1-2. (a) Yesu a prat hte hkaw tsun magam a lam myit ai shaloi hpa hkamsha lu ai kun? (b) Ndai sumhpa hta hpa lam bawngban na kun?

 TSAWRA ai marai langai si mat ai shaloi, anhte grai dum ai. Grai nni nkri hkrum nna si mat ai nga yang, dai aten hpe bai dum shagu grai yawn chye ai. Raitim, aten na wa ai hte maren, shi sharin ya wa ai lam ni, tinang hpe n-gun jaw na matu, tinang pyaw na matu, shi galaw wa, tsun wa ai lam ni hpe myit dat shagu bai pyaw wa lu ai.

² Dai zawn sha, Yesu nni nkri hkrum let si mat wa ai lam hti ai shaloi, grai yawn ai. Laksan hku nna, Myit Dum Poi laman, gawng malai hkungga a manu hpe aten la myit sawn sumru ai. (1 Ko 11:24, 25) Raitim, mungkan ga hta Yesu tsun wa, galaw wa ai lam yawng hpe bai myit ai shaloi, anhte kabu lu ai. Ya, Yesu hpa galaw nga ai kun? Htawm hpang hta hpa galaw na kun? ngu ai hpe myit ai mung n-gun lu shangun ai. Dai lam ni hte Yesu a tsawra myit a lam hpe myit sawn sumru ai gaw, chyeju dum ai lam hpe tatut madun na matu shadut ya lu ai. Dai lam hpe ndai sumhpa hta bawngban na re.

3. Gawng malai jahpu a matu hpa majaw chyeju dum ging ai kun?

³ Yesu a prat hkrun lam hte si ai lam hpe myit ai shaloi, anhte chyeju dum ai. Mungkan ga hta hkaw tsun bungli galaw ai  laman, Karai Mungdan shaman chyeju ni a lam hpe Yesu sharin ya ai. Dai Mungdan tengman lam hpe anhte manu shadan ai. Gawng malai jahpu a matu mung chyeju dum ai. Yehowa hte mung, Yesu hte mung hku hkau ai lam lu na matu, lam hpaw ya ai majaw re. Yesu hpe kamsham ai ni gaw htani htana asak sha n-ga, tsawra ai si mat ai ni hte bai hkrum lu na myit mada lam lu ai. (Yhn 5:28, 29; Rom 6:23) Dai shaman chyeju ni hte ging dan ai lam hpa mung anhte n galaw wa ai. Yehowa hte Hkristu galaw ya wa ai lam yawng a matu, chyeju bai htang lu ai atsam n nga ai. (Rom 5:8, 20, 21) Raitim, kade daram chyeju dum ai hpe gaw madun mai ai. Gara lam hte kun?

4. Magdala Mari gaw Yesu galaw ya wa ai ni a matu chyeju dum ai lam gara hku madun ai kun? (Sumla hpe yu u.)

⁴ Yuda num Magdala Mari a lam hpe myit yu u. Nhkru ai nat 7 shung hkrum ai majaw, grai nni nkri hkrum sha nga ai. Lawt lam n nga sai ngu hkamsha wa na re. Nhkru ai nat shalau ai kaw na lawt hkra Yesu galaw ya ai shaloi, kade ram chyeju dum na hpe myit yu u. Grai chyeju dum ai majaw, Yesu a hpang hkan ai wa byin wa ai. (Luk 8:1-3) Aten, n-gun atsam, arung arai ni akyu jashawn nna hkaw tsun magam hta Yesu hpe madi shadaw ya ai. Nhkru ai nat hpe shaden kau ya ai majaw, Mari chyeju dum ai. Raitim, dai hta grau kaba ai hpe Yesu naw galaw ya na lam n chye shi ai. Masha yawng a matu asak naw jaw ya na re. “Kasha hpe kam sham ai ni nlang hte” htani htana asak lu na matu re. (Yhn 3:16) Dai pyi, Yesu hpe sadi dung ai hku nna, chyeju dum ai lam Mari madun ai. Hpun shadaw hta Yesu nni nkri hkrum nga ai shaloi, Yesu a makau hta tsap ya ai. Yesu hte kaga ni hpe shalan shabran ya ai. (Yhn 19:25) Yesu si mat ai hpang, Mari hte kaga num lahkawng lup sunghku de manam pyaw ai sau ni la wa ai. (Mrk 16:1, 2) Mari sadi dung ai majaw shaman chyeju law law lu la ai. Bai hkrung rawt wa ai Yesu hte hkrum lu, ga shaga lu ai. Dai ahkaw ahkang hpe kasa law malawng pyi n lu ai.​—Yhn 20:11-18.

5. Anhte a matu Yehowa hte Yesu galaw ya wa ai ni hpe chyeju dum ai lam gara hku madun mai ai kun?

 ⁵ Anhte mung tinang a aten, n-gun atsam, sut gan ni hpe Mungdan akyu a matu akyu jashawn ai hku nna, Yehowa hte Yesu galaw ya wa ai ni hpe chyeju dum ai lam madun mai ai. Ga shadawn, nawku lamang a matu akyu jashawn ai htingnu ni gawgap ai, gram lajang ai lam hta karum ya mai ai.

6. Gawng malai jahpu gaw anhte langai hpra hpe jaw ai kumhpa re ai ngu hpa majaw lu tsun ai kun?

⁶ Anhte hpe Yehowa hte Yesu kade tsawra ai hpe myit yu ai shaloi, shan hpe bai tsawra na matu shadut hkrum ai. (1 Yh 4:10, 19) Anhte langai hpra a matu Yesu si hkam ya wa ai hpe chye ai shaloi grau tsawra wa ai. Kasa Pawlu mung dai hpe yin la ai: “Ngai hpe tsaw ra nna, nye a matu mara shi hkum dai shi ap kau ai Karai Kasang a Kasha” ngu Galati mare na Hkristan ni hpang de ka wa ai. (Gal 2:20) Gawng malai jahpu hta madung nna, anhte hpe shi a jinghku byin hkra Yehowa lau la wa ai. (Yhn 6:44) Nang hta kaja ai lam lama ma nga ai hpe Yehowa mu nna, Shi jinghku byin na matu manu dan dik htum hpe sak jaw wa ai hpe chye lu ai gaw grai n-gun lu hpa re. Yehowa hte Yesu hpe grau tsawra wa ai. ‘Dai tsawra myit gaw hpa galaw na matu ngai hpe shadut ya ai kun?’ ngu tinang hkum tinang san u. 

7. Sumla hta mu lu ai hte maren, Yehowa hte Yesu hpe tsawra ai lam anhte yawng gara hku madun lu ai kun? (2 Korinhtu 5:14, 15; 6:1, 2)

⁷ Karai Kasang hte Hkristu hpe tsawra ai myit gaw kaga ni hpe mung tsawra na matu shadut ya ai. (2 Korinhtu 5:14, 15; 6:1, 2 hpe hti u.) Tsawra myit madun lu ai lam langai gaw, hkaw tsun bungli hta myit rawt let shang lawm ai re. Hkrum ai masha shagu hpe hkaw tsun ai. Amyu baw sang, shingdu labau,  sut su ai lam ni hpe yu nna yu kaji ai lam n nga ai. Dai hku nna, “masha yawng mayawng hkye hkrang la ai hkrum lu nna, teng man ai lam a chye chyang ai kaw du lu mu ga” ngu ai Yehowa a yaw shada lam hte maren galaw nga ai.​—1 Tm 2:4.

8. Hpunau nauna ni hpe tsawra ai lam gara hku madun mai ai kun?

⁸ Hpunau nauna ni hpe tsawra ai lam madun ai hku nna mung, Yehowa hte Yesu hpe tsawra ai lam madun ai. (1 Yh 4:21) Hpunau nauna ni hpe anhte myit lawm ai. Shanhte yakhkak ai aten karum ya ai. Tsawra ai ni si mat ai shaloi, shalan shabran ya ai. Hkam n kaja ai aten sa kawan ai. Myit daw ai aten hta mung dang lu ai made n-gun jaw ai. (2 Ko 1:3-7; 1 Ht 5:11, 14) “Ding hpring ai wa a hpyi nem ai ga gaw, shabyin lu na atsam law law rawng nga lu ai” ngu ai hpe chye ai majaw, shanhte a matu akyu hpyi ya ai.​—Yak 5:17.

9. Hpunau nauna ni hpe tsawra myit madun mai ai kaga lam langai gaw hpa rai kun?

⁹ Hpunau nauna ni hte simsa hkra shakut ai hku nna shanhte hpe tsawra ai lam madun ai. Yehowa a mara raw ya ai kasi ningli hpe shakut nna kasi la ai. Anhte a yubak mara ni a matu, Yehowa gaw shi a Kasha hpe sharawng awng let si hkam shangun ai rai yang, anhte hpe shut ai hpunau nauna ni a mara hpe grau nna raw ya ging ai n re i? Yesu a ga shadawn kaw na nhkru ai mayam zawn anhte n byin mayu ai. Grai law ai shi a hka hpe, hkawhkam wa shaprai kau ya ai raitim pyi, mayam manang wa a hka kaji kajaw hpe gaw n shaprai kau ya ai. (Mat 18:23-35) Nawku hpung na langai ngai hte chye na shut ai rai yang, Myit Dum Poi garai n du shi yang, shi hte simsa hkra shakut lu na kun? (Mat 5:23, 24) Dai gaw, Yehowa hte Yesu hpe grai tsawra ai lam madun ai re.

10-11. Yehowa hte Yesu hpe tsawra ai lam myitsu salang ni gara hku madun mai ai kun? (1 Petru 5:1, 2)

¹⁰ Yehowa hte Yesu hpe tsawra ai lam myitsu salang ni gara hku madun mai ai kun? Ahkyak ai lam langai gaw, Yesu a sagu ni a ra kadawn ai lam ni hpe karum ya ai re. (1 Petru 5:1, 2 hpe hti u.) Dai lam hpe kasa Petru hpe Yesu asan sha tsun dan ai. Yesu hpe Petru masum lang nyet kau ai hpang, Yesu hpe tsawra ai lam grai madun mayu nga na re. Yesu hkrung rawt ai hpang, “Yawhan a kasha Simun e, nang ngai hpe tsaw ra nga n ni?” ngu Petru hpe Yesu san ai. Petru gaw Yesu hpe tsawra ai lam madun na matu hpa hpe raitim galaw mayu nga na re. “Nye a sagu ni hpe bau nga u” ngu Petru hpe Yesu tsun ai. (Yhn 21:15-17) Shi a ngam nga ai prat ting Yesu a sagu ni hpe lanu lahku nna, Yesu hpe tsawra ai lam madun wa ai.

¹¹ Myitsu salang ni e, Petru hpe tsun ai Yesu a ga ni gaw na a matu ahkyak ai hpe, Myit Dum Poi ladaw hta gara hku madun lu na kun? Sagu kawan ai lam ayan galaw ai, wenyi lam hta katsi nga ai ni Yehowa kaw bai wa lu hkra karum ya ai hku nna, Yehowa hte Yesu hpe kade daram tsawra ai lam madun mai ai. (Eze 34:11, 12) Myit Dum Poi sa lung ai chyum ga sharin ni, masha nnan ni hpe mung myit lawm ai lam madun mai ai. Dai sape tai wa na masa nga ai ni hkalum la hkrum ai ngu hkamsha hkra karum ya u. 

12. Yesu garai n si shi yang tsun wa ai ga ni hpe myit ai gaw, hpa majaw nden marai lu shangun ai kun? (Yawhan 16:32, 33)

¹² Yesu garai n si shi ai shana hta sape ni hpe, “nanhte gaw mungkan ga e nni nkri hkrum sha myit dai: rai ti mung, dakring dakan rai nga mu; ngai gaw mungkan ga hpe  dang kau da ni ai” ngu tsun ai. (Yawhan 16:32, 33 hpe hti u.) Si ai du hkra sadi dung na matu, nden marai rawng let hpyen ni hpe gasat na matu, Yesu hpe hpa gaw karum ya ai kun? Yesu gaw Yehowa hpe kamhpa ai. Shi a hpang hkan ai ni mung, dai zawn mayak mahkak ni hkrum na hpe chye ai majaw, makawp maga ya rit ngu Yehowa kaw akyu hpyi ai. (Yhn 17:11) Dai gaw anhte hpe hpa majaw nden marai rawng shangun ai kun? Hpa majaw nga yang, Yehowa gaw anhte a hpyen yawng hta atsam kaba ai majaw re. (1 Yh 4:4) Shi gaw yawng hpe mu ai. Dai majaw Yehowa hpe kamhpa yang, hkrit ai myit hpe nden marai hte tawt lai lu hkra karum ya na hpe kam mai ai.

13. Aramahti mare na Yosep gaw nden marai nga ai lam gara hku madun wa ai kun?

¹³ Aramahti mare na Yosep a lam hpe yu yu ga. Yuda masha ni a lapran hta grai gumhkawng ai wa re. Yuda tara rung daju a hpung shang re. Raitim, Yesu mungkan ga hta hkaw tsun magam galaw ai shaloi shi nden marai n nga wa ai. “Yuda masha ni hpe hkrit ai majaw, mayun de nna Yesu a sape tai nga ai” wa re ngu Yawhan tsun ai. (Yhn 19:38) Mungdan shiga hpe myit lawm tim, Yesu hpe kamsham ai lam kaga ni chye mat na hpe hkrit ai. Shi Yesu a sape tai mat ai hpe kaga ni chye mat yang shawoi na zawn n hkungga mat na hpe hkrit ai rai na re. Hpa mi raitim, Yesu si ai hpang hta, “Yosep gaw Pilat a man de gwi gwi shang nna Yesu a hkum tsawp moi mang hpe hpyi wu ai.” (Mrk 15:42, 43, JCLB) Yesu a sape re ai hpe madun gwi mat sai.

14. Masha hkrit ai myit hpe gasat ra yang hpa galaw ra na kun?

¹⁴ Nang mung Yosep zawn hkrit ai kun? Jawng (sh) bungli hta Yehowa Sakse re ai ngu tsun na matu hkrit ai kun? Kaga ni gara hku mu na hpe tsang ai majaw hkaw tsun masha galaw na matu, hkalup hkam na matu htingnut nga ai kun? Dai zawn hkamsha ai majaw, jaw ai hpe n galaw ai sha hkum nga. Nsim nsa akyu hpyi u. Karai a myit ra ai lam hte maren, galaw lu hkra n-gun jaw rit ngu akyu hpyi u. Akyu hpyi ga ni hpe Yehowa mahtai jaw ai hpe mu ai shaloi, grau ngang kang nna nden marai nga wa na re.​—Esa 41:10, 13.

15. Sape ni hpe Yesu hkum shadan dan ngut ai hpang, shanhte a kabu gara ai lam gaw hpa galaw na matu shadut ya ai kun? (Luka 24:52, 53)

¹⁵ Yesu si ai aten sape ni grai yawn ai. Shanhte a shara hta shang yu u. Tsawra ai manang hpe sum kau ai hta n-ga, myit mada lam mat  mat sai ngu hkamsha wa ai. (Luk 24:17-21) Raitim, shanhte hpe Yesu hkum shadan dan nna Chyum Laika myihtoi ga hpring tsup ai lam hta, tinang a daw hpe chye na hkra aten la nna karum ya ai. Grai ahkyak ai bungli hpe mung jaw ai. (Luk 24:26, 27, 45-48) Nhtoi 40 ya na ai hpang, Yesu sumsing lamu de lung mat ai shaloi, sape ni a yawn ai lam gaw kabu gara ai lam byin mat ai. Dai kabu gara ai lam gaw Yehowa hpe matut shakawn na matu shanhte hpe shadut ya ai.​—Luka 24:52, 53 hpe hti u; Kas 5:42.

16. Yesu a sape ni hpe gara hku kasi la mai ai kun?

¹⁶ Yesu a sape ni hpe anhte gara hku kasi la mai ai kun? Myit Dum Poi ladaw hta sha n-ga, laning mi tup Yehowa hpe nawku dawjau ai lam hta kabu gara lu ai. Dai hku byin na matu, anhte a prat hta Karai a Mungdan hpe shawng tawn ra na re. Ga shadawn, masha law law gaw hkaw tsun bungli hta lawm na matu, zuphpawng lung na matu, dinghku nawku ayan galaw na matu, shanhte a bungli chyarang ni hpe galai shai ai. Nkau gaw nawku hpung hta grau magam gun lu na matu, hkaw tsun masha grau ra ai shara hta magam gun lu na matu, ja sut gan law law tam na matu n shakut mat sai. Yehowa hpe matut nawku na matu hkam jan ai atsam ra ai raitim, prat hta Mungdan hpe shawng tawn yang shaman chyeju law law jaw na ngu Yehowa ga sadi jaw da ai.​—Gsh 10:22; Mat 6:32, 33.

17. Dai ning na Myit Dum Poi ladaw hta hpa galaw na matu nang dawdan da ai kun? (Sumla hpe yu u.)

¹⁷ April 4, Bat Lahkawng Ya shani hta Myit Dum Poi galaw na matu anhte myit mada nga ai. Raitim, Yesu a prat hte si ai lam, Yehowa hte Yesu madun wa ai tsawra myit a lam hpe myit sumru na matu, dai aten du hkra hkum la nga. Myit Dum Poi ladaw hta ahkaw ahkang lu malu la nna dai lam hpe myit yu nga u. Ga shadawn, Mungkan Nnan Ga Gale Chyum Laika, Bungjat Daw B12, “Yesu A Mungkan Prat Na Hpang Jahtum Bat” ngu ai hta madun da ai mabyin ni hpe hti sumru na matu aten masat da u. Yesu a prat hte seng nna hti ai shaloi, chyeju dum ai myit, tsawra myit, nden marai, kabu gara ai lam shalaw ya ai chyum daw ni hpe hti u. Ngut nna, chyeju dum ai lam madun lu ai ladat ni hpe myit yu u. Myit Dum Poi ladaw hta Yesu hpe myit dum na matu, nang galaw ai lam yawng hpe Yesu manu shadan ai hpe kam mai ai.​—Shr 2:19.