2019 Sin Langchyi hpe madung tawn ai ndai ga san ni hpe nang lu htai na kun?

“Nang hpe hpyen na matu galaw ai ri nhtu, langai mi tai na n rai” ngu ai Karai ga sadi a lachyum gaw hpa rai kun? (Esa 54:17)

“Pawt kahtet” nga ai hpyen ni a gasat ai kaw nna, Yehowa makawp maga ya na hpe anhte kam mai ai. (Esa 25:4, 5) Anhte a hpyen ni gaw galoi mung awng dang na n re.​—w19.01, pp. 6-7.

Hkanan masha ni hte nhkru ai Israela masha ni hpe Karai Kasang hparan ai lam gaw tara rap ra ai ngu ai hpe gara hku chye lu ai kun?

Matsat shabat lam ni re ai nse nsa ai lam ni galaw ai ni hte num ni, ma ni hpe n tara ai hku kanawn mazum ai ni hpe Karai Kasang tara jeyang na re. Shi a ga madat ai ni hte kaga ni hpe tara rap ra ai hku kanawn mazum ai ni hpe gaw shi shaman chyeju jaw ai.​—w19.02, pp. 22-23.

Makam masham n bung ai marai langai akyu hpyi ai shara hta anhte nga taw yang hpa galaw ging ai kun?

Hkungga ai lam madun nna azim sha nga mai ai. Raitim, “amen” ngu nna gaw tsun na n re. Shing nrai, dai kaw nga taw ai ni hte shada da lata jum ai lam mung galaw na n re. Anhte hkrai azim sha akyu hpyi mai ai.​—w19.03, p. 31.

Ma hpe hkum shan roi rip ai gaw kade daram mara kaba ai kun?

Ma hpe hkum shan roi rip ai gaw roi rip hkrum ai wa, nawku hpung, asuya hte Karai Kasang hpe tawt lai ai mara re. Hkum shan roi rip hkrum yang, asuya ni hpe tsun dan ra ai ngu hpyi shawn da ai tara nga ai shara hta rai yang, myitsu salang ni gaw dai tara hpe hkan sa ai.​—w19.05, pp. 9-10.

Myit masin kraw lawang hpe gara hku galai shai nna rawt jat hkra galaw mai na kun?

Madung lam ni gaw: Yehowa hpe akyu hpyi nna ga shaga u. Tinang hkum tinang san jep na ngu bandung tawn nna myit sawn sumru u. Kanawn manang ni hpe hpaji rawng ai hku lata u.​—w19.06, p. 11.

Zingri zingrat lam a matu ya kaw nna hkyen lajang na matu hpa galaw mai na kun?

Yehowa hte anhte a hku hkau lam ngang kang hkra galaw ra ai. Shi gaw anhte hpe tsawra nna, galoi n kau da ai hpe kam u. Chyum Laika hpe shani shagu hti u. Galoi mung akyu hpyi u. Karai Kasang mungdan a shaman chyeju ni teng sha hpring tsup wa na hpe kam u. Nang ra sharawng ai Chyum Daw ni hte shakawn mahkawn ni hpe matsing hkra galaw da u.​—w19.07, pp. 2-4.

Jinghku ni hkye hkrang la hkrum na matu hpa galaw mai ai kun?

Kaja ai sakse hkam ai lam byin na matu kasi kaja madun nna matsan dum myit madun na matu ahkyak ai. Myit galu ra nna hpaji rawng ra ai.​—w19.08, pp. 15-17.

Mahte 11:28 hta Yesu ga sadi jaw da ai hte maren anhte hpe gara hku ban sa ya na kun?

Anhte hta kaja htum woi awn ai ni, kaja htum manang ni hte kaja htum bungli nga ai.​—w19.09, p. 23.

Karai Kasang gaw anhte hpe galaw mayu ai myit hte galaw lu ai n-gun atsam gara hku jaw ai kun? (Hpl 2:13)

Anhte Chyum Laika hti nna myit sawn sumru ai shaloi, Karai Kasang gaw anhte hpe n-gun jaw ai. Galaw mayu ai myit hte galaw lu ai atsam hpe mung jaw ai. Shi a wenyi gaw anhte a atsam ningja ni hpe jat wa shangun ai.​—w19.10, p. 21.

Ahkyak ai dawdan lam ni garai n jahkrat shi yang gara hpaji rawng ai lam ni hpe galaw ging ai kun?

Galaw lu ai lam 5 gaw: Atsawm sawk sagawn u. Hpaji byeng-ya a matu akyu hpyi u. Na a myit jasat hpe san jep u. Tup hkrak re ai bandung tawn u. Tatut rai u.​—w19.11, pp. 27-29.

Satan gaw Ewa hpe n chye si ai wenyi a lam tsun wa ai kun?

N tsun wa ai. Satan gaw Ewa hpe si mat na zawn sha rai na ngu n tsun ai sha, n si ai ngu tsun wa ai. Shut shai ai nawku htung hte seng ai makam masham ni gaw Hka Sha-u Ing ai shaloi n nga mat sai. N chye si ai wenyi ngu ai makam masham gaw Babelon wahpang gap ai masha ni hpe Karai Kasang garai n shabra shi ai kaw nna nga wa ai rai na re.​—w19.12, p. 15.