Tara Jahprang 22:25-27 hta la wa hta mara nga ai ngu tsun da ngut chyalu re ai majaw, shi a mara hte seng nna ahkyak shatai tsun mayu ai n re. Ndai tara gaw num hta mara n nga ai lam hpe madun mayu ai re. Lawu lahta ga yan ni hpe yu yu ga.

Tara Jahprang 22:22, 23 hta, la langai gaw mahtan da ai num langai hte “mare e” shut hpyit ai ngu tsun da ai. Dai hku galaw ai la gaw, num shaw ai re. Hpa majaw nga yang, mahtan da ai num hpe, hkungran ngut sai num hku nna mu mada ai majaw re. Dai num gaw gara hku kun? “Num jan mung mare e rai nga yang, n jahtau wu ai.” Shi jahtau ai nga yang, kaga ni na nna, shi hpe sa hkye la na re. Raitim, shi n jahtau ai majaw, shi hta mung la shaw ai mara nga ai. Lahkawng yan tara jeyang hkrum na re.​—Trj 22:23, 24.

Kaga masa hte seng nna Tara gaw ndai hku bai lam matsun da ai: “La wa gaw, dai mahtan tawn sai mahkawn hpe pa hkan e adip akrip di nna shut ai rai yang gaw la wa hkrai sha si lu na rai nga ai: dai mahkawn hpe hpa mung di lu na n rai; shi hta si ging ai yubak n nga lu ai: kaning rai nme law, la wa dai numsha hpe lam e hkrum nna num jan jahtau ti mung, hkye la na masha n nga ai majaw, dai gaw masha shada sat hkat ai amu zawn rai nga ai.”​—Trj 22:25-27.

Dai masa hta, tara agyi ni gaw num hpe kam ma ai. Gara masa hta rai na kun? “Num jan jahtau ti mung, hkye la na masha n nga ai majaw” ngu nna sawn la ai masa hta re. Dai majaw, num jan hta la shaw ai mara n nga ai. La wa gaw, mahtan da ai num hpe “adip akrip di nna shut ai” majaw, num shaw ai mara nga ai.

Ndai tara gaw num jan hta mara n nga ai ngu tsun da tim, la wa gaw shut hpyit nna num shaw ai ngu jaw ai hku madun da ai. Tara agyi ni gaw ‘dai lam hpe azin ayang gawn yu’ nna, dan leng hkra tsun da ai Karai Kasang a tsang madang ni hta madung tawn nna, dawdan lam jahkrat na hpe anhte kam mai ai.​—Trj 13:15; 17:4; Pru 20:14.