1-2. Mungkan nnan hpe la nga ai laman anhte hpa galaw ra ai kun?

 NHKRU ai ndai mungkan a shara hta, ding hpring ai mungkan nnan hpe malai bang kau sana ngu ai Yehowa a ga sadi hpe anhte grai manu shadan ai. (2 Pe 3:13) Mungkan nnan galoi du wa na hpe tup hkrak n chye tim, nau n la ra sai lam, ya aten na mungkan a masa ni gaw madun nga ai.​—Mat 24:32-34, 36; Kas 1:7.

² Tengman ai lam hta shaning law law nga wa ai rai yang pyi, Karai a ga sadi ni hpe kam ai myit ngang kang hkra anhte yawng shakut ra ai. Hpa majaw kun? Ngang kang ai makam masham pyi, n-gun yawm wa chye ai majaw re. Makam masham n nga ai hpe “kap loi la ai yubak” ngu nna Pawlu tsun wa ai. (Heb 12:1) Dai majaw, anhte a makam masham n-gun n yawm mat hkra, mungkan nnan gaw gaja wa byin wa na hpe sakse madun ai madi madun lam ni hpe ayan bai maram ra ai.​—Heb 11:1.

3. Ndai sumhpa hta hpa lam hkaja na kun?

³ Ndai sumhpa hta, mungkan nnan ga sadi hpe kam ai myit ngang kang hkra galaw lu ai lam 3 hpe bawngban na re. (1) Gawng malai jahpu a lam myit ai, (2) Yehowa a n-gun atsam a lam myit ai, (3) Yehowa hte hku hkau shangun ai lam ni hpe galaw ai hta bungli law nga ai hku nna re. Dai hta n-ga, Habaku hpe Yehowa tsun ai ga ni gaw, dai ni aten hta makam masham ngang na matu gara hku karum ya ai hpe mung bawngban na re. Shawng nnan, ngang kang ai makam masham nga ra ai masa ni hpe hkaja yu ga.

 Ngang Kang Ai Makam Masham Ra Ai Masa Ni

4. Gara masa ni hta ngang kang ai makam masham ra ai kun?

⁴ Shani shagu ngang kang ai makam masham ra ai dawdan lam ni hpe jahkrat ra ai. Ga shadawn, manaw manang, shangwi shapyaw lam, hpaji lam, dinghku lam, kashu kasha lam, kan bau bungli lam hte seng ai dawdan lam ni jahkrat ra ai aten ni hta re. Dawdan lam jahkrat ai shaloi, ‘Ndai mungkan gaw chyahkring sha re, kade n na yang mungkan nnan du wa sana hpe kam ai lam nye a dawdan lam ni gaw madun nga ai kun? (sh) Htani htana asak hkrung lu ai hpe n kam ai masha ni zawn ngai dawdan nga ai kun? ngu tinang hkum tinang san u. (Mat 6:19, 20; Luk 12:16-21) Mungkan nnan grai ni wa sai ngu ai makam masham ngang kang yang, kaja htum dawdan lam ni jahkrat lu na re.

5-6. Myit daw nna n-gun yawm nga ai aten hta hpa majaw ngang kang ai makam masham ra ai kun? Ga shadawn jaw u.

⁵ Ngang kang ai makam masham ra ai mayak mahkak ni hpe anhte hkrum ai. Zingri zingrat lam, machyi jung ai, myit daw shangun ai masa ni hpe anhte hkrum chye ai. Nnan hta gaw, dai lam ni hpe hkamjan lu na re ngu myit la na re. Raitim, aten na na hkrum sha wa ai shaloi, hkamjan lu hkra, Yehowa hpe angwi apyaw nawku lu hkra, ngang kang ai makam masham ra ai.​—Rom 12:12; 1 Pe 1:6, 7.

⁶ Mayak mahkak ni hkrum nga ai laman, Yehowa a mungkan nnan du gaw du wa na kun? ngu hkamsha chye ai. Dai hku hkamsha ai gaw, makam masham yawm mat ai majaw kun? N re ai. Kaw si nga ai aten, shat di dun da ai ngu shingran yu u. ‘Shat wa mung n hkut hkraw ai’ ngu hkamsha chye ai. Raitim, aten du jang hkut mat ai sha re. Dai hte maren, myit daw nna n-gun yawm nga ai aten hta, mungkan nnan du nan n du hkraw ai ngu hkamsha hkrup chye ai. Raitim, makam masham ngang kang yang, aten du jang Yehowa a ga sadi ni hpring tsup wa na hpe anhte chye ai. (Shk 94:3, 14, 15; Heb 6:17-19) Dai zawn kam ai gaw, prat hta Yehowa hpe nawku daw jau ai lam hpe shawng tawn na matu karum ya ai.

7. Gara hku myit ai hpe koi ra ai kun?

⁷ Ngang kang ai makam masham ra ai shara langai gaw hkaw tsun bungli hta re. Du wa sana mungkan nnan hte seng ai “kabu gara shiga” gaw n mai byin ai ngu, masha law law hkamsha ma ai. (Mat 24:14; Ezk 33:32) Anhte mung shanhte zawn n myit hkrup na matu sadi ra ai. Makam masham ngang kang yang she, dai zawn n myit hkrup na re. Makam masham ngang kang hkra galaw lu ai lam 3 hpe hkaja yu ga.

Gawng Malai Jahpu A Lam Myit Ai

8-9. Gawng malai jahpu a lam myit ai gaw gara hku nna makam masham ngang kang shangun ai kun?

⁸ Makam masham ngang kang hkra galaw lu ai lam langai gaw, gawng malai jahpu a lam myit ai re. Karai a ga sadi ni hpring tsup wa na hpe gawng malai jahpu gaw kam shangun ai. Gawng malai jahpu hpe hpa majaw jaw ai, Yehowa kade daram sak jaw ra wa ai lam hpe atsawm myit sawn sumru yang, mungkan nnan hte seng ai ga sadi hpring tsup wa na hpe kam wa na re. Hpa majaw kun?

⁹ Gawng malai jahpu a matu Yehowa kade daram sak jaw ra wa ai hpe myit yu u. Grai tsawra ai kasha alat hpe hkum tsup ai masha hku nna shangai wa na matu, lamu kaw nna  mungkan ga de shangun dat ai. Mungkan ga hta nga ai laman, mayak mahkak amyu myu hpe Yesu hkrum wa ai. Dai hpang nni nkri hkamsha nna si ra ai. Yehowa a matu grai kaba ai sak jaw ai lam re. Anhte chyahkring chyahkra sha asak hkrung na matu, Yehowa gaw, Kasha hpe nni nkri hkamsha let si hkam shangun na kun? (Yhn 3:16; 1 Pe 1:18, 19) Manu kaba jaw da ra ai majaw, mungkan nnan hte seng ai ga sadi tsep kawp hpring tsup wa na hpe kam mai ai.

Yehowa A N-gun Atsam Hpe Myit Yu Ai

10. Ehpesu 3:20 hku nga yang Yehowa hpa galaw lu ai kun?

¹⁰ Makam masham ngang kang hkra galaw lu ai lahkawng ngu na lam gaw, Yehowa a n-gun atsam a lam myit ai re. Ga sadi shagu hpe hpring tsup shangun lu ai atsam Yehowa hta nga ai. Mungkan nnan hta n htum nwai asak hkrung lu na ngu ai ga sadi gaw, masha a ningmu hku nga yang n mai byin ai zawn re. Raitim, masha ni n lu jaw ai ga sadi hpe Yehowa chyahkring hkring jaw ai. Hpa majaw kun? Chyahtum Chyalai N-gun Rawng Ai Madu re ai majaw re. (Yob 42:2; Mrk 10:27) Dai majaw laklai ai ga sadi ni jaw lu ai ngu myit mada mai ai n re i?​—Ehpesu 3:20 hpe hti u.

11. N mai byin ai zawn re ai Yehowa a ga sadi langai a lam tsun dan u. (“ Hpring Tsup Ngut Sai Laklai Ai Ga Sadi Ni” ngu ai lawk hpe yu u.)

¹¹ Moi prat na Karai a mayam ni hpe, Yehowa jaw wa ai n mai byin na zawn re ai ga sadi ni a lam myit yu u. Asak grai kaba sai Abraham yan Sara hpe ma lu na ngu Yehowa tsun ai. (Nin 17:15-17) Abraham a amyu lakung ni Hkanan mung hpe madu lu na ngu nna mung tsun ai. Raitim, Abraham a amyu lakung re ai Israela ni gaw, Egutu mung hta shaning law law mayam yam nga ra ai. Dai majaw, Yehowa a ga sadi ni hpring gaw hpring tsup wa na kun ngu myit hkrup chye ai. Raitim, gaja wa hpring tsup wa ai. Hpang de, Elisabet gaw asak grai kaba nga tim, ma lu na ngu Yehowa tsun ai. Hkawn sek Mari mung lasha langai shangai na, dai ma hku nna Edin sun hta jaw wa ai ga sadi hpe hpring tsup shangun na ngu Yehowa tsun ai.​—Nin 3:15.

12. Yawshu 23:14 hte Esaia 55:10, 11 gaw, Yehowa a n-gun atsam hte seng nna hpa hpe kam shangun ai kun?

¹² Yehowa hpa ga sadi ni jaw da ai, gara hku hpring tsup shangun wa ai ngu ai hpe myit yu ai shaloi, Yehowa a atsam ningja hpe grau kam wa ai. (Yawshu 23:14; Esaia 55:10, 11 ni hpe hti u.) Dai gaw, mungkan nnan ga sadi gaw yup mang shingran n re ai ai lam, kaga masha ni hpe tsun dan na matu karum ya ai. Dai hta n-ga, sumsing lamu nnan, mungkan ga nnan hte seng nna, “ndai ga gaw kangka re ai ga, teng man ai ga rai nga ai” ngu Yehowa nan ndau shana da ai.​—Shr 21:1, 5.

Yehowa Hte Hku Hkau Shangun Ai Lam Ni Hpe Galaw U

13. Nawku zuphpawng ni gaw makam masham hpe gara hku shangang ya ai kun? Sanglang dan u.

¹³ Makam masham ngang kang hkra galaw lu ai masum ngu na lam gaw, nawku dawjau lam ni hta bungli law nga ai re. Nawku zuphpawng ni kaw na gara hku akyu lu ai lam myit yu u. Aten hpring magam amyu myu hta shaning law law shang lawm wa ai Anna ndai hku tsun ai: “Zuphpawng ni gaw makam masham shangang ya ai. Mungga htawn ai wa ga shaga atsam nau n kaja yang pyi, lam nnan ni n tsun shalawm yang pyi, Chyum Laika tengman lam hpe grau chye na shangun ai lam langai ngai hpe na lu ai. Dai gaw makam masham hpe shangang ya ai.” b Zuphpawng hta hpunau nauna ni jaw ai mahtai ni mung makam masham hpe shangang ya ai.​—Rom 1:11, 12; 10:17.

14. Hkaw tsun bungli gaw makam masham hpe gara hku shangang ya ai kun?

¹⁴ Hkaw tsun bungli hta shang lawm ai mung, makam masham hpe shangang ya ai.  (Heb 10:23) “Hkaw tsun bungli hta shang lawm ai gaw makam masham hpe shangang ya ai hpe ayan sadi hkrup ai. Yehowa a mauhpa ga sadi ni a lam kaga ni hpe tsun dan yang, nye a makam masham grau ngang kang wa ai” ngu 70 ning jan sadi dung let nawku nga ai Babara tsun ai.

15. Tinang hkrai hkaja ai lamang gaw makam masham hpe gara hku shangang ya ai kun? (Sumla ni hpe mung yu u.)

¹⁵ Makam masham shangang ya ai nawku dawjau lam langai gaw, tinang hkrai hkaja ai lamang re. Chyarang galaw nna, tinang hkrai hkaja ai lam galaw ai gaw akyu nga ai hpe Susan a mahkrum madup gaw madun ai. “Laban Ya rai yang, hpang na bat a matu Sin Langchyi Hkaja Laika hpe hkaja ai. Bat Langai Ya hte Bat Lahkawng Ya rai yang bat lapran zuphpawng a matu hkyen lajang ai. Ngam ai nhtoi ni hta tinang hkrai hkaja lam galaw ai. Chyarang hte maren ayan hkaja ai majaw, Susan a makam masham grau ngang kang wa ai. Chyum Laika myihtoi ga ni hpe hkaja ai gaw makam masham hpe shangang ya ai lam, mungkan ginjaw rung hta shaning law law magam gun nga ai Airin ndai hku tsun ai: “Yehowa a myihtoi ga ni gaw ahkri ahkrai hpring tsup wa ai majaw grai mauhpa re.” c

“N Hkring N Sa Du Sa Na Ra Ai”

16. Habaku hpe Yehowa tsun ai ga ni gaw, dai ni aten hte mung seng ai ngu hpa majaw lu tsun ai kun? (Hebre 10:36, 37)

¹⁶ Nhkru ai ndai mungkan a jahtum hpe, Yehowa a mayam nkau mi la nga ai shaning grai na sai. Masha a ningmu hku yu yang, Karai a ga sadi gaw lanyan nga ai zawn re. Raitim, mayam ni a hkamsha lam hpe Yehowa atsawm  chye na ai lam, myihtoi Habaku hpe tsun ai ga ni kaw na chye lu ai. “Ndai shingran gaw, ndat da ai aten hte seng nna, dik wa na matu, lawan nga ai hte, masu na n rai: ganung nga yang rai ti mung, ala nga u; dai gaw teng teng du na ra ai; hpang hkrat na, n rai” ngu tsun ai. (Hab 2:3) Yehowa gaw Habaku hpe sha dai hku tsun wa ai kun? Dai ni aten na anhte hte mung seng ai kun? Dai ga ni gaw mungkan nnan hpe myit mada nga ai Hkristan ni hte seng ai lam kasa Pawlu tsun ai. (Hebre 10:36, 37 hpe hti u.) Yehowa a ga sadi gaw lanyan nga ai zawn raitim, “dai gaw teng teng du na ra ai; hpang hkrat na, n rai” ngu ai hpe kam mai ai.

17. Habaku hpe Yehowa htet da ai ga hte maren nauna langai gara hku hkan sa wa ai kun?

¹⁷ “Ala nga u” ngu Yehowa htet da ai hte maren, shaning grai na mat tim pyi Karai a mayam ni matut nna la nga ai. Ga shadawn, Nauna Lisa gaw 1939 hta, Yehowa hpe nawku hpang wa ai. “Lahta tsang jawng garai n ngut shi yang, Hara Magedon du wa na re ngu dai aten hta shadu da ai. Dai hku n byin wa ai. Karai Karai kaw na ga sadi shaman chyeju lu na matu shaning law law la wa ai Noa, Abraham, Yosep hte kaga ni a lam ni hpe hti ai. Dai ni gaw nye a matu ‘la nga ai labau ni’ re. Matut nna la nga ai gaw, mungkan nna grai ni nga sai hpe myit maju jung na matu, ngai hte kaga ni hpe karum ya ai” ngu tsun ai. Yehowa hpe shaning law law nawku nga ai masha ni mung dai hku sha hkamsha na re.

18. Hpan da lam ni hpe hkaja ai gaw makam masham gara hku ngang kang shangun ai kun?

¹⁸ Shagan ni, hpun ni, dusat ni, masha ni hte hpawn mungkan ntsa na hpan da lam nkau mi a lam myit yu u. Yehowa hpan da ai majaw yawng mayawng nga wa ai re. Dai ni gaw ajet re ai kun, ngu nna kadai mung ntsen ai lam n nga ai. (Nin 1:1, 26, 27) Ya chyawm gaw mungkan nnan n du wa shi ai. Raitim, mungkan nnan galaw ya na ngu Yehowa ga sadi jaw da ai. Dai ga sadi ni hte maren hpring tsup wa hkra galaw ya na re. Mungkan nnan hta, masha shagu hkamja zet let ai asak aprat lu la na re. Dai majaw, Yehowa masat da ai aten hta mungkan nnan galaw ya na hpe kam mai ai.​—Esa 65:17; Shr 21:3, 4.

19. Makam masham hpe gara hku shangang lu ai kun?

¹⁹ Ndai laman, lu ai ahkaw ahkang shagu hpe akyu jashawn nna makam masham ngang kang hkra galaw u. Gawng malai jahpu a matu chyeju dum ai lam ayan madun u. Yehowa a n-gun atsam a lam myit yu u. Nawku dawjau lam ni hta bungli law nga u. Rai yang, “makam masham hte shakut sharang ai a majaw, ga ndat ni a sali wunli hkam la lu ai ni” hta nang mung lawm na re.​—Heb 6:11, 12; Rom 5:5.