1. Karai a tsawra myit gaw nang hpe gara hku hkamsha shangun ai kun?

“KARAI Kasang gaw tsaw ra ai myit rai nga ai” ngu kasa Yawhan ka da ai. (1 Yh 4:8) Karai Kasang gaw tsawra myit hte asak a npawt re ai lam dai ga gaw bai shadum ya ai. Yehowa gaw anhte hpe tsawra ai. Shi a tsawra myit gaw, anhte hpe shim lum lam, ngwi pyaw lam hte myit dik ai lam hkamsha shangun ai.

2. Mahte 22:37-40 hku nga yang ahkyak htum ai hkang da ai tara lahkawng gaw hpa rai kun? Lahkawng ngu na tara hpe hkan sa na matu hpa majaw yak chye ai kun?

² Hkristan ni gaw tsawra myit madun ra ai. Dai gaw hkang da ai tara re. (Mahte 22:37-40 hpe hti u.) Yehowa a lam atsawm chye wa yang, nambat langai hkang da ai tara hpe aloi sha hkan sa lu na re. Yehowa gaw hkum tsup nna, tsawra myit hte lanu lahku ai majaw re. Raitim, nambat lahkawng hkang da ai tara hpe hkan sa na matu gaw yak chye ai. Hpa majaw kun? Htingbu re ai hpunau nauna ni gaw, n hkum tsup ai majaw re. Kalang lang, shanhte tsun ai, galaw ai lam ni gaw tsawra myit hte lanu lahku ai lam n nga ai. Dai zawn hkrum wa na hpe Yehowa chye ai majaw, tsawra myit hpe shada da hpa majaw madun ging ai, gara hku madun ging ai lam hpe Chyum Laika hta ka shalawm na matu, masha nkau hpe shatsam ya ai. Dai ni kaw na langai gaw Yawhan re.​—1 Yh 3:11, 12.

3. Yawhan gaw hpa hpe ahkyak shatai na tsun wa ai kun?

³ Hkristan ni gaw tsawra myit madun ra ai ngu Yawhan gaw shi a laika hta ahkyak shatai tsun da ai. Yawhan Laika hta lawm ai tsawra myit hte seng ai lam gaw Mahte, Marku, Luka Laika masum hta na pyi grau law ai. Yawhan gaw, asak 100 ning daram hta, Yawhan Laika hte kaga Laika masum hpe ka  wa ai. Hkristan ni galaw ai lam yawng hta, tsawra myit lawm ra ai ngu nna dai laika ni gaw sharin ya ai. (1 Yh 4:10, 11) Dai hpe chye na matu, shi mung aten la nna sharin la ra ai.

4. Yawhan gaw kaga ni hpe tsawra myit ayan madun lu wa ai kun?

⁴ Yawhan gaw, asak naw kaji ai aten hta tsawra myit hpe ayan gaw n lu madun wa ai. Ga shadawn, kalang mi hta, Yesu hte rau sape ni gaw Galile kaw nna Samari mung de hkaw tsun sa ai. Samari kahtawng langai kaw na masha ni gaw, shanhte hpe atsawm n hkap tau la ai. Shi hpa galaw wa ai kun? Lamu de na wan jahkrat shangun nna jahten kau ra na kun? ngu nna Yesu hpe san ai. (Luk 9:52-56) Kalang mi hta mung, Yawhan gaw kaga kasa ni hpe tsawra myit n madun wa ai. Shi hte kahpu Yaku gaw, Karai a Mungdan hta ahkyak ai shara lu na matu kanu hpe Yesu hpang sa nna hpyi shangun wa na masa nga ai. Shan galaw ai hpe kaga kasa ni chye mat ai shaloi grai masin pawt ai. (Mat 20:20, 21, 24) Yawhan hta dai zawn gawngkya ai lam ni nga tim, Yesu gaw shi hpe tsawra ai.​—Yhn 21:7.

5. Ndai sumhpa hta hpa lam hkaja lu na kun?

⁵ Ndai sumhpa hta, Yawhan a kasi ningli hte tsawra myit hte seng nna shi ka da ai lam nkau hpe hkaja lu na re. Dai hpe hkaja ai shaloi, hpunau nauna ni hpe tsawra myit gara hku madun mai ai lam hpe mung chye lu na re. Dinghku ningbaw gaw, shi a dinghku hpe tsawra myit madun na matu ahkyak ai hpe mung hkaja lu na re.

6. Anhte hpe tsawra ai lam Yehowa gara hku madun ai kun?

⁶ Ga ngwi ga pyaw tsun ai gaw tsawra myit madun ai re ngu anhte myit chye ai. Raitim, jet ai tsawra myit gaw, galaw ai lam ni lawm ra ai. (Yaku 2:17, 26 hte shingdaw yu u.) Ga shadawn, Yehowa gaw anhte hpe tsawra ai. (1 Yh 4:19) Shi a tsawra myit hpe Chyum Laika hta grai tsawm ai ga si ni hte hpaw tsun dan ai. (Shk 25:10; Rom 8:38, 39) Raitim, dai hku tsun ai sha n-ga, galaw ai lam hte mung tsawra ai lam madun ai. Yawhan ndai hku ka da ai: “Karai Kasang gaw shi a Kasha shingtai hpe mungkan ga de shangun dat wu ai rai nna, anhte gaw shi a marang e a hkrung nga ma li ga, . . . dai gaw anhte hta e, Karai Kasang a tsaw ra ai myit dan pru ai lam rai nga ai.” (1 Yh 4:9) Yehowa gaw, shi tsawra ai kasha hpe anhte a malai nni nkri hkrum let si hkam na matu ahkang jaw ai. (Yhn 3:16) Dai majaw, anhte hpe Yehowa kade daram tsawra ai lam chye lu ai.

7. Yesu gaw shi a tsawra myit hpe gara hku sakse madun wa ai kun?

⁷ Yesu gaw sape ni hpe tsawra ai lam hpaw tsun dan ai. (Yhn 13:1; 15:15) Anhte hpe  mung tsawra ai lam tsun ai sha n-ga, galaw ai lam hte mung sakse madun ai. Shi ndai hku tsun ai: “Jinghku wa a matu tinang a asak nawng kau hkra tsaw ra ai myit hta, grau kaba ai tsaw ra ai myit gaw kadai hta mung n rawng nga ai.” (Yhn 15:13) Anhte a matu Yehowa hte Yesu galaw ya ai lam ni hpe bai myit yu ai shaloi, hpa galaw na matu shadut ya ai kun?

8. 1 Yawhan 3:18 hta hpa galaw na matu tsun da ai kun?

⁸ Yehowa hte Yesu a ga madat ai hku nna shan yan hpe tsawra ai lam madun mai ai. (Yhn 14:15; 1 Yh 5:3) Shada da tsawra na matu Yesu hkang da ai. (Yhn 13:34, 35) Hpunau nauna ni hpe tsawra ai lam tsun ai hte sha n-ga, galaw ai lam hte mung madun ra ai. (1 Yawhan 3:18 hpe hti u.) Shanhte hpe tsawra myit madun mai ai lam nkau gaw hpa rai kun?

9. Tsawra myit gaw hpa galaw na matu Yawhan hpe shadut ya ai kun?

⁹ Yawhan gaw kawa hte rau, nga hkwi ai hpaga bungli galaw nna gumhpraw tam mai ai. Raitim, shi a prat hpe Yehowa hte Yesu a lam kaga ni chye wa hkra karum ya ai hta akyu jashawn ai. Yawhan lata ai prat hkrun lam gaw n loi ai. Zingri zingrat hkrum ai. Tsa ban langai htum hkyen ai aten, shi asak grai kaba sai shaloi, kaga de gawt kau hkrum ai. (Kas 3:1; 4:1-3; 5:18; Shr 1:9) Yesu a lam hkaw tsun ai majaw htawng hkrat nga tim, kaga ni hpe tsawra ai lam sakse madun ai. Ga shadawn, Patmu zunlawng hta du nga ai shaloi, Shingran Laika hpe ka wa nna, nawku hpung ni hpang de sa ya ai. Dai majaw, “ahkying ladaw gade n na yang, byin wa na” lam ni hpe shanhte chye lu ai. (Shr 1:1) Patmu zunlawng kaw na lawt wa ai hpang she, Yesu a prat hkrun lam hte hkaw tsun magam hte seng ai labau ni lawm ai Yawhan Laika hpe ka wa ai rai na re. Hpunau nauna ni hpe n-gun jaw na matu hte shangang shakang ya na matu, Laika masum hpe mung ka wa ai. Yawhan a tingkyeng akyu n tam ai tsawra myit hpe gara hku kasi la mai na kun?

10. Masha ni hpe tsawra ai lam gara hku sakse madun na kun?

¹⁰ Tinang lata ai lam hte masha ni hpe tsawra ai lam sakse madun mai ai. Satan a mungkan gaw, ahkying aten hte n-gun atsam hpe, tinang a matu, gumhpraw a matu, mying gumhkawng na matu akyu jashawn shangun mayu ai. Mungkan ting na hkaw tsun masha ni gaw, kabu gara shiga hkaw tsun ai hte Yehowa hpang de masha ni sit sa wa na matu tinang a aten hpe law law akyu jashawn nga ai. Nkau gaw, hkaw tsun ai hte sharin achyin ai lam hta aten hpring galaw nga ai.

11. Hkristan law law gaw Yehowa hte hpunau nauna ni hpe tsawra ai lam gara hku madun ai kun?

¹¹ Hkristan law law gaw, tinang hkum tinang hte kun dinghku hpe madi shadaw na matu kan bau bungli hpe aten hpring galaw ra ai. Raitim, Karai a uhpung hpe dang lu ai daram madi shadaw ya nga ai. Ga shadawn, nkau gaw hkye mawai bungli, gawgap bungli ni hta karum ya nna, yawng gaw mungkan ting na magam bungli a matu alu shang lawm ai. Karai Kasang hte hpunau nauna ni hpe tsawra ai majaw galaw lu ai re. Bat shagu, nawku zuphpawng ni lung ai, shang lawm ai hku nna hpunau nauna ni hpe tsawra ai lam madun ai. Pu ba nga tim, zuphpawng ni hpe lung ai. Mahtai jaw na matu hkrit tim, shakut nna jaw ai. Manghkang ni nga tim, zuphpawng n hpang shi ai aten hte ngut ai aten ni hta shada da n-gun jaw hkat ai. (Heb 10:24, 25) Hpunau nauna ni galaw ya ai lam a matu anhte teng sha chyeju dum ai.

12. Hpunau nauna ni hpe tsawra ai lam gara lam hte mung Yawhan madun ai kun?

 ¹² Yawhan gaw, hpunau nauna ni hpe shakawn ya ai sha n-ga, hpaji jaw ga tsun ai hku nna mung tsawra ai lam madun ai. Ga shadawn, shi a laika ni hta, hpunau nauna ni a makam masham hte kaja ai lam ni a matu shakawn ya ai. Mara hte seng nna hpaji jaw ra yang mung asan sha tsun ai. (1 Yh 1:8–2:1, 13, 14) Anhte mung, hpunau nauna ni a kaja ai lam ni hpe shakawn ya ra ai. Raitim, marai langai ngai hta n kaja ai myit jasat ni hte akyang lailen ni nga wa hpe sadi hkrup yang, hpaji rawng ai hku shading sharai ya nna, tsawra myit madun mai ai. Manang langai hpe hpaji jaw na matu nden marai ra tim, jet ai manang gaw, shada da hpe grau kaja hkra galaw ya lu ai, shading sharai ya lu ai ngu Chyum Laika hta tsun da ai.​—Gsh 27:17.

13. Hpa hpe koi ging ai kun?

¹³ Kalang lang, tinang n galaw na matu lata ai lam ni hte mung hpunau nauna ni hpe tsawra ai lam madun mai ai. Ga shadawn, shanhte tsun ai lam a majaw aloi sha masin pawt ai baw n galaw ai. Kalang mi hta, Yesu gaw asak lu mayu ai ni gaw, shi a shan sha ra nna, sai hpe lu ra ai ngu sape ni hpe tsun ai. (Yhn 6:53-57) Dai ga a majaw, sape law law kajawng mat nna, shi hpe kau da mat ai. Raitim, Yawhan hte manang ajet ni gaw n kau da ai. Sadi dung let shi hte rau matut nga ai. Yesu tsun ai lam hpe shanhte n chye na ai. Mau mung mau ai. Raitim, Yesu tsun ai lam gaw shut ai ngu n sawn la ai. Dai hte seng nna mung myit n htum ai. Shi tsun ai ga gaw tengman ai hpe chye ai majaw, shi hpe kamhpa ai. (Yhn 6:60, 66-69) Anhte a manang ni tsun ai lam a majaw aloi sha masin n pawt na matu grai ahkyak ai. Masin pawt na malai, chye na shut ai lam ni hpe tsun dan na matu ahkang jaw ging ai.​—Gsh 18:13; Hpj 7:9.

14. Hpunau nauna ni hpe nju ndawng ai myit hpa majaw n nga ging ai kun?

¹⁴ Hpunau nauna ni hpe nju ndawng ai myit n nga na matu mung Yawhan n-gun jaw da ai. Dai hpaji jaw ga hpe n hkan sa ai nga yang, Satan gaw anhte hpe shingkang ka-up mat na re. (1 Yh 2:11; 3:15) Tsa ban langai htum na mahka hta nkau mi dai zawn byin wa ai. Dai aten hta Satan gaw, Karai a masha ni shada da nju ndawng hkra, myit n hkrum hkra galaw lu ai lam yawng hpe galaw wa ai. Dai Laika ni hpe Yawhan ka ai aten hta, Satan a myit jasat nga ai ni gaw nawku hpung hta nga wa sai. Ga shadawn, nawku hpung langai hta Diotrehpi  gaw, myit n hkrum hkra galaw ai. (3 Yh 9, 10) Uphkang hpung a malai re ai hpung kawan hpunau ni hpe n hkungga ai. Shi n ra sharawng ai ni hpe manam daw ai ni hpe mung, nawku hpung kaw na shapraw kau na matu pyi shakut ai. Grai nan sawng ai. Satan gaw dai ni aten na Karai a masha ni a lapran hta mung, myit n hkrum mat hkra shakut nga ai. Dai zawn n byin hkra nju ndawng ai myit shang na ahkang hkum jaw.

15. Dinghku ningbaw gaw hpa hpe dum ra ai kun?

¹⁵ Dinghku ningbaw gaw, nta masha ni a ra kadawn ai lam ni hpe madi shadaw ya ai hku nna tsawra ai lam madun mai ai. (1 Tm 5:8) Ra kadawn ai lam ni hpe madi shadaw ya ai hta na, wenyi lam kaja hkra madi shadaw ya ai gaw grau ahkayk ai hpe dum ra ai. (Mat 5:3) Dinghku ningbaw ni a matu, Yesu jahkrat wa ai kasi ningli hpe yu yu ga. Yesu gaw hpun shadaw hta noi da hkrum ai aten hta pyi, dinghku a matu myit nga ai lam Yawhan Laika hta mu lu ai. Yesu sat hkrum na shara hta kanu Mari hte arau Yawhan tsap nga ai. Yesu gaw laja lana nni nkri hkrum nga tim, kanu hpe lanu lahku ya na matu Yawhan hpe htet da ai. (Yhn 19:26, 27) Mari ra kadawn ai lam ni hpe madi shadaw ya na matu, Yesu hta kahpu kanau ni nga na re. Raitim, shanhte kadai mung Yesu a sape garai n byin shi ai. Wenyi lam hte ra kadawn ai lam ni hpe Mari lu la hkra Yesu lajang ya wa ai.

16. Yawhan hta hpa lit kaba ni nga ai kun?

¹⁶ Yawhan hta lit kaba law law nga ai. Kasa langai re ai majaw hkaw tsun bungli hpe woi awn ra ai. Dinghku hte re ai majaw mung, dinghku a ra kadawn ai lam ni hte wenyi lam hpe madi shadaw na matu rap ra hkra galaw ra na re. (1 Ko 9:5) Dai ni aten na dinghku ningbaw ni hpa sharin la lu ai kun?

17. Dinghku ningbaw gaw nta masha ni a wenyi lam hpe lanu lahku na matu hpa majaw ahkyak ai kun?

¹⁷ Dinghku ningbaw re ai hpunau langai hta lit kaba law law nga na re. Ga shadawn, bungli hta Yehowa amying n hkra machyi hkra bungli shakut shaja ra ai. (Ehp 6:5, 6; Tit 2:9, 10) Nawku hpung hta mung sagu kawan ai, hkaw tsun bungli hpe woi awn ai zawn re ai lit ni mung nga na re. Madu jan, kasha ni hte arau Chyum Laika hpe ayan hkaja na matu mung grai ahkyak ai. Ra kadawn ai lam ni, hkamsha lam ni, wenyi lam ni kaja hkra shakut ya nga ai hpe nta masha ni grai chyeju dum na re.​—Ehp 5:28, 29; 6:4.

18. Yawhan hpa hpe kam ai kun?

¹⁸ Yawhan gaw asak galu ai majaw mahkrum madup law law nga ai. Wenyi lam gawngkya shangun chye ai mayak mahkak law law hte shi hkrum wa ai. Raitim, hpunau nauna ni hpe tsawra u ngu ai tara hte hpawn, Yesu a hkang da ai ga ni hpe htep lahti hkan sa ai. Yehowa hte Yesu gaw shi hpe tsawra nna, mayak mahkak ni hpe tawt lai lu hkra, n-gun atsam jaw na hpe shi kam ai. (Yhn 14:15-17; 15:10; 1 Yh 4:16) Hpunau nauna ni hpe tsawra ai Yawhan a tsawra myit hpe hkring mat hkra Satan hte shi a mungkan gaw n lu galaw ai.

19. 1 Yawhan 4:7 hta hpa galaw na matu n-gun jaw da ai kun? Hpa majaw kun?

¹⁹ Yawhan zawn anhte mung, nju ndawng ai lam ni hte hpring nga ai Satan a mungkan hta asak hkrung nga ai. (1 Yh 3:1, 10) Hpunau nauna ni hpe n tsawra mat hkra Satan galaw mayu ai. Raitim, anhte ahkang n jaw yang shi hpa mung n lu galaw ai. Anhte a tsun ai, galaw ai lam ni hku nna hpunau nauna ni hpe tsawra ai lam madun mat wa ga. Rai yang, Yehowa a nta masha byin lu ai majaw myit dik lam lu la nna, teng sha ngwi pyaw na re.​—1 Yawhan 4:7 hpe hti u.