1-2. (a) Yesu gaw shi a myit dum poi hpe hkik hkam ai hku n re ai sha asan sha galaw na ngu anhte hpa majaw myit mada mai ai kun? (b) Yesu a gara atsam ningja ni hpe anhte hkaja na kun?

YESU si ai Myit Dum Poi hta hpa ni galaw ai hpe nang shingran yu u. Madu A Shana Shat Sha Poi galaw ai lam ahkri ahkrai hpe nang bai myit dum na re. Hpa majaw kun? Dai lamang hpe hkik hkam ai hku n galaw ai majaw re. Raitim, grai ahkyak ai aten re. ‘Dai lamang hpe hpa majaw hkik hkam ai hku n galaw ai kun?’ ngu nna anhte myit na re.

² Yesu mungkan hta hkaw tsun magam gun ai shaloi, teng man ai lam hpe chye na loi ai hku asan sha tsun dan ai ngu nna masha ni chye ma ai. (Mat 7:28, 29) Dai zawn sha, shi a myit dum poi * hpe mung lachyum nga nna, hkik hkam ai hku n re ai sha asan sha galaw na matu, anhte hpe sharin ya wa ai. Myit Dum Poi a lam hte, dai hte seng nna Yesu tsun wa ai, galaw wa ai lam nkau hpe atsawm myit yu ga. Yesu a shagrit shanem ai lam, nden marai hte jet ai tsawra myit ni hpe anhte grau nna chye na lu na re. Rai yang, shi hpe gara hku grau nna kasi la lu na lam chye lu na re.

3. Mahte 26:26-28 hta lawm ai hte maren, Yesu gaw shi a Myit Dum Poi hpe gara hku asan sha galaw hpang wa ai kun? Madung masat dingsat lahkawng gaw hpa rai kun?

³ Yesu gaw shi a kasa 11 hte arau shi a Myit Dum Poi hpe galaw hpang wa ai. Shi gaw Shalai Wa Ai Poi galaw ai shani hta sha, dai poi hpe galaw wa ai. (Mahte 26:26-28 hpe hti u.) Matsi n rawng ai muk hte dai hta nga ai tsabyi ntsin hte sha galaw wa ai. Yesu gaw kasa ni hpe ndai poi a madung masat dingsat  lam lahkawng hpe tsun dan wa ai. Dai gaw, shanhte a malai kade n na yang sak jaw na hkungga re ai shi a hkum tsup ai hkum hte asai a lam re. Grai ahkyak ai poi nnan gaw hkik hkam ai hku n re ai sha, asan sha re ai hpe kasa ni n mau ma ai. Hpa majaw kun?

4. Myit Dum Poi hpe Yesu hpa majaw yu maya sha galaw wa ai hpe chye na na matu Marhta hpe jaw wa ai hpaji jaw ga gaw gara hku karum ya ai kun?

⁴ Yesu hkaw tsun magam galaw ai masum ning a shawng nnan shata ni hta, shi grai hkau ai manang ni re ai Lazaru, Marhta hte Mari ni a nta de sa chyai ai shaloi, hpa byin wa ai hpe myit yu ga. Dai simsa nga ai aten hta shi shanhte hpe sharin achyin ya ai. Marhta gaw grai ahkyak ai manam a matu lu sha grai law hkra hkyen lajang nga ai majaw myit bra taw nga ai. Yesu dai hpe sadi hkrup ai shaloi tsawra myit hte shading sharai ya ai. Dai zawn malu masha grai law hkra n lajang ra ai hpe shi chye na hkra Yesu karum ya wa ai. (Luk 10:40-42) Dai hpang, shi tsun ai ga hte maren, shi hkum hpe hkungga nawng na shani hta hkan sa wa ai. Myit Dum Poi hpe yu maya sha galaw wa ai. Dai gaw Yesu hte seng nna hpa chye lu ai kun?

5. Hkik hkam ai lam n lawm ai ndai poi gaw Yesu hte seng nna hpa chye lu ai kun? Dai poi gaw Hpilipi 2:5-8 hta lawm ai ga hte gara hku hkrak re ai kun?

⁵ Yesu gaw tsun shaga galaw hkawm sa ai lam yawng hta shagrit shanem ai. Dai majaw, shi a ginding aga hpang jahtum shana hta, shi madun wa ai shagrit shanem lam hpe anhte n mau ga ai. (Mat 11:29) Yesu gaw shinggyim masha labau hta, ahkyak dik htum hkungga hpe sak jaw ra ai lam hte shi hpe Yehowa bai jahkrung ya nna sumsing lamu hta hkawhkawm aya jaw na hpe shi chye ai. Dai hku chye da tim pyi, shi a Myit Dum Poi hpe grai hkik hkam ai hku galaw nna, shi hkum shi myit maju jung lai ai baw n galaw wa ai. De a malai, hkik hkam ai lam n lawm ai ndai poi hpe laning mi hta kalang galaw nna, shi hpe myit dum na matu sape ni hpe htet wa ai. (Yhn 13:15; 1 Ko 11:23-25) Hkik hkam ai lam n lawm ai htap htuk ai poi hpe yu yang, Yesu gaw gumrawng ai masha n re ai hpe chye lu ai. Anhte a sumsing Hkawhkam a laklai ai atsam ningja langai gaw, shagrit shanem ai atsam re ai majaw anhte grai kabu ga ai.​—⁠Hpilipi 2:5-8 hpe hti u. 

6. Anhte manghkang ni hkrum nga yang, Yesu a shagrit shanem ai myit hpe gara hku kasi la mai na kun?

⁶ Yesu a shagrit shanem ai myit hpe gara hku kasi la mai na kun? Anhte hta na kaga ni a akyu hpe shawng tawn ai hku nna re. (Hpl 2:3, 4) Yesu a ginding aga prat hpang jahtum shana hpe myit yu ga. Yesu gaw, kade n na yang, grai machyi nna si ra na  hpe chye ai. Raitim, shi a majaw sadi dung ai kasa ni yawn hkyen na hpe sha, grai myit tsang ya taw nga ai. Dai majaw shi gaw, hpang jahtum shana hta, shanhte hte arau nga nna, shanhte hpe lam matsun jaw ai, n-gun jaw ai, shalan ya ai. (Yhn 14:25-31) Yesu gaw, shi hkum hta na kaga ni a akyu hpe myit tau ya ai hku nna shagrit shanem ai myit hpe madun wa ai. Anhte a matu grai kaja ai kasi ningli hpe shi madun wa ai re.

7. Madu A Shana Shat Sha Poi galaw ngut nna kade n na yang Yesu gaw nden marai rawng ai hpe gara hku madun wa ai kun?

⁷ Yesu gaw, Madu A Shana Shat Sha Poi galaw ngut nna kade n na yang, laklai ai nden marai hpe madun wa ai. Gara hku nna kun? Karai Kasang a amying hpe dagam ai masha, kaya hkrum nna si ra ai masha hku nna sat hkrum na hpe shi chye tim pyi, shi Kawa a myit ra ai lam hpe hkap la wa ai. (Mat 26:65, 66; Luk 22:41, 42) Shi gaw, tsep kawp sadi dung lu ai majaw, Yehowa a amying ningsang hpe shagrau lu ai. Karai Kasang a awmdawm ahkaw ahkang hpe mung makawp maga lu nna, myit malai lu ai masha ni htani htana asak lu na matu mung lam hpaw ya wa ai. Dai aten hta sha, Yesu gaw shi a sape ni hkrum wa na manghkang ni hpe tawt lai lu na matu mung, hkyen lajang ya wa ai.

8. (a) Yesu gaw sadi dung ai kasa ni hpe hpa tsun wa ai kun? (b) Yesu si ai hpang na shaning ni hta sape ni gaw shi a nden marai rawng ai kasi hpe gara hku hkan sa ma ai kun?

⁸ Yesu gaw, shi hta myit tsang ai lam ni nga tim, dai hpe myit maju n jung ai sha, sadi dung ai kasa ni a ra kadawn ai lam ni hpe myit maju jung ai hku nna, shi a nden marai hpe madun wa ai. Yuda hpe shinggan de pru mat shangun kau ngut ai hpang she, Myit Dum Poi hpe galaw hpang wa ai. Dai poi gaw, namman chya hkrum ai sape ni hpe Yesu a asai kaw nna akyu lu la na matu hte ga shaka ningnan kaw shanhte lawm ai lam myit dum shangun na re. (1 Ko 10:16, 17) Shi hte shi Kawa gaw shanhte  kaw nna hpa myit mada ai lam hpe tsun dan nna, kasa ni matut sadi dung lu na matu hte sumsing lamu hta arau nga lu na matu Yesu karum ya wa ai. (Yhn 15:12-15) Yesu gaw kasa ni hpe shanhte hkrum wa na manghkang ni hpe mung tsun dan wa ai. Shi a kasi ningli hpe hkan sa na matu hte “dakring dakan rai” nga na matu shanhte hpe n-gun jaw wa ai. (Yhn 16:1-4, 33) Shaning grai na ai hpang hta pyi, Yesu a sape ni gaw, shi a tingkyeng akyu n tam ai myit hpe matut kasi la nna, nden marai hpe matut nna madun nga ai. Tinang nni nkri hkrum ra tim pyi, manghkang ni a lapran hta shada da madi shadaw hkat nga ai.​—⁠Heb 10:33, 34.

9. Nden marai madun wa ai Yesu hpe anhte gara hku kasi la mai ai kun?

⁹ Dai ni anhte mung, Yesu madun wa ai nden marai hpe hkan sa ga ai. Ga shadawn, makam masham a majaw zingri hkrum nga ai hpunau nauna ni hpe karum na matu anhte hta nden marai nga ra ai. Kalang lang, anhte a hpunau ni gaw, n tara ai hku htawng jahkrat hkrum chye ai. Dai zawn byin ai shaloi, shanhte a malai tsun shaga ya ai hte hpawn, anhte dang lu ai lam yawng hpe galaw ra ai. (Hpl 1:14; Heb 13:19) Nden marai rawng ai hpe anhte madun lu ai kaga lam langai gaw, “nden ja ai myit hte” matut nna hkaw tsun ai re. (Kas 14:3) Masha ni anhte hpe ninghkap nna zingri tim pyi, Yesu zawn Mungdan shiga hpe hkaw tsun na matu dawdan da ga ai. Kalang lang, anhte nden marai yawm wa chye ai. Dai shaloi, hpa galaw na kun?

10. Myit Dum Poi garai n du shi ai bat ni hta anhte hpa galaw ra ai kun? Hpa majaw kun?

¹⁰ Anhte a matu sak jaw wa ai Hkristu a gawng malai hkungga kaw nna lu la na myit mada lam ni hpe myit sumru ai hku nna, nden marai grau nga wa hkra galaw lu ai. (Yhn 3:16; Ehp 1:7) Myit Dum Poi garai n du shi ai bat ni hta, gawng malai hkungga hpe chyeju dum ai myit grau nga wa hkra galaw lu ai laksan ahkaw ahkang anhte hta nga ga ai. Myit Dum Poi aten ni laman, hti na Chyum daw ni hpe matut hti nna, Yesu garai n si shi ai laman byin wa ai mabyin  ni hpe atsawm myit sawn sumru u. Dai hku galaw yang, Madu A Shana Shat Sha Poi hpe anhte shang lawm ai shaloi, dai poi a masat dingsat ni a lachyum hte laklai ai lam hpe anhte grau nna chye na lu na re. Anhte a matu Yehowa hte Yesu galaw ya wa ai lam ni hpe chyeju dum wa nna, anhte hte anhte tsawra ai ni hpe kade daram akyu shabyin ya lu ai hpe chye na wa na re. Dai gaw anhte a myit mada lam hpe grau ngang kang shangun nna, jahtum du hkra nden marai rawng let hkamjan lu hkra mung shadut ya na re.​—⁠Heb 12:3.

11-12. Anhte hpa lam hpe hkaja wa sai kun?

¹¹ Anhte sharin la wa ai Madu A Shana Shat Sha Poi a lam ni gaw, manu dan ai gawng malai hkungga hpe dum na matu sha n-ga, Yesu a laklai ai atsam ningja ni re ai shagrit shanem ai myit hte nden marai hpe mung dum shangun ai. Yesu gaw, anhte a malai hpyi nem ya ai sumsing lamu Hkinjawng Agyi hku nna dai atsam ningja ni hpe matut madun ai majaw, anhte grai chyeju dum ga ai. (Heb 7:24, 25) Anhte myit masin mahkra hte chyeju dum ai lam madun na matu, Yesu a Myit Dum Poi hpe htet da ai hte maren sadi dung let galaw ra ai. (Luk 22:19, 20) Laning mi hta ahkyak htum shani re ai Nisan 14 hte hkrak re ai shani hta sha dai poi hpe galaw ga ai.

¹² Anhte a malai Yesu si hkam na matu shadut ya ai kaga atsam ningja hpe, Madu A Shana Shat Sha Poi kaw nna chye lu ai. Ginding aga hta shinggyim masha langai hku nna nga lai wa ai shaloi, dai atsam ningja a majaw masha ni Yesu hpe chye ma ai. Gara atsam ningja rai na kun?

13. Yehowa hte Yesu madun wa ai tsawra myit hpe Yawhan 15:9 hte 1 Yawhan 4:8-10 hta gara hku madun da ai kun? Shanhte a tsawra myit kaw nna kadai ni akyu hkamsha lu na kun?

¹³ Anhte a matu galaw ya ai Yehowa a grau htum ai tsawra myit hpe Yesu kasi la wa ai. (Yawhan 15:9 hte 1 Yawhan 4:8-10 hpe hti u.) Ahkyak htum gaw, anhte a malai shi a asak hpe myit masin mahkra hte Yesu sak jaw wa ai lam re. Namman chya hkrum ai ni raitim, “sagu kaga” ni raitim, Yehowa hte shi a Kasha madun wa ai tsawra myit re ai gawng malai hkungga kaw nna akyu lu la ai. (Yhn 10:16; 1Yh 2:2) Myit Dum Poi hta lang ai muk hte tsabyi a lam hpe mung myit yu ga. Dai gaw Yesu a tsawra myit hte sape ni a matu myit tau ya ai hpe madun nga ai. Gara hku nna kun?

14. Sape ni hpe tsawra ai lam Yesu gara hku madun wa ai kun?

¹⁴ Yesu gaw, Myit Dum Poi hpe grai shuk ai htung lailen hku n galaw ai sha, yu maya sha galaw hpang dan ai hku nna, nammam chya hkrum ai shi a sape ni hpe tsawra myit madun wa ai. Aten ni lai wa ai hte maren, nammam chya hkrum ai sape ni gaw shaning shagu Myit Dum Poi hpe, mabyin masa amyu myu a lapran hta galaw ra na re. Htawng rawng nga tim pyi galaw ra na re. (Shr 2:10) Yesu a ga hpe shanhte madat lu na kun? Madat lu ai.

15-16. Yakhkak ai masa lam ni hta du nga tim, nkau mi gaw Myit Dum Poi hpe gara hku galaw lu wa ai kun?

¹⁵ Tsa ban langai kaw nna dai ni aten du hkra, jet ai Hkristan ni gaw Yesu a si ai myit dum poi hpe galaw ra na re. Kalang lang rai yang, yakhkak ai masa ni hta rai nga tim, Madu A Shana Shat Sha Poi hpe dang lu ai daram kaja htum galaw ma ai. Lawu na ga shadawn ni hpe myit yu ga. Hpunau Hero Kin gaw, Miwa mung hta shi hkrai sharen da hkrum ai shaloi, Myit Dum Poi hpe galaw wa ai. Shi hta nga ai hte sha Myit Dum Poi a matu masat dingsat hpe kadai n chye hkra hkyen lajang wa ai. Myit Dum Poi shani hpe chye na matu, nhtoi ni hpe atsawm sha hti ai. Myit Dum Poi aten du ai shaloi, gawk hta shi langai hkrai sha mahkawn hkawn, akyu hpyi nna mungga htawn ai.

¹⁶ Kaga ga shadawn langai hpe mung yu yu ga. Nambat Lahkawng Mungkan Majan laman  hta, Grai zingri hkrum ai htawng hta du nga ai nauna ni gaw, Madu A Shana Shat Sha Poi hpe shoihpa nga tim galaw wa ai. Myit Dum Poi hpe hkik hkam ai hku n galaw ra ai majaw, kadai n chye ai sha galaw lu wa ai. Shanhte ndai hku tsun ai: “Dunghkum hpe sumpan ahpraw magap kau nna, ntsa hta masat dingsat hpe tawn da ai. Anhte langai hte langai shinggrup nna tsap nga ai. Myihprap wan shatu da yang, hpa galaw nga ai hpe chye mat na re majaw, wan shadaw hpe sha shatu da ai. Chyoi pra ai amying ningsang san seng na matu, anhte a n-gun lagaw mahkra akyu jashawn na ngu nna anhte a Kawa hpe myit rawt let ga sadi jaw da ai lam chyahkring hkring tsun ga ai.” Shanhte a sadi dung ai lam gaw grai laklai ai. Yakhkak ai masa lam ni hta du nga tim, Myit Dum Poi hpe galaw lu na matu, Yesu lajang ya wa ai gaw, shi a tsawra myit hpe madun nga ai re.

17. Tinang hkum tinang gara ga san ni hpe san ging ai kun?

¹⁷ Myit Dum Poi ni wa sai majaw, tinang hkum tinang ndai ga san ni hpe san ging ai: ‘Tsawra myit madun ai hta Yesu hpe gara hku nna htep lahti kasi la lu na kun? Tinang a ra kadawn ai lam hta grau nna hpunau nauna ni a ra kadawn ai lam hpe myit maju jung ai kun? Hpunau nauna ni galaw lu ai hta jan nna ngai myit mada nga ai kun? Shanhte galaw lu ai lam gaw shadawn sharam sha re ai hpe ngai chye ai kun?’ Yesu hpe ayan kasi la nna, “maren mara re ai myit masa” hpe madun mat wa ga.​—⁠1 Pe 3:8, JCLB.

18-19. (a) Anhte hpa hpe chye ai kun? (b) Hpa galaw na matu nang dawdan da ai kun?

¹⁸ Hkristu a si ai Myit Dum Poi hpe law law lang gaw galaw ra sana n re. Ru tsang kaba laman Yesu “bai du” ai shaloi, “lata la sai ni” hpe sumsing lamu de shaga la mat wa na re. Dai hpang Myit Dum Poi galaw ra sana n re.​—⁠1 Ko 11:26; Mat 24:31.

¹⁹ Myit Dum Poi hpe matut nna n galaw ra mat tim, Yesu madun wa ai nden marai, shagrit shanem ai myit hte tsawra myit hpe chye na shangun ai Myit Dum Poi hpe gaw, Yehowa a amyu masha ni ayan na dum nga na re. Myit Dum Poi lung wa ai ni gaw, asak bai hkrung wa na masha ni hpe dai poi kaw nna lu la ai akyu ni hpe teng sha tsun dan na re. Ya aten hta pyi, dai poi kaw nna akyu lu la hkra, Yesu a nden marai, shagrit shanem myit hte tsawra myit ni hpe kasi la na matu dawdan da ra ai. Dai hku galaw na nga yang, Yehowa jaw ai kumhpa hpe teng sha lu la na re.​—⁠2 Pe 1:10, 11.