Chyoi pra ai amyu masha byin na matu Israela ni hpe Yehowa htet da ai. Dai zawn chyoi pra na matu, karum ya ai hku nna, “Na a amyu masha ni hta shi wawn htawn hkawm ai wa nang tai lu na n rai: na a manang wa a asak nang gyam lu na ndai n rai: ngai gaw Yehowa rai nga nngai” ngu htet da ai.​—Jaw 19:2, 16.

“Gyam” ngu ga gale da ai madung Hebre ga gaw hpa hpe tsun mayu ai kun? “Dai daw kaji hta lang da ai Hebre ga a lachyum gaw, ‘ntsa kaw, makau kaw, ni ai shara kaw hkum tsap’ ngu tsun mayu ai re. Tup hkrak lachyum hpe chye na matu yak ai” ngu Jaw Jau Laika hte seng ai Ju laika buk langai hta ka da ai.

Chyum hpaji du nkau gaw, dai daw kaji hpe shawng na daw kaji hte matut mahkai da ai. Shawng na daw kaji hta, “tara jeyang ai lam hta n sun n lang ai hku daw dan ya lu na n rai; matsan jahkrai hpe mung n maga, kaba ai wa a myi man mung n tau ai sha, teng man ai hku hkan nna na a baw sang lapran jeyang ya lu na rai ndai” ngu tsun da ai. (Jaw 19:15) Rai yang, marai langai ngai hpe sat na matu hkum “gyam” ngu ai daw kaji 16 gaw, tara rung hta, bungli hta, dinghku hta n tara ai hku n galaw na matu, n dingman ai hku n galaw na matu tsun mayu ai rai na re. Kaga lam mung naw nga na re.

Daw kaji 16 a shawng nnan na ga yan hpe yu u. Shi wawn n htawn hkawm na matu Karai Kasang htet da ai. Shi wawn htawn hkawm ai gaw, manghkang byin shangun chye ai shatan ga tsun ai daram sha n re. (Gsh 10:19; Hpj 10:12-14; 1 Tm 5:11-15; Yak 3:6) Marai langai ngai hpe mying hten mat hkra yaw shada let, n kaja ai hku tsun ai re. Kaga masha asak shoihpa hkrum na hpe chye nga ninglen n teng n man ai hku sakse hkam ya ai rai na re. Nabot gaw sari jahpoi tsun ai marai lahkawng a n teng n man ai hku sakse hkam ai majaw, n tara ai hku nlung hte kabai sat hkrum ai lam hpe dum u. (1 Hk 21:8-13) Re ai. Shi wawn htawn ai wa gaw, Jaw Jau 19:16 a hpang na daw hta tsun da ai zawn, marai langai hpe sat na matu gyam ai zawn byin mat chye ai.

Dai sha n-ga, marai langai ngai a lam hpe shi wawn htawn ai gaw, n ju n dawn ai majaw rai chye ai. 1 Yawhan 3:15 hta ndai hku tsun da ai: “Shi a kahpu kanau wa hpe n dawng n yawt ai wa kadai rai ti mung, masha hpe sat kau ai wa rai nga ai: masha hpe sat kau ai wa kadai rai ti mung, n htum n wai asak shi hta n rawng nga ai, nanhte chye nga myit dai.” Jaw Jau 19:16 hta lawm ai ga ni tsun ngut ai hpang, “na a hpu nau wa hpe n dawng n yawt rai lu na n rai” ngu matut tsun da ai gaw matsing hpa re.​—Jaw 19:17.

Dai majaw, Jaw Jau 19:16 hta htet da ai ga gaw, Hkristan ni a matu mung laja lana sadi jaw da ai lam re. Kaga ni a lam hpe n kaja ai hku myit ai, shi wawn htawn ai hpe koi ra ai. N ra ai majaw raitim, manawn ai majaw raitim, shi wawn htawn ai gaw shi hpe n ju n dawng ai re. Hkristan ni gaw kadai hpe mung n ju n dawng n mai byin ai.​—Mat 12:36, 37.