1. 1935 zuphpawng kaba hta na lu ai mungga gaw ramma lasha a ntsa gara hku akyu shabyin wa ai kun?

CHYUM Jawng ma ni ngu shaga lai wa ai Yehowa Sakse dinghku langai hta lasha 3, numsha 2 nga ai. Yehowa hpe nawku na matu, Yesu Hkristu hpe kasi la na matu, kasha ni hpe sharin ya ai. 1926 hta, asak 18 ning re ai kasha ma naw hkalup hkam ai. Dai aten hta, Chyum Jawng Ma ni zawn sadi dung ai dai lasha gaw, shaning shagu Myit Dum Poi hta muk hte tsabyi ntsin sha ai. Raitim, “Wunawng Wuwa Kaba” ngu ai labau shang mungga a majaw, htawm hpang myit mada lam galai shai mat ai. Dai mungga hpe 1935, Amerikan, Washingtan D.C. zuphpawng kaba hta J. F. Radahpawt htawn tsun wa ai. Dai zuphpawng hta Chyum Jawng Ma ni hpa lam chye wa ai kun?

2. Gara myit kahpra hpa tengman ai lam hpe Hpunau Radahpawt sanglang dan ai kun?

² Shingran 7:9 hta tsun da ai “wunawng wuwa kaba” hta kadai ni lawm na hpe Hpunau Radahpawt sanglang dan ai. Ndai hpung gaw namman chya hkam ai ni daram sadi n dung ai majaw, sumsing lamu hta nambat lahkawng tsang hta rai na ngu dai aten du hkra hkap la da ai. Wunawng wuwa kaba gaw sumsing lamu de lung na matu n lata hkrum ai. “Ru  tsang kaba” kaw na lawt wa nna, ginding aga hta htani htana asak hkrung na Hkristu a sagu kaga * ni re ai lam Hpunau Radahpawt gaw Chyum daw ni hte sanglang dan ai. (Shr 7:14) “Ndai ulawng hte n seng ai sagu kaga mung ngai naw lu nngai: dai sagu ni hpe mung ngai woi wa lu na rai nna, dai ni mung nye a nsen madat na ma ra ai; shaloi sagu hpung langai sha, sagu rem wa langai sha, rai na ra ai” ngu Yesu ga sadi jaw ai. (Yhn 10:16) Dai sagu kaga ni gaw, mungkan Hparadisu hta htani htana asak hkrung na matu myit mada lam nga ai sadi dung ai Yehowa Sakse ni re. (Mat 25:31-33, 46) Dai Chyum Laika tengman ai lam nnan gaw asak 18 ning re ai hpunau hte hpawn, Yehowa a mayam law law a prat hkrun lam hpe gara hku galai shai ya ai lam yu yu ga.​—Shk 97:11; Gsh 4:18.

3-4. 1935 zuphpawng kaba hta hkying hku law ai masha ni gaw shanhte a myit mada lam hte seng nna hpa hpe chye na mat ai kun? Hpa majaw kun?

³ Ginding aga hta htani htana asak hkrung na matu myit mada ai ni yawng rawt tsap ya u ngu mungga htawn ai wa tsun dat ai. Dai shaloi, 20,000 daram nga ai shawa hpawng kaw na ka-ang hkup jan gaw rawt tsap ma ai ngu dai kaw lawm wa ai marai langai tsun dan ai. “Yu dat u! Teng sha law ai wunawng wuwa kaba re!” ngu nna Hpunau Radahpawt tsun dat ai shaloi, masha hpawng gaw kabu gara let jahtau ma ai. Tinang gaw sumsing lamu de sa na matu n lata hkrum ai, chyoi pra ai wenyi hte namman n jaw hkrum ai hpe rawt tsep ai ni chye na ma ai. Hpang shani hta, Sakse Hkam 840 hkalup hkam ai. Law malawng gaw sagu kaga ni re.

⁴ Dai mungga hpe na la ngut ai hpang, mi yet tsun wa ai ramma lasha hte hpawn, hkying hku law ai kaga ni gaw Myit Dum Poi hta muk hte tsabyi n sha sai. “1935 Myit Dum Poi hta, ngai muk hte tsabyi sha ai gaw hpang jahtum lang re. Sumsing lamu de lung na matu, chyoi pra ai wenyi hte namman n jaw hkrum ai. Ginding aga hpe Hparadisu byin hkra karum ya nna, htani htana asak hkrung na matu, myit mada lam nga ai hpe chye na mat ai majaw re” ngu nna hpunau langai shagrit shanem let tsun wa ai. Dai hpe masha law law myit hkrum ma ai. (Rom 8:16, 17; 2 Ko 1:21, 22) Dai aten kaw nna law htam wa ai wunawng wuwa kaba gaw ngam nga ai * namman chya hkam ai ni hte rau jawm galaw ai.

5. Muk hte tsabyi n sha sai ni hpe Yehowa gara hku mu mada ai kun?

⁵ 1935 hpang hta, muk hte tsabyi n sha mat ai ni hpe Yehowa gara hku mu mada ai kun? Dai ni aten hta, hkalup hkam ngut sai Sakse Hkam langai gaw, Myit Dum Poi hta muk hte tsabyi sha nga nna, tinang gaw teng sha namman n jaw hkrum ai hpe hpang she chye na mat ai nga yang gara hku kun? (1 Ko 11:28) Nkau gaw myit mada lam hte seng nna chye na shut ai majaw, sha wa ma ai. Raitim, shut ai lam hpe shagrit shanem let hkap la nna, muk hte tsabyi n sha mat sai. Yehowa hpe sadi dung let matut nawku ai nga yang, sagu kaga hku nna Karai Kasang hkap la na re. Muk hte tsabyi n sha sai raitim, Yehowa  hte Yesu galaw ya wa ai lam ni hpe chyeju dum nna, Myit Dum Poi hpe lung ma ai.

6. Lamu kasa ni hpe hpa galaw na matu Yesu tsun ai kun?

⁶ Kade n na yang, ru tsang kaba du sana re ai majaw, namman chya hkam ai Hkristan ni hte wunawng wuwa kaba a lam Shingran Laika daw kaba 7 hta tsun da ai hpe bawngban ai gaw n-gun lu shangun ai. Lamu ga man 4 kaw na jahten sharun ai nbung hpe manat da na matu, lamu kasa ni hpe Yesu tsun ai. Namman chya hkam ai yawng hpe dazik n shakap ngut dingsa, lam mi hku nna shanhte hpe Yehowa tsep kawp n shagrin ngut dingsa, ginding aga de nbung n dat dat na matu re. (Shr 7:1-4) Hkristu a namman chya hkam ai hpunau ni gaw sadi dung ai majaw, sumsing lamu hta hkawhkam ni, hkinjawng ni hku nna kumhpa lu la na re. (Shr 20:6) Namman chya hkam ai 144,000 yawng sumsing chyeju lu la ai aten hta Yehowa, Yesu hte lamu kasa yawng kabu na re.

7. Shingran 7:9, 10 hta kadai ni hpe Yawhan mu wa ai kun? Shanhte hpa galaw nga ai kun? (Makawp sumla hpe yu u.)

⁷ Hkawhkam ni, hkinjawng ni re ai 144,000 a lam tsun ngut ai hpang, Hara Magedon kaw na lawt wa ai wunawng wuwa kaba hpe Yawhan mu ai. Nambat 1 hpung hte n bung ai sha, nambat 2 hpung gaw masha grau law ai. N dang hti hkra law ai. (Shingran 7:9, 10 hpe hti u.) “Hpraw ai hpun palawng bu hpun” da ai. Dai gaw Satan mungkan a “awu asin re ai hpe koi kau” nna, Karai Kasang hte Hkristu a ntsa sadi dung ai hpe madun ai. (Yak 1:27) Yehowa hte Sagu Kasha Yesu a chyeju majaw hkye hkrang la hkrum ai ngu jahtau ma ai. Namhtan hpun lakung ni hpe mung lang da ai. Dai gaw Yehowa aya tang da ai Hkawhkam hku nna Yesu hpe kabu gara let hkap la ai lam madun ai re.​​—Yawhan 12:12, 13 hte shing daw yu u.

8. Shingran 7:11, 12 hta, Yehowa a sumsing nta masha a lam hpa tsun da ai kun?

⁸ Shingran 7:11, 12 hpe hti u. Sumsing lamu kaw nga ai ni gara hku bai htang ai kun? Wunawng wuwa kaba hpe mu ai shaloi Yehowa a sumsing nta masha yawng kabu let Karai hpe shakawn ma ai. Ru tsang kaba kaw na wunawng wuwa kaba lawt wa ai aten hta mung naw kabu na re.

9. Shingran 7:13-15 hku nga yang, ya wunawng wuwa kaba hpa galaw nga ai kun?

⁹ Shingran 7:13-15 hpe hti u. Wunawng wuwa kaba gaw, “tinang a hpun palawng hpe Sagu Kasha a asai hta hkrut jahpraw” wa ai ngu Yawhan tsun ai. Dai gaw san seng ai myit nsam nga ai, Yehowa a man hta ding hpring ai ngu tsun mayu ai re. (Esa 1:18) Shanhte gaw Yesu a shagu hkungga hpe kam ai. Yehowa hte hku hkau lam kaja ai, apnawng da ai hkalup hkam ngut sai Hkristan ni re. (Yhn 3:36; 1 Pe 3:21) Dai majaw, Karai a tingnyang man hta tsap nna, ginding aga na ga shadawn nawku htingnu wang hta “shani shana” shi hpe nawku daw jau na ahkang lu ai. Hkaw tsun ai hte sape shatai ai bungli hta myit rawt let shang lawm nna, mungdan hpe shawng tawn ai.​—Mat 6:33; 24:14; 28:19, 20.

10. Wunawng wuwa kaba gaw hpa hpe kam ai kun? Gara ga sadi hpring tsup wa na kun?

¹⁰ Ru tsang kaba kaw na lawt wa ai wunawng wuwa kaba gaw, Karai a makawp maga ai lam matut hkamsha lu na hpe kam ai. Tingnyang hta dung nga ai madu gaw, shi a sum hpe shanhte a ntsa ka-up da na majaw re. “Shanhte a myi hta na myi prwi pru mapru katsut kau ya na ra ai: htawm hpang e si  hkrung si htan n nga lu na sai; sharung shayawt ai, hkrap ngu hkrap ngoi ai, hki si ba si ai mung, n nga lu na sai” ngu ai Karai a ga sadi hpring tsup wa na re.​—Shr 21:3, 4.

11-12. (a) Shingran 7:16, 17 hku nga yang, wunawng wuwa kaba a matu gara shaman chyeju ni la nga ai kun? (b) Myit Dum Poi hta sagu kaga ni hpa galaw mai ai kun? Hpa majaw kun?

¹¹ Shingran 7:16, 17 hpe hti u. Dai ni aten hta, Yehowa a mayam nkau gaw hpaga lam n kaja ai, majan byin ai, simsa lam n nga ai majaw, kawsi hpang gara hkrum nga ai. Nkau gaw makam masham a majaw htawng hkrat nga ai. Raitim, ndai nhkru ai mungkan hten run ai kaw na lawt lu ai hpang, malu masha ni, wenyi malu masha ni n hpaw n ya lu la na hpe chye ai majaw kabu nga ai. Satan a mungkan jahten hkrum ai aten mungdan ni a ntsa ru jaw na Yehowa a pawt sindawng ai lam re ai “kahtet ai” ari hpe wunawng wuwa kaba hkrum sha na n re. Ru tsang kaba kaw na lawt wa ai ni hpe “[htani htana] asak hka hpawk” de Yesu lam woi ya na re. Wan hku law ai asak hkrung ai ni gaw galoi mung si ra sana n re. Mau hpa myit mada lam re.​—Yhn 11:26.

¹² Mau hpa myit mada lam a matu Yehowa hte Yesu hpe sagu kaga ni grai chyeju dum ai. Sumsing lamu de lung na matu n lata hkrum tim, Yehowa a man hta shanhte a manu jahpu gaw, namman chya hkam ai ni hte maren sha re. Hpung lahkawng yan gaw, Karai Kasang hte Hkristu hpe shakawn mai ai. Lam langai gaw Myit Dum Poi lung ai hku nna re.

13-14. Hkristu a Myit Dum Poi hpe hpa majaw lung ging ai kun?

¹³ Kade n na shi ai shaning ni hta, Myit Dum Poi sa lung ai marai 1,000 hta muk hte tsabyi sha ai marai 1 daram sha nga ai. Nawku hpung law malawng hta muk hte tsabyi sha ai ni n nga ai. Sa lung ai law malawng gaw, ginding aga myit mada lam nga ai ni re. Rai yang, Myit Dum Poi hpe hpa majaw lung ai kun? Manang langai a hkungran poi hpe sa lung ai hte bung ai. Hkungran ai yan la hpe tsawra ai majaw, n-gun jaw mayu na sa lung ai re. Dai hte maren, sagu kaga ni gaw Hkristu hte namman chya hkam ai ni hpe tsawra ai majaw, madi shadaw ai lam madun mayu ai majaw lung ai re. Yesu a gawng malai hkungga hpe chyeju dum ai lam madun mayu ai majaw mung re.  Dai hkungga a majaw sha, ginding aga hta htani htana asak hkrung na matu lam hpaw mat ai.

¹⁴ Kaga ahkyak ai lam langai gaw, Yesu a matsun ga hpe madat mayu ai majaw re. Shawng nnan galaw ai Myit Dum Poi hta, Yesu gaw “ngai hpe adum nga na matu ndai galaw mu” ngu sadi dung ai kasa ni hpe htet da ai. (1 Ko 11:23-26) Dai majaw, sagu kaga ni gaw ginding aga hta namman chya hkam ai ni nga dingsa Myit Dum Poi hpe lung na re. Shanhte hte rau lung na matu masha yawng hpe mung saw shaga ai.

15. Myit Dum Poi hta Karai Kasang hte Hkristu hpe gara hku nna shakawn mai ai kun?

¹⁵ Myit Dum Poi hta mahkawn hkawn, akyu hpyi ai shaloi, Karai Kasang hte Hkristu hpe shakawn na matu ahkaw ahkang lu ai. Dai ning na mungga ga baw gaw, “Na A Matu Karai Kasang Hte Hkristu Galaw Ya Wa Ai Hpe Manu Shadan U!” ngu ai re. Ndai mungga gaw, Yehowa hte Hkristu hpe chyeju dum ai myit law htam wa shangun na re. Muk hte tsabyi shalai ai shaloi, de a malai re ai Yesu a hkum hkrang hte asai a lam myit ging ai. Anhte asak lu na matu, Kasha hpe Yehowa si hkam shangun ai lam myit dum ging ai. (Mat 20:28) Sumsing Kawa hte Kasha hpe tsawra ai ni yawng gaw Myit Dum Poi hpe lung na re.

16. Namman chya hkam ai ni hte sagu kaga ni a bung ai lam gaw hpa rai kun?

¹⁶ Karai a man hta namman chya hkam ai ni hte sagu kaga ni a manu gaw n shai ai. Hpung lahkawng yan hpe Yehowa maren sha manu shadan ai. Manu jahpu maren sha re ai Kasha a asai hte mari da ai re. N bung ai gaw myit mada lam sha re. Raitim, hpung lahkawng yan Karai Kasang hte Hkristu a ntsa sadi dung ra ai. (Shk 31:23) Namman chya hkam ai ni raitim, sagu kaga raitim, langai hpra a ra kadawn ai hta madung nna Yehowa gaw chyoi pra ai wenyi jaw ai.

17. Ngam nga ai namman chya hkam ai ni hpa hpe myit mada ai kun?

¹⁷ Namman Chya Hkam Ai Hkristan Ni gaw shangai ai kaw na sumsing lamu myit mada lam nga ai ni n re. Karai Kasang jaw ai myit mada lam re. Namman chya hkam ai ni gaw, myit mada lam hte seng nna sumru ai, akyu hpyi ai. Sumsing chyeju lu na matu sharawng awng let la nga ai. Sumsing lamu hta gara zawn hkum hkrang lu la na hpe n chye ai. (Hpl 3:20, 21; 1 Yh 3:2) Raitim, Yehowa, Yesu, lamu kasa ni, kaga namman chya hkam ai ni hte hkrum na matu, sumsing mungdan hta shanhte hte arau nga na matu myit mada nga ai.

18. Sagu kaga ni hpa hpe myit mada ai kun?

 ¹⁸ Sagu kaga ni gaw, ginding aga kaw sha htani htana asak hkrung mayu ai. Dai myit mada lam hpe mung manu shadan ai. (Hpj 3:11) Mungkan ting hpe hparadisu hku nna galai shai ai hta karum ya ai ahkang lu na nhtoi, hkam kaja ai kashu kasha ni hte rau tinang a nta, tinang a sun hte nga ra na nhtoi hpe myit mada ai. (Esa 65:21-23) Nam maling, bum ni, panglai ni hpe yu let Yehowa hpan da ai lam ni hpe sawk sagawn na matu myit mada nga ai. Shanhte hpe kabu shangun dik htum lam gaw, Yehowa hte hku hkau lam lani hte lani ngang kang wa na ngu ai hpe chye da ai lam re.

19. Myit Dum Poi gaw anhte langai hpra hpe gara ahkaw ahkang lu shangun ai kun? Dai ning na Myit Dum Poi hpe gara aten hta galaw na kun?

¹⁹ Apnawng da ai mayam langai hpra hpe mau hpa myit mada lam Yehowa jaw da ai. (Yer 29:11) Hkristu a Myit Dum Poi gaw, htani htana asak lu na matu, Karai Kasang hte Hkristu galaw ya ai lam ni hpe shakawn na matu anhte langai hpra hpe ahkaw ahkang lu shangun ai. Myit Dum Poi gaw jet ai Hkristan ni a matu, ahkyak dik ai zuphpawng langai re. Ndai poi hpe 2021, March 27, Bat Kru Ya shani, jan shang ngut ai hpang galaw na re. Dai ning na Myit Dum Poi hpe masha law law wanglu wanglang lu lung na re. Nkau gaw ninghkap ai ni a lapran lung ra na re. Nkau gaw ndai poi hpe htawng kata kaw sha galaw ra na re. Yehowa, Yesu, lamu kasa ni hte hkrung rawt ngut sai namman chya hkam ai ni yu nga ai npu hta nawku hpung shagu, hpung kaji shagu, hkum dek shagu Myit Dum Poi hpe kabu gara let lu lung u ga.