NAWKU hpung hta nang galaw mayu ai lama ma nga tim, ya n lu galaw nga ai kun? Marai langai ngai gaw dai lit hpe galaw nna, kabu gara nga ai mung rai na re. Shing nrai, nang galaw wa ai magam lit, ahkaw ahkang langai ngai mung rai na re. Raitim, asak aprat, hkam kaja lam, ja gumhpraw mayak mahkak, dinghku lit ni a majaw, nang gaw shadawn sharam sha lu galaw ai rai na re. Shing nrai, uhpung galai shai ai lam ni a majaw, aten na na galaw wa ai lit hpe kau da ra ai mung rai na re. Hpa mi raitim, Karai Kasang a magam hta nang galaw mayu ai lam yawng hpe n lu galaw ai ngu hkamsha na re. Dai zawn masa ni hta, kalang lang myit daw chye ai. Rai yang, myit daw myit hten ai, myit machyi ai, masin n si hkraw ai zawn re ai n kaja ai hkamsha lam ni hpe aru kaw nna baw kau na matu gara hku galaw lu ai kun? Matut nna gara hku kabu gara lu na kun?

Hkalup sara Yawhan a kasi ningli hpe hkaja ai hku nna, matut kabu gara lu ai lam sharin la lu ai. Yawhan gaw Yehowa a magam hta laklai ai lit ni hpe gunhpai nna kabu gara nga ai. Raitim, shi a prat hta n myit mada da ai lam byin wa ai. Yawhan gaw shi magam gun wa ai aten hta na, htawng rawng ai aten gaw grau na na ngu shi myit mada da na n re. Shi gaw matut nna kabu gara nga ding yang re. Prat ting dai myit jasat matut nga na matu shakut wa ai. Shi hpe hpa gaw karum ya wa ai kun? Anhte myit daw myit hten nga tim, kabu gara lam gara hku nna matut nga lu na kun?

A.D. 29, April daram hta, Yawhan gaw du wa na Meshia a matu hkyen lajang ya ai lit hpe nnan hpang galaw nna ndai hku tsun ai: “Sumsing lamu a mungdan du magang ra ai majaw, myit malai lu mu.” (Mat 3:2; Luk 1:12-17) Masha law law myit malai lu ma ai. Masha hpawng gaw shi a mungga madat na matu grai tsan ai shara kaw na sa wa nna, myit malai la let hkalup hkam la ai. Yawhan gaw, tinang hkum tinang dingman ai ngu hkam la ai nawku htung ningbaw ni hpe shanhte n galai shai yang, tara jeyang hkrum na ngu nna marai rawng let sadi jaw wa ai. (Mat 3:5-12) A.D. 29, October daram hta, Yawhan gaw Yesu hpe hkalup hkam ya ai shaloi, shi a magam hta ahkyak htum ai lam hpe galaw wa ai re. Dai aten kaw nna, ga sadi tawn da ai Meshia re ai Yesu hpang hkan na matu masha ni hpe Yawhan lam matsun ya ai.​—⁠Yhn 1:32-37.

Yawhan a laklai ai daw hte seng nna Yesu ndai hku tsun ai: “Numsha kaw shangai ai ni hta, baptisma sara Yawhan hta grau kaba ai marai langai mi muk n paw pru ai.” (Mat 11:11) Yawhan gaw shi  lu la ai shaman chyeju ni hte seng nna, kabu gara nga na gaw teng sha re. Yawhan zawn, dai ni aten na masha law law mung shaman chyeju ni lu la nga ma ai. Hpunau Teri a mahkrum madup hpe myit yu ga. Shi hte madu jan Sandara gaw aten hpring magam hta 50 jan shang lawm wa ai. Teri ndai hku tsun ai: “Ngai hta laklai ai lit ni lu wa ai. Ningshawng, Behtela nta masha, laksan ningshawng, ninghtawn hpung kawan, ginwang hpung kawan hku nna re. Ya gaw, laksan ningshawng hku nna magam bai gun nga ai.” Theocractic magam lit ni lu la ai gaw kabu hpa re. Raitim, anhte a masa lam ni galai shai mat ai shaloi, matut nna kabu gara lu na matu, shakut shaja ra ai lam Yawhan a kasi ningli kaw nna sharin la lu ai.

Hkalup sara Yawhan matut nna kabu gara lu ai gaw, shi lu da ai lit ni hte seng nna ayan chyeju dum nga ai majaw re. Ga shadawn langai hpe myit yu ga. Yesu hkalup hkam ngut ai hpang, Yawhan a magam lit gaw yawm wa nna, Yesu a magam lit gaw law htam wa ai. Yawhan a sape ni gaw shi hpang de sa nna ndai hku tsun ai: “Yu u, shi mung baptisma jaw nga ai rai nna, yawng mayawng shi hpang de du sa ma ai.” (Yhn 3:26) Yawhan ndai hku bai tsun ai: “Num nnan lu ai wa gaw, la nnan rai nga ai; la nnan a makau e tsap nga nna, shi a ga na la ai jinghku wa gaw, la nnan a nsen majaw ja ja kabu nga ai: shing re ai kabu gara lam gaw, ngai hta dik wa sa li ai.” (Yhn 3:29) Yawhan gaw Yesu hte n shingjawng wa ai. Yesu a magam gaw grau ahkyak ai majaw, shi lu da ai magam lit gaw manu n dan ai ngu nna mung n myit wa ai. De a malai, shi a daw re ai la nnan a jinghku byin lu ai ahkang hpe manu shadan wa ai majaw, matut nna kabu gara lu wa ai.

Yawhan a lit gaw n loi wa tim, matut nna ngwi pyaw lu na matu shi a kaja ai myit jasat gaw karum ya wa ai. Ga shadawn, Yawhan gaw shangai wa ai shaloi kaw nna Nazari masha re ai majaw, tsabyi hte chyaru n lu ai. (Luk 1:15) Prat hpe asan sha tawn ai Yawhan a lam hte seng nna Yesu ndai hku tsun ai: “Yawhan sa du nna n lu n sha ai.” Yesu hte shi a sape ni gaw, Nazari masha n re ai majaw, kaga masha ni zawn mai nga ai. (Mat 11:18, 19) Yawhan gaw gara mauhpa lam hpe mung n galaw wa ai. Shawng nnan hta Yawhan hpang hkan wa ai masha nkau mi hte hpawn, Yesu a sape ni hta mauhpa lam galaw lu ai atsam nga ai hpe mung, Yawhan chye ai. (Mat 10:1; Yhn 10:41) Shi hte Yesu a sape ni a lapran na shai hkat ai lam hpe sha myit nga na malai, Yehowa jaw ai shi a lit hta sha matut amu law nga ai.

Anhte mung, ya galaw nga ai Yehowa a magam hpe manu shadan na nga yang, anhte a kabu gara lam hpe matut hkang da lu ai. Teri ndai hku tsun ai: “Ngai lu da ai lit langai hpra hpe ngai myit maju jung ai.” Aten hpring magam gun wa ai shi a prat hpe myit yu nna, “ngai myit malai n lu ai sha n-ga, kaja ai lam ni hpe sha matsing ai” nga nna shi tsun ai.

Gara hteocratic magam lit raitim, teng sha manu shadan nna, myit sawn sumru yang, Karai Kasang a magam hta anhte grau kabu gara lu ai. Dai gaw “Karai Kasang a shingdep shingtau” byin lu ai laksan ahkaw ahkang re. (1 Ko 3:9) Manu dan ai arai langai hpe ayan lanu lahku ai nga yang, galoi mung tsawm htap nga na re. Dai hte maren, Yehowa hte arau bungli galaw lu ai hpe ayan myit sumru ai nga yang, matut nna kabu gara nga na re. Tinang sak jaw ai lam hte kaga ni a sak jaw ai lam hpe n mai shingdaw ai. Tinang lu da ai lit ni gaw kaga ni lu da ai lit ni hta, manu n dan ai ngu nna n mai myit la ai.​—⁠Gal 6:4.

Yawhan gaw shi a magam hpe matut nna aten na na n galaw lu ai lam chye da tim, akajawng sha hkring ra na hpe gaw shi n chye da ai. (Yhn 3:30) Yesu hkalup hkam ngut ai hpang shata 6 daram na ai shaloi, A.D. 30 hta, Yawhan gaw Hkawhkam Herod a majaw, htawng jahkrat hkrum ai. Tengman ai lam gaw hpa re ai hpe Yawhan matut sharin ya ai. (Mrk 6:17-20) Ndai zawn, galai shai ai lam ni a lapran matut nna kabu gara na matu hpa gaw karum ya wa ai kun? Wenyi lam ni hpe sha shi matut nna myit maju jung ai.

Yawhan htawng rawng nga ai laman, Yesu a rawt jat ai magam hte seng ai lam hpe shi na lu ai. (Mat 11:2; Luk 7:18) Yesu gaw Meshia re ai hpe Yawhan kam ai. Raitim, Meshia galaw ya na hte seng nna Chyum Laika hta tsun da ai lam yawng hpe hpring tsup hkra Yesu gara hku galaw na hpe gaw shi myit nga ai. Meshia gaw hkawhkam aya lu la  wa ai majaw, kade nna yang Yesu a uphkang ai lam hpang sana kun? Yesu gaw shi hpe htawng kaw nna shalawt ya lu na kun? ngu nna mung shi myit na re. Yesu a daw hpe asan sha chye na lu na matu, sape lahkawng hpe Yesu hpang dat dat nna ndai hku san ai: “Nang gaw dai du sa na ra ai wa rai nga n ni? shing n rai, kaga hpe anhte naw myit mada lu na rai nga a ni?” (Luk 7:19) Shanhte bai wa ai shaloi, Yesu gaw mauhpa lam hte shamai ya ai lam shanhte tsun dan ai hpe Yawhan atsawm madat lu ai. Yesu gaw Yawhan hpe ndai hku bai tsun shangun dat ai: “Myi kyaw ai ni myi mu lu ma ai, lagaw hten ai ni hkawm sa lu ma ai, manggang kap ai ni san pra wa lu ma ai, na lahpang ai ni na lu ma ai, si mat ai ni sharawt la ai hkrum ma ai, matsan mayan ni a matu kabu gara shiga hkaw dan nga ai.”​—⁠Luk 7:20-22.

Shanhte tsun dan ai lam a majaw, Yawhan gaw n-gun lu la na re. Dai gaw Meshia hte seng ai myihtoi ga ni hpe Yesu jahpring shatsup ya nga ai re. Yesu gaw shi hpe htawng kaw nna shalawt ya na n re ai hpe chye ai. Shi galaw wa ai magam bungli gaw majoi n byin mat ai hpe mung shi chye ai. Shi a masa gara hku mi raitim, shi hta kabu gara lu na lam nga ai.

Yawhan zawn, anhte mung wenyi lam hta myit maju jung yang, matut kabu gara nna myit galu nga na re. (Kol 1:9-11) Dai hku byin lu na matu, Chyum Laika hti nna myit sawn sumru ra ai. Yehowa a magam gun ai gaw majoi n byin mat ai hpe mung myit dum ra ai. (1 Ko 15:58) Sandara ndai hku tsun ai: “Chyum Laika daw kaba langai hpe shani shagu hti ai gaw, Yehowa hte nihtep na matu ngai hpe karum ya ai. Tinang hkum tinang n re ai sha, shi hpe myit maju jung na matu mung karum ya ai.” Karai A Mungdan galaw ai lam ni hpe anhte mung myit maju jung mai ai. Dai hku galaw ai gaw, anhte a masa lam hpe n yu ai sha, Yehowa galaw awng dang ai lam ni hpe myit maju jung na matu, anhte hpe karum ya lu ai. “Shata shagu na JW TV lamang gaw, uhpung hte nihtep na matu hte nye a lit hta matut kabu gara lu na matu ngai hpe karum ya ai” nga nna Sandara tsun ai.

Hkalup sara Yawhan gaw aten kadun laman, “Elia a wenyi hte atsam rawng let” hkaw tsun wa ai. Elia zawn shi gaw “anhte hte maren myit mang rawng nga ai shinggyim masha” re. (Luk 1:17; Yak 5:17) Yawhan a chyeju dum ai lam hte wenyi lam hpe myit maju jung ai kasi ningli hpe anhte hkan sa na nga yang, hpa mi byin tim Mungdan magam hta matut nna kabu gara lu na re.