1. Jinghku ni hte seng nna anhte gara hku hkamsha ai kun?

“TENGMAN ai lam chye wa ai shaloi kaw nna Hparadisu hta ngai hte arau nye a jinghku ni hpe nga shangun mayu ai” nga nna nauna Pawlin tsun ai. * “Laksan hku nna an nu wa ni arau Yehowa hpe nawku mayu ai.” Na a jinghku ni hta Yehowa a lam n chye shi ai ni, shi hpe n tsawra shi ai ni nga ai kun? Pawlin a hkamsha lam zawn na a jinghku ni hte seng nna mung dai hte maren hkamsha nga na re.

2. Ndai sumhpa hta gara gasan ni hpe hkaja mat na kun?

² Jinghku ni hpe kabu gara shiga hkap la na matu atik anang n mai shadut ai. Raitim, Chyum Laika shiga hpe grau hkap la mayu wa hkra anhte karum ya mai ai. (2 Tm 3:14, 15) Jinghku ni hpe hpa majaw sakse hkam ging ai kun? Matsan dum myit hpa majaw madun ra ai kun? Anhte zawn Yehowa a lam chye wa hkra jinghku ni hpe karum ya na matu hpa galaw mai ai kun? Nawku hpung hta nga ai ni yawng gaw anhte hpe gara hku karum ya lu ai kun?

3. 2 Petru 3:9 hku nga yang jinghku ni hpe hpa majaw sakse hkam ging ai kun?

³ Kade nna yang, Yehowa gaw nhkru ai mungkan a masa lam ni hpe jahtum kau ya sana re. “N htum n wai asak” lu la na matu shakut ai ni sha asak hkrung lawt lu na re. (Kas 13:48) Tsasam masha ni hpe hkaw tsun na matu, anhte a aten hte n-gun atsam hpe akyu jashawn ai nga yang, jinghku ni hpe grau  aten jaw nna hkaw tsun mayu na re. Anhte tsawra ai Kawa Yehowa gaw “yawng mayawng myit kayin wa nna, kadai rai ti mung, hten bya ai n hkrum mu ga, shi ra nga ai majaw, shi nanhte hpe myit galu kaba madun nga ai.”​—⁠2 Petru 3:9 hpe hti u.

4. Jinghku ni hpe sakse hkam ai shaloi anhte gara hku galaw hkrup chye ai kun?

⁴ Hkye hkrang la ai hte seng ai shiga hpe hkaw tsun ai shaloi, shut ai ladat hte jaw ai ladat nga ai hpe anhte chye da ra ai. Tsasam masha ni hpe hpaji rawng ai hku hkaw tsun tim, jinghku ni hpe gaw hpaji n rawng ai hku hkaw tsun chye ai.

5. Jinghku ni hpe tengman ai lam garai n hkaw tsun shi yang hpa hpe myit dum ging ai kun?

⁵ Jinghku ni hpe shawng nnan sakse hkam wa ai hpe bai myit ai shaloi, kaga lam hku sakse hkam dat yang, grau kaja na wa ngu myit malai lu chye ai. Kasa Pawlu gaw Hkristan ni hpe ndai hku hpaji jaw da ai: “Langai hte langai hpe kaning rai htan lu na chye lu u ga, nanhte a ga hta galoi mung chyeju lawm nga nna, jum hte a shum nga u ga.” (Kol 4:5, 6) Jinghku ni hpe hkaw tsun ai shaloi ndai hpaji jaw ga hpe dum na matu ahkyak ai. Raitim, shanhte madat mayu hkra tsun na malai, shanhte n ra ai hku tsun chye ai.

6-7. Makam masham n bung ai ningrum ningtau hpe matsan dum myit madun mai ai lam ga shadawn langai tsun dan u.

⁶ Matsan dum myit madun u. Pawlin ndai hku tsun ai: “Shawng nnan hta, ngai gaw nye madu wa hte wenyi lam ni sha tsun mayu ai. ‘Kaga lam’ hpe nau n tsun byin ai.” Raitim, Pawlin a madu wa Wen gaw Chyum Laika lam loi mi sha chye ai majaw, Pawlin tsun mayu ai lam hpe n chye na ai. Shi a matu, madu jan tsun ai lam yawng gaw nawku htung hte seng ai lam sha re ngu shadu ai. Madu jan gaw  shoihpa nga ai hpung hte matut mahkai nga ai majaw, hkalem hkrum nga sai ngu shadu nna myit tsang wa ai.

⁷ Pawlin gaw shana maga aten ni hte kru ya laban ni laman hta hpunau nauna ni hte zuphpawng ni, hkaw tsun bungli ni, kanawn mazum hpawng ni hta aten law law jaw wa ai nga nna shi yin la ai. “Nta de bai wa ai shaloi kalang lang kadai mung n nga ai majaw, Wen gaw garen gari nga na re” nga nna Pawlin tsun ai. Madu jan kasha hte arau nga mayu na re. Madu jan kanawn nga ai masha ni hpe gaw shi n chye ai. Madu jan a matu manang nnan ni gaw shi hta grau nna ahkyak ai ngu shi shadu wa ai. Dai majaw, Wen gaw Pawlin hte hka na matu jahkrit wa ai. Pawlin a masa hta matsan dum myit grau madun lu ai lam ni hpe nang mu ai kun?

8. 1 Petru 3:1, 2 hku nga yang jinghku ni gaw hpa hpe grau sadi hkrup ai kun?

⁸ Kasi kaja madun u. Jinghku ni gaw anhte tsun ai hta na galaw ai lam hpe grau sadi hkrup ai. (1 Petru 3:1, 2 hpe hti u.) Dai lam hpe Pawlin angwi ngwi chye wa ai. “Wen gaw an nu yan hpe tsawra nna, n hka mayu ai hpe ngai chye ai” nga nna shi tsun ai. “Hka na ngu nna shi jahkrit wa ai lam gaw, Yehowa ra sharawng ai hte maren galaw ra sana lam ngai hpe shadum ya ai. Ga law law shaga na malai, nye a galaw hkawm sa ai lam hte, kasi kaja madun ra ai.” Pawlin gaw Wen hte Chyum Laika lam n tsun ai sha, kaga lam ni tsun na matu shakut hpang ai. Madu jan grau ngwi pyaw simsa wa nna, kasha a akyang lailen grau kaja wa ai hpe mung Wen mu wa ai. (Gsh 31:18, 27, 28) Chyum Laika gaw shi a dinghku hpe kaja ai akyu shabyin ya lu ai hpe chye wa ai majaw, Karai A Mungga hpe grau nna madat mayu wa ai.​—⁠1 Ko 7:12-14, 16.

9. Jinghku ni hpe karum ya na matu hpa majaw shakut shaja ra ai kun?

⁹ Jinghku ni hpe karum ya na matu shakut  shaja u. Yehowa gaw anhte a matu kaja ai kasi ningli madun wa ai. Asak lu la na matu hte kabu gara shiga hkap la na matu masha ni hpe “lang mi hte lang mi” shi tsun wa ai. (2 Hl 36:15) Pawlu gaw kaga ni hpe karum ya ai hta shakut shaja na matu Timohti hpe tsun ai. Hpa majaw kun? Dai hku galaw yang, shi mung shi a ga madat ai ni mung, hkye la hkrum na majaw re. (1 Tm 4:16) Anhte gaw jinghku ni hpe tsawra ai majaw, shanhte hpe Karai A Mungga hta lawm ai tengman lam ni hpe chye shangun mayu ai. Pawlin a ga ni hte lailen ni gaw, shi a jinghku ni a ntsa kaja ai akyu shabyin ya lu ai. Ya nga yang, madu wa gaw shi hte arau Yehowa a magam hta kabu gara let shang lawm nga sai. Shan gaw ningshawng ni rai nna, madu wa gaw myitsu salang hku nna magam gun nga sai.

10. Anhte hpa majaw myit galu ra ai kun?

¹⁰ Myit galu u. Karai a ga madat na matu dawdan da yang, anhte a prat hte makam masham hpe galai shai ra na re. Dai shaloi, jinghku ni gaw anhte a galai shai ai lam ni hpe hkap la na matu yak chye ai. Shawng nnan, shanhte hte rau nawku htung hte seng ai poi ni, mung masa lam ni hta n shang lawm sai hpe sadi hkrup na re. Jinghku nkau mi gaw masin pawt chye ai. (Mat 10:35, 36) Raitim, shanhte hpe asum n jaw ging ai. Anhte a makam masham hpe chye na na matu n karum ya ai nga yang, shanhte gaw htani htana asak hte n gingdan ai ni ngu nna jeyang ai hte bung mat na re. Dai hku jeyang na ahkang anhte hpe Yehowa n jaw da ai sha, Yesu hpe sha jaw da ai. (Yhn 5:22) Anhte myit galu na nga yang, jinghku ni gaw anhte a shiga hpe grau madat mayu wa na re.​—⁠“ Sharin Ya Na Matu Anhte A Website Hpe Lang U” ngu ai lawk hpe yu u.

11-13. Kanu kawa ni hpe Elit tsun shaga ai lam kaw nna hpa sharin la lu ai kun?

¹¹ Ngang kang nna hpaji rawng u. (Gsh 15:2) Elit a mabyin hpe myit yu ga. Shi gaw kanu kawa ni hte grai tsan ai shara hta nga ai shaloi, Yehowa a lam sharin la wa ai. Kanu kawa ni gaw, mung masa lam hta lawm ai ni rai nna, Karai Kasang hpe mung n kamsham ai ni re. Shi sharin la wa ai kaja ai lam ni hpe kanu yan kawa hpe alawan tsun dan ra na hpe shi chye ai. Shi ndai hku tsun ai: “Tinang a makam masham nnan hte galaw ai lam ni hpe alawan n tsun yang, nta masha ni grai mau mat na re.” Kanu kawa ni myit lawm chye ai tsawra myit zawn re ai ga baw ni hpe lata nna, shi laika ka ai. Dai lam hte seng nna Chyum Laika hta tsun da ai lam hpe shanhte gara hku myit ai lam chye na matu mung san yu ai. (1 Ko 13:1-13) Shi hpe bau maka wa ai majaw kanu kawa hpe chyeju dum nna, kumhpa ni shagun ya ai. Kanu kawa nta sa chyai ai laman, kanu hpe nta bungli ni galaw karum ai. Elit gaw makam masham hte seng ai lam kanu kawa ni hpe shawng nnan tsun dan ai shaloi, shan n ra sharawng ma ai.

¹² Elit gaw kanu kawa hte arau nta kaw nga ai shaloi, Chyum Laika hpe shani shagu hti ai. “Dai hku hti ai majaw Chyum Laika gaw nye a matu kade daram ahkyak ai hpe anu chye na wa ai” ngu shi tsun ai. Dai shaloi, kawa mung shi kasha hpa majaw galai shai ai hpe chye lu hkra, Chyum Laika shut ai hpe tam mu hkra, Chyum Laika hpe hkaja yu na matu dawdan wa ai. “Ngai ka matsing da ai Chyum Laika hpe jaw dat ai” nga nna shi tsun ai. Hpa akyu lu wa ai kun? Shut ai lam ni hpe mu tam na malai, kawa gaw Karai A Mungga hta lawm ai lam ni hpe grai ra sharawng mat ai.

¹³ Anhte chyam dinglik ai lam ni hkrum nga tim ngang ngang kang kang tsap ra ai. Raitim, hpaji rawng ra ai. (1 Ko 4:12) Ga shadawn, Elit gaw kanu a ninghkap ai lam hte hkrum nga ai. “Ngai hkalup hkam ai shaloi, nu gaw ‘ngai hpe nang n tsawra ai’ ngu nna tsun ai.” Elit gara hku galaw wa ai kun? “Manghkang hpe koi yen na malai, Yehowa Sakse langai byin na matu  dawdan da sai lam hte dai ga sadi grin mayu ai lam hkungga let sanglang dan ai. Nu hpe teng sha tsawra ai lam nu chye hkra shakut ai. Nu hte arau ngai mung hkrap ai. Shi a matu grai kaja ai malu masha shadu ya ai. Chyum Laika gaw ngai hpe masha kaja langai byin na matu karum ya ai lam nu chye wa ai.”

14. Asum jaw na matu chyam dinglik wa ai shaloi hpa majaw asum n mai jaw ai kun?

¹⁴ Yehowa hpe nawku ai gaw kade daram ahkyak ai hpe jinghku ni tsep kawp chye na wa na matu aten la ra chye ai. Ga shadawn, kanu kawa ni lata ya ai kan bau bungli hpe galaw na malai ningshawng galaw na matu Elit dawdan ai shaloi, kanu kalang bai hkrap ai. Raitim, shi asum n jaw wa ai. “Shara ra hta asum jaw kau na nga yang, nta masha ni gaw kaga lam ni hta mung shadut wa chye ai. Nta masha ni hpe tsawra nna makam masham hta matut ngang kang na nga yang, nkau mi gaw na a ga hpe madat wa chye ai” nga nna shi tsun ai. Dai zawn akyu hpe Elit hkamsha lu wa ai. Ya kanu yan kawa gaw ningshawng ni rai nna, kawa gaw myitsu salang langai re.

15. Mahte 5:14-16 hte 1 Petru 2:12 hku nga yang jinghku ni hpe karum ya na matu kaga ni gaw “kaja ai bungli” gara hku galaw lu ai kun?

¹⁵ Yehowa gaw masha ni hpe shi hte nihtep wa na matu Hkristan nawku hpung a “kaja ai bungli” hpe akyu jashawn ai. (Mahte 5:14-16; 1 Petru 2:12 hpe hti u.) Ningrum ningtau gaw Yehowa Sakse n rai yang, hpunau nauna ni hte jahkrum ya lu na kun? Pawlin gaw hpunau nauna ni hpe nta de saw shaga ai majaw, shi madu wa Wen gaw shanhte hte hkau wa ai. Yehowa Sakse ni gaw kaning re ai masha re ai hpe chye na na matu hpunau langai karum ya wa ai lam Wen ndai hku tsun dan ai: “Dai hpunau gaw lani mi ahkang la  nna, ngai hte arau gawdin ginsup poi arau yu ai. Shi mung yu maya masha sha re ai hpe ngai chye dat ai.”

16. Jinghku ni hpe zuphpawng lung na matu hpa majaw saw shaga ging ai kun?

¹⁶ Jinghku ni hpe karum ya lu ai kaja htum lam gaw, anhte hte rau zuphpawng lung na matu saw shaga ai lam re. (1 Ko 14:24, 25) Wen shawng nnan lung ai zuphpawng gaw, Myit Dum Poi re. Bungli ngut ai hpang hta galaw nna, lamang ni mung kadun ai. “Htawn tsun ai mungga hpe ngai n chye na tim, masha ni hpe gaw dum nga ai” ngu shi tsun ai. Shanhte gaw ngai hpe hkap tau la nna sa shakram ma ai. Shanhte gaw masha kaja ni re.” Yan la langai gaw, hkaw tsun magam hte zuphpawng ni hta Pawlin hte kasha hpe laksan hku nna tsawra myit madun ai. Dai majaw, Wen gaw Pawlin a makam masham nnan hte seng ai lam hpe grau chye mayu wa nna shi hpe Chyum Laika sharin ya na matu tsun wa ai.

17. Hpa a majaw tinang hkum tinang mara n shagun ging ai kun? Raitim jinghku ni gaw galai shai na n re nga nna hpa majaw n myit ging ai kun?

¹⁷ Jinghku ni hpe anhte hte arau Yehowa hpe nawku wa na matu myit mada ga ai. Karai a mayam byin wa na matu jinghku ni hpe anhte yawng karum ya tim, tengman ai lam de shanhte du yang she du wa na re. Dai zawn byin yang, shanhte a dawdan lam hte seng nna, tinang hkum tinang mara n shagun ging ai. Anhte a makam masham hpe hkap la na matu kadai hpe mung atik anang n shadut ging ai. Yehowa hpe nang nawku ai majaw kade daram pyaw nga ai hpe jinghku ni mu yang, dai gaw shanhte hpe shingkang ka-up lu ai hpe hkum malap. Shanhte a matu akyu hpyi ya u. Hpaji rawng ai hku tsun shaga u. Matut nna karum ya u. (Kas 20:20) Nang shakut shaja ai hpe Yehowa shaman chyeju jaw na hpe kam u. Nang tsun ai hpe jinghku ni madat ai nga yang, shanhte hkye hkrang la hkrum na re.