1. Hkawhkam Dawi zawn nkau mi mung gara hku san chye ai kun?

ANHTE yawng gaw ngwi pyaw simsa ai prat lu mayu ai. Myit tsang ai hpe kadai mung n ra sharawng ai. Raitim, kalang lang grai myit tsang ai. “Gade na hkra nye a myit masin hta ngai sumru yu nga nna, Lani hte lani nye a myit hta yawn hkyen nga na rai ta?” ngu nna Yehowa hpe san wa ai Hkawhkam Dawi zawn Yehowa a mayam nkau mi mung san chye ai.​—Shk 13:2.

2. Ndai sumhpa hta hpa lam hkaja lu na kun?

² Myit tsang ai lam hpe tsep kawp n nga hkra n mai galaw tim, dai hpe hkang lu ai. Ndai sumhpa hta myit tsang lam byin chye ai lam nkau hpe shawng hkaja lu na re. Manghkang ni hpe hparan lu nna, matut simsa lu hkra karum ya ai tatut re ai lam 6 hpe mung hkaja lu na re.

3. Anhte gara myit tsang ai lam ni hte hkrum nga ai kun? Hpa lam ni hpe gaw anhte hkang lu ai kun?

³ Myit tsang shangun ai lam nkau hpe gaw n hkang lu ai. Ga shadawn, malu masha, bu hpun palawng, nga shara ni laning hte laning manu rawt wa ai hpe gaw n hkang lu ai. Makau grupyin hta byin nga ai tara tawt lai ai lam ni hpe mung n jahkring kau lu ai. Raitim, n dingman ai hku galaw na matu (sh) akyang hten za na matu bungli manang, jawng manang  ni shadut ai shaloi hta gaw hkang lu ai. Chyum Laika npawt tara ni hte maren n hkan sa ai masha ni a lapran hta nga ra ai majaw, dai zawn manghkang ni hpe anhte hkrum na re. ‘Ndai prat na myit tsang ai lam’ a majaw, masha nkau gaw Yehowa hpe n nawku mat na hpe Satan chye ai. (Mat 13:22; 1 Yh 5:19) Ndai mungkan gaw myit tsang ai lam hte hpring nga ai hpe anhte chye ai.

4. Grai myit tsang wa yang hpa byin chye ai kun?

⁴ Manghkang ni a majaw grai myit tsang wa yang, hpa mung n lu myit sai. Ga shadawn, ra kadawn ai lam ni hpe mari na matu gumhpraw n nga mat ai, machyi makaw hkrum wa ai, bungli n lu galaw ai, lu da ai bungli ni sum mat ai shaloi myit tsang wa chye ai. Karai a tara ni hpe tawt lai na matu hkalem hkrum ai shaloi, sadi n dung lu na hpe mung myit tsang chye ai. Kade n na yang, Satan gaw shi a masha ni hpe akyu jashawn nna, Karai a masha ni hpe gasat na re. Dai shaloi gara hku bai htang na ngu ai hpe mung myit tsang chye ai. ‘Dai zawn myit tsang ai gaw shut ai kun?’ ngu nna anhte myit na re.

5. “Hkum tsang nga myit” ngu nna Yesu tsun ai gaw hpa lachyum rai kun?

⁵ “Hkum tsang nga myit” ngu nna shi hpang hkan ai ni hpe Yesu htet da ai lam anhte chye ai. (Mat 6:25) Hpa hpe mung myit n tsang ging ai ngu Yesu tsun nga ai lachyum kun? N re. Lai wa sai aten na Yehowa a mayam nkau gaw myit tsang wa ai. Raitim, Yehowa a myi man n sum mat ai. * (1 Hk 19:4; Shk 6:3) Anhte myit simsa lu na matu, nawku daw jau ai lam hpe hkra machyi shangun ai du hkra, ladu lai myit n tsang na matu Yesu tsun nga ai re. Myit tsang wa yang hpa galaw lu ai kun?​—“ Galaw Lu Ai Lam” ngu ai lawk hpe yu u.

6. Hpilipi 4:6, 7 hku nga yang simsa lam lu hkra hpa gaw karum ya lu ai kun?

⁶ (1) Chyahkring hkring akyu hpyi u. Manghkang ni a majaw, myit tsang wa yang, Yehowa kaw akyu hpyi u. (1 Pe 5:7) “Chye chyang ai nyan yawng hta grau lai ai Karai Kasang a ngwi pyaw ai” hpe jaw ai hku nna, akyu hpyi ga hpe Yehowa mahtai jaw na re. (Hpilipi 4:6, 7 hpe hti u.) Yehowa gaw atsam kaba ai chyoi pra ai wenyi hku nna simsa lam jaw na re.​—Gal 5:22.

7. Karai Kasang kaw akyu hpyi ai shaloi hpa hpe myit dum ging ai kun?

⁷ Yehowa kaw akyu hpyi ai shaloi, myit masin mahkra hpaw tsun dan u. Tup hkrak hpyi u. Na a manghkang ni, hkamsha lam ni hpe mung tsun dan u. Tinang hparan lu ai manghkang rai yang, hparan lu na matu Yehowa kaw nyan hpaji hte n-gun atsam hpyi u. N hparan lu ai nga yang, ladu lai myit n tsang na matu Yehowa kaw akyu hpyi u. Tup hkrak hpyi yang, Yehowa gara hku mahtai jaw ai hpe asan sha mu wa na re. Kalang ta mahtai n lu tim, asum hkum jaw. Yehowa gaw tup hkrak hpyi shangun mayu ai sha n-ga, matut nna mung akroi anoi hpyi shangun mayu ai.​—Luk 11:8-10.

8. Akyu hpyi ga ni hta hpa ni lawm ging ai kun?

⁸ Myit tsang ai lam hte seng nna Yehowa kaw akyu hpyi ai shaloi, chyeju dum ga ni hpe mung tsun shalawm u. Grai yak ai masa ni hta pyi, lu la ai shaman chyeju ni hpe hti nga u. Hkamsha lam hpe tsun dan na matu ga si n lu tam tim pyi, ‘chyeju hte karum ya rit’ ngu  tsun yang Yehowa mahtai jaw ya lu ai.​—2 Hl 18:31; Rom 8:26.

9. Jet ai shimlum lam lu na matu gara hku galaw lu na kun?

⁹ (2) Tinang hkum tinang n re ai sha, Yehowa a nyan hpaji hpe kamhpa u. Myihtoi Esaia a prat hta Yuda masha ni gaw Asuri masha ni sa gasat ai majaw grai hkrit tsang wa ai. Egutu ni kaw shanhte sa karum hpyi ai. (Esa 30:1, 2) Dai majaw, tsin-yam hkrum na ngu Yehowa sadi jaw ai. (Esa 30:7, 12, 13) Jet ai shimlum lam lu na matu gara hku galaw ra na hpe Esaia hku nna Yehowa tsun ai. “Asim sha nga let [Yehowa hpe] kam sham ai hte nanhte n-gun lagaw lu Ia na myit dai” ngu Esaia tsun ai.​—Esa 30:15.

10. Yehowa hpe kamhpa ai lam madun mai ai masa lam nkau gaw hpa ni rai kun?

¹⁰ Yehowa hpe kamhpa ai lam gara hku madun mai ai kun? Ga shadawn nkau hpe yu yu ga. Shang gumhpraw kaja ai bungli galaw na matu saw shaga hkrum ai ngu saga. Dai gaw aten grai jaw ra nna, wenyi lam hpe nau n lu galaw ai. Shing nrai, bungli hta hkalup n hkam da ai marai langai gaw nang hpe tsawra ai lam madun ai ngu saga. Shing nrai, tsawra ai nta masha langai gaw, “Karai Kasang hpe lata na kun? Ngai hpe lata na kun?” ngu nna tsun ai ngu saga. Dai zawn masa ni hta, dawdan lam jahkrat na matu yak chye ai. Raitim, nang ra nga ai lam matsun hpe Yehowa jaw na re. (Mat 6:33; 10:37; 1 Ko 7:39) Yehowa hpe kamhpa nna shi a lam matsun hpe hkan sa na kun?

11. Laja lana ninghkap hkrum ai shaloi matut simsa na matu gara Chyum Laika labau ni hpe hkaja mai ai kun?

¹¹ (3) Kaja ai hte n kaja ai kasi ningli ni kaw nna sharin la u. Asim sha nga nna, Yehowa hpe kamhpa na matu grai ahkayk ai hpe madun ai Chyum Laika labau law law nga ai. Dai ni hpe hkaja ai shaloi, laja lana ninghkap hkrum ai aten hta matut simsa na matu, Karai a mayam ni hpe hpa gaw karum ya ai hpe myit yu u. Ga shadawn, Yuda tara rung daju gaw, kasa ni hpe n hkaw tsun na matu tsun ai shaloi, shanhte n hkrit ai. Nden marai hte ndai hku tsun ai: “Masha ga madat na hta, Karai Kasang a ga mahtang grau madat na ga ai.” (Kas 5:29) Laja lana kayat hkrum tim pyi, grai hkrit tsang ai lam n nga ai. Hpa majaw kun? Shanhte maga hta Yehowa nga ai hpe chye ai majaw re. Shanhte hpe Yehowa ra sharawng ai majaw, kabu gara shiga hpe matut hkaw tsun lu ai. (Kas 5:40-42) Sape Stehpan gaw si hkrung si htan hte hkrum ai shaloi, matut simsa nga nna, shi a myi man gaw ‘lamu Kasa myi man zawn rai nga ai.’ (Kas 6:12-15) Hpa majaw kun? Yehowa a myi man lu na hpe kam ai majaw re.

12. 1 Petru 3:14 hte 4:14 hku nga yang zingri zingrat hkrum ai shaloi hpa majaw kabu lu ai kun?

¹² Kasa ni hte rau Yehowa nga ai gaw dan leng nga ai. Mauhpa lam ni galaw lu na matu shanhte hpe atsam jaw ai. (Kas 5:12-16; 6:8) Dai ni aten hta gaw dai zawn atsam n jaw sai. Raitim, dinghpring ai lam a majaw yakhkak hkrum tim, shi a myi man matut lu la na, chyoi pra ai wenyi mung anhte hte rau rai nga na hpe Chyum Laika kaw na chye lu ai. (1 Petru 3:14; 4:14 hpe hti u.) Zingri zingrat hkrum wa yang, hpa galaw ra na hpe myit n tsang ging ai. Yehowa madi shadaw ya lu ai, hkye hkrang la lu ai hpe kam ai myit grau nga hkra galaw ging ai. Tsa ban 1 na sape ni zawn, anhte mung Yesu a ndai ga sadi hpe kam ra ai: “Nanhte a gumlau maga na ni nlang, n hkap htang lu hkra, ngai nanhte hpe n-gup ga hte hpaji jaw na.” Ndai hku mung ga sadi jaw ai: ‘Nanhte gaw hkam sharang ai  hte asak wenyi jahkrung la lu na re.’ (Luk 21:12-19) Sadi dung let si mat ai mayam ni yawng hpe Yehowa gaw matsing nyan hta bang da ai majaw, shanhte hpe bai jahkrung ya na re.

13. Yehowa hpe asim sha n kamhpa wa ai Hkawhkam Asa a mabyin kaw na hpa sharin la lu ai kun?

¹³ Yehowa hpe asim sha n kamhpa wa ai ni a mabyin kaw na mung sharin la lu ai. Dai mabyin ni hpe hkaja ai gaw, shanhte zawn n shut na matu karum ya lu ai. Ga shadawn, Yuda Hkawhkam Asa hkaw dung hpang ai aten hta, manu mana law ai hpyen dap sa gasat ai shaloi, Yehowa hpe kamhpa ai majaw, shi awng dang wa ai. (2 Hl 14:8-11) Hpang de, hpyen n-gun nau n law ai Israela Hkawhkam Basha a hpyen hpung sa gasat ai shaloi, moi na zawn Yehowa hpe n kamhpa wa ai. Suri hpyen dap hpe kamhpa nna kumhpaw kumhpa sa jaw ai. (2 Hl 16:1-3) Asak htum wa na mahka, grai machyi jung nga ai shaloi hta mung, Yehowa hpe kamhpa ai lam n nga ai.​—2 Hl 16:12.

14. Asa a mabyin kaw na hpa sharin la lu ai kun?

¹⁴ Shawng nnan hta Asa gaw, manghkang ni hkrum ai shaloi, Yehowa hpe kamhpa wa ai. Raitim, hpang de gaw karum shingtau lu na matu Karai Kasang hpe kamhpa na malai, tinang hkrai hparan na matu shakut ai. Israela ni hpe gasat na matu, Suri hpyen dap hpe sa karum hpyi ai gaw tatut rai na zawn re. Raitim, shi a awng dang ai lam gaw chyahkring chyahkra sha re. Myihtoi hku nna Yehowa shi hpe ndai hku tsun ai: ‘Nang gaw na a Karai Kasang Yehowa hta n hpa ndai hte, Suri hkawhkam hta hpa ndai majaw, Suri hkawhkam a hpyen luksuk ni gaw na a lata na lawt wa sai.’ (2 Hl 16:7) Anhte mung, Yehowa a Chyum Laika lam matsun hpe n tam ai sha, manghkang ni hpe tinang hkrai hparan lu na re ngu n myit ging ai. Dawdan lam ni hpe alawan jahkrat ra tim, Yehowa hpe asim sha kamhpa na nga yang, awng dang hkra shi karum ya na re.

15. Chyum Laika hti ai shaloi anhte hpa galaw mai ai kun?

¹⁵ (4) Chyum daw ni hpe matsing hkra galaw u. Asim sha nga nna Yehowa hpe kamhpa na matu grai ahkyak ai hpe madun ai Chyum daw ni hpe mu yang matsing hkra galaw u. Nsen shapraw nna hti na, ka da na, chyahkring hkring bai yu na nga yang, matsing lu na re. Hpaji rawng ai hku galaw lu na matu, Hkang Da Ai Tara ni hpe nsen shapraw nna ayan hti na matu Yawshu hpe Yehowa hkang da ai. Dai hku galaw ai majaw, hkrit tsang ai lam n nga ai sha, Karai a masha ni hpe nden marai hte woi awn lu wa ai. (Ysh 1:8, 9) Chyum daw law law gaw, myit tsang ai lam ni, hkrit ai lam ni hkrum wa ai shaloi, simsa hkra karum ya lu ai.​—Shk 27:1-3; Gsh 3:25, 26.

16. Asim sha nga nna shi hpe kamhpa na matu nawku hpung hpe Yehowa gara hku akyu jashawn ai kun?

¹⁶ (5) Karai a masha ni hte kanawn mazum u. Asim sha nga nna, shi hpe kamhpa na matu, hpunau nauna ni hpe Yehowa akyu jashawn ai. Zuphpawng ni hta, mungga ni, shawa masha ni jaw ai mahtai ni kaw na akyu lu la ai zawn, hpunau nauna ni hte ga shaga ai kaw na mung, n-gun lu la mai ai. (Heb 10:24, 25) Nawku hpung na kamhpa mai ai manang ni hpe tinang a hkamsha lam ni tsun dan ai shaloi hta mung, n-gun lu la mai ai. Manang wa a “ngwi pyaw ai ga” gaw, myit tsang ai lam ni hpe yawm mat hkra karum ya lu ai.​—Gsh 12:25.

17. Hebre 6:19 hku nga yang manghkang ni nga tim matut simsa hkra Mungdan myit mada lam gaw gara hku karum ya lu ai kun?

 ¹⁷ (6) Myit mada lam hpe ngang kang hkra galaw u. Manghkang ni, myit tsang ai lam ni nga tim, Mungdan myit mada lam gaw, “anhte a myit masin a matu hpri chyinghkyi” zawn ngang kang shangun ai. (Hebre 6:19 hpe hti u.) Myit tsang ai lam ni hkoi mat na ngu ai Yehowa a htawm hpang ga sadi ni hpe myit sawn sumru u. (Esa 65:17) N kaja ai lam ni n nga ai simsa ai mungkan nnan hta, du nga ai ngu shingran yu u. (Mik 4:4) Mungkan nnan hte seng nna kaga ni hpe tsun dan yang, na a myit mada lam mung grau ngang kang wa na re. Hkaw tsun ai hte sape shatai ai bungli hpe dang lu ai daram galaw u. Rai yang, “myit mada ai lam hpring” tsup wa ai du hkra shakut shaja lu na re.​—Heb 6:12.

18. Htawm hpang hta hpa byin wa na kun? Anhte hpa galaw lu ai kun?

¹⁸ Ndai mungkan a prat htum hkyen sai majaw, manghkang ni grau law wa nna, myit tsang ai lam ni mung law wa chye ai. 2021 a shaning ginchyum Chyum daw gaw, manghkang ni hpe tinang a atsam hte n re ai sha, Yehowa hpe kamhpa ai hku nna tawt lai lu na, simsa lu na matu karum ya na re. Ndai shaning laman, “Asim sha nga let kam sham ai hte nanhte n-gun lagaw lu la na myit dai” ngu ai Yehowa a ga sadi hpe kamhpa ai lam anhte a galaw ai lam ni hte madun mat wa ga.​—Esa 30:15.