1. Zuphpawng ni hta hpa majaw mahtai jaw ai kun?

 NAWKU zuphpawng ni hpe anhte hpa majaw lung ai kun? Madung gaw, Yehowa hpe shakawn na matu re. (Shk 26:12; 111:1) Yakhkak ai ndai aten hta, shada da n-gun jaw na matu mung re. (1 Ht 5:11) Lata sharawt nna mahtai jaw ai gaw, Karai Kasang hpe shakawn ai lam byin shangun nna, hpunau nauna ni hpe mung n-gun lu shangun ai.

2. Zuphpawng ni a gara daw ni hta mahtai jaw mai ai kun?

² Bat lapran zuphpawng ni hta mahtai jaw na matu ahkaw ahkang law law nga ai. Ga shadawn, Sin Langchyi hkaja hpawng ni hta mahtai jaw lu ai. Bat lapran zuphpawng ni hta lawm ai Wenyi Sut Gan Ni, Hpung Chyum Laika Hkaja Hpawng hte kaga san htai bawngban ai daw ni hta mahtai jaw lu ai.

3. Mahtai jaw ai hte seng nna hpa mayak mahkak ni hkrum chye ai kun? Hebre 10:24, 25 gaw gara hku karum ya ai kun?

³ Anhte yawng Yehowa hpe shakawn mayu ai. Hpunau nauna ni hpe n-gun jaw mayu ai. Raitim, mahtai jaw ai shaloi mayak mahkak ni nga chye ai. Mahtai jaw na matu hkrit ai, (sh) mahtai grai jaw mayu tim nau n shaga hkrum ai. Dai mayak mahkak ni hpe gara hku tawt lai lu ai kun? Hebre Hkristan ni hpang de kasa Pawlu ka ai laika hta mahtai mu lu ai. Rau zuphpawng ai a ahkyak ai lam hpe Pawlu tsun ai aten hta, “shada da hpe shadum shahprang” u ngu tsun ai. (Hebre 10:24, 25 hpe hti u.) Tinang a makam masham hpe madun dan ai mahtai kadun langai sha pyi, zuphpawng lung ai yawng hpe n-gun lu shangun ai hpe dum yang, lata sharawt na matu  hkrit ai myit yawm wa na re. Shing nrai, tinang nau n shaga hkrum tim, kaga ni mahtai jaw na ahkang lu ai majaw kabu ya mai ai.​—1 Pe 3:8.

4. Ndai sumhpa hta gara lam 3 hpe bawngban na kun?

⁴ Mahtai jaw na masha nau n nga ai nawku hpung kaji hta, shada da gara hku n-gun jaw lu ai kun? Mahtai jaw na masha law ai nawku hpung kaba hta, shada da gara hku n-gun jaw lu ai kun? Kaga ni n-gun lu na matu gara zawn mahtai jaw lu ai kun? Ndai sumhpa hta dai lam 3 hpe bawngban mat na re.

5. Zuphpawng kaw masha nau n law yang shada da gara hku n-gun jaw lu ai kun?

⁵ Nawku hpung kaji (sh) hpung kaji ni hta mahtai jaw ai masha nau n nga ai. Kalang lang, woi awn ai wa grai na hkra la ya yang she, langai daram lata sharawt wa ai. Dai hku rai yang, zuphpawng gaw lagawn na zawn rai mat nna, n-gun mung nau n lu mat sai. Nang hpa galaw lu ai kun? Chyahkring hkring lata sharawt ya mai ai. Rai yang, kaga ni mung lata sharawt mayu ai myit nga wa na re.

6-7. Mahtai jaw na matu hkrit ai myit yawm hkra hpa galaw lu ai kun?

⁶ Mahtai jaw na matu hkrit yang gaw gara hku kun? Masha law law hkrit chye ai. Rai yang, hpunau nauna ni hpe grau n-gun jaw lu hkra, hkrit ai myit yawm hkra galaw lu ai lam ni hpe tam yu u. Gara hku tam mai na kun?

⁷ Hpaji jaw ga nkau hpe Sin Langchyi ni hta tam mai ai. b Ga shadawn, atsawm hkyen lajang u. (Gsh 21:5) Sumhpa hta lawm ai lam hpe atsawm chye na yang, mahtai jaw na matu grau loi na re. Kadun dawk htai u. (Gsh 15:23; 17:27) Mahtai kadun yang, htai na matu nau myit tsang sana n re. Ga yan langai lahkawng sha lawm ai mahtai kadun ni gaw, galu ai mahtai ni hta na grau chye na loi ai. Ga shaga ai zawn kadun dawk htai ai gaw, atsawm hkyen lajang da ai lam, tsun mayu ai lam hpe atsawm chye na ai lam madun ai re.

8. Nang dang lu ai daram shakut ai hpe Yehowa gara hku sawn la ai kun?

⁸ Hpaji jaw ga hte maren chyam yu tim, kalang, lahkawng lang hta jan nna n htai gwi ai nga yang gaw gara hku kun? Nang dang lu ai daram shakut ai hpe Yehowa manu shadan ai hpe kam u. (Luk 21:1-4) Kaja htum sak jaw ai ngu ai gaw, n dang di ai hpe galaw ai n re. (Hpl 4:5) Tinang hpa galaw lu ai hpe myit yu u. Bandung tawn u. Myit simsa na matu akyu hpyi u. Shawng nnan, kadun dawk mahtai langai jaw na matu bandung tawn u.

9. Nawku hpung kaba ni hta hpa mayak mahkak ni nga ai kun?

⁹ Hkaw tsun masha law ai nawku hpung ni hta, mayak mahkak langai mi nga ai. Mahtai jaw na ni law ai majaw, nau n shaga hkrum ai baw byin chye ai. Ga shadawn, nauna Den-ye gaw zuphpawng ni hta mahtai jaw ai hpe grai ra sharawng. c Dai hpe nawku dawjau ai lam a daw langai, kaga ni hpe n-gun jaw ya lu ai ladat, tinang a makam masham ngang kang hkra galaw lu ai ladat ngu nna sawn la ai. Raitim, nawku hpung kaba de htawt mat ai majaw, lata sharawt ai shaloi nau n shaga hkrum ai. Kalang lang, zuphpawng ngut mat tim, mahtai n lu jaw dat ai. “N-gun n lu ai zawn hkamsha ai. . . . Ahkaw ahkang sum mat ai  zawn hkamsha ai. Aten na wa ai shaloi, dingsang n shaga ai kun ngu nna pyi myit hkrup wa ai” ngu tsun ai.

10. Mahtai jaw na ahkang law law lu hkra hpa galaw mai ai kun?

¹⁰ Nauna Den-ye zawn hkamsha ga ai kun? Rai yang, lata n kam sharawt mat ai baw, zuphpawng hta madat sha madat mayu ai baw byin wa chye ai. Mahtai n jaw ai sha hkum nga. Hpa galaw mai ai kun? Zuphpawng yawng a matu mahtai law law shajin da mai ai. Rai yang, zuphpawng nnan daw hta mahtai n lu jaw yang pyi, hpang na daw ni hta mahtai jaw na matu ahkaw ahkang nga taw na re. Sin Langchyi hkaja hpawng a matu hkyen lajang ai shaloi, laika pang shagu gaw sumhpa a madung lam hte gara hku matut mahkai nga ai hpe myit yu u. Rai yang, sumhpa ting hta mahtai jaw lu ai lam langai n rai yang langai gaw nga na re. Dai sha n-ga, sung htum ai sharin achyin lam ni lawm ai laika pang ni a matu, mahtai shajin da mai ai. (1 Ko 2:10) Hpa majaw kun? Dai zawn daw ni hta mahtai jaw ai ni nau n nga chye ai majaw re. Ndai hpaji jaw ga ni hte maren chyam yu tim pyi, mahtai jaw na ahkang n lu ai bat loi mi na wa sai nga yang gaw gara hku kun? Zuphpawng n hpang shi yang, woi awn ai hpunau kaw sa nna, gara ga san hpe mahtai jaw mayu ai lam tsun dan da mai ai.

11. Hpilipi 2:4 hta hpa n-gun jaw da ai kun?

¹¹ Hpilipi 2:4 hpe hti u. Kaga ni a akyu hpe myit shalawm ya na matu, Hkristan ni hpe kasa Pawlu n-gun jaw da ai. Zuphpawng ni hta, dai hpaji jaw ga hpe gara hku tatut hkan sa mai ai kun? Tinang zawn sha, kaga ni mung mahtai jaw mayu ai hpe dum ai hku nna re.

12. Zuphpawng ni hta kaga ni hpe n-gun jaw lu ai lam langai gaw hpa rai kun? (Sumla hpe mung yu u.)

 ¹² Ga shadawn, manang ni hte ga shaga ai shaloi, tinang chyu sha tsun na kun? N tsun ai. Kaga ni hpe mung tsun shangun mayu na re. Dai zawn sha, zuphpawng ni hta anhte masha law law hpe mahtai jaw na ahkang lu shangun mayu ai. Hpunau nauna ni hpe n-gun jaw ya lu ai kaja htum lam langai gaw, shanhte a makam masham hpe hpaw tsun na matu ahkaw ahkang jaw ai re. (1 Ko 10:24) Lam nkau hpe yu yu ga.

13. Masha law law mahtai jaw na ahkang nga hkra hpa galaw lu ai kun?

¹³ Lam langai gaw, masha law law mahtai jaw lu hkra, kadun dawk mahtai jaw ai hku nna re. Ndai daw hta, myitsu salang ni, kunghpan ai hkaw tsun masha ni gaw kasi madun mai ai. Mahtai kadun ai nga yang pyi, lam law law tsun shalawm ai hpe koi u. Laika pang ting hpe htai dat yang, kaga ni mahtai n lu jaw mat na. Ga shadawn, ndai laika pang hta hpaji jaw ga lahkawng lawm ai. Kadun dawk htai na matu hte lam law law shalawm nna n htai na matu re. Lama na, ndai laika pang hpe mahtai jaw na matu shawng nnan shaga hkrum yang, lam langai hpe sha htai u. Rai yang, hpang na masha ni a matu mahtai ngam na re.

14. Lata kade lang sharawt na ngu ai hpe dawdan ai shaloi hpa gaw karum ya na kun? (Sumla hpe mung yu u.)

¹⁴ Lata kade lang sharawt na ngu ai hpe dawdan ai shaloi, rap ra ai lam nga ra ai. Chyahkring hkring lata sharawt taw ai nga yang, n htai shi ai ni nga tim, woi awn ai wa gaw gawng machyi nna tinang hpe shaga kau dat ai baw byin chye ai. Rai yang, kaga ni myit daw wa na re.​—Hpj 3:7.

15. (a) Mahtai jaw na matu n shaga hkrum ai shaloi gara hku bai htang ging ai kun? (b) Zuphpawng woi awn ai wa gaw marai shagu hpe myit tau ya ai lam gara hku madun mai ai kun? (“ Zuphpawng Woi Awn Ai Wa A Matu Hpaji Jaw Ga” ngu ai lawk hpe yu u.)

¹⁵ Hpunau nauna grai law hkra lata sharawt ai shaloi, anhte htai mayu ai daram htai lu na n re. Kalang lang, n lu htai dat ai baw pyi byin chye ai. Myit daw na zawn byin chye ai. Raitim, n shaga hkrum ai shaloi masin n pawt ging ai.​—Hpj 7:9.

16. Mahtai jaw ai ni hpe gara hku n-gun jaw lu ai kun?

¹⁶ Tinang htai mayu ai daram n lu htai ai nga yang, kaga ni htai ai hpe atsawm madat mai ai. Zuphpawng ngut mat ai shaloi, mahtai a matu shakawn ya mai ai. Dai gaw mahtai jaw ai hte bung nna, hpunau nauna ni hpe n-gun lu shangun ai. (Gsh 10:21) Dai  zawn shakawn ya ai gaw shada da n-gun jaw lu ai kaga lam langai mung re.

17. (a) Ma ni a asak hta hkan nna mahtai ni hpe gara hku shajin ya mai ai kun? (b) Video hta lawm ai hte maren, mahtai hpe shajin lu ai lam 4 gaw hpa ni rai kun? (Lawu matsing hpe mung yu u.)

¹⁷ Zuphpawng ni hta shada da gara hku n-gun naw jaw lu ai kun? Nang gaw kanu kawa rai yang, kasha ni hpe asak hta hkan nna mahtai ni shajin ya mai ai. (Mat 21:16) Kalang lang, dinghku hte seng ai lam, akyang lailen hte seng ai zawn re ai sung htum ai lam ni hpe bawngban chye ai. Raitim, ma ni mahtai jaw lu ai laika pang langai, lahkawng daram gaw nga chye ai. Lata sharawt shagu shaga hkrum na n re ai hpe mung, ma ni chye na hkra tsun dan da u. Dai hku tsun dan ai gaw,  tinang n re ai sha, kaga ni shaga hkrum ai shaloi, myit n daw na matu karum ya ai.​—1 Tm 6:18. d

18. Mahtai jaw ai shaloi tinang hpe myit maju jung hkra galaw ai hpe gara hku koi lu ai kun? (Ga Shagawp 27:2)

¹⁸ Anhte yawng Yehowa hpe shagrau ai lam byin shangun ai, hpunau nauna ni hpe madi shadaw ya ai lam byin shangun ai mahtai ni hpe shajin mai ai. (Gsh 25:11) Kalang lang, tinang a mahkrum madup ni tsun shalawm mai tim, tinang a lam grai law hkra tsun ai hpe koi ging ai. (Ga Shagawp 27:2 hpe hti u; 2 Ko 10:18) Yehowa Karai Kasang, Karai a Mungga, Karai a amyu masha ni a lam hpe grau myit maju jung ging ai. (Shr 4:11) Laika pang a ga san gaw, tinang a lam hpe htai shangun ai nga yang htai ging ai. Ga shadawn, hpang na laika pang hta dai zawn ga san san da ai.

19. (a) Zuphpawng lung ai masha yawng hpe myit tau ya ai lam madun ai shaloi hpa akyu lu na kun? (Roma 1:11, 12) (b) Zuphpawng ni hta mahtai jaw ai lamang hte seng nna nang hpa hpe ra sharawng ai kun?

¹⁹ Mahtai jaw ai hte seng nna rit kawp tara san san gaw n nga tim, shada da a matu n-gun jaw lam byin ging ai. Ga shadawn, masha n law ai nga yang, chyahkring hkring mahtai jaw mai ai. Masha law ai nga yang, lu ai ahkaw ahkang hte myit dik mai ai. Kaga ni mung mahtai jaw na ahkang lu ai majaw kabu ya mai ai. Nawku zuphpawng ni hta kaga ni a akyu hpe myit shalawm na nga yang, anhte yawng shada da n-gun jaw na ahkang lu na re.​—Roma 1:11, 12 hpe hti u.