1. Myit daw ai gaw anhte hpe gara hku byin shangun ai kun?

SHANI shagu manghkang ni hkrum tim anhte hkam jan lu ai. Raitim, myit daw ai shaloi, manghkang ni hpe hparan na matu yak chye ai. Myit daw ai gaw anhte hpe manu n dan ai, myit n pyaw ai ngu hkamsha shangun ai. Chyum Laika hta ndai hku tsun da ai: “Ru yak tsin-yam hkrum ai aten hta, nang gawng kya nga ai rai yang, . . . n-gun kya ai wa rai nga ndai.” (Gsh 24:10, JCLB) Myit daw ai gaw manghkang ni hpe hparan na matu ra nga ai n-gun atsam hpe yawm mat shangun ai.

2. Hpa a majaw anhte myit daw chye ai kun? Ndai sumhpa hta hpa lam hkaja lu na kun?

² Tinang a majaw, kaga lam ni a majaw, myit daw na lam amyu myu nga ai. N hkum tsup ai lam ni, gawng kya ai lam ni, hkam ja lam ni a majaw mung byin chye ai. Yehowa a magam hta lu la mayu ai lit hpe n lu ai majaw, hkaw tsun lawk hta rawt jat lam n nga ai majaw byin chye ai. Ndai sumhpa hta, myit daw ai hpe hparan lu ai lam nkau mi hpe hkaja lu na re.

3. N hkum tsup ai lam ni hpe rap ra ai hku mu na matu hpa gaw karum ya na kun?

³ N hkum tsup ai lam ni hte gawng kya ai lam ni a majaw aloi sha myit daw chye ai. Yehowa gaw Hparadisu hta nga shangun mayu na kun? ngu nna pyi myit chye ai. Dai zawn myit ai gaw shoihpa nga ai. N hkum tsup ai lam ni hpe gara  hku mu mada ging ai kun? Yesu Hkristu hta lai nna masha yawng gaw, “yubak nga ai ni” re ngu Chyum Laika hta tsun da ai. (Rom 3:23, NW) Yehowa gaw anhte a mara ni hpe myit maju n jung ai. Hkum tsup na matu n myit mada ai. Anhte hpe karum ya mayu ai. Tsawra myit nga ai Kawa rai nna myit galu ai. Gawng kya ai lam ni hpe ninghkap na matu, tinang hkum tinang rap ra ai hku mu mada na matu shakut nga ai hpe shi mu ai shaloi, anhte hpe karum na matu jin jin re.​—Rom 7:18, 19.

4-5. Myit daw ai hpe awng dang na matu nauna yan hpe 1 Yawhan 3:19, 20 gaw gara hku karum ya ai kun?

⁴ Debawra yan Mariya * a mabyin hpe yu yu ga. Debawra gaw ma prat hta, kaya jahkrum ai lam chyahkring hkring hkrum wa ai. Shakawn n hkrum ga ai daram re. Dai majaw, kaba wa ai du hkra tinang hkum tinang n kaja ai hku sha mu ai. Mara kaji kajaw galaw hkrup tim, asung n shang ai wa re ngu hkamsha ai. Mariya mung dai zawn byin ai. Jinghku ni gaw shi hpe kaya jahkrum ai. Dai majaw, manu n dan ai ngu ai hkamsha lam hte sha nga kaba wa ai. Hkalup hkam ngut ai hpang hta pyi, Yehowa Sakse byin na matu atsam n hpring ai ngu hkamsha ai.

⁵ Raitim, dai nauna yan gaw Yehowa hpe nawku ai lam n jahkring kau ai. Hpa majaw kun? Yehowa hpang akyu hpyi nna shanhte gara hku hkamsha ai hpe tsun dan ai. (Shk 55:22) Lai wa sai aten na mabyin ni a majaw, n kaja ai ningmu nga chye ai hpe sumsing Kawa chye ai lam shanhte hkap la wa ai. Tinang hta kaja ai atsam ningja ni n nga ai ngu shadu da tim pyi, shi gaw anhte a kaja ai atsam ningja ni hpe mu ai.​—1 Yawhan 3:19, 20 hpe hti u.

6. N kaja ai akyang lailen hpe kahtap galaw hkrup yang gara hku hkamsha ai kun?

⁶ Marai langai gaw n kaja ai akyang lailen hpe jahkring kau mayu tim, dai hpe bai galaw hkrup ai majaw myit daw chye ai. Mara galaw hkrup ai shaloi, mara nga ai ngu hkamsha chye ai. (2 Ko 7:10) Raitim, ‘ngai gaw tsep kawp hkrat sum sai. Yehowa galoi mara raw ya na n re’ ngu ladu lai mara n shagun ging ai. Dai zawn myit ai gaw shut ai. Yehowa hpe nawku ai kaw nna pyi hkring mat shangun chye ai. Myit daw yang, n-gun yawm shangun chye ai ngu Ga Shagawp 24:10 hta tsun da ai. Akyu hpyi nna, mara raw ya na matu hpyi shawn ai hku nna Yehowa hte “bawng jahkrup” u. (Esa 1:18, JCLB) Jet ai myit malai lu yang, nang hpe mara raw ya na re. Dai sha n-ga, myitsu salang ni kaw mung karum hpyi u. Shanhte gaw wenyi lam bai kaja wa hkra nang hpe myit galu let karum ya na re.​—Yak 5:14, 15.

7. Gawng kya ai lam hpe ninghkap nga ai rai yang hpa majaw myit n daw ging ai kun?

 ⁷ Gawng kya ai lam hpe ninghkap nga ai ni hpe Pyintit kaw na myitsu salang Yaw Lwik ndai hku tsun ai: “Yehowa a man hta, dinghpring ai wa ngu ai gaw mara n galaw ai wa hpe tsun mayu ai n re. Shut ai lam ni a matu, grai yawn let myit malai la nna, galai shai ai wa hpe tsun mayu ai re.” (Rom 7:21-25) Gawng kya ai lam hpe ninghkap nga ai rai yang, tinang hkum tinang mara hkum shagun. Karai a man hta dinghpring ai lam hpe gingdan let lu la ai kadai mung n nga ai. Gawng malai hkungga hku nna jaw ai Yehowa a tsawra myit hpe anhte yawng ra ai.​—Ehp 1:7; 1 Yh 4:10.

8. Myit daw ai shaloi kadai ni gaw n-gun jaw ya lu ai kun?

⁸ Hpunau nauna ni kaw nna n-gun jaw lam hkap la u. Anhte ga shaga mayu ai shaloi, shanhte madat ya lu nna, n-gun jaw na re. (Gsh 12:25; 1 Ht 5:14) Myit daw ai lam hpe ninghkap nga ai Naijiriya na nauna Joi ndai hku tsun ai: “Hpunau nauna ni n nga yang ngai ram ram yak na re. Nye a akyu hpyi ga hpe hpunau nauna ni hku nna Yehowa mahtai jaw ai. Gawng run nga ai ni hpe n-gun jaw na matu, shanhte kaw na sharin la lu ai.” Hpunau nauna ni gaw, anhte n-gun jaw lam ra nga ai hpe ayan na gaw chye na n re. Dai majaw, kung hpan ai hpunau nauna ni hpe anhte maga hku nna karum hpyi ra ai.

9. Shakawn 41:3 hte 94:19 gaw gara hku n-gun jaw ya lu ai kun?

⁹ Yehowa hpe karum hpyi u. Hkam n kaja ai shaloi, laksan hku nna machyi jung nga ai shaloi, kaja ai ningmu nga na matu yak chye ai. Ya aten hta, Yehowa gaw mauhpa lam hku nna shamai ya na gaw n re. Raitim, shalan shabran ya nna, hkam jan lu hkra n-gun atsam jaw na re. (Shakawn 41:3; 94:19 hpe hti u.) Ga shadawn, nta bungli nkau galaw ra ai shaloi, gat mari ra ai shaloi, dai hpe galaw ya na matu hte anhte hte arau akyu hpyi na matu shanhte hpe shadut ya chye ai. Hkum tsup ai aprat lu la na mungkan nnan myit mada lam zawn re ai Chyum daw ni hpe myit dum wa hkra karum ya na re.​—Rom 15:4.

10. Ang katut byin ngut ai hpang Isan hpe hpa gaw karum ya wa ai kun?

¹⁰ Naijiriya na hpunau Isan gaw, ang katut byin ai majaw, pai maga hkum katsing si mat ai. Galoi mung lam n lu hkawm sai ngu sarawun tsun ai. “Gawng run nna, myit daw ai” ngu shi tsun ai. Hpa gaw karum ya wa ai kun? “Ngai hte nye madu jan gaw, Yehowa kaw ayan na akyu hpyi ai. Chyum Laika ayan hkaja ai. Karai a mungkan nnan hta lu la na myit mada lam hte hpawn, shaman chyeju ni hpe ayan hti na matu dawdan da ai” ngu Isan tsun ai.

11. Sindi grai machyi ai shaloi kabu gara lam gara hku lu la ai kun?

¹¹ Meksiko kaw nga ai nauna Sindi gaw grai sawng ai yawga byin nga ai hpe chye dat ai. Gara hku hkam jan lu ai kun? Tsi tsi nga ai laman, shani shagu sakse hkam na matu bandung tawn da ai. “Dai hku galaw ai gaw, ga tsi ai shaloi, kade daram machyi na hpe myit maju jung na malai, kaga ni hpe myit maju jung na matu karum ya ai. Sarawun ni, tsi sara ni hte ga shaga ai shaloi, shanhte a lam san ai. Ndai zawn yak ai bungli hpe hpa majaw lata ai kun? ngu nna san ai. Dai shaloi, gara lam tsun dan na hpe chye wa ai. Machyi masha ni gaw ‘Kaja ai i?’ ngu nna nau n san ga ai ngu nkau mi tsun ai. Shanhte hpe lanu lahku ai majaw, chyeju dum ma ai. Nkau nga yang, matut mahkai na matu, hkring dat ni,  phone nambat ni pyi jaw ai. Ndai zawn yakhkak ai aten ni laman, kabu gara lam lu na matu, n myit mada ai lam hku Yehowa karum ya ai” ngu Sindi tsun ai.​—Gsh 15:15.

12-13. Machyi ai ni hte n kung n kang re ai ni gaw hkaw tsun magam hta gara hku shang lawm lu ai kun? Hpa akyu lu wa ai kun?

¹² Machyi masha ni, n kung n kang ai ni gaw, hkaw tsun magam hta shadawn sharam sha lu galaw ai majaw myit daw chye ai. Raitim, law law gaw matut hkaw tsun lu nga ding yang re. Amerikan kaw nna nauna Lawre gaw 37 ning daram yupra kaw sha nga ra nna, jak hte sha nsa sa ra ai. Shi gaw mawng ana byin ai, chyahkring hkring ga tsi lajang ra ai, shan hpyi ana mung byin nga ai. Grai nan yakhkak tim, n hkaw tsun ai sha n nga ai. Tsi tsi ya ai ni hte nta de sa chyai ai ni hpe sakse hkam ai. Hpa akyu lu ai kun? Yawm htum marai 17 hpe Yehowa a lam chye hkra karum ya lu wa ai. *

¹³ Nta kaw (sh) asak kaba ai ni hpe yu lajang ai shara kaw nga ai n kung n kang re ai ni hpe Pyintit kaw nna myitsu salang Ritchat ndai hku hpaji jaw ai: “Laili laika ni hpe loi mi madun da na matu tsun ai. Chye mayu ai ni san wa yang, ga shaga hpang na matu karum ya ai. Dai gaw, nta langai hpang langai n lu sa ai hpunau nauna ni hpe n-gun lu shangun ai.” Nta kaw sha nga ra ai ni gaw laika ka ai, phone hte sakse hkam ai hku nna mung hkaw tsun magam hta shang lawm mai ai.

14. Hkawhkam Dawi gaw gara kasi ningli madun wa ai kun?

¹⁴ Anhte a asak, hkam kaja lam, kaga lam ni a majaw, nawku hpung (sh) ninghtawn kata hta anhte ra sharawng ai lit hpe n lu la ai baw byin chye ai. Dai zawn hkamsha yang, Hkawhkam Dawi a kasi ningli kaw nna sharin la lu ai. Dawi gaw shi grai galaw mayu ai Karai Kasang a nawku htingnu gap na matu n lata hkrum ai. Raitim, dai lit hpe galaw na matu Karai Kasang lata ai wa hpe hpring tup madi shadaw ya ai. Dai lamang a matu sharawng awng let alu jaw ai. Shi gaw anhte a matu kaja ai kasi ningli re.​—2 Sa 7:12, 13; 1 Hl 29:1, 3-5.

15. Myit daw ai lam hpe Ugi gara hku tawt lai wa ai kun?

¹⁵ Pyintit kaw na hpunau Ugi gaw hkam ja lam a majaw, myitsu salang hku nna magam n lu gun sai. Nta bungli kaji kajaw hpe pyi n lu galaw ai. Shi ndai hku tsun ai: “Nnan hta gaw asung n shang ai ngu hkamsha nna, grai myit daw ai. Nye a masa gaw shadawn sharam sha re ai hpe hkap la dat ai. Dang lu ai lam ni hpe galaw ai majaw, Karai a magam hta kabu gara lam bai lu la ai. Asum n jaw na  matu dawdan da ai. Pu ba nga ai Gidon hte marai 300 zawn, ngai mung matut gasat na re.”​—Trg 8:4.

16. Lamu kasa ni a kasi ningli kaw nna hpa sharin la lu ai kun?

¹⁶ Sadi dung ai lamu kasa ni mung kaja ai kasi ningli madun wa ai. Hkawhkam Ahab uphkang ai laman, nhkru ai hkawhkam hpe lau la lu na lam ni hpe tsun dan na matu, lamu kasa ni hpe Yehowa saw shaga ai. Lamu kasa law law mung tsun dan ma ai. Raitim, Karai Kasang gaw lamu kasa langai tsun ai hpe hkap la nna, shi tsun ai hku galaw shangun dat ai. (1 Hk 22:19-22) Kaga sadi dung ai lamu kasa ni gaw myit daw nna, ‘majoi sa tsun hkrup sai’ ngu nna myit ai kun? N myit ai. Lamu kasa ni gaw shagrit shanem nna Yehowa hpe sha shagrau mayu ai.​—Trg 13:16-18; Shr 19:10.

17. Lit langai ngai hpe n lu la ai majaw myit daw yang hpa galaw ging ai kun?

¹⁷ Karai a amying hkam la lu na ahkang hte Mungdan lam ndau shana na ahkang lu da ai hpe dum u. Lit ngu ai gaw lu chye ai, sum mat chye ai. Lit ni a majaw Karai a man hta anhte manu dan ai n re. Npu taw nna shagrit shanem yang, Yehowa hte hpunau nauna ni a matu manu dan ai masha byin na re. Matut shagrit shanem nna npu taw lu na matu Yehowa kaw karum hpyi u. Chyum Laika hta lawm ai shagrit shanem ai mayam ni a kaja ai kasi ningli ni hpe myit sawn sumru u. Hpunau nauna ni hpe dang lu ai daram sharawng awng let sak jaw u.​—Shk 138:6; 1 Pe 5:5.

18-19. Hkaw tsun lawk hta rawt jat ai zawn n rai tim pyi gara hku kabu gara lu na kun?

¹⁸ Hkaw tsun lawk n rawt jat ai zawn rai yang, nta kaw masha ni hpe nau n hkrum ai zawn rai yang myit daw ga ai kun? Dai zawn masa hta, kabu gara ai lam matut nga hkra, grau pyaw wa hkra gara hku galaw lu na kun? “ Hkaw Tsun Magam Hta Grau Kabu Gara Lu Ai Lam” ngu ai lawk hta tatut re ai hpaji jaw ga nkau mi lawm ai. Hkaw tsun magam hpe kaja ai ningmu nga na matu grai ahkyak ai. Dai ningmu hta hpa ni lawm ai kun?

¹⁹ Karai a amying hte shi a Mungdan hpe ndau shana ai hta matut myit maju jung u. Yesu gaw shi a hpang de masha kachyi mi sha hkan nang na ngu asan sha tsun da ai. (Mat 7:13, 14) Hkaw tsun magam hta shang  lawm ai shaloi, Yehowa, Yesu, lamu kasa ni hte arau galaw lu ai. (Mat 28:19, 20; 1 Ko 3:9; Shr 14:6, 7) Yehowa gaw shi hpe nawku mayu ai ni hpe lau la ai. (Yhn 6:44) Marai langai gaw shiga hpe ya kalang n madat kam tim, hpang kalang madat mayu wa chye ai.

20. Myit daw ai hpe ninghkap ai hte seng nna Yeremia 20:8, 9 gaw hpa sharin ya ai kun?

²⁰ Myihtoi Yeremia kaw nna law law sharin la lu ai. Shi gaw grai nan yak ai hkaw tsun lawk hta lit ap hkrum ai. Masha ni a shatan nhkan ai, jahpoi asawng ai hpe “shani shagu” hkrum ai. (Yeremia 20:8, 9 hpe hti u.) Kalang mi hta grai myit daw ai majaw, n hkaw tsun sana ngu nna pyi myit ai. Raitim, dai hku n galaw wa ai. Hpa majaw kun? Shi a myit masin hta “Yehowa a mungga” gaw wan zawn hkru nga ai majaw, n hkaw tsun ai sha n nga lu ai. Chyum Laika hpe shani shagu hkaja nna atsawm myit sawn sumru na nga yang, shi zawn byin wa na re. Hkaw tsun bungli hta grau kabu gara wa na, grau tang du wa na re.​—Yer 15:16.

21. Gara lam a majaw myit daw ai raitim dai hpe gara hku awng dang lu na kun?

²¹ “Myit daw ai gaw Satan akyu jashawn nga ai atsam kaba ai laknak re” ngu nna Debawra tsun ai. Raitim, shi a laknak gaw Yehowa a matu hpa n re ai. Gara lam a majaw myit daw ai raitim, Yehowa kaw karum hpyi u. N hkum tsup ai lam ni hte gawng kya ai lam ni hpe ninghkap na matu shi karum ya na re. Machyi ai shaloi hta mung madi shadaw ya na re. Magam lit ni hte seng nna jaw ai ningmu nga na matu mung karum ya na re. Hkaw tsun lawk hpe kaja ai ningmu nga na matu mung karum ya na re. Sumsing Kawa hpe akyu hpyi hpaw tsun dan u. Myit daw ai hpe Karai a karum shingtau lam hte awng dang lu na re.