Hkaja Na Sumhpa 33
Yehowa Gaw Shi A Masha Ni Hpe Yu Nga
‘Yehowa hpe hkrit kamyin ai ni hpe . . . Shi a myi a yu nga ai.’—SHK 33:18, 19.
Mahkawn 4 Yehowa Gaw Nye A Sagu Rem Wa
Sumhpa Hta Lawm Ai Lam *
1. Yesu gaw shi hpang hkan ai ni hpe yu ya na matu Yehowa kaw hpa majaw karum hpyi ai kun?
YESU gaw shi hpang hkan ai ni hpe yu ya na matu, garai n si shi ai shana hta, sumsing Kawa kaw laksan akyu hpyi wa ai. (Yhn 17:15, 20) Yehowa gaw shi a amyu masha ni hpe makawp maga ya na matu, lanu lahku ya na matu, galoi mung yu nga ai. Raitim, Yesu gaw shi hpang hkan ai ni hpe, Satan laja lana ninghkap na, dai hpe tawt lai lu na matu, Yehowa a karum shingtau ra na hpe chye ai.
2. Shakawn 33:18-20 hku nga yang, anhte hkrum nga ai mayak mahkak ni hpe hpa majaw hkrit n ra ai kun?
2 Ndai nhkru ai Satan mungkan a majaw, dai ni aten na jet ai Hkristan ni mayak mahkak law law hkrum nga ai. Myit daw shangun ai, Yehowa hpe sadi dung ai lam hpe chyam dinglik shangun ai, mayak mahkak ni anhte hkrum nga ai. Raitim, hkrit n ra ai lam hpe ndai sumhpa hta mu lu na re. Yehowa gaw anhte hpe yu nga ai. De a lachyum gaw, anhte hkrum nga ai manghkang ni hpe Shi mu ai, anhte hpe karum ya mayu ai ngu ai lachyum re. “Yehowa hpe hkrit kamyin ai ni” hpe Shi gara hku “yu nga ai” hpe madun ai Chyum Laika kasi ningli 2 hpe hkaja yu ga.—Shakawn 33:18-20 hpe hti u.
Garen Gari Ai Ngu Hkamsha Ai Shaloi
3. Gara aten hta garen gari ai ngu hkamsha chye ai kun?
3 Nawku hpung hta, hpunau nauna law law nga tim, kalang lang gaw garen gari ai ngu hkamsha chye ai. Ga shadawn, asak kaji ai ni jawng hta makam masham hte seng nna sanglang dan ra ai shaloi, nawku hpung nnan de htawt ra ai shaloi, garen gari ai ngu hkamsha chye ai. Nkau gaw, tinang hkrai sha re ngu hkamsha nna, yawn hkyen nga ai, myit daw nga ai. Kaga ni chye na ya na n re ngu myit tsang nna, tsun na matu htingnut chye ai. Tinang hpe lanu lahku ya lu ai kadai mung n nga ai ngu hkamsha hkrup chye ai. Gara lam a majaw raitim, garen gari ai ngu hkamsha ai shaloi, myit tsang ai, karum shingtau lam n nga ai ngu hkamsha chye ai. Yehowa dai hku n hkamsha shangun mayu ai. Hpa majaw dai hku lu tsun ai?
4. Myihtoi Elia gaw, ‘ngai hkrai sha’ ngam sai ngu hpa majaw tsun ai kun?
4 Sadi dung ai Elia a kasi ningli hpe myit yu ga. Yezebela sat na hpe hkrit ai majaw, nhtoi 40 ya jan hprawng hkawm ra taw ai. (1 Hk 19:1-9) Hpang jahtum, lungpu hta shi hkrai makoi nga ai shaloi, myihtoi gaw ‘ngai hkrai sha’ ngam sai ngu Yehowa hpe tsun ai. (1 Hk 19:10) Ndai mungdan hta kaga myihtoi ni naw nga ai. Yezebela hkan sat ai shaloi, myihtoi 100 hpe Obedia hkye la wa ai. (1 Hk 18:7, 13) Rai yang, Elia gaw shi hkrai sha re ngu hpa majaw hkamsha ai kun? Obedia hkye la wa ai myihtoi ni yawng si mat sai ngu shi shadu nna kun? Hkarmela Bum hta Bala ni hte chyam ai lam galaw ngut ai hpang, kaga ni gaw Yehowa hpe n nawku wa ai majaw, shi hkrai re ngu hkamsha ai kun? Shi shoihpa hkrum nga ai hpe kadai n chye ai (sh) shi hpe lanu lahku ai masha n nga ai ngu hkamsha ai majaw kun? Elia a hkamsha lam hpe ahkri ahkrai gaw n tsun dan ai. Raitim, shi hkrai re ngu hpa majaw hkamsha ai hpe Yehowa chye na nna, gara hku karum ya ra na hpe mung hkrak chye ai.
Garen gari ai ngu hkamsha ai shaloi, Elia hpe Yehowa karum ya ai lam kaw na hpa shalan shabran ai lam lu la ai kun? (Laika pang 5-6 hpe yu u)
5. Langai sha n re ai hpe Elia kam hkra Yehowa gara hku karum ya wa ai kun?
5 Yehowa gaw, Elia hpe lam law law hte karum ya ai. Elia hpe “nang nang e hpa galaw nga n ta?” ngu 2 lang san nna, ga shaga wa hkra karum ya ai. (1 Hk 19:9, 13) Elia hpaw tsun dan ai hpe Yehowa lang shagu madat ya wa ai. Yehowa gaw, Elia makau hta Shi nga nga ai, Shi hta n-gun atsam grai kaba ai lam hpe Elia chye hkra galaw wa ai. Shi hpe nawku dawjau nga ai ni law law naw nga ai lam mung chye hkra galaw wa ai. (1 Hk 19:11, 12, 18) Myit hta nga ai lam hpe hpaw tsun dan ngut ai hpang, Yehowa bai htang ai hpe mu ngut ai hpang, myit simsa mat na re. Yehowa gaw, Elia hpe kaga ahkyak ai lit law law mung bai jaw ai. Hazaela hpe Suru hkawhkam tai na matu, Yehu hpe lsraela hkawhkam tai na matu, Elisha hpe myihtoi tai na matu namman jaw ya na matu shi hpe lit jaw ai. (1 Hk 19:15, 16) Dai lam hku nna, kaja ai lam ni hpe myit maju jung lu hkra, Yehowa karum ya wa ai. Grai hkau ai manang Elisha hpe mung lajang ya wa ai. Nang hkrai sha re ngu hkamsha ai shaloi, Yehowa a karum shingtau lam hpe gara hku lu mai na kun?
6. Garen gari ai ngu hkamsha ai shaloi hpa hpe hpyi mai ai kun? (Shakawn 62:8)
6 Yehowa gaw Shi hpang akyu hpyi na matu saw shaga nga ai. Nang hpa manghkang ni hkrum nga ai hpe shi chye ai. Gara aten hta hpyi tim, Shi madat ya na re. (1 Ht 5:17) Shi hpe nawku ai ni a akyu hpyi ga hpe madat mayu ai. (Gsh 15:8) Garen gari ai ngu hkamsha ai shaloi hpa hpe hpyi mai ai kun? Elia galaw wa ai zawn, Yehowa hpe myit masin mahkra hpaw tsun dan u. (Shakawn 62:8 hpe hti u.) Na a myit tsang ai lam, gara hku hkamsha nga ai lam tsun dan u. Dai hpe hparan lu na matu karum hpyi u. Ga shadawn, jawng hta sakse hkam na matu hkrit nga ai, garen gari ai ngu hkamsha nga ai rai yang, nden marai jaw na matu, makam masham hte seng nna hpaji rawng ai hku tsun dan chye na matu, nyan hpaji hpyi u. (Luk 21:14, 15) Myit daw ai ngu hkamsha nga yang, kunghpan ai hpunau nauna langai ngai hte ga shaga lu hkra, karum ya na matu akyu hpyi u. Tinang a hkamsha lam hpe chye na ya lu hkra, dai hpunau nauna hpe karum ya na matu hpyi u. Akyu hpyi ga ni hpe shi gara hku mahtai jaw ai hpe chye hkra galaw u. Kaga ni a karum shingtau lam hpe hkap la u. Rai yang, garen gari ai ngu hkamsha ai lam yawm wa na re.
Hkaw tsun magam hpe jat nna galaw na matu, kaga ni hte rau magam gun na matu ahkaw ahkang tam ai kun? (Laika pang 7 hpe yu u)
7. Mawrisiyo a mabyin kaw na hpa sharin la lu ai kun?
7 Yehowa gaw anhte yawng hpe lachyum nga ai bungli jaw da ai. Nawku hpung lit ni hte hkaw tsun magam hta nang shakut shaja galaw ai hpe Shi sadi hkrup ai, manu shadan ai hpe kam u. (Shk 110:3) Dai lam ni hta bungli law nga ai gaw, garen gari ai hkamsha lam hpe gasat lu hkra gara hku karum ya ai kun? Ramma hpunau Mawrisiyo a lam hpe yu yu ga. * Shi hkalup hkam ngut nna kade n na yang, grai hkau ai manang gaw tengman lam hpe kau da mat ai. “Shi hpe yu nna, ngai mung tinang hkum tinang kam ai myit mat mat ai. Yehowa hpe jaw ai ga sadi grin lu na kun? Yehowa a nta masha matut byin lu na kun? ngu nna ngai myit ai. Garen gari nna, nye a hkamsha lam ni hpe kadai n chye na ai ngu myit wa ai” ngu tsun ai. Mawrisiyo hpe hpa gaw karum ya wa ai kun? Shi ndai hku tsun ai: “Hkaw tsun magam hta grau shang lawm ai. Dai gaw, nye a lam hpe sha n myit nga na matu, n kaja ai hkamsha lam ni mat mat na matu karum ya ai. Kaga ni hte rau galaw ai majaw, garen gari ai lam ni yawm wa nna ngwi pyaw lam lu la ai.” Hpunau nauna ni hte hkrum nna hkaw tsun n sa lu tim, laika ka ai, phone hte sakse hkam ai zawn re ai lam ni hta rau shang lawm ai gaw anhte hpe n-gun lu shangun ai. Mawrisiyo hpe hpa gaw naw karum ya wa ai kun? “Nawku hpung bungli ni hta amu law nga ai. Jawngma lit ni hpe atsawm hkyen lajang nna shang lawm ai. Dai lit ni gaw, Yehowa hte kaga ni ngai hpe manu shadan ai ngu hkamsha ai” ngu tsun ai.
Grai Sawng Ai Mayak Mahkak Ni Hkrum Ai Shaloi
8. Grai sawng ai chyam dinglik ai lam ni gaw anhte hpe gara hku hkra machyi shangun ai kun?
8 Ndai hpang jahtum nhtoi hta mayak mahkak ni hkrum na hpe myit mada da ai. (2 Tm 3:1) N myit mada da ai aten hta, kalang ta hkrum wa ai shaloi, grai mau mat chye ai. Ja gumhpraw yakhkak ai, grai sawng ai yawga nga ai hpe chye dat ai, tsawra ai marai langai si mat ai lam ni hkrum chye ai. Laksan hku nna, mayak mahkak ni langai hpang langai hkrum ai (sh) yawng kalang ta hkrum ai shaloi, myit daw nna hpa galaw na hpe n chye ai baw byin chye ai. Raitim, anhte hpe Yehowa yu nga nna, Shi a karum shingtau lam hte hpa hpe raitim tawt lai lu na re.
9. Yoba hkrum wa ai chyam dinglik ai lam nkau hpe tsun dan u.
9 Sadi dung ai Yoba hpe Yehowa gara hku karum ya ai hpe yu yu u. Aten kadun laman, grai sawng ai chyam dinglik ai lam ni kalang ta hkrum wa ai. Lani mi hta sha, dusat ni yawng lagu la hkrum ai, sat hkrum ai, mayam ni hte kasha ni sat hkrum ai lam hpe na lu ai. (Yob 1:13-19) Grai yawn nga ai laman hta sha, matsat shabat re ai ana bai byin wa ai. (Yob 2:7) Shi a masa gaw grai sawng ai majaw, ndai hku tsun ai: “Asak hkrun lam hpe hki ba dum nga nngai majaw asum jaw nngai.”—Yob 7:16, JCLB.
Yoba hpe Yehowa lanu lahku nga ai hpe kam na matu, Shi hpan da ai lam ni hpe lam amyu myu hte lanu lahku nga ai hpe tsun dan nga (Laika pang 10 hpe yu u)
10. Chyam dinglik ai lam hpe Yoba hkam jan lu hkra Yehowa gara hku karum ya wa ai kun? (Makawp sumla hpe yu u.)
10 Yehowa gaw Yoba hpe yu nga ai. Yoba hpe Yehowa tsawra ai majaw, dai chyam dinglik lam ni hpe hkam jan lu hkra n-gun jaw wa ai. Yehowa gaw, Shi a nyan hpaji hte seng nna bai shadum ya ai, Shi hpan da ai masha yawng hpe tsawra myit hte lanu lahku ai lam Yoba hpe tsun dan ai. Mauhpa lam hte hpan da hkrum ai du sat law law a lam hpe mung tsun dan ai. (Yob 38:1, 2; 39:9, 13, 19, 27; 40:15; 41:1, 2) Yoba hpe n-gun jaw na matu, shalan shabran ya na matu, asak kaji nna sadi dung ai Elihu hpe mung akyu jashawn wa ai. Yehowa gaw shi hpe nawku ai ni a hkam jan lu ai atsam hpe galoi mung kumhpa jaw ai lam Elihu bai shadum ya ai. Yoba hpe tsawra myit hte sharin shaga na matu mung Elihu hpe Yehowa shadut ya ai. Ninggawn tawa Hpan Madu Yehowa hte Yoba a masa hpe shingdaw dan ai hku nna, tinang hkum tinang sha myit maju n jung na matu Elihu karum ya wa ai. (Yob 37:14) Yehowa gaw Yoba hpe lit jaw ai. Mara galaw ai shi a manang 3 a matu akyu hpyi ya na matu tsun ai. (Yob 42:8-10) Dai ni aten hta mung, grai sawng ai chyam dinglik ai lam ni hkrum ai shaloi, anhte hpe Yehowa gara hku madi shadaw ya ai kun?
11. Chyam dinglik ai lam ni hkrum ai shaloi Chyum Laika gaw anhte hpe gara hku karum ya ai kun?
11 Dai ni aten hta Yehowa gaw Yoba hpe tsun ai zawn, anhte hpe dingtawk ga shaga na n re. Raitim, Chyum Laika hku nna anhte hpe ga shaga ai. (Rom 15:4) Htawm hpang myit mada lam jaw ai hku nna shalan shabran ya ai. Chyam dinglik ai lam ni hkrum ai shaloi, shalan shabran ya lu ai Chyum Laika kaw na lam nkau hpe myit yu ga. Chyum Laika hta, grai sawng ai chyam dinglik lam ni hte hpawn, gara lam mung, “[Shi] a tsaw ra ai hta na, anhte hpe n jahka kau lu” ai lam Yehowa tsun da ai. (Rom 8:38, 39) Akyu hpyi ai hku nna, “Shi hpe shaga ai ni nlang hte hte, . . . ni nga ai” ngu nna mung tsun da ai. (Shk 145:18) Yehowa hpe shamyet shanat na nga yang, gara chyam dinglik lam hpe raitim hkam jan lu nna, yakhkak hkrum ai aten hta pyi ngwi pyaw lam lu la na ngu nna tsun da ai. (1 Ko 10:13; Yak 1:3, 12) Anhte hkrum ai chyam dinglik lam ni gaw, chyahkring chyahkra sha rai nna, Shi jaw na htani htana asak hte shingdaw dat yang, aten kadun sha rai mat ai ngu nna mung Chyum Laika hta tsun da ai. (2 Ko 4:16-18) Yakhkak jamjau ai lam ni byin shangun ai Nat Satan hte shi hpang hkan ai ni hpe Yehowa jahten kau na ngu nna mung tsun da ai. (Shk 37:10) Htawm hpang hta hkrum wa na chyam dinglik ai lam ni hpe hkam jan lu hkra karum ya ai Chyum daw nkau mi hpe nang matsing ai kun?
12. Yehowa gaw Shi a Mungga kaw na akyu hpring tup lu la hkra anhte hpe hpa galaw shangun mayu ai kun?
12 Yehowa gaw, anhte hpe Chyum Laika ayan hkaja na matu aten masat da shangun mayu nna, hti ai lam hpe atsawm myit sawn sumru shangun mayu ai. Chye wa ai lam ni hpe tatut hkan sa ai shaloi, makam masham grau ngang kang wa nna, sumsing Kawa hte grau ni htep wa na re. Chyam dinglik ai lam ni hpe hkam jan lu ai n-gun atsam lu na re. Shi a Mungga hta shamyet shanat ai ni hpe chyoi pra ai wenyi mung jaw ya ai. Dai wenyi gaw, gara chyam dinglik ai lam hpe raitim hkam jan lu ai “chyahtum chyalai re ai n-gun atsam” jaw ya lu ai.—2 Ko 4:7-10.
13. “Sadi ai hte myit su ai mayam” kaw na lajang ya ai wenyi malu masha ni gaw, chyam dinglik ai lam ni hpe hkam jan lu hkra gara hku karum ya ai kun?
13 Yehowa a karum shingtau lam hte “sadi ai hte myit su ai mayam” gaw, makam masham ngang kang na matu, wenyi lam hta maja nga na matu, sumhpa ni, video ni, yungwi ni hpe shapraw da ya ai. (Mat 24:45) Dai zawn aten dep lajang da ya ai lam ni kaw na akyu lu hkra shakut u. Amerikan kaw na nauna langai gaw, ya na zawn lajang da ya ai wenyi malu masha yawng a matu chyeju dum ai lam ya hte sha tsun dan ai. Shi ndai hku tsun ai: “Yehowa hpe nawku dawjau wa ai 40 ning laman, nye a sadi dung ai lam chyahkring hkring chyam dinglik hkrum wa ai.” Shi a kaji dwi gaw tsa nang nga ai mawdaw la a majaw, mawdaw adawt hkrum nna si mat ai. Kanu yan kawa mung, grai machyi sawng nna si mat ai, shi mung mawng ana lahkawng lang byin da ai. Hkam jan lu hkra hpa gaw karum ya wa ai kun? Shi ndai hku tsun ai: “Yehowa gaw, ngai hpe ayan lanu lahku ai. Sadi ai hte myit su ai mayam kaw na lajang ya ai wenyi malu masha ni gaw, hkam jan lu hkra karum ya ai. ‘Si ai du hkra, nye a sadi dung ai hpe n kau da ai’ ngu tsun wa ai Yoba zawn ngai hkamsha ai.”—Yob 27:5, JCLB.
Nawku hpung kaw nga ai kaga ni hpe gara hku karum ya lu ai kun? (Laika pang 14 hpe yu u)
14. Anhte yakhkak hkrum ai shaloi, karum ya na matu hpunau nauna ni hpe Yehowa gara hku akyu jashawn ai kun? (1 Htesaloni 4:9)
14 Yakhkak jamjau ai lam ni hkrum ai laman, shada da tsawra na matu, shalan shabran ya na matu, shi a masha ni hpe Yehowa shaman shakyang ya ai. (2 Ko 1:3, 4; 1 Htesaloni 4:9 hpe hti u.) Yakhkak hkrum ai aten hta, matut sadi dung lu hkra, Elihu zawn hpunau nauna ni karum ya nga ai. (Kas 14:22) Ga shadawn, nauna Daiyan a madu wa grai machyi sawng ai shaloi, nawku hpung gaw shi hpe gara hku karum ya wa ai lam hpe yu yu ga. Shi ndai hku tsun ai: “Dai shaloi grai yakhkak tim, Yehowa a tsawra myit nga ai lata hte ahpum da ai ngu hkamsha ai. Nawku hpung mung madi shadaw ya ai. Hpunau nauna ni sa chyai ai, phone shaga ai. Ngai mawdaw n chye gau ai majaw, zuphpawng sa na matu, hkaw tsun sa na matu, shanhte lajang ya ai.” Tsawra myit nga ai wenyi kun dinghku hta nta masha byin lu ai gaw shaman chyeju re.
Tsawra Myit Hte Yehowa Lanu Lahku Ya Ai Hpe Chyeju Dum U
15. Chyam dinglik ai lam ni hpe hkam jan lu na ngu hpa majaw kam ai kun?
15 Anhte yawng gaw chyam dinglik lam langai n rai yang, langai hkrum na re. Raitim, anhte langai sha hparan ra na n re. Tsawra myit nga ai Kawa Yehowa gaw anhte hpe galoi mung yu nga ai. Anhte a makau hta nga nna, karum hpyi ai hpe madat ya nga ai. Karum ya na matu jin jin rai nga ai. (Esa 43:2) Hkam jan lu hkra, ra nga ai lam yawng hpe Yehowa lajang ya ai majaw, tawt lai lu na ngu anhte kam ai. Ra nga ai aten hta, karum ya na matu, akyu hpyi lu ai ahkaw ahkang, Chyum Laika, wenyi malu masha law law hte tsawra myit nga ai hpunau nauna ni hpe Yehowa jaw da ai.
16. Yehowa matut lanu lahku na matu hpa galaw ra ai kun?
16 Anhte hpe sumsing Kawa yu nga ai majaw chyeju dum hpa re. “Anhte myit masin shi hta kabu nga ga ai.” (Shk 33:21) Anhte hpe karum ya na matu lajang da ya ai lam yawng kaw na akyu lu la na matu shakut ai hku nna, Yehowa hpe chyeju dum mai ai. Karai Kasang matut lanu lahku na matu, tinang maga kaw na galaw ra ai lam ni hpe mung galaw ra ai. Yehowa a ga madat na matu kaja htum shakut na, shi a man hta jaw ai hku galaw na nga yang, anhte hpe htani htana yu lanu lahku mat na re!—1 Pe 3:12.
Mahkawn 30 Nye A Kawa, Karai Hte Jinghku
^ Dai ni aten anhte hta manghkang ni law ai majaw, tawt lai lu na matu Yehowa a karum shingtau ra ai. Yehowa gaw shi amyu masha ni hpe yu nga ai lam, anhte langai hpra hkrum nga ai mayak mahkak ni hpe Shi chye ai lam, dai ni hpe tawt lai lu hkra ra ai lam ni hpe madi shadaw ya ai lam, ndai sumhpa gaw kam shangun na re.
^ Mying nkau galai shai da ai.