1-2. Ejelito a mahkrum madup gaw hpa galaw na matu anhte hpe sharin ya ai kun?

NA A kanu kawa ni gaw Yehowa Sakse ni rai kun? Rai yang, Yehowa hte shanhte lu da ai hku hkau lam hpe sali wunli hku nna, hpa n galaw ai sha nang lu na n re. Kanu kawa ni Karai Kasang hpe nawku tim, n nawku tim Yehowa hte hku hkau lam hpe tinang nan gawgap ra ai.

² Hpunau Ejelito a mahkrum madup hpe myit yu ga. Shi gaw Sakse Hkam dinghku kaw nna re. Raitim, asak kaji ai shaloi Karai Kasang hte hku hkau lam nau n nga ai ngu hkamsha ai. Shi ndai hku tsun ai: “Nye a nta masha ni Yehowa hpe nawku ai majaw, ngai mung nawku ai re.” Raitim, shi gaw Chyum Laika hpe grau hti nna myit sawn sumru na matu dawdan ai. Bai nna, Yehowa hpe chyahkring hkring akyu hpyi ai. Hpa akyu lu la ai kun? Shi ndai hku tsun ai: “Yehowa hpe tinang nan chye hkra galaw ai lam sha shi hte nihtep lu ai lam re ai hpe chye wa ai.” Ejelito a mahkrum madup gaw ndai ahkyak ai ga san nkau hpe myit yu shangun ai: Yehowa a lam hpe loi mi sha chye ai hte atsawm chye ai gaw hpa shai ai kun? Yehowa hpe atsawm chye hkra anhte hpa galaw mai na kun?

3. Yehowa a lam chye ai hte shi hpe atsawm chye ai gaw hpa shai ai kun?

³ Yehowa a amying hpe chye ai (sh) shi tsun ai, galaw ai lam nkau hpe chye ai nga yang, shi a lam hpe chye sai ngu anhte lu tsun ai. Raitim, Yehowa hpe atsawm chye na matu dai hta  n-ga naw galaw ra ai. Yehowa a lam hte shi a atsam ningja ni hpe hkaja na matu aten jaw ra ai. Rai yang, shi hpa majaw tsun ai, galaw ai ngu ai hpe anhte chye na wa na re. Anhte a ningmu ni, dawdan lam ni hte galaw ai lam ni hpe Yehowa ra sharawng ai kun? n ra sharawng ai kun? ngu ai hpe mung chye wa na re. Yehowa a myit ra ai lam hpe anhte chye yang, dai hpe anhte galaw ra ai.

4. Chyum Laika kasi ningli ni gaw anhte hpe gara hku karum ya ai kun?

⁴ Masha nkau gaw Yehowa hpe anhte nawku mayu ai hpe jahpoi asawng chye ai. Anhte zuphpawng ni lung hpang wa ai shaloi, shanhte gaw grau nna ninghkap wa chye ai. Raitim, Yehowa hpe kamhpa yang anhte hpe shi kau da na n re. Yehowa hte hku hkau lam gawgap ai gaw prat tup grin mat na re. Yehowa hpe dai zawn atsawm chye lu ai kun? Chye lu ai. N hkum tsup ai Mawshe hte Hkawhkam Dawi zawn re ai masha ni a kasi ningli hpe yu nna, dai zawn galaw lu ai hpe chye lu ai. Shanhte galaw wa ai lam ni hpe hkaja yang, ndai ga san lahkawng a mahtai hpe chye lu na re: Yehowa hpe shanhte gara hku chye wa ai kun? Shanhte a kasi ningli kaw nna anhte hpa sharin la lu ai kun?

5. Hpa galaw na matu Mawshe lata wa ai kun?

⁵ Sharin la wa ai hte maren Mawshe galaw. Asak 40 ning daram hta, Mawshe gaw “Hpara-u a shayi sha a kasha” ngu nna masha ni chye na hta, Karai Kasang a masha ni hte kanawn mazum na matu dawdan wa ai. (Heb 11:24) Mawshe gaw gumhkawng ai ahkang aya hpe asum hkam kau ai. Israela ni hpe madi shadaw yang, Hpara-u masin pawt na hpe chye ai. Hpara-u gaw ahkang aya kaba nna Egutu masha ni gaw shi hpe hpara zawn sawn la ma ai. Mawshe hta grai laklai ai makam masham nga ai. Yehowa hpe mung kamhpa ai. Dai zawn kamhpa lam gaw grin ai hku hkau lam a npawt re.​—Gsh 3:5.

6. Mawshe a kasi ningli kaw nna hpa sharin la lu ai kun?

⁶ Anhte hpa sharin la lu ai kun? Mawshe zawn, Karai Kasang hpe nawku na matu, shi a masha ni hte kanawn mazum na matu lata na kun? ngu ai hpe anhte langai hpra dawdan ra ai. Karai Kasang hpe nawku na matu anhte sak jaw ra chye nna Yehowa hpe n chye ai ni a ninghkap ai hpe mung hkrum chye ai. Raitim, Yehowa hpe kamhpa yang shi madi shadaw ya na re.

7-8. Mawshe gaw hpa hpe matut nna sharin la wa ai kun?

⁷ Mawshe gaw Yehowa a atsam ningja ni hpe matut hkaja nna Shi a myit ra ai hpe matut galaw ai. Ga shadawn, bawng masha byin ai kaw nna Israela ni hpe hkye la na matu Mawshe hpe Yehowa tsun ai shaloi, shi hta tinang hkum tinang kam ai myit nau n nga ai. Atsam n hpring ai ngu Yehowa hpe chyahkring hkring tsun wa ai. Raitim, Karai Kasang gaw matsan dum myit hte Mawshe hpe madi shadaw ya na lam tsun wa ai. (Pru 4:10-16) Akyu hku nna, Hpara-u hpe tara jeyang na shiga hpe Mawshe lu tsun wa ai. Hpara-u hte shi a hpyen dap hpe Nawng Hkyeng Hka hta jahten kau nna, Israela ni hpe hkye la wa ai Yehowa a atsam hpe mung Mawshe mu wa ai.​—Pru 14:26-31; Shk 136:15.

⁸ Israela ni hpe Egutu mung kaw nna Mawshe hkye la wa ai hpang, shanhte gaw dai hte seng nna aput angun ayan tsun ma ai. Raitim, Yehowa gaw mayam prat kaw nna Shi nan hkye la wa ai masha ni hpe myit galu wa ai lam Mawshe mu wa ai. (Shk 78:40-43) Israela ni hpe n jahten kau na matu Mawshe tsun ai shaloi, Yehowa gaw myit hpe galai shai  nna, shagrit shanem lam madun wa ai hpe mung Mawshe mu wa ai.​—Pru 32:9-14.

9. Hebre 11:27 hku nga yang Yehowa hte Mawshe kade daram hku hkau ai kun?

⁹ Egutu mung kaw nna pru wa ai hpang, Mawshe gaw Yehowa hte grai hku hkau wa nna, sumsing Kawa hpe mu lu wa ai zawn re. (Hebre 11:27 hpe hti u.) ‘Yehowa gaw jinghku shada shachyen ai zawn Mawshe hte myi man hkrum rai nna shaga ai’ ngu Chyum Laika hta tsun da ai hpe yu yang grai hku hkau ai hpe chye lu ai.​—Pru 33:11.

10. Yehowa hpe atsawm chye na matu anhte hpa galaw ra ai kun?

¹⁰ Anhte hpa sharin la lu ai kun? Yehowa hpe atsawm chye na matu, shi a atsam ningja ni hpe hkaja ai sha n-ga, shi a myit ra ai hpe mung galaw ra ai. Dai ni aten na Yehowa a myit ra ai lam gaw, ‘masha yawng mayawng hkye hkrang la ai hkrum lu nna, teng man ai lam hpe chye chyang’ na matu re. (1 Tm 2:3, 4) Yehowa a myit ra ai lam hpe galaw lu ai lam langai gaw shi hte seng ai lam kaga ni hpe sharin ya ai hku nna re.

11. Yehowa a lam kaga ni hpe sharin ya yang shi hpe gara hku nna atsawm chye wa na kun?

¹¹ Yehowa a lam kaga ni hpe sharin ya magang, tinang gaw shi a lam grau chye wa magang re. Ga shadawn, myit ding man ai masha ni hpe mu na matu, anhte hpe Yehowa lam matsun ai shaloi, shi a matsan dum myit hpe ding tawk mu lu ai. (Yhn 6:44) Anhte hte Chyum Laika hkaja ai ni gaw, shanhte a n kaja ai akyang ni hpe kabai kau nna, gawng shingyan ningnan hpe bu hpun wa ai hpe mu ai shaloi, Karai Mungga a atsam hpe anhte mu lu ai. (Kol 3:9, 10) Karai Kasang gaw hkaw tsun lawk na masha ni hpe shi a lam sharin la na matu hte hkye la na matu ahkaw ahkang jaw ai hpe yu yang, shi a myit galu ai lam hpe anhte mu lu ai.​—Rom 10:13-15.

12. Pru Mat 33:13 hta tsun da ai hte maren Mawshe hpa hpe hpyi shawn wa ai kun? Hpa majaw kun?

¹² Mawshe gaw Yehowa hte hku hkau lam hpe manu shadan ai. Karai Kasang a amying hte mauhpa amu ni hpe galaw ngut ai hpang hta pyi Mawshe gaw Yehowa hpe grau nna chye na matu hkungga let karum hpyi wa ai. (Pru Mat 33:13 hpe hti u.) Mawshe asak 80 jan hta pyi, sumsing Kawa a lam hpe grau nna sharin la mayu ai majaw matut nna hpyi shawn wa ai.

13. Karai Kasang hte anhte a hku hkau lam hpe manu shadan ai lam gara hku sakse madun lu na kun?

¹³ Anhte hpa sharin la lu ai kun? Yehowa hpe nawku wa ai kade daram na sai raitim, Yehowa hte anhte a hku hkau lam hpe ahpa atang n mai sawn la ai. Dai hku n sawn la ai hpe sakse madun lu ai lam langai gaw, shi hpang akyu hpyi ai hku nna re.

14. Karai Kasang a lam hpe sharin la na matu akyu hpyi ai gaw hpa majaw ahkyak ai kun?

¹⁴ Ngang kang ai hku hkau lam langai a madung lam gaw kaja ai matut mahkai lam re. Karai Kasang hte hku hkau mayu yang, chyahkring hkring akyu hpyi nna, kraw lawang na hkamsha lam ni hpe tsun dan na matu galoi mung n mai htingnut ai. (Ehp 6:18) Turaki mung hta nga ai nauna Krista ndai hku tsun ai: “Nye a hkamsha lam hpe akyu hpyi nna Yehowa hpe tsun dan ai. Shi ngai hpe karum ya ai lam hpe mu wa shagu, shi hpe grau tsawra wa nna kamhpa wa ai. Nye a akyu hpyi ga hpe Yehowa mahtai jaw ai. De a majaw, Yehowa hpe Kawa zawn, Manang zawn mu wa ai.”

15. Yehowa gaw Hkawhkam Dawi hpe gara hku tsun wa ai kun?

¹⁵ Hkawhkam Dawi gaw Yehowa Karai Kasang kaw apnawng da ai amyu masha kaw nna shangai wa ai. Raitim, Dawi gaw shi a nta  masha ni a nawku htung hpe hkan sa ai daram hta n-ga galaw wa ai. Karai Kasang hte shi a hku hkau lam hpe gawgap wa nna, Yehowa hpe grai tsawra wa ai. Yehowa gaw Dawi hpe “nye a myit hte tup ai” wa nga nna tsun wa ai. (Kas 13:22) Dawi gaw Yehowa hte gara hku nna hku hkau wa ai kun?

16. Hpan da ai lam kaw nna Yehowa a lam Dawi hpa sharin la wa ai kun?

¹⁶ Dawi gaw hpan da ai lam kaw nna Yehowa a lam hpe sharin la ai. Dawi asak kaji ai shaloi, kawa a sagu ni hpe rem let shinggan kaw aten na na nga wa ai. Yehowa hpan da ai lam ni hpe dai aten kaw nna myit sawn sumru hpang wa ai rai na re. Ga shadawn, shana na lamu hpe Dawi yu dat ai shaloi, manu mana law ai shagan ni hpe mu ai sha n-ga, dai shagan hpe hpan ai wa a atsam ningja ni hpe mung chye wa ai. Dai ni hpe galaw da ai wa a atsam ningja ni hpe shi dinglik yu na re. Dai majaw, ndai lam hpe Dawi ka wa ai: “Sumsing lamu gaw Karai Wa a hpung shingkang gawn dan nna, Lamu madin gaw, shi a lata amu madun ya nga ai.” (Shk 19:1, 2) Shinggyim masha ni hpe hpan da ai lam hte seng nna Dawi myit yu ai shaloi, Yehowa a mauhpa nyan hpaji hpe mu wa ai. (Shk 139:14) Yehowa a amu bungli ni hpe Dawi chye na wa ai hte maren, shagrit shanem ra ai hpe chye wa ai.​—Shk 139:6.

17. Hpan da ai lam kaw nna anhte hpa sharin la lu ai kun?

¹⁷ Anhte hpa sharin la lu ai kun? Hpan da ai lam ni hpe hkaja na matu re. Yehowa hpan da ai tsawm htap ai mungkan hpe aten la nna myit yu mai ai. Dai shaloi nang grai mau mat na re. Yehowa a lam sharin ya ai lam ni hpe shani shagu myit yu u. Na a makau grup-yin na hpan da hkrum ai hpun ni, du sat ni hte masha ni a lam hpe re. Rai yang, nang tsawra ai Kawa a lam hpe shani shagu grau nna sharin la lu na re. (Rom 1:20) Lani hte lani mung shi hpe grau grau nna tsawra wa na re.

18. Shakawn 18 hta tsun da ai hte maren Dawi hpa hpe chye wa ai kun?

¹⁸ Dawi gaw shi hpe Yehowa karum ya nga ai hpe chye ai. Ga shadawn, Dawi gaw kawa a sagu ni hpe hkanghkyi hte tsap a shoihpa kaw nna hkye la wa ai. Shoihpa jaw ai dusat ni hpe sat kau lu hkra, Yehowa karum ya wa ai hpe shi chye ai. Masha numraw hpyen du kaba Goliat hpe gasat awng dang ai shaloi, lam matsun ya ai wa gaw Yehowa re ai hpe Dawi dan dan leng leng mu wa ai. (1 Sa 17:37) Shi hpe manawn ai Hkawhkam Shawlu kaw nna hprawng wa ai shaloi, hkye la ai wa gaw Yehowa re ai hpe mung Dawi chye ai. (Shk 18, ntsa na ga yan) Shi gaw gumrawng ai wa rai yang, dai zawn awng dang ai lam ni gaw shi galaw wa ai ngu hkam la na re. Raitim, Dawi gaw shagrit shanem ai. Dai majaw, shi a prat hta Yehowa a karum shingtau lam hpe chye na wa ai re.​—Shk 138:6.

19. Dawi a kasi ningli kaw nna hpa sharin la lu ai kun?

¹⁹ Anhte hpa sharin la lu ai kun? Yehowa kaw karum hpyi ai hta n-ga galaw ra ai. Shi gara hku karum ya wa ai, galoi aten hta re ai hpe chye hkra mung galaw ra ai. Anhte gaw shadawn sharam sha galaw lu ai hpe shagrit shanem let hkap la yang, anhte a gawng kya ai lam ni hpe Yehowa madi shadaw ya nga ai lam asan sha mu lu na re. Yehowa karum ya ai hpe anhte mu wa magang, shi hte hku hkau lam grau ngang kang wa magang re. Yehowa hpe shaning law law nawku wa ai Hpi Ji mung na hpunau Aisek gaw dai lam teng ai hpe mu wa ai. Shi ndai hku tsun ai: “Nye a prat hpe bai yu dat yang, Chyum Laika hkaja hpang ai kaw nna ya aten du hkra Yehowa karum ya wa ai hpe ngai mu lu ai. Akyu hku nna, Yehowa hte grai hku hkau wa ai.”

20. Dawi hte Karai Kasang a hku hkau lam kaw nna hpa sharin la lu ai kun?

 ²⁰ Dawi gaw Yehowa a atsam ningja ni hpe kasi la ai. Yehowa gaw shi a atsam ningja ni hpe kasi la lu ai atsam nga hkra anhte hpe hpan da ai. (Nin 1:26) Yehowa a kasi ningli ni hpe anhte grau hkaja magang, shi hpe grau kasi la lu magang re. Dawi gaw sumsing Kawa hpe atsawm chye ai majaw, kaga ni hte kanawn mazum ai shaloi, Yehowa hpe kasi la lu wa ai. Ga shadawn langai hpe myit yu ga. Batsheba hte shut hpyit nna, shi a madu wa hpe sat kau ai shaloi, Yehowa hpe shut hpyit wa ai. (2 Sa 11:1-4, 15) Raitim, kaga ni hpe matsan dum myit Dawi madun wa ai majaw, shi hpe mung Yehowa matsan dum myit bai madun wa ai. Dawi gaw Yehowa hte dai zawn hku hkau lam kaja ai majaw, Israela ni tsawra dik ai hkawhkam langai byin wa ai. Kaga Israela hkawhkam ni kasi la na matu shi hpe Yehowa akyu jashawn wa ai.​—1 Hk 15:11; 2 Hk 14:1-3.

21. Ehpesu 4:24 hte 5:1 hta tsun da ai hte maren “Karai Kasang hpe kasi la ai ni” gaw hpa akyu ni lu la na kun?

²¹ Anhte hpa sharin la lu ai kun? “Karai Kasang hpe kasi la ai ni” byin ra ai. Dai hku galaw yang, anhte akyu lu ai sha n-ga, shi hpe mung chye wa na re. Shi a atsam ningja ni hpe kasi la ai gaw, shi a kasha ni re ai hpe anhte sakse madun nga ai re.​—Ehpesu 4:24; 5:1 hpe hti u. *

22-23. Yehowa a lam sharin la nna hkan sa yang hpa akyu lu la na kun?

²² Anhte chye wa sai hte maren, Yehowa gaw shi a hpan da ai lam ni hte Chyum Laika hku nna shi a lam tsun dan ai. Chyum Laika hta, Mawshe hte Dawi zawn re ai anhte kasi la lu ai Karai Kasang a sadi dung ai mayam ni a lam ni lawm ai. Yehowa gaw shi a daw hpe galaw ngut sai. Anhte gaw shi a lam hpe chye lu na matu galaw lu ai lam yawng hpe galaw ra ai.

²³ Yehowa a lam hpe matut nna sharin la ra ai. (Hpj 3:11) Ahkyak ai lam gaw, shi a lam kade daram chye ai n re ai sha, chye da ai lam hpe gara hku tatut hkan sa ai lam re. Anhte sharin la wa ai hpe hkan sa nna, Yehowa hpe kasi la yang, shi hte grau nihtep wa na re. (Yak 4:8) Shi hpe tam ai ni hpe galoi mung n kabai da ai lam shi a Mungga kaw nna anhte chye lu ai.