na sumhpa hta chye lu na re.