1. Marai langai ngai hte hku hkau hkra gara hku galaw na kun?

NANG hkrum ai marai langai ngai hte hku hkau na matu, shawng nnan aten la ra ai. Shada da ga shaga nna, myit mang ai lam ni hte mahkrum madup ni hpe tsun dan hkat yang, manang byin wa na re. Raitim, Yesu hte hku hkau hkra shakut ai shaloi hta gaw, mayak mahkak ni nga ai. Hpa majaw kun?

2. Anhte hkrum ai langai ngu na mayak mahkak gaw hpa rai kun?

² Langai, Yesu hte myiman chyaw anhte n hkrum ga ai. Tsa ban langai na Hkristan law law mung, dai zawn re. Raitim, kasa Petru ndai hku tsun ai: “Yesu hpe nanhte n mu yu ti mung, tsaw ra nga ma nit dai; shi hpe garai n mada mu mu ti mung, shi hpe kam sham nga ai.” (1 Pe 1:8) Dai majaw, Yesu hte n hkrum ga tim, shi hte hku hkau ai manang byin lu ai.

3. Anhte hkrum ai lahkawng ngu na mayak mahkak gaw hpa rai kun?

³ Lahkawng, anhte gaw Yesu hte dingtawk ga n lu shaga ai. Akyu hpyi ai shaloi, anhte a myit mang ai lam ni hpe Yehowa kaw dingtawk tsun dan ai. Yesu a amying gang nna akyu hpyi ai raitim, shi hpe dingtawk ga n lu shaga ai. Dai sha n-ga, Yesu mung shi hpang de akyu n hpyi shangun mayu ai. Hpa majaw kun? Akyu hpyi ai gaw nawku daw jau ai lam re ai majaw, Yehowa sha lu ging ai. (Mat 4:10) Raitim, Yesu hpe tsawra ai lam anhte madun mai ai.

4. Masum ngu na mayak mahkak gaw hpa rai kun? Ndai sumhpa hta hpa lam hkaja lu na kun?

⁴ Masum, Yesu gaw sumsing lamu kaw nga ai majaw, shi hte arau nga lu na n re. Raitim, shi a lam law law hpe anhte chye lu ai. Shi hte hku hkau lam ngang kang hkra galaw lu ai lam 4  hpe yu yu ga. Shawng nnan, Hkristu hte hku hkau lam gawgap na matu hpa majaw ahkyak ai hpe hkaja yu ga.

5. Yesu hte hpa majaw manang byin ra ai kun? (“ Yesu Hte Hku Hkau Ai Gaw Yehowa Hte Mung Hku Hkau Shangun” ngu ai lawk hte “ Yesu A Daw Hpe Rap Ra Ai Hku Mu Mada Ai Lam” ngu ai lawk hpe yu u.)

⁵ Anhte gaw Yehowa hte hku hkau lam kaja mayu yang, Yesu hte manang byin ra ai. Hpa majaw re ai hte seng nna lam 2 hpe yu yu ga. Langai, Yesu gaw shi a sape ni hpe ndai hku tsun ai: “Nanhte ngai hpe tsaw ra myit dai rai nna, . . . Wa gaw shi hkum nan nanhte hpe tsaw ra nga ai.” (Yhn 16:27) Shi ndai hku mung tsun ai: “Ngai hta nna n rai yang gaw, kadai mung nye Wa kaw n du wa lu ai.” (Yhn 14:6) Yehowa a manang byin na matu shakut ai shaloi, Yesu hte hku hkau lam n nga yang, chyinghka lam hku n re ai sha, nta kata de shang na matu shakut ai hte bung mat na re. Yesu gaw shi hkum hpe “sagu ni shang ai chyinghka” hte shingdaw nna tsun ai shaloi, dai ga shadawn hpe lang wa ai. (Yhn 10:7) Lahkawng, Yesu gaw Kawa a atsam ningja ni hpe htep lahti kasi la ai. Shi a sape ni hpe ndai hku tsun ai: “Ngai hpe mu yu ai wa gaw, Wa hpe mu yu nu ai.” (Yhn 14:9) Dai majaw, Yehowa a lam chye hkra Yesu a prat hkrun lam hpe hkaja na matu ahkyak ai. Yesu a lam grau hkaja magang, shi hpe grau tsawra wa magang re. Yesu hte hku hkau lam rawt jat wa magang, shi Kawa hpe tsawra ai myit mung rawt jat wa magang re.

6. Yesu hte hku hkau ra ai kaga lam langai gaw hpa rai kun? Sanglang dan u. 

⁶ Anhte a akyu hpyi ga ni mahtai lu na matu, Yesu hte hku hkau ra ai. De a lachyum gaw, akyu hpyi ga jahtum hta “Yesu a amying gang nna” hpyi ai hta n-ga galaw ra ai. Anhte a akyu hpyi ga ni hpe mahtai jaw ai shaloi, Yehowa  gaw Yesu hpe gara hku akyu jashawn wa ai lam chye ra ai. Kasa ni hpe Yesu ndai hku tsun ai: “Nye a amying gang nna, nanhte hpyi mahpyi, ngai madat ya na nngai.” (Yhn 14:13) Anhte a akyu hpyi ga ni hpe madat ya nna, mahtai jaw ai wa gaw Yehowa sha raitim, Shi a dawdan lam ni galaw na matu, Yesu hpe ahkang jaw da ai. (Mat 28:18) Akyu hpyi ga ni hpe Karai Kasang mahtai n jaw shi yang, Yesu a hpaji jaw ga hpe anhte gara hku hkan sa ai lam shawng yu ai. Ga shadawn, Yesu ndai hku tsun ai: “Masha ni a shut hpyit ai hpe nanhte raw kau ya myit yang gaw, nanhte a lamu na Kawa gaw, nanhte a shut hpyit ai hpe mung, raw kau ya na myit dai; Masha ni a shut hpyit ai hpe nanhte n raw kau ya myit yang gaw, nanhte a Kawa mung, nanhte a shut hpyit ai hpe, n raw kau ya na myit dai.” (Mat 6:14, 15) Dai majaw, Yehowa hte Yesu anhte hpe kanawn mazum ai zawn, kaga ni hpe mung dai hte maren kanawn mazum na matu grai ahkyak ai.

7. Yesu a gawng malai hkungga kaw nna kadai ni akyu lu la na kun?

⁷ Yesu hte kaja ai hku hkau lam nga ai ni sha, shi a gawng malai hkungga kaw nna akyu lu la na re. Gara hku chye lu ai kun? “Jinghku wa a matu tinang a asak nawng kau” ya ai ngu Yesu tsun ai. (Yhn 15:13) Ginding aga de Yesu garai n sa shi yang asak hkrung wa ai sadi dung ai ni gaw, shi a lam sharin la nna shi hpe tsawra wa na re. Abraham, Sara, Mawshe hte Rahab ni zawn re ai masha ni gaw, hkrung rawt wa na re. Raitim, Yehowa hpe sadi dung ai dai mayam ni gaw, htani htana asak lu na matu Yesu hte hku hkau lam nga ra ai.​—Yhn 17:3; Kas 24:15; Heb 11:8-12, 24-26, 31.

8-9. Yawhan 15:4, 5 hta tsun da ai hte maren Yesu hte hku hkau yang anhte hpa galaw lu na kun? Dai gaw hpa majaw ahkyak ai kun?

⁸ Anhte gaw Mungdan kabu gara shiga hkaw tsun ai hte sharin achyin ya ai lam hta, Yesu hte arau kabu gara let shang lawm nga ai. Ginding aga kaw Yesu nga wa ai shaloi, shi gaw sara langai re. Sumsing lamu de lung mat wa ai kaw nna, Yesu gaw nawku hpung a baw hku nna, hkaw tsun ai hte sharin achyin ya ai lam hpe matut lam matsun ya nga ai. Shi hte Kawa hpe chye na matu, dang lu ai daram nang karum ya nga ai hpe shi mu nna manu shadan ai. Yehowa hte Yesu karum ya ai majaw sha, ndai bungli ngut kre lu ai re.​—Yawhan 15:4, 5 hpe hti u. 

⁹ Yehowa hpe myit shapyaw ya na matu, Yesu hpe tsawra ai myit nga ra nna, dai hpe matut nga hkra galaw ra ai lam Chyum Laika hta asan sha tsun da ai. Dai majaw, Yesu a manang ni byin na matu anhte galaw lu ai lam 4 hpe hkaja yu ga.

10. Yesu hte hku hkau na matu shawng nnan hpa galaw ra ai kun?

¹⁰ (1) Yesu hpe chye hkra galaw u. Mahte, Marku, Luka hte Yawhan Laika hpe hti ai hku nna chye lu ai. Yesu a lam ni lawm ai Chyum Laika labau ni hpe myit sawn sumru yang, shinggyim masha ni hpe tsawra myit hte Yesu kanawn mazum ai lam chye wa ai majaw, shi hpe tsawra nna hkungga wa na re. Ga shadawn, shi gaw shanhte a Madu raitim, sape ni hpe mayam ni hku nna n kanawn ai. Shanhte hpe shi a hkamsha lam hte myit mang lam ni hpe tsun dan ai. (Yhn 15:15) Shanhte yawn hkyen hkrum yang, shi mung yawn ai. (Yhn 11:32-36) Yesu a shiga hpe hkap la ai ni gaw, shi a manang byin wa ai hpe hpyen ni pyi chye ma ai. (Mat 11:19) Sape ni hte Yesu kanawn mazum ai lam hpe anhte kasi la yang, kaga ni hte hku hkau ai lam rawt jat wa na, grau pyaw wa na, Hkristu hpe grau nna chyeju dum wa na re.

11. Yesu a manang byin na matu lahkawng ngu na lam gaw hpa rai kun? Dai lam gaw hpa majaw ahkyak ai kun?

 ¹¹ (2) Yesu a myit mang ai lam hte galaw ai lam hpe kasi la u. Shi a myit mang ai lam ni hpe anhte atsawm chye nna kasi la magang, shi hte grau nna hku hkau wa magang re. (1 Ko 2:16) Yesu hpe gara hku kasi la mai na kun? Ga shadawn langai hpe yu yu ga. Yesu gaw tinang hkum tinang hta na kaga ni hpe karum ya na matu grau myit ai. (Mat 20:28; Rom 15:1-3) Shi dai hku myit wa ai majaw, shi a prat hpe sak jaw lu nna, kaga ni hpe mara raw ya lu ai. Shi hte seng nna kaga ni tsun ai hpe aloi sha myit n daw ai. (Yhn 1:46, 47) Lai wa sai aten hta, shut ai lam galaw wa ai marai langai hpe prat tup dai zawn sha byin nga na ngu shi n myit ai. (1 Tm 1:12-14) Yesu ndai hku tsun ai: “Nanhte shada tsaw ra ai myit rawng nga myit yang gaw, nanhte nye a sape ni rai nga myit dai gaw, masha yawng mayawng chye lu na ma ra ai.” (Yhn 13:35) Tinang hkum tinang ndai hku san yu u: “Hpunau nauna ni hte simsa hkra, galaw lu ai lam yawng hpe galaw ai hku nna Yesu hpe ngai kasi la nga ai kun?”

12. Yesu a manang byin lu ai masum ngu na lam gaw hpa rai kun? Dai hpe gara hku galaw lu ai kun?

¹² (3) Yesu a hpunau ni hpe madi shadaw u. Namman chya hkam ai hpunau ni hpe anhte madi shadaw ai gaw, shi a matu galaw ya ai hku nna Yesu mu mada ai. (Mat 25:34-40) Namman chya hkam ai ni hpe madi shadaw lu na madung lam gaw, Mungdan shiga hkaw tsun ai hte sape shatai ai magam hta, myit masin mahkra hte shang lawm ai hku nna re. Dai hku galaw na matu, shi hpang hkan ai ni hpe Yesu lam matsun da ai. (Mat 28:19, 20; Kas 10:42) Hkristu a hpunau ni ya galaw nga ai mungkan ting na hkaw tsun magam hpe, “sagu kaga” ni a karum shingtau ai lam hte sha ngut kre lu ai re. (Yhn 10:16) Nang gaw sagu kaga rai yang, ndai bungli hta shang lawm shagu, namman chya hkam ai ni hpe sha n-ga, Yesu hpe tsawra ai lam madun nga ai re.

13. Luka 16:9 hta tsun da ai Yesu a hpaji jaw ga hpe gara hku hkan sa lu ai kun?

¹³ Yehowa hte Yesu lam matsun nga ai bungli hpe madi shadaw na matu, alu gumhpraw shang lawm ai hku nna mung shan a jinghku byin lu ai. (Luka 16:9 hpe hti u.) Ga shadawn, mungkan ting na magam bungli ni a matu alu shang lawm mai ai. Dai alu gumhpraw ni hpe, san san rai nga ai shara ni kaw na kabu gara shiga hkaw tsun ai bungli hpe madi shadaw ai, tengman ai nawku daw jau lam hpe madi shadaw ya nga ai htingnu ni hpe gawgap ai, gram lajang ai, tsin-yam hkrum nga ai ni hpe arung arai madi shadaw ai lam ni hta jailang ai. Tinang a nawku htingnu hta mung alu bang mai ai zawn, ra kadawn nga ai ngu anhte chye da ai ni hpe karum ya mai ai. (Gsh 19:17) Dai lam ni hku nna Hkristu a hpunau ni hpe anhte madi shadaw ya lu ai.

14. Ehpesu 4:15, 16 hku nga yang Yesu a manang byin lu ai mali ngu na lam gaw hpa rai kun?

¹⁴ (4) Hkristan nawku hpung a lamang ni hpe madi shadaw u. Anhte hpe lanu lahku na matu aya tang da hkrum ai ni hte arau jawm galaw ai hku nna, nawku hpung a baw re ai Yesu hte hku hkau lu ai. (Ehpesu 4:15, 16 hpe hti u) Ga shadawn, Nawku Htingnu yawng hpe kaja htum akyu jashawn na matu shakut nga ai. Dai majaw, nawku hpung nkau hpe pawng kau nna, hkaw tsun lawk ni hpe bai lajang ya ai. Dai lam hku nna, Yehowa a uhpung hpe madi shadaw da ai alu gumhpraw ni hpe shayawm nna jailang lu wa ai. Dai majaw, hkaw tsun masha nkau gaw, masa lam nnan hte maren galai shai ra ai lam ni nga wa ai. Sadi dung ai dai hkaw tsun masha ni gaw, shanhte a nawku hpung hta shaning law law nawku daw jau ai lam ni hta  shang lawm wa nna, hpunau nauna ni hte mung grai hku hkau wa ai. Raitim, ya gaw kaga nawku hpung hta shang lawm ra sai. Dai zawn galai shai ai lam ni hta, sadi dung ai sape ni arau jawm galaw ai hpe mu ai shaloi Yesu grai kabu na re.

15. Htawm hpang hta Yesu hte hku hkau lam gara hku rawt jat lu na kun?

¹⁵ Chyoi pra ai wenyi hte namman chya hkrum ai ni gaw, Yesu hte arau htani htana nga lu ai myit mada lam nga nna, Karai a Mungdan hta shi hte arau uphkang lu na re. Shanhte gaw Hkristu hpe teng sha mu lu na, ga shaga lu na, arau kanawn mazum lu na re. (Yhn 14:2, 3) Ginding aga myit mada lam nga ai ni mung, Yesu a tsawra myit hte lanu lahku ai lam lu la na re. Yesu hpe n mu lu tim, kaja ai hku hkau lam nga na re. Shanhte a matu Yehowa hte Yesu galaw ya ai lam ni a majaw, ngwi pyaw lam hkamsha lu na re.​—Esa 9:5, 6.

16. Yesu hte manang byin ai kaw nna anhte hpa shaman chyeju ni lu la na kun?

¹⁶ Shi a manang ni byin na matu, Yesu saw shaga ai hpe anhte hkap la yang, shaman chyeju law law lu la na re. Ga shadawn, ya aten hta mung shi a tsawra myit hte madi shadaw ya ai kaw nna akyu lu la nga ai. Htani htana asak myit mada lam mung nga ai. Ahkyak htum gaw, Yesu a kawa Yehowa hte kaja ai hku hkau lam lu la ai gaw, Yesu hte manang byin ai lam a manu dan dik ai lam re. Yesu a manang ngu nna shaga hkrum ai gaw laksan ahkaw ahkang re.