1. Bai hkrung rawt ai myit mada lam hte seng nna Mettayu ngu ai hpunau kasha hpa tsun ai kun?

 HPUNAU kasha Mettayu gaw, grai sawng ai yawga langai a majaw, ga tsi lajang ai lam law law galaw wa ai. Asak 7 ning hta nta masha ni hte rau JW TV lamang yu nga ai. Lamang jahtum daw hta lawm ai yungwi nsen video gaw, hkrung rawt wa ai tsawra ai ni hpe hkap tau la ai lam re. b Lamang ngut mat ai shaloi, kanu kawa ni a lata hpe jum nna, Mettayu ndai hku tsun ai: “Mu ai i, nu yan wa? Ngai si mat tim pyi bai hkrung rawt wa na re. Ngai hpe la nga u yaw. Hpa n ra ai.” Bai hkrung rawt ai myit mada lam hpe kasha tsep kawp kam ai lam chye lu ai majaw, kanu yan kawa gara hku hkamsha na hpe shingran yu u. 

2-3. Hkrung rawt ai ga sadi hpe hpa majaw chyahkring hkring bai myit ging ai kun?

² Hkrung rawt ai ga sadi hpe anhte yawng chyahkring hkring bai myit ging ai. (Yhn 5:28, 29) Hpa majaw kun? Tinang nan gara aten hta grai sawng ai yawga byin wa na, tsawra ai ni hpe sum kau ra na hpe n chye ai majaw re. (Hpj 9:11; Yak 4:13, 14) Dai zawn mayak mahkak ni hpe hkamjan na matu, hkrung rawt ai myit mada lam gaw karum ya lu ai. (1 Ht 4:13) Anhte hpe sumsing Kawa atsawm chye ai, grai tsawra ai hpe Chyum Laika hta hkrak tsun da ai. (Luk 12:7) Bai jahkrung ya ai shaloi, mi na akyang lailen, matsing nyan ni bai bang ya lu ai du hkra anhte a lam hpe Yehowa atsawm chye ai hpe myit yu u. Anhte hpe grai tsawra ai majaw, htani htana asak hkrung shangun mayu ai majaw, si mat tim pyi bai jahkrung ya na re!

³ Hkrung rawt ai ga sadi hpe anhte hpa majaw kam mai ai kun? “Na kanau gaw asak bai hkrung na ra ai” ngu ai madung Chyum daw a labau kaw na makam masham shangang ya lu ai lam ni hpe  sharin la lu na re. (Yhn 11:23, JCLB) Hkrung rawt ai myit mada lam hpe grau kam wa hkra gara hku galaw mai ai lam hpe mung chye lu na re.

4. Ga sadi langai hpe kam na matu hpa ra ai kun? Ga shadawn tsun dan u.

⁴ Ga sadi jaw ai wa hta, ga sadi hpe hpring tsup hkra galaw ya mayu ai myit sha n-ga, galaw ya lu ai atsam mung nga ai hpe anhte kam yang she, shi jaw da ai ga sadi hpe kam na re. Ga shadawn, nbung laru a majaw, tinang a nta grai hten mat ai ngu shingran yu u. ‘Nta bai gap na matu karum ya na’ ngu manang langai sa tsun ai. Myit kaja ai manang re ai majaw, karum ya mayu ai myit nga ai hpe nang kam ai. Dai sha n-ga, manang gaw gawgap bungli hta grai ram ai wa re. Ra ai hkingrai ni nga ai, karum ya lu ai atsam ngai hpe hpe mung nang kam ai. Rai yang, shi jaw ai dai ga sadi hpe kam na re. Hkrung rawt ai ga sadi hte seng nna gaw gara hku kun? Ga sadi hpe hpring tsup ya mayu ai myit hte hpring tsup ya lu ai atsam, Karai Kasang hta gaja wa nga ai kun?

5-6. Si mat ai ni hpe bai jahkrung ya mayu ai myit Yehowa hta nga ai ngu hpa majaw lu tsun ai kun?

⁵ Si mat ai ni hpe bai jahkrung ya mayu ai myit Yehowa hta nga ai kun? Nga ai. Hkrung rawt ai ga sadi hte seng ai lam hpe Karai Kasang gaw Chyum Laika ka ai masha law law hpe ka shangun wa ai. (Esa 26:19; Hos 13:14; Shr 20:11-13) Yehowa gaw ga sadi jaw ngut yang galoi mung grin ai. (Ysh 23:14) Dai sha n-ga, si mat ai ni hpe bai jahkrung ya na matu myit rawt nga ai. Hpa majaw dai hku lu tsun ai kun?

⁶ Ga shadawn, Yoba tsun ai ga hpe myit yu u. Shi si mat tim pyi, asak bai hkrung wa na hpe Yehowa mu mayu ai lam shi kam ai. (Yob 14:14, 15) Si mat ai mayam yawng hpe mung Yehowa bai mu mayu ai. Ngwi pyaw hkam kaja let bai hkrung rawt wa shangun mayu ai. Yehowa hte seng ai tengman lam n lu sharin la dat ai sha si mat wa ai masha wan law law hte seng nna gaw gara hku kun? Tsawra myit rawng ai Karai gaw, shanhte hpe mung bai jahkrung ya mayu ai. (Kas 24:15) Tinang hte jinghku hku lu na ahkang, mungkan ga hta htani htana asak hkrung na ahkang jaw mayu ai. (Yhn 3:16) Si mat ai ni hpe bai jahkrung ya mayu ai myit Yehowa hta nga ai gaw teng sha re.

7-8. Si mat ai ni hpe bai jahkrung ya lu ai atsam Yehowa hta nga ai ngu hpa majaw lu tsun ai kun?

⁷ Si mat ai ni hpe bai jahkrung ya lu ai atsam Yehowa hta nga ai kun? Nga ai. “Chyahtum chyalai n-gun rawng ai Madu” re ai majaw re. (Shr 1:8) Si ai lam raitim, gara hpyen hpe raitim, gasat lu ai atsam Karai Kasang hta nga ai. (1 Ko 15:26) Ndai lam hpe chye da ai gaw, n-gun jaw lam, shalan shabran lam lu shangun ai. Ga shadawn, nauna Emma Ano ni a dinghku gaw, Nambat II Mungkan majan laman, grai sawng ai makam masham chyam dinglik lam hkrum wa ai. Shi kasha grai tsawra ai ni gaw Nazi htawng hta si mat wa ai. “Si mat ai ni gaw galoi mung asak bai n hkrung sai nga yang, hpyen wa re ai si ai lam gaw, Karai Kasang hta na grau atsam kaba ai zawn byin mat na re” ngu nna kasha hpe Emma shalan shabran ya ai. Yehowa hta na kadai mung, hpa mung atsam n kaba ai. Asak hpe hpan ai chyahtum chyalai n-gun rawng ai Karai gaw, si mat ai ni hpe teng sha bai jahkrung ya lu ai.

⁸ Si mat ai ni hpe Karai Kasang bai jahkrung ya lu ai ngu lu tsun ai kaga lam langai gaw, Karai Kasang hta shadawn sharam n nga ai matsing nyan nga ai majaw re. Karai Kasang gaw shagan langai hpra hpe mying hte shaga ai. (Esa 40:26) Si mat ai ni hpe mung naw matsing ai. (Yob 14:13; Luk 20:37, 38) Shanhte a nsam, akyang lailen, mahkrum madup, matsing nyan ni kaw na hkawt, ahkri ahkrai lam ni hpe matsing nga ai.

9. Hkrung rawt ai ga sadi hpe nang hpa majaw kam ai kun?

 ⁹ Hkrung rawt ai ga sadi hpe jahpring shatsup ya mayu ai myit mung, hpring tsup ya lu ai atsam mung Yehowa hta nga ai majaw, dai ga sadi hpe anhte kam mai ai. Kam mai ai kaga lam langai gaw, si mat ai ni hpe Shi bai jahkrung ya wa ai labau ni nga ai majaw re. Chyum Laika prat hta, Yesu hte hpawn, sadi dung ai la nkau hpe jailang nna si mat ai ni hpe bai jahkrung ya wa ai. Ya, Yawhan daw kaba 11 hta lawm ai Yesu galaw ya wa ai hkrung rawt ai labau hpe hkaja yu ga.

10. Yawdan hka wora hkran hta Yesu hkaw tsun nga ai shaloi hpa byin ai kun? Yesu hpa galaw ai kun? (Yawhan 11:1-3)

¹⁰ Yawhan 11:1-3 hpe hti u. A. D. 32 htum na mahka hta, Behtani kaw na mabyin hpe shingran yu u. Dai mare hta, Yesu hte grai hku hkau ai Lazaru, Mari, Marhta ngu ai kanau kana 3 nga ai. (Luk 10:38-42) Lani mi hta, Lazaru machyi ai majaw kana ni myit tsang nna, Yawdan hka wora hkran de du nga ai Yesu hpang de shiga sa dat ai. Dai shara gaw Behtani kahtawng kaw na lam hkawm sa yang 2 ya na ai. (Yhn 10:40) Yawn hpa gaw, Yesu hpang de shiga du ai aten hta sha Lazaru si mat ai. Manang Lazaru si mat ai hpe chye tim, 2 ya matut nga nna Behtani kahtawng de Yesu du wa ai. Yesu du wa ai aten hta Lazaru si mat ai 4 ya na mat sai. Manang ni a akyu a matu, Karai a hpung shingkang dan leng na matu, Yesu lama ma galaw ya sana re.​—Yhn 11:4, 6, 11, 17.

11. Manang ajet hte seng nna ndai labau kaw na hpa chye lu ai kun?

¹¹ Manang ajet ngu ai gaw hpa hpe tsun mayu ai lam ndai labau kaw na chye lu ai. Myit yu u: Lazaru machyi ai lam sha Yesu hpang de Mari yan Marhta shiga sa ai re. Behtani kahtawng de sa na matu n tsun ai. (Yhn 11:3) Lazaru si mat ai shaloi mung, grai tsan ai shara kaw na sha Yesu bai jahkrung ya dat tim mai ai. Raitim, manang Mari, Marhta ni hte rau nga ya na matu, Behtani mare de Yesu du wa ai. Nang hta mung karum n hpyi ra ai sha, karum ya mayu ai manang nga ai kun? Nga ai nga yang, “ru yak hkrum ai nhtoi” hta kamhpa mai ai wa re ai lam nang chye na re. (Gsh 17:17) Anhte mung Yesu zawn sha kaga ni a matu manang ajet byin ga. Matut nna hpa byin ai hpe chye na matu labau hpe bai yu yu ga.

12. Marhta hpe Yesu hpa ga sadi jaw ai kun? Dai ga sadi hpe Marhta hpa majaw kam mai ai kun? (Yawhan 11:23-26)

¹² Yawhan 11:23-26 hpe hti u. Behtani kahtawng de Yesu du nga ai hpe Marhta na ai shaloi, pru wa nna, “Madu e, nang nang e nga ndai rai taw gaw, ngai yung n si na re” ngu tsun ai. (Yhn 11:21) Yesu she nga nga yang, Lazaru hpe shamai ya lu na re. Raitim, Yesu gaw dai hta grau laklai ai lam galaw ya mayu ai. ‘Na kanau gaw asak bai hkrung na ra ai’ ngu ga sadi jaw dat ai. Dai ga sadi hpe kam mai ai lam hpe mung matut tsun ai. ‘Ngai gaw bai hkrung rawt ai lam hte asak hkrung ai lam rai nga ai.’ Si mat ai ni hpe bai hkrung rawt ya lu ai atsam Karai Kasang  jaw da ai re. Shawng hta mung, si ai nau n na shi ai numsha langai hpe jahkrung ya ya wa nna, lasha langai hpe mung si mat ai shani hta sha, Yesu bai jahkrung ya wa ai. (Luk 7:11-15; 8:49-55) Raitim, Lazaru si mat ai 4 ya na sai majaw, yat wa sai. Shi hpe mung bai jahkrung ya lu ai kun?

13. Yawhan 11:32-35 hta mu lu ai hte maren, Mari hte kaga ni hkrap nga ai hpe mu ai shaloi Yesu gara hku bai htang ai kun? (Sumla hpe mung yu u.)

¹³ Yawhan 11:32-35 hpe hti u. Lazaru a kana Mari mung Yesu hpe sa jahkrum ai. “Madu e, nang nang e nga ndai rai taw gaw, ngai yung n si na re” ngu, Marhta tsun ai zawn tsun ai. Mari hte kaga ni grai yawn nna hkrap nga ai hpe Yesu mu ai shaloi, grai yawn mat ai. Manang Lazaru hpe matsan dum nna myiprwi hkrat wa ai. Tsawra ai wa si mat ai shaloi, kade daram hkamsha ai hpe Yesu chye na ai. Yawn hkyen nna myiprwi hkrat shangun ai si ai lam hpe, grai yeng seng kau ya mayu na gaw teng sha re.

14. Mari hkrap nga ai hpe Yesu bai htang ai lam kaw na Yehowa a lam hpa chye lu ai kun?

¹⁴ Yehowa gaw shalan shabran ya ai Karai re ai lam, Mari hkrap nga ai hpe Yesu bai htang ai lam gaw madun ai. Hpa majaw kun? Shawng na sumhpa hta chye wa ai sai hte maren, Yesu gaw shi Kawa zawn raw hkamsha chye ai wa re. (Yawhan 12:45) Yawn hkyen nga ai manang ni hpe matsan dum nna Yesu myiprwi hkrat ai lam hti lu ai majaw, anhte yawn hkyen nna myiprwi hkrat ai hpe mu yang mung, Yehowa myit hkra machyi nga na hpe chye lu ai. (Shk 56:8) Dai lam hpe chye lu ai gaw, tsawra myit nga ai Madu Karai Kasang hte grau hku hkau wa ai n re i?

15. Yawhan 11:41-44 hta tsun da ai hte maren, Lazaru a lup hta hpa byin wa ai kun? (Sumla hpe mung yu u.)

¹⁵ Yawhan 11:41-44 hpe hti u. Lazaru a lup de Yesu du wa nna, nlung hpe galau kau shangun ai. Mang gaw grai manam taw na sai ngu tsun nna Marhta shingdang ai. Yesu gaw, “Nang kam n yang gaw, Karai Kasang a hpung shingkang nang mu lu na rin dai, ngu nna ngai tsun sade ai, n rai ni?” ngu bai tsun ai. (Yhn 11:39, 40) Dai hpang, sumsing lamu hpe mada yu nna masha hpawng man akyu hpyi ai. Byin wa na lam ni a matu, Yehowa hpe shagrau mayu ai majaw re. Dai hpang, “Lazaru e, pru wa rit” ngu marawn nna shaga dat ai shaloi, lup kaw na Lazaru pru  wa ai. N mai byin ai ngu masha nkau shadu ai lam hpe Yesu galaw dan dat ai.​—2008, January 1, Sin Langchyi (Myen) lm. 31 hta lawm ai “Yesu gaw Lazaru a lup de du na matu, hpa majaw 4 ya na wa ai kun?” ngu ai sumhpa hpe yu u.

16. Yawhan daw kaba 11 hta lawm ai labau gaw, gara hku nna hkrung rawt ai myit mada lam hpe kam wa shangun ai kun?

¹⁶ Yawhan daw kaba 11 hta lawm ai labau gaw, hkrung rawt ai myit mada lam hpe kam shangun ai. Gara lam hku nna kun? ‘Na kanau gaw asak bai hkrung na ra ai’ ngu Marhta hpe Yesu ga sadi jaw da ai hpe dum u. (Yhn 11:23, JCLB) Shi Kawa zawn sha, ga sadi hpe hpring tsup ya mayu ai myit mung, hpring tsup ya lu ai atsam mung Yesu hta nga ai. Si mat ai ni hpe bai jahkrung ya mayu ai myit, masha ni hpe yawn hkyen myiprwi hkrat shangun ai si ai lam hpe yeng seng kau ya mayu ai myit nga ai lam, Yesu a myiprwi ni gaw sakse madun ai. Lup kata kaw na Lazaru pru wa ai aten hta, si mat ai ni hpe bai jahkrung ya lu ai atsam mung nga ai lam Yesu kahtap nna sakse madun dat sai. “Nang kam n yang gaw, Karai Kasang a hpung shingkang nang mu lu na rin dai, ngu nna ngai tsun sade ai, n rai ni?” ngu nna Marhta hpe Yesu ga sadi jaw ai hpe mung myit yu u. (Yhn 11:40) Hkrung rawt ai hte seng ai ga sadi hpring tsup wa na hpe kam ging ai lam re. Raitim, grau kamhpa wa na matu hpa galaw ra na kun?

17. Hkrung rawt ai hte seng ai Chyum Laika labau ni hti ai shaloi hpa hpe dum ra ai kun?

¹⁷ Hkrung rawt ai labau ni hpe hti nna, myit sawn sumru u. Mungkan ga ntsa bai hkrung rawt wa ai marai 8 a lam Chyum Laika hta lawm ai. c Labau langai hpra hpe atsawm hkaja u. Hkrung rawt wa ai num, la, ma ni gaw, gaja wa nga wa ai ni re ai hpe dum u. Sharin la lu ai lam ni tam u. Si mat ai ni hpe bai jahkrung ya mayu ai myit mung, jahkrung ya lu ai atsam mung Karai Kasang hta nga ai lam, labau langai  hpra gaw gara hku madun dan nga ai hpe myit yu u. Laksan hku nna, Yesu a hkrung rawt ai labau hpe atsawm myit yu u. Dai gaw, ahkyak htum hkrung rawt ai labau re. Yesu hkrung rawt ai hpe shagrin ya lu ai myi mu sakse ni tsa lam hku nga ai. Yesu a hkrung rawt ai lam gaw, anhte kamsham ai a madung lam langai re.​—1 Ko 15:3-6, 20-22.

18. Hkrung rawt ai lam hte seng ai mahkawn ni kaw na akyu lu na matu hpa galaw ra na kun? (Lawu matsing hpe mung yu u.)

¹⁸ Hkrung rawt ai myit mada lam hte seng ai mahkawn ni hpe madat u, mahkawn u, myit yu u. d (Ehp 5:19) Dai mahkawn ni gaw, hkrung rawt ai myit mada lam hpe grau kam wa hkra karum ya ai. Dinghku nawku hta, mahkawn ni hpe madat u, shaman u, mahkawn ga yan ni hpe bawngban u. Matsing hkra galaw u. Rai yang, tinang nan machyi kaba hkrum ai shaloi, tsawra ai ni si mat ai shaloi, dai mahkawn ni hpe dum na matu, mahkawn ni kaw na shalan shabran lam hte n-gun lu na matu, chyoi pra ai wenyi gaw karum ya na re.

19. Hkrung rawt ai lam hte seng nna hpa ni shingran yu mai ai kun? (“ Shanhte Hpe Hpa Ni San Na Kun?” ngu ai lawk hpe yu u.)

¹⁹ Shingran yu u. Shingran yu lu ai atsam anhte hpe Yehowa jaw da ai. Nauna langai ndai hku tsun dan ai: “Tinang hkum tinang mungkan nnan hta du nga ai ngu shingran yu ai. Hparadisu hta pu tsawm nga ai numri pan ni a sama lu ai du hkra shingran yu ai.” Dai sha n-ga, Chyum Laika prat kaw na sadi dung ai num, la ni hte hkrum ai ngu shingran yu u. Kadai hpe mu mayu ai kun? Mu yang hpa ni san na kun? Si mat ai tinang tsawra ai ni hte bai hkrum zup ai ngu nna mung shingran yu u. Mu ai hte hpa tsun na ni, alum ala hte ahpum dat na lam ni, myiprwi hkrat ai du hkra grai pyaw nga na zawn re ai ahkri ahkrai lam ni hpe shingran yu u.

20. Anhte hpa dawdan da ging ai kun?

²⁰ Hkrung rawt ai hte seng ai ga sadi jaw da ai majaw Yehowa hpe chyeju dum hpa re. Dai ga sadi hpe hpring tsup ya mayu ai myit sha n-ga, galaw ya lu ai atsam mung Yehowa hta nga ai majaw teng sha hpring tsup wa na hpe kam mai ai. Dai ga sadi hpe grau kam wa hkra matut galaw na matu dawdan da ga. Rai yang, ‘Nang tsawra ai ni asak bai hkrung wa na’ ngu, anhte langai hpra hpe ga sadi jaw da ai Karai Kasang hte grau hku hkau wa na re.