1. Hpilipi hta nawku hpung hpawng de na matu kadai ni karum ya wa ai kun?

PAWLU, Sila, Luka hte Timohti ni gaw Roma uphkang ai npu hta nga ai Hpilipi mare de du ai shaloi, Mungdan shiga hpe myit lawm ai masha law law hte hkrum wa ai. Myit rawt ai dai hpunau 4 gaw nawku hpung langai hpe hpawng de ya wa ai. Hpunau nauna ni gaw manam daw kam ai Ludi a nta hta, zuphpawng arau galaw hpang wa ai rai na re.​—⁠Kas 16:40.

2. Kade n na yang dai nawku hpung gaw gara chyam dinglik ai lam hte hkrum wa ai kun?

² Kade n na yang, nawku hpung nnan gaw chyam dinglik ai lam hkrum wa ai. Dai sadi dung ai Hkristan ni a hkaw tsun magam hpe laja lana ninghkap na matu, tengman lam n ra sharawng ai ni hpe Satan shadut ya wa ai. Pawlu hte Sila gaw rim hkrum ai, kayat hkrum ai, htawng jahkrat hkrum ai. Shan yan htawng kaw nna lawt wa ai hpang, sape nnan ni hpang de sa chyai nna n-gun jaw ai. Dai hpang, Pawlu, Sila hte Timohti ni gaw dai mare kaw nna pru wa ai. Luka chyawm gaw matut nga nga ai rai na re. Nnan hpawng de da ai nawku hpung gaw gara hku rai na kun? Yehowa a chyoi pra ai wenyi karum ya ai majaw, sape nnan ni gaw Yehowa a magam hta rawt jat galu kaba wa ai. (Hpl 2:12) Pawlu gaw shanhte a matu grai arawng la na re.

3. Hpilipi 1:9-11 hta Pawlu gaw gara lam ni hte seng nna akyu hpyi wa ai kun?

³ Pawlu gaw 10 ning daram na ai hpang, Hpilipi nawku hpung de laika ka wa ai. Dai laika hta tsun da ai hte maren, hpunau nauna ni hpe Pawlu kade daram tsawra ai hpe nang chye na re. “Ngai gaw Hkristu Yesu shi nan a myit masin hta rawng ai n-gaw nwai ai myit hte nanhte hpe myit dum marit nga nngai” ngu nna shi ka da ai. (Hpl 1:8, JCLB) Shanhte a matu akyu hpyi ya ai lam shi ka da ai. Tsawra myit law htam wa hkra, grau ahkyak  ai lam ni hpe chye ginhka lu hkra, mara shagun shara n nga hkra, kaga ni hpe ahtu kataw shangun ai lam hpe koi lu hkra, dinghpring ai lam hpe matut galaw lu hkra, shanhte a matu Yehowa kaw akyu hpyi ya ai. Pawlu a tsawra myit rawng ai ga ni kaw nna anhte mung akyu lu la ai. (Hpilipi 1:9-11, NW hpe hti u.) * Ndai sumhpa hta, shi tsun wa ai lam ni hpe myit sumru nna, dai langai hpra hpe gara hku hkan sa lu na lam hkaja mat na re.

4. (a) 1 Yawhan 4:9, 10 hku nga yang anhte hpe tsawra ai lam Yehowa gara hku madun dan ai kun? (b) Karai Kasang hpe kade daram tsawra ging ai kun?

⁴ Yubak mara nga ai anhte a malai si hkam ya na matu Kasha hpe mungkan ga de shangun dat ai hku nna Yehowa gaw tsawra ai lam madun wa ai. (1 Yawhan 4:9, 10 hpe hti u.) Karai Kasang a tsawra myit gaw shi hpe bai tsawra na matu anhte hpe shadut ya ai. (Rom 5:8) Karai Kasang hpe kade daram tsawra ging ai kun? Dai ga san hte seng nna Hparishe ni hpe Yesu ndai hku tsun wa ai: “Dai Madu, na a Karai Kasang hpe, na a myit kraw lawang mahkra hte, na a myit masin mahkra hte, na a myit mang mahkra hte nang tsaw ra lu na ndai.” (Mat 22:36, 37) Karai Kasang hpe myit masin mahkra hte tsawra mayu ga ai. Shi hpe tsawra ai myit hpe shani shagu law htam hkra galaw mayu ga ai. Hpilipi nawku hpung masha ni hpe “tsawra myit law htam” hkra galaw na matu Pawlu tsun wa ai. Karai Kasang hpe tsawra ai myit law htam hkra hpa galaw mai ai kun?

5. Anhte a tsawra myit gara hku law htam wa na kun?

⁵ Karai Kasang hpe tsawra lu na matu shi a lam chye ra ai. Chyum Laika hta ndai hku tsun da ai: “Tsaw ra ai myit n rawng ai wa gaw, Karai Kasang hpe chye chyang wu ai n rai: . . . Karai Kasang gaw tsaw ra ai myit rai nga ai.” (1 Yh 4:8) “Tengman ai hku chye wa nna, atsawm garan ginhka chye wa ai hte maren” Karai Kasang hpe tsawra ai myit gaw law htam wa na nga nna kasa Pawlu tsun da ai. (Hpl 1:9, NW) Chyum Laika hpe shawng nnan hkaja ai shaloi, Karai Kasang a lam hpe loi mi sha chye tim, shi hpe tsawra wa ai. Yehowa a lam grau hkaja magang, shi hpe tsawra ai myit law htam wa magang re. Anhte a prat hta ahkyak htum gaw Karai Kasang a mungga hpe ayan hkaja nna myit sawn sumru na matu re.​—⁠Hpl 2:16.

6. 1 Yawhan 4:11, 20, 21 hku nga yang tsawra myit law htam lu na matu kade a tsawra myit anhte hta nga ging ai kun?

⁶ Karai Kasang madun ai tsawra myit a majaw anhte mung hpunau nauna ni hpe tsawra mayu ga ai. (1 Yawhan 4:11, 20, 21 hpe hti u.) Hpunau nauna ni hpe tsawra ai myit gaw shi hkrai shi nga wa na re ngu myit chye ai. Raitim, Yehowa hpe nawku dawjau nna shi a atsam ningja ni hpe kasi la yang she nga wa na re. Anhte a malai, asak hpe nawng kau ya ai Yesu a tsawra myit hpe mung anhte kasi la ra ai. Kalang lang, shada da tsawra u ngu nna tsun da ai lam hpe hkan sa na matu yak chye ai. Hpilipi nawku hpung hta byin wa ai masa langai hpe yu yu ga.

7. Eodia hte Suntuki hpe jaw ai Pawlu a hpaji jaw ga kaw nna hpa sharin la lu ai kun?

⁷ Eodia hte Suntuki ni gaw myit rawt ai nauna yan rai nna kasa Pawlu hte arau magam gun ai ni re. Shan a lapran hta, myit n hkrum ai lam ni a majaw, hku hkau lam hten za mat ai. Dai nauna yan magam gun nga ai nawku hpung de ka ai laika hta, Eodia hte Suntuki  ngu nna amying hte hpawn shan hpe “myit langai sha” rai nga na matu tsun da ai. (Hpl 4:2, 3) Pawlu gaw nawku hpung ting hpe ndai hku tsun ra na ngu nna mung myit ai: “Hpa lam hpe mung, put ngun nna ndang kalang hkat ai hte, hkum galaw mu.” (Hpl 2:14) Pawlu a dingtawk re ai ndai hpaji jaw ga gaw, sadi dung ai nauna yan sha n-ga, nawku hpung ting shada da tsawra na matu karum ya lu ai.

8. Hpunau nauna ni hpe tsawra na matu yak chye ai lam gaw hpa rai kun? Dai hpe gara hku tawt lai lu na kun?

⁸ Eodia hte Suntuki zawn n hkum tsup ai lam ni hpe myit maju jung ai nga yang, tsawra myit law htam wa na matu yak chye ai. Anhte yawng gaw shani shagu shut chye ai. Kaga ni a n hkum tsup ai lam ni hpe myit maju jung na nga yang, shanhte hpe tsawra ai myit kawp wa chye ai. Ga shadawn, hpunau langai gaw Nawku Htingnu jasan jaseng ai hpe atsawm n galaw ai nga yang, anhte masin pawt wa chye ai. Hpunau a shut ai lam ni hpe matsing da na nga yang, grau masin pawt mayu wa nna, tsawra myit mung yawm wa na re. Nang dai zawn byin nga yang, ndai lam hpe myit ai gaw kaja ai: Hpunau nauna ni hte anhte a n hkum tsup ai lam ni hpe Yehowa mu ai. Dai zawn n hkum tsup ai lam ni nga tim, hpunau nauna ni hte anhte hpe tsawra nga dingyang re. Dai majaw, Yehowa a tsawra myit hpe kasi la nna, hpunau nauna ni a kaja ai atsam hpe matut myit maju jung ra ai. Shanhte hpe tsawra na matu shakut yang, grau nna kahkyin gumdin wa na re.​—⁠Hpl 2:1, 2.

9. Hpilipi hta nga ai Hkristan yawng hpe ka ai Pawlu a laika hta tsun da ai “grau ahkyak ai lam ni” gaw hpa ni rai kun?

⁹ “Grau ahkyak ai lam ni hpe ginhka chye” hkra, Hpilipi hta nga ai Hkristan yawng hpe matsun na matu chyoi pra ai wenyi gaw Pawlu hpe shung ya wa ai. (Hpl 1:10, NW) Dai ahkyak ai lam ni hta, Yehowa a amying chyoi pra ai lam, shi a yaw shada lam hpring tsup ai lam, nawku hpung ngwi pyaw simsa ai lam ni lawm ai. (Mat 6:9, 10; Yhn 13:35) Anhte a prat hta dai ahkyak ai lam ni hpe galaw na nga yang, Yehowa hpe tsawra ai lam sakse madun ai re.

10. Mara shagun shara n nga na matu anhte hpa galaw ra na kun?

¹⁰ “Mara shagun shara” n nga na matu mung Pawlu tsun ai. Anhte hkum tsup ra ai ngu nna gaw tsun mayu ai n re. Yehowa Karai Kasang hta mara shagun shara n nga ai. Anhte hta gaw nga chye ai. Raitim, tsawra myit law htam hkra kaja htum galaw nna, grau ahkyak ai lam ni hpe galaw na nga yang, Yehowa a ningmu hta mara shagun shara nga sana n re. Kaga ni hpe ahtu kataw shangun ai lam ni hpe dang lu ai daram koi ai hku nna, anhte a tsawra myit hpe madun mai ai.

11. Kaga ni hpe ahtu kataw shangun ai lam hpe hpa majaw koi ra ai kun?

¹¹ Kaga ni hpe ahtu kataw shangun ai lam hpe koi u ngu ai matsun ga gaw grai ahkyak ai ga re. Kaga ni hpe gara hku nna ahtu kataw shangun chye ai kun? Anhte a shangwi shapyaw lam, bu hpun ai lam, bungli lata ai lam ni gaw ahtu kataw shangun chye ai. Shut ai ngu Yehowa tsun da ai lam ni hpe anhte galaw na n re. Raitim, anhte lata ai lam ni gaw, marai langai a myit nsam hpe dingbai dingna byin shangun nna, ahtu kataw shangun chye ai majaw grai sadi ra ai. Yesu gaw shi a sagu langai hpe ahtu kataw shangun na malai, du hta htumrin kaba noi nna, panglai de kabai jahkrat kau ai gaw grau kaja ai nga nna tsun ai.​—⁠Mat 18:6.

12. Ningshawng yan la langai a kasi ningli kaw nna hpa sharin la lu ai kun?

¹² Yesu a sadi jaw ga hpe ningshawng yan la langai gara hku hkan sa wa ai kun? Shan a nawku hpung hta, tara ja ai dinghku kaw nga kaba wa nna, hkalup hkam da ai n na shi ai yan  la langai nga ai. Shan gaw yu mai ai sumla hkrung ni hpe pyi Hkristan ni n yu ging ai ngu nna sawn la ma ai. Sumla hkrung madun ai htingnu de ningshawng yan la sa ai hpe chye ai shaloi, shan grai myit htum mat ai. Dai majaw, ningshawng yan la gaw dai yan la myit nsam hkap la ai aten n du dingsa, sumla hkrung n yu na matu dawdan kau ai. (Heb 5:14) Ningshawng yan la gaw, hpunau nauna nnan hpe ga hte sha n-ga, tingkyeng akyu n tam ai tsawra myit hte sakse madun wa ai.​—⁠Rom 14:19-21; 1 Yh 3:18.

13. Marai langai mara galaw hkrup hkra anhte gara hku shadut chye ai kun?

¹³ Kaga masha ni hpe ahtu kataw shangun chye ai lam langai gaw mara galaw hkrup hkra shadut ai hku nna re. Dai zawn gara hku byin chye ai kun? Ndai masa lam hpe myit yu ga. Chyum ga sharin langai gaw aten grai na hkra shakut shaja wa ai majaw, tsa chyaru lu lai ai hpe hkang lu wa ai. Tsa chyaru hpe shi koi ra na ngu ai hpe chye na mat ai. Shi gaw alawan rawt jat wa nna hkalup hkam la ai. Hpang de, kanawn mazum poi langai hta, nta madu hpunau gaw shi hpe tsa loi mi lawm ai lu hpa hpe lu na matu ndai hku tsun ai: “Ya, nang Hkristan rai sai; nang hta Yehowa a chyoi pra ai wenyi nga ai. Chyoi pra ai wenyi a atsam ningja langai gaw tinang hkum hpe hkang lu ai re. Dai atsam hpe tatut shaman da na nga yang, tsa chyaru lu lai sana n re.” Hpunau nnan gaw shut ai hpaji jaw ga hpe madat nna tsa ya bai byin mat yang, yawn hpa re.

14. Hpilipi 1:10 hta tsun da ai matsun ga ni hpe hkan sa lu na matu Hkristan zuphpawng ni gaw anhte hpe gara hku karum ya ai kun?

¹⁴ Anhte a Hkristan zuphpawng ni gaw Hpilipi 1:10 (NW) hta tsun da ai matsun ga ni hpe  lam amyu myu hku nna tatut hkan sa lu hkra karum ya lu ai. Langai, wenyi lusha jaw ai lamang hku nna, Yehowa a myit ai lam gaw grau ahkyak ai ngu ai hpe shadum ya ai. Lahkawng, mara shagun shara n nga hkra, sharin la wa ai lam ni hpe gara hku hkan sa lu na lam chye lu ai. Masum, “tsawra ai myit rawng wa na hte kaja ai amu bungli” galaw na matu mung shadut hkrum ai. (Heb 10:24, 25) Hpunau nauna ni a n-gun jaw ga grau lu la magang, Karai Kasang hte hpunau nauna ni hpe tsawra ai myit grau law htam wa magang re. Dai tsawra myit anhte hta nga yang, hpunau nauna ni hpe ahtu kataw shangun ai lam hpe koi lu hkra kaja htum galaw na re.

15. “Dinghpring ai lam ni hpe galaw” ai ngu ai lachyum gaw hpa rai kun?

¹⁵ Pawlu gaw Hpilipi masha ni “dinghpring ai lam ni hpe galaw lu hkra” aja awa akyu hpyi ya ai. (Hpl 1:11, NW) “Dinghpring ai lam” hta Yehowa hte shi a masha ni hpe shanhte tsawra ai myit lawm ai. Dai sha n-ga, Yesu hpe shanhte kamsham ai lam hte shanhte a myit mada lam hte seng nna kaga ni hpe tsun dan ai lam mung lawm ai. Hpilipi 2:15, 16 hta, ‘mungkan ga a nhtoi zawn htoi tu’ na matu kaga ga shadawn langai hpe jailang da ai. Dai gaw, sape ni hpe “mungkan ga a nhtoi” ngu nna Yesu tsun da ai lam hte hkrak sha re. (Mat 5:14-16) Yesu gaw shi hpang hkan ai ni hpe “sape shatai” na matu tsun da ai. Shanhte gaw “lamu ga aprat htum hkra” sakse hkam na re ai hpe mung tsun da ai. (Mat 28:18-20; Kas 1:8) Ndai ahkyak htum ai magam hta myit rawt let shang lawm ai shaloi “dinghpring ai lam ni hpe galaw” nga ai re.

16. Anhte a masa gara hku mi nga tim Hpilipi 1:12-14 hku nga yang gara hku nna nhtoi htoi tu lu na kun? (Makawp sumla hpe yu u.)

¹⁶ Anhte hta gara masa mi nga tim, nhtoi zawn htoi tu lu ai. Kalang lang, hkaw tsun na  matu pat shingdang nga ai zawn raitim, hkaw tsun lu na matu ahkaw ahkang byin shangun chye ai. Ga shadawn, kasa Pawlu gaw Hpilipi nawku hpung de laika ka ai shaloi, Roma mare hta nta langai kaw sharen da hkrum nga ai. Shi lata na hpri sin-yu gaw hkaw tsun magam hpe n hkum pat lu wa ai. Shi hpe sin ai ni hte shi kaw sa chyai ai ni hpe matut hkaw tsun wa ai. Dai masa ni a lapran, Pawlu gaw myit rawt let hkaw tsun wa ai. Dai gaw hpunau nauna ni “Karai Kasang a mungga hpe n hkrit n kang ai sha” tinang hkum tinang kam ai myit hte nden marai rawng let hkaw tsun na matu karum ya wa ai.​—⁠Hpilipi 1:12-14 hpe hti u; 4:22.

17. Hpunau nauna nkau gaw yakhkak ai lam ni nga tim gara hku nna matut hkaw tsun lu ai kun?

¹⁷ Hpunau nauna ni gaw Pawlu a nden marai rawng ai kasi ningli hpe hkan sa lu ai. Shanhte gaw wanglu wanglang n hkaw tsun lu ai (sh) nta langai hpang langai n lu sa ai mungdan ni hta nga tim, kaga lam hku nna kabu gara shiga hkaw tsun na matu ahkaw ahkang tam ma ai. (Mat 10:16-20) Dai zawn mungdan langai hta, ninghtawn hpung kawan gaw hkaw tsun masha ni hpe jinghku jingyu ni, htingbu ni, jawng manang ni, bungli manang ni, chye hkat ai masha ni hpe hkaw tsun na matu n-gun jaw ai. Lahkawng ning laman, dai ninghtawn kata hta nga ai nawku hpung ni gaw, manu mana rawt jat wa ai. Anhte gaw wanglu wanglang hkaw tsun lu ai shara hta nga nga ai rai na re. Raitim, hpaji rawng let hkaw tsun nga ai hpunau nauna ni a kasi ningli kaw nna anhte sharin la lu ai. Hkaw tsun lu hkra dang lu ai daram nang galaw ai nga yang, yakhkak ai lam nga tim matut hkaw tsun lu ai atsam hpe Yehowa jaw na re.​—⁠Hpl 2:13.

18. Hpa galaw na matu dawdan da ging ai kun?

¹⁸ Ya na zawn ahkyak ai aten hta, Hpilipi ni hpe ka ai Pawlu a laika hta lawm ai hpaji jaw ga ni hpe hkan sa na matu dawdan da ra ai. Anhte gaw grau ahkyak ai lam ni galaw ra ai, mara shagun shara n nga hkra shakut ra ai, kaga ni hpe ahtu kataw shangun ai lam ni hpe koi ra ai, dinghpring ai lam ni hpe galaw ra ai. Rai yang, anhte gaw tsawra myit law htam wa nna, tsawra myit nga ai Kawa Yehowa hpe shagrau lu na re.