1. Anhte hta hpa ahkaw ahkang nga ai kun?

YEHOWA a nawku hpung hta nga lu ai gaw ahkaw ahkang kaba re. Ngwi pyaw ai masha ni hte simsa ai lam hpring nga ai wenyi hparadisu hta anhte nga lu ai. Nawku hpung hta na a shara gaw hpa rai a ta?

2. Kasa Pawlu ka ai laika ni hta gara ga shadawn hpe lang wa ai kun?

² Kasa Pawlu ka ai laika ni hta lang da ai ga shadawn langai kaw nna, ndai ga baw hte seng ai lam law law hpe chye lu ai. Dai laika ni hta, Pawlu gaw nawku hpung hpe masha hkum hkrang hte shingdaw da ai. Nawku hpung hta nga ai marai langai hpra hpe hkum hkrang a daw ni hte mung shingdaw da ai.​—Rom 12:4-8; 1 Ko 12:12-27; Ehp 4:16.

3. Ndai sumhpa hta gara lam 3 hpe hkaja lu na kun?

³ Ndai sumhpa hta, Pawlu a ga shadawn kaw na sharin la lu ai ahkyak ai lam 3 hpe chye lu na re. Langai, Yehowa a nawku hpung hta anhte langai hpra a matu shara * nga ai hpe sharin la lu na re. Lahkawng, nawku hpung hta tinang a shara hpe mu na matu yak nga ai nga yang hpa galaw lu ai hpe mung hkaja lu na re. Masum, nawku hpung hta anhte langai hpra hpe Yehowa jaw da ai amu hta bungli law nga na matu hpa majaw ahkyak ai hpe mung hkaja lu na re.

4. Roma 12:4, 5 gaw anhte hpe hpa sharin ya ai kun?

⁴ Yehowa a dinghku hta, langai hpra a matu ahkyak ai shara nga ai hpe Pawlu a ga shadawn kaw nna shawng nnan sharin la lu na re. Pawlu gaw shi a ga shadawn hpe ndai hku hpang da ai: “Hkum hkrang langai sha hta nna, daw shan law law rai nga ai rai nna, daw shan ni yawng gaw asung langai sha hta n shang lu ai hte maren, law law rai nga ga ai anhte mung, Hkristu hta hkum hkrang langai sha tai nna, langai hte langai shada da a daw shan ni rum nga ga ai.” (Rom 12:4, 5) Pawlu hpa hpe tsun mayu ai kun? Anhte yawng nawku hpung hta n bung ai lit ni nga tim yawng gaw manu dan ai.

5. Nawku hpung hpe Yehowa hpa “kumhpa” jaw da ai kun?

⁵ Nawku hpung hta shara lu da ai ni ngu tsun yang, woi awn ai ni hpe sha kalang ta myit hkrup na re. (1 Ht 5:12; Heb 13:17) Hkristu hku nna, Yehowa gaw nawku hpung hpe masha “kumhpa” jaw da ai. (Ehp 4:8) Dai kumhpa hta Uphkang Hpung Shang Masha Ni, shanhte hpe karum ya ai ni, Ginjaw garan rung komiti hta lawm ai ni, hpung kawan ni, sharin jawng hpe woi awn ai ni, myitsu salang ni hte magam tau ni lawm ai. Yehowa a manu dan ai sagu ni hpe lanu lahku na matu hte nawku hpung hpe shangang shakang ya na matu, dai hpunau yawng hpe chyoi pra ai wenyi hte aya tang da ai.​—1 Pe 5:2, 3.

6. 1 Htesaloni 2:6-8 hku nga yang chyoi pra ai wenyi hte aya tang hkrum ai hpunau ni gaw hpa galaw na matu shakut ai kun?

⁶ Chyoi pra ai wenyi hte aya tang da ai hpunau ni hta lit amyu myu nga ai. Lagaw hte lata zawn, hkum hkrang a daw shan yawng gaw hkum ting akyu lu na matu rau jawm galaw ai zawn sha, chyoi pra ai wenyi hte aya tang hkrum ai hpunau ni mung nawku hpung ting akyu lu na matu, arau jawm galaw ai. Shanhte gaw tinang shagrau hkrum na matu n shakut ai. De a malai hpunau nauna ni hpe, shadaw shangang ya na matu hte n-gun jaw na matu shakut ai. (1 Htesaloni 2:6-8 hpe hti u.) Tingkyeng akyu n tam ai sha, wenyi atsam ningja nga ai hpunau ni hpe jaw da ai majaw Yehowa hpe chyeju dum ga ai.

7. Aten hpring magam gun ai ni hta hpa shaman chyeju nga ai kun?

⁷ Nawku hpung hta, nkau mi gaw sasana magam gun ai ni, laksan ningshawng ni, aten galu ningshawng ni hku nna lit ap hkrum chye ai. Mungkan ting hta nga ai hpunau nauna ni gaw, hkaw tsun ai hte sape shatai ai bungli hpe aten hpring magam gun na matu dawdan da ma ai. Dai majaw, shanhte gaw masha law law hpe Yesu Hkristu a sape byin wa hkra karum ya lu wa ai. Shanhte hta, ja gumhpraw kachyi mi sha nga tim, Yehowa jaw ai shaman chyeju lu la ma ai. (Mrk 10:29, 30) Dai hpunau nauna ni hpe anhte tsawra nna, nawku hpung hta shanhte nga ai majaw, grai chyeju dum ai.

8. Hkaw tsun masha yawng gaw Yehowa a matu hpa majaw manu dan ai kun?

⁸ Aya tang hkrum ai hpunau ni hte aten hpring magam hta shang lawm nga ai ni a matu sha, nawku hpung hta shara nga ai kun? N re. Hkaw tsun masha yawng gaw Karai hte nawku hpung a matu manu dan ai. (Rom 10:15; 1 Ko 3:6-9) Nawku hpung a ahkyak dik htum bandung langai gaw, Madu Yesu Hkristu a sape shatai ai bungli hta shang lawm na matu re. (Mat 28:19, 20; 1 Tm 2:4) Hkalup hkam da ai ni hte garai n hkam shi ai hkaw tsun masha yawng gaw, dai bungli hpe shawng tawn nna shakut nga ma ai.​—Mat 24:14.

9. Anhte a Hkristan nauna ni hpe hpa majaw manu shadan ai kun?

⁹ Yehowa gaw Hkristan nauna ni hpe nawku hpung hta ahkyak ai bungli jaw ai hku nna shagrau  ai. Shi hpe sadi dung let nawku nga ai ningrum ningtau jan ni, kanu ni, gaida jan ni hte dinghku n de ai nauna ni hpe shi grai manu shadan ai. Karai a myit hpe shapyaw ya ai num ni a lam hpe Chyum Laika hta chyahkring hkring tsun da ai. Shanhte gaw hpaji rawng ai, makam masham nga ai, myit rawt ai, nden marai rawng ai, gam jaw gam ya kam ai, bungli kangka ai ni hku nna shakawn hkrum ai. (Luk 8:2, 3; Kas 16:14, 15; Rom 16:3, 6; Hpl 4:3; Heb 11:11, 31, 35) Dai zawn atsam ningja ni hte hpring ai Hkristan num ni nawku hpung hta nga ai majaw, Yehowa hpe chyeju dum ai.

10. Asak kaba ai ni hpe anhte hpa majaw manu shadan ai kun?

¹⁰ Nawku hpung hta asak kaba ai ni nga ai majaw mung grai kabu ga ai. Nawku hpung nkau hta nga ai asak kaba ai hpunau nauna ni gaw, prat ting Yehowa hpe sadi dung let nawku dawjau wa ma ai. Asak kaba ai nkau mi gaw, nau n na shi ai aten hta sha, tengman ai lam hpe sharin la wa ai rai na re. Shanhte gaw asak kaba wa ai majaw, hkamja lam nau n nga wa ai mung rai na re. Dai majaw, nawku hpung hte hkaw tsun bungli hta shadawn sharam sha galaw lu ai. Raitim, hkaw tsun bungli hta dang lu ai daram galaw let, kaga ni hpe n-gun jaw nna, shaman shakyang ya nga ai. Shanhte a mahkrum madup kaw nna, anhte yawng akyu lu la ga ai. Yehowa hte anhte a matu grai manu dan ai ni re.​—Gsh 16:31.

11-12. Nawku hpung hta nga ai ramma ni a majaw anhte gara hku n-gun lu ai kun?

¹¹ Ramma ni hte seng nna mung myit yu ga. Shanhte gaw Nat Satan hte nhkru ai myit mang lam ni shingkang ka-up nga ai ndai mungkan hta nga kaba wa ai majaw, chyam dinglik ai lam ni hpe hkrum nga ai. (1 Yh 5:19) Raitim, shanhte gaw zuphpawng ni hta mahtai jaw ai, hkaw tsun bungli hta shang lawm ai, shanhte a makam masham hpe nden marai hte makawp maga ai hpe anhte mu ai shaloi grai n-gun lu ga ai. Ramma ni mung Yehowa a nawku hpung hta ahkyak ai shara lu da ai.​—Shk 8:2.

¹² Hpunau nauna nkau gaw nawku hpung hta ahkyak ai tinang a shara hpe mu na matu yak nga ai. Langai hpra a matu nawku hpung  hta shara nga ai ngu hkamsha lu hkra karum ya lu ai lam hpe hkaja yu ga.

13-14. Nawku hpung hta manu n dan ai ngu nkau mi hpa majaw hkamsha ma ai kun?

¹³ Pawlu a ga shadawn kaw nna sharin la lu ai lahkawng ngu na lam hpe yu yu ga. Hpunau nauna law law hkrum nga ai manghkang langai hpe shi tsun da ai. Dai gaw nawku hpung hta tinang a shara hpe mu na matu yak nga ai lam re. Pawlu ndai hku tsun da ai: “Lagaw mahtang gaw, Ngai lata n rai nngai majaw hkum hte n seng nngai, nga nna tsun a yang gaw, de a majaw hkum hte n seng ai, n rai. Bai dai ana gaw, Ngai myi n rai nngai majaw hkum hte n seng nngai, nga nna tsun a yang gaw, de a majaw hkum hte seng ai, n rai.” (1 Ko 12:15, 16) Pawlu anhte hpe hpa sharin ya ai kun?

¹⁴ Nawku hpung na kaga ni hte tinang hkum tinang shingdaw na nga yang, na a atsam ningja ni hpe mu na matu yak chye ai. Nawku hpung hta nga ai nkau mi gaw sharin achyin ai hta grai ram ai ni, grai zinlum chye ai ni, sagu rem kaja ni rai ma ai. Nang gaw shanhte zawn n ram ai ngu hkamsha na re. Dai gaw nang hta shagrit shanem ai myit nga ai hpe madun nga ai. (Hpl 2:3) Raitim, sadi ra ai. Dai zawn atsam ningja nga ai ni hte tinang hkum tinang chyahkring hkring shingdaw ai nga yang, myit daw wa chye ai. Kasa Pawlu tsun wa ai zawn, nawku hpung hta tinang a matu shara n nga ai ngu nna pyi hkamsha chye ai. Dai zawn hkamsha lam ni hpe tawt lai lu hkra hpa gaw karum ya lu na kun?

15. 1 Korinhtu 12:4-11 hku nga yang anhte hta nga ai shaman chyeju hte seng nna hpa hpe chye da ra ai kun?

¹⁵ Ndai lam hpe myit yu ga: Yehowa gaw tsa ban langai na Hkristan nkau mi hpe chyoi pra ai wenyi hte mauhpa shaman chyeju jaw wa ai. Shanhte lu la ai shaman chyeju ni hte atsam ningja ni gaw n bung tim, Yehowa a matu manu dan ai. (1 Korinhtu 12:4-11 hpe hti u.) Dai ni aten hta chyoi pra ai wenyi hku nna, mauhpa shaman chyeju ni n lu la sai. Yawng a atsam ningja ni gaw n bung tim, Yehowa a matu manu dan ai.

16. Kasa Pawlu a gara hpaji jaw ga hpe hkan sa ra ai kun?

 ¹⁶ Tinang hkum tinang kaga ni hte shingdaw na malai, kasa Pawlu a ndai hpaji jaw ga hpe hkan sa ra ai: “Langai hte langai gaw tinang a bungli hpe dinglik yu u ga; shaloi shi gaw masha kaga hta n rai, tinang hta sha gumrawng shara rai na ra ai.”​—Gal 6:4.

17. Pawlu a hpaji jaw ga ni hpe hkan sa na nga yang gara akyu ni lu la na kun?

¹⁷ Kasa Pawlu a hpaji jaw ga hpe hkan sa nna, tinang hkum tinang dinglik yu na nga yang, tinang hta nga ai shaman chyeju hte atsam ningja ni hpe mu wa na re. Ga shadawn, myitsu salang langai gaw, pinra ntsa hta hkaw tsun ai shaloi gaw nau n hkrak tim, sape shatai ai bungli hta gaw grai ram ai wa rai na re. Shing nrai, shi gaw kaga myitsu salang ni zawn, hpajang ai lam hta atsawm n chye galaw tim, tsawra myit rawng ai, hkaw tsun masha ni Chyum Laika hpaji hpe aloi sha mai hpyi ai myitsu salang rai chye ai. Shing nrai, manam daw kam ai wa re ngu mying kaja lu da ai wa byin chye ai. (Heb 13:2, 16) Tinang hta nga ai atsam ningja ni hpe atsawm sha chye wa na nga yang, nawku hpung hta tinang galaw lu ai hte seng nna myit dik lam nga wa na re. Rai yang, tinang hte n bung ai atsam ningja ni lu tawn da ai hpunau nauna ni hpe manawn ai myit nga sana n re.

18. Anhte a atsam ningja ni rawt jat hkra gara hku galaw ra ai kun?

¹⁸ Nawku hpung hta gara shara kaw mi nga ai raitim, anhte yawng gaw hkaw tsun magam hta atsam ningja ni rawt jat hkra shakut ging ai. Anhte rawt jat na matu Yehowa gaw shi a uhpung hku nna, shaman shakyang ya nga ai. Ga shadawn, hkaw tsun bungli grau tang du hkra galaw lu na matu, bat lapran zuphpawng ni hta lam matsun ni lu la ai. Dai zuphpawng ni kaw na akyu hpring tup lu la na matu nang shakut nga ai kun?

19. Kabu Gara Shiga Hkaw Tsun Ai Ni A Matu Jawng hpe lu lung na matu gara hku shakut mai ai kun?

¹⁹ Shaman shakyang ya ai lamang hta Kabu Gara Shiga Hkaw Tsun Ai Ni A Matu Jawng mung lawm ai. Aten hpring magam hta shang lawm nga ai asak 23 hte 65 lapran nga ai hpunau nauna ni lung mai ai. Dai jawng hpe galoi mung lu lung na n re ngu nang shadu yang shadu na re. Raitim, n lu lung ai lam ni hpe myit nga na malai, hpa majaw lung mayu ai ngu ai hpe myit yu u. Dai hpang, na a atsam ningja ni rawt jat wa hkra karum ya lu ai masing hpe jahkrat u. Yehowa a karum shingtau ai lam hte tinang nan shakut na nga yang, n mai byin ai ngu myit tawn da ai lam ni gaw teng sha byin wa na re.

20. Roma 12:6-8 kaw nna hpa sharin la lu ai kun?

²⁰ Roma 12:6-8 (hti u) hta lawm ai Pawlu a ga shadawn kaw nna sharin la lu ai masum ngu na lam hpe yu yu ga. Nawku hpung hta nga ai ni gaw, n bung ai shaman chyeju ni nga ai lam hpe Pawlu kalang bai tsun da ai. Ya kalang gaw anhte hta gara shaman chyeju mi nga tim, nawku hpung hpe shangang shakang ya na matu hte n-gun jaw na matu dai hpe akyu jashawn ging ai lam ahkyak shatai nna tsun da ai.

21-22. Robat hte Hpelit kaw nna hpa sharin la lu ai kun?

²¹ Hpunau Robat * a mabyin hpe yu yu ga. Maigan hta magam gun nga yang, shi a mungdan na Behtela hta magam gun na matu lit ap hkrum ai. Lit galai shai mat ai gaw, shi a ra rawng ai lam a majaw n re ai hpe hpunau ni tsun tim, ndai hku hkamsha nga ai: “Nye a ra rawng ai lam a majaw re ngu nna shata law law myit n pyaw wa ai. Behtela kaw nna pru na matu pyi myit wa ai.” Kabu gara ai myit hpe shi gara hku bai lu la wa ai kun? Lai wa sai aten  hta Yehowa shaman shakyang ya ai gaw ya galaw nga ai lit hta grau akyu rawng na matu re ngu myitsu salang langai n-gun jaw ai. Lai wa sai aten hpe bai n yu ai sha, ya galaw lu ai lam hpe myit maju jung ra ai lam Robat chye mat ai.

²² Hpunau Hpelit Episkopo mung dai zawn masa hte hkrum wa ai. Shan la gaw, 1956 kaw Gilat jawng yu nna Bolibia hta hpung kawan magam gun ai. 1964 hta ma lu wa ai. “Anhte manu shadan ai lit hpe tawn da kau na matu grai yak ai. Laning mi daram myit daw myit hten ai lam ni byin wa ai. Raitim, Yehowa a karum shingtau ai lam hte nye a myit jasat ni hpe galai shai lu wa nna, kanu kawa ngu ai lit nnan hpe myit maju jung lu wa ai.” Nang mung Robat (sh) Hpelit zawn hkamsha nga ai kun? Shawng de lu la wa ai magam lit ni hpe ya n lu galaw mat ai majaw, myit daw nga ai kun? Rai yang, na a myit jasat hpe galai shai nna Yehowa hte hpunau ni a matu, nang ya galaw lu ai lam hpe myit maju jung na nga yang, grau pyaw wa na re. Na a shaman chyeju ni hte atsam ningja ni hpe akyu jashawn nna, kaga ni hpe karum ya ai hta amu law nga u. Rai yang, nawku hpung hpe shangang shakang ya lu nna, nang mung kabu gara lu na re.

23. Hpa galaw na matu aten la ging ai kun? Hpang na sumhpa hta hpa lam hkaja na kun?

²³ Anhte langai hpra gaw Yehowa a matu manu dan ai. Yehowa gaw anhte hpe shi a nta masha byin shangun mayu ai. Hpunau nauna ni hpe shangang shakang ya na matu, galaw lu ai lam hpe aten la nna myit sawn sumru ra ai. Dai hpang, tatut galaw ra ai. Rai yang, nawku hpung hta anhte a matu shara n nga ai ngu nna hkamsha sana n re. Nawku hpung hta, kaga ni hpe gara hku mu mada ging ai kun? Shanhte hpe chyeju dum ai lam gara hku madun na kun? Hpang na sumhpa hta dai ahkyak ai lam hpe hkaja lu na re.