1. Sape ni hpe sagu ni hte Yesu hpa majaw shingdaw ai kun?

 YESU gaw sape ni hte kaja ai hku hkau lam nga ai hpe sagu rem hte sagu ni a lapran na hku hkau lam hte shingdaw wa ai. (Yhn 10:14, 15) Dai hku shingdaw ai gaw htap htuk ai. Sagu ni gaw sagu rem wa a nsen hpe chye nna madat ai. Dai hpe bu hkawm ai marai langai tatut hkrum wa ai. “Sagu nkau hpe sumla dem mayu ai majaw, makau de sa wa hkra galaw tim, anhte a nsen hpe n chye ai majaw, n sa ma ai. Sagu rem du wa nna, shaga dat ai shaloi hta gaw shi hpang de yawng hkan nang ma ai” ngu shi tsun ai.

2-3. (a) Yesu a nsen hpe madat ai lam shi hpang hkan ai ni gara hku madun nga ai kun? (b) Ndai sumhpa hte hpang na sumhpa hta hpa lam bawngban na kun?

² Dai bu hkawm ai wa a mahkrum madup gaw, sape ni hpe sagu hte shingdaw ai Yesu a ga hpe bai dum shangun ai. “Dai ni mung nye a nsen madat na ma ra ai” ngu Yesu tsun ai. (Yhn 10:16) Raitim, Yesu gaw sumsing lamu hta nga ai majaw, shi a nsen hpe anhte gara hku madat mai na kun? Madat mai ai madung lam gaw, Yesu a sharin achyin ai lam ni hpe prat hta, tatut hkan sa ai hku nna re.​—Mat 7:24, 25.

³ Ndai sumhpa hte hpang na sumhpa hta, Yesu a sharin achyin ai lam nkau hpe bawngban na re. N mai galaw ai lam ni hte galaw ra na lam ni hte seng nna Yesu sharin ya ai lam hpe chye lu na re. N mai galaw ai lam lahkawng hpe shawng bawngban yu ga.

4. Luka 12:29 hku nga yang, ladu lai myit tsang ai baw hpa majaw byin chye ai kun?

⁴ Luka 12:29 hpe hti u. * Arung arai ra kadawn ai lam ni a matu, “ladu lai myit tsang ai baw hkum byin sanu” ngu shi hpang hkan ai ni hpe Yesu n-gun jaw ai. Yesu a sharin achyin ai lam gaw, hpaji rawng nna tengman ai hpe chye ai majaw anhte hkan sa mayu tim, kalang lang gaw yak chye ai. Hpa majaw kun?

5. Lu na, sha na, nga na matu nkau gaw hpa majaw myit tsang chye ai kun?

⁵ Nkau gaw lu na, sha na, nga na matu, myit tsang chye ai. Matsan ai mungdan hta nga ai majaw rai na re. Dinghku hpe madi shadaw na matu, gumhpraw nau n lu tam ai majaw mung rai chye ai. Dinghku hpe madung hku nna madi shadaw ya ai wa si mat yang, ngam ai nta masha ni hta, gumhpraw yak ai mung rai chye ai. Kobit-19 ana zinli a majaw, bungli n lu mat nna shang gumhpraw n nga mat ai mung byin chye ai. (Hpj 9:11) Dai zawn mayak mahkak ni (sh) kaga mayak mahkak ni hkrum nga ai aten hta, ladu lai hkum tsang sanu ngu ai Yesu a ga hpe gara hku hkan sa mai na kun?

6. Kalang mi hta kasa Petru hpa byin wa ai hpe tsun dan u.

⁶ Kalang mi hta, kasa Petru hte kaga kasa ni gaw, Galile Nawng hta nbung laru hkrum ai. Dai aten hta, Yesu hka ntsa lam hkawm wa ai. “Madu e, nang rai n yang gaw, hka ntsa hku nang kaw sa du lu na, ngai hpe shaga la e” ngu Petru tsun ai. “Sa rit” ngu Yesu shaga ai shaloi, “Petru gaw li hta na yu hkrat nna, hka ntsa e hkawm” wa ai. Matut hpa byin ai hpe yu yu u. “Nbung hpe mu jang shi hkrit nga ai; dai rai nna hka hta lup bang wa jang, shi gaw, Madu e, ngai hpe sai la e, ngu nna jahtau” ai shaloi, Yesu lata ladawn nna hkye la dat ai. Yesu hpe  myit maju jung nga dingsa nbung laru ja ai hka ntsa Petru lam hkawm lu wa ai. Raitim, nbung laru hpe myit maju jung hkrup ai shaloi, hkrit myit, ntsen ai myit ni shang wa nna hka hta lup mat ai.​—Mat 14:24-31.

7. Petru a mabyin kaw na hpa sharin la lu ai kun?

⁷ Petru a mabyin kaw na anhte sharin la lu ai. Hka li kaw na yu nna, hka ntsa lam hkawm hpang ai shaloi, myit tsang ai majaw lup mat na ngu Petru shadu na n re. Shi a Madu hpang de du hkra, hka ntsa matut hkawm mat mayu na re. Raitim, Yesu hpe matut myit maju n jung ai majaw, dai zawn n hkawm lu wa ai. Petru zawn, anhte mung chyam dinglik ai lam ni hpe hkam jan lu na matu, makam masham ra ai. Yehowa hte shi a ga sadi ni hpe myit maju n jung sai nga yang, makam masham gawng kya wa nna myit ru myit tsang ai hta lup mat chye ai. Nbung laru hte bung ai gara manghkang mi hkrum tim, Yehowa hte shi a karum ya lu ai atsam hpe matut myit maju jung ra ai. Gara hku galaw lu na kun?

8. Ra kadawn ai lam ni a matu, ladu lai myit tsang ai baw n byin hkra hpa gaw karum ya na kun?

⁸ Manghkang ni a matu, myit tsang nga na malai Yehowa hpe kamhpa ra ai. Wenyi lam hpe shawng tawn na nga yang, ra kadawn ai lam ni hpe madi shadaw ya na ngu, Wa Yehowa ga sadi jaw da ai hpe dum u. (Mat 6:32, 33) Dai ga sadi hte maren galoi shagu madi shadaw ya ai. (Trj 8:4, 15, 16; Shk 37:25) U ni, nampan ni hpe pyi Yehowa n kabai da ai nga yang, anhte lu na, sha na, bu hpun na matu, myit n tsang ging ai. (Mat 6:26-30; Hpl 4:6, 7) Kanu kawa ni gaw ma ni hpe tsawra ai majaw, ra kadawn ai lam ni hpe madi shadaw ya ai. Dai hte maren, sumsing kawa mung shi a amyu masha ni hpe tsawra ai majaw, ra kadawn ai lam ni hpe madi shadaw ya ai. Dai majaw, anhte hpe mung lanu lahku ya na hpe kam mai ai.

9. Yan la langai a mahkrum madup kaw na hpa chye lu ai kun?

⁹ Ra kadawn ai lam ni hpe Yehowa madi shadaw ya lu ai lam madun dan ai mahkrum madup langai hpe yu yu ga. Ningshawng yan la langai gaw, hpyen yen dabang hta nga ai nauna nkau hpe zuphpawng lung na matu, mawdaw dingsa hte hkying hkum mi jan gawt nna sa shaga ai. “Zuphpawng ngut ai hpang, nta kaw lama ma sha na matu, saw shaga dat ai. Raitim, jaw sha na hpa n nga ai hpe shaga ngut ai hpang she dum dat ai” ngu hpunau tsun ai. Matut hpa byin ai kun? “Nta de du ai shaloi, chyinghka shawng hta, lusha hpring hkra bang da ai ka tawng lahkawng du taw ai. Kadai sa tawn da ya ai hpe n chye ai. Anhte hpe Yehowa teng sha lanu lahku ai” ngu hpunau tsun ai. Hpang hta, shan a mawdaw hten mat ai. Dai mawdaw hpe hkaw tsun bungli a matu lang nga ai re. Raitim, bai gram na matu, gumhpraw n nga ai. Gram yang, kade daram ma na hpe chye hkra, makau na mawdaw gram ai shara hta sa san nga ai shaloi, la langai du wa nna, “ndai kadai na mawdaw rai?” ngu san ai. Hpunau gaw shi na mawdaw re ai lam, gram ra nga ai lam tsun dan ai. Dai shaloi, “hpa n ra ai. Ndai zawn, mawdaw hpe nye madu jan grai ra ai. Nsam mung hkrak sha re. Kade hte dut na rai?” ngu san ai. Hpunau mung dut kau ai. Kaga mawdaw bai mari na matu, gumhpraw law mat ai. “An n chye tsun hkra kabu ai. Ndai gaw ang katut byin ai n re. Yehowa karum ya ai re” ngu hpunau tsun ai.

10. Ra kadawn ai lam ni hpe myit n tsang na matu Shakawn 37:5 gaw gara hku karum ya ai kun?

¹⁰ Sagu rem kaja a ga hpe madat nna, ra kadawn ai lam ni a matu, ladu lai myit n tsang ai nga yang, anhte hpe Yehowa madi shadaw ya na hpe kam mai ai. (Shakawn 37:5 hpe hti u. 1 Pe 5:7) Laika pang 5 hta tsun da ai masa  lam ni hpe myit yu u. Dinghku a baw (sh) bungli madu langai ngai hpe akyu jashawn nna, shani shagu ra kadawn nga ai lam ni hpe, Yehowa madi shadaw ya nga ai rai na re. Raitim, dinghku a baw n madi shadaw lu mat ai shaloi, anhte bungli n lu mat ai shaloi, Yehowa gaw lam langai ngai hte madi shadaw ya na ngu ai hpe kam mai ai. Hkum jeyang myit ngu sagu rem kaja tsun ai kaga lam langai hpe mung matut bawngban yu ga.

11. Mahte 7:1, 2 hku nga yang, hpa n galaw na matu Yesu tsun ai kun? Hkan sa na matu hpa majaw yak chye ai kun?

¹¹ Mahte 7:1, 2 hpe hti u. N hkum tsup ai ni hku nna, kaga ni hpe anhte jeyang mayu ai hpe Yesu chye ai. Dai majaw, “hkum jeyang myit” ngu tsun ai. Hpunau nauna ni hpe n jeyang hkrup na matu, dang lu ai daram shakut tim, n hkum tsup ai ni re ai majaw, galoi shagu gaw n awng dang ai. Kalang lang, tinang nan jeyang hkrum ai aten ni nga chye ai. Dai shaloi, gara hku bai htang na kun? Hkum jeyang myit ngu ai Yesu a ga hpe madat na matu, shakut ra ai.

12-13. Kaga ni hpe n jeyang na matu Yehowa a kasi ningli gaw gara hku karum ya ai kun?

¹² Yehowa a kasi ningli hpe myit sawn sumru ai kaw na akyu lu la mai ai. Masha ni a kaja ai lam hpe sha Karai Kasang myit maju jung ai. Mara kaba ni galaw hkrup wa ai Hkawhkam Dawi hte kanawn mazum ai hta, dai lam hpe mu lu ai. Ga shadawn, Dawi gaw Batsheba hte shut hpyit nna, shi a madu wa hpe pyi sat kau ai. (2 Sa 11:2-4, 14, 15, 24) Dai majaw, tinang sha n-ga, madu jan ni hte hpawn, dinghku ting jam jau hkrum ra ai. (2 Sa 12:10, 11) Hpang kalang hta mung, hpyen n-gun kade daram nga ai hpe hti yu wa ai. Yehowa hpe tsep kawp n kamhpa ai lam re. Hpyen dap n-gun hpe kamhpa myit, gumrawng ai myit a majaw, galaw wa ai rai na re. Akyu hku nna, kap bra ana a majaw, Israela amyu 70,000 daram si mat ai.​—2 Sa 24:1-4, 10-15.

¹³ Dai aten hta, nang gaw Israela mungdan hta nga ai rai yang, Dawi hpe gara hku mu mada na kun? Karai a matsan dum myit hte n ging dan ai ngu mu mada na kun? Yehowa gaw dai zawn n mu mada ai. Prat ting Dawi sadi dung wa ai hpe sha yu nna, jet ai myit malai lu ai hpe myit maju jung wa ai. Dai majaw, mara kaba ni hpe raw kau ya ai. Shi hpe Dawi tsawra ai lam, jaw ai hpe galaw mayu ai lam chye ai. Anhte a kaja ai lam ni hpe Karai Kasang myit maju jung ya ai majaw, chyeju dum hpa n re i?​—1 Hk 9:4; 1 Hl 29:10, 17.

14. Kaga ni hpe n jeyang hkrup na matu hpa gaw karum ya na kun?

¹⁴ N hkum tsup ai shinggyim masha ni kaw na hkum tsup na hpe Yehowa n myit mada ai. Rai yang, n hkum tsup ai shada da mung hkum tsup na hpe n myit mada ai sha, kaja ai lam hpe tam ging ai. Kaga ni a gawng kya ai lam hpe mu nna, aloi sha jeyang hkrup chye ai. Raitim, Yehowa hpe kasi la ai ni gaw, kaga ni a gawng kya ai lam hpe mu tim pyi, matut nna atsawm sha kanawn mazum lu ai. N garang shi ai tsing lung seng langai gaw n tsawm tim, dai nlung a lam hpe atsawm chye ai wa gaw ntsa lam hpe n yu ai sha, garang dat yang kade daram tsawm wa na hpe shi chye ai. Yehowa hte Yesu zawn, anhte mung kaga ni a gawng kya ai lam hpe n re ai sha, kaja ai lam ni hpe mu chye ra ai.

15. Kaga ni hpe n jeyang hkrup na matu hpa gaw naw karum ya lu ai kun?

¹⁵ Kaja ai hpe mu chye ai sha n-ga, kaga ni hpe n jeyang hkrup hkra kaga hpa naw karum ya lu ai kun? Shanhte a prat hpe chye na ya ai hku nna re. Ga shadawn langai hpe yu yu ga. Lani mi hta, nawku htingnu kaw matsan ai gaida  jan langai manu nau n dan ai magri dingseng lahkawng alu sutdek kaw bang nga ai hpe Yesu mu ai. “Hpa majaw dai daram sha bang ai kun?” ngu nna Yesu n tsun ai. Gaida jan bang ai manu hpe n yu ai sha, shi a myit jasat, masa lam hpe myit yu nna, dang lu ai daram bang ai hpe shakawn ya ai.​—Luk 21:1-4.

16. Baronika a mahkrum madup kaw na hpa chye lu ai kun?

¹⁶ Kaga ni a masa hpe chye na ya na matu, kade daram ahkyak ai hpe nauna Baronika a mahkrum madup gaw madun dan ai. Nawku hpung hta, yan nu langai nga ai. Kanu gaw ningrum ningtau n nga ai wa re. “Shanhte gaw zuphpawng hte hkaw tsun bungli nau n sa ai. Dai majaw, ngai chye na shut wa ai. Raitim, lani mi hta, kanu hte rau hkaw tsun bungli sa ai shaloi, bawnu n gring ai ma a majaw, hkrum nga ai mayak mahkak ni hpe shi tsun dan ai. Shan nu ra kadawn ai lam ni, wenyi lam ni hpe dang lu ai daram shakut nga ra ai. Ma na hkam ja lam a majaw, kalang lang kaga nawku hpung kaw sa lung ra ai aten ni mung nga ai. Dai daram yakhkak nga ai hpe ngai tsep kawp n chye ai. Ya gaw Yehowa a magam hta dai nauna danglu ai daram shakut nga ai hpe grai manu shadan ai” ngu Baronika tsun ai.

17. Yaku 2:8 hta hpa galaw na matu n-gun jaw da ai kun? Hpa galaw lu ai kun?

¹⁷ Hpunau nauna ni hpe jeyang hkrup chye ai hpe sadi hkrup yang, hpa galaw mai ai kun? Hpunau nauna ni hpe tsawra ra ai hpe dum u. (Yaku 2:8 hpe hti u.) Kaga ni hpe jeyang ai baw n galaw hkrup hkra, karum ya na matu,  Yehowa kaw akroi anoi akyu hpyi u. N kaja ai hku mu nga ai wa hpe tinang maga kaw na, ga shaga hpang ai hku nna, akyu hpyi ai hte maren galaw u. Dai lam hku nna shi a lam grau chye wa na re. Hkaw tsun bungli rau sa na matu saw shaga mai ai. Shat daw mai ai. Shi a lam grau chye wa ai shaloi, kaja ai lam ni hpe mu wa hkra shakut u. Dai gaw Yehowa hte Yesu a kasi ningli hpe hkan sa ai re. Dai lam hku nna, kaga ni hpe hkum jeyang myit ngu ai kaja ai sagu rem wa a ga hpe madat ai lam madun mai ai.

18. Kaja ai sagu rem wa a ga hpe madat ai lam gara hku madun mai ai kun?

¹⁸ Sagu ni gaw sagu rem wa a ga hpe madat ai zawn, Yesu hpang hkan ai ni mung Yesu a ga madat ma ai. Ra kadawn nga ai lam ni a matu, ladu lai myit n tsang na matu, kaga ni hpe n jeyang hkrup hkra shakut na nga yang, anhte a shakut ai lam hpe Yehowa hte Yesu shaman chyeju jaw na re. Anhte gaw “sagu hpung kaji” hta lawm ai raitim, “sagu kaga” hta lawm ai raitim, kaja ai sagu rem wa a ga hpe matut madat nna, hkan sa mat wa ga. (Luk 12:32; Yhn 10:11, 14, 16) Shi hpang hkan ai ni galaw na matu, Yesu htet da ai lam lahkawng hpe hpang na sumhpa hta bawngban na re.