1-2. Myit Dum Poi hpe hpa majaw shaning shagu lung ai kun?

 LAI wa sai 2,000 ning daram hta, Yesu gaw shi a asak hpe anhte a matu jaw wa ai. Dai aten kaw nna htani htana asak lu na matu lam hpaw mat ai. Shi n si shi ai shana hta, tsawra myit hte nawng wa ai shagu hkungga hpe myit dum nga na matu, muk hte tsabyi jahku lawm ai asan sha re ai poi lamang hpe galaw na matu htet ai.​—1 Ko 11:23-26.

² Yesu hpe anhte grai tsawra ai majaw, shi hkang da ai ga hpe madat ai. (Yhn 14:15) Shaning shagu Myit Dum Poi aten ladaw laman, Yesu si ai lam hte seng nna myit sawn sumru na matu, akyu hpyi na matu aten la ai hku nna, chyeju dum ai lam madun ai. Ndai laksan poi hpe masha law lu ai daram law law, sa lung lu hkra saw shaga ai hkaw tsun bungli hta mung grau shang lawm ai. Myit Dum Poi n lung lu hkra byin shangun ai gara lam hpe mung ahkang n jaw na matu dawdan da ai.

3. Ndai sumhpa hta hpa lam hkaja na kun?

³ Ndai sumhpa hta Yesu a Myit Dum Poi hpe galaw na matu, Yehowa Sakse Ni kaja htum shakut ai lam 3 hpe hkaja na re. (1) Yesu htet da ai hte maren galaw ai, (2) Myit Dum Poi lung na matu kaga masha ni hpe saw shaga ai, (3) mayak mahkak ni a lapran lung ai.

4. Shaning shagu Myit Dum Poi hta gara ga san ni a mahtai lu ai kun? Dai tengman ai tara ni hpe hpa majaw manu shadan ging ai kun? (Luka 22:19, 20)

⁴ Shaning shagu Myit Dum Poi hta, ga san law law hpe asan sha htai ya ai. Chyum Laika hpe madung tawn ai mungga hpe na lu ai. Masha ni gawng malai jahpu hpe hpa majaw ra kadawn ai, masha langai a si ai lam gaw masha law law a yubak hpe gara hku shaprai kau ya ai hpe chye lu ai. Muk hte sabyi jahku gaw hpa hpe malai tsun ai, kadai ni gaw dai hpe sha ging ai lam ni hpe mung, bai dum shangun ai. (Luka 22:19, 20 hpe hti u.) Mungkan ga myit mada lam nga ai ni lu la na shaman chyeju ni a lam myit sumru ai. (Esa 35:5, 6; 65:17, 21-23) Ndai tengman lam ni hpe anhte grau manu shadan ai. Wan hku law ai masha ni gaw ndai lam hpe n chye na ma ai. Yesu a gawng malai jahpu hpe manu n shadan ma ai. Yesu hkang da ai hte maren Myit Dum Poi hpe n galaw ma ai. Hpa majaw kun?

5. Kasa ni si mat ai hpang Yesu a Myit Dum Poi hpe masha ni gara hku galaw ma ai kun?

⁵ Yesu a kasa ni si mat ai hpang, nawku hpung kata hpyi hpun ai Hkristan ni shang wa ai. (Mat 13:24-27, 37-39) Shanhte gaw “sape ni hpe lau la lu hkra, shut ai hku tsun” ai. (Kas 20:29, 30) “Shut ai” lam langai gaw, Chyum Laika hta tsun da ai zawn, Yesu gaw masha “law law ni a yubak gunhpai kau na, lang mi sha nawng ya” wa ai n re. Chyahkring hkring nawng ra na ngu ai lam re. (Heb 9:27, 28) Dai zawn shut ai sharin achyin lam hpe masha law law kam ma ai. “Poi Daw” b galaw na matu nawku jawng hta ayan, kalang lang shani shagu ngu na daram hpawng ma ai. Nawku htung uhpung nkau chyawm gaw, dai daram chyahkring hkring n galaw ai raitim, gawng malai jahpu a lachyum hpe asan sha n chye na ma ai. ‘Yesu a si ai lam gaw nye a yubak ni hpe gaja wa shaprai kau ya ai kun?’ ngu nna nkau mi myit ma ai. Hpa majaw kun? Yesu a si hkam ai lam gaw yubak ni hpe n raw ya lu ai ngu, tsun ai masha ni a shingkang ka-up hkrum ai majaw re. Yesu a sape ajet ni gaw ndai lam hpe gara hku sawn la ai kun?

6. 1872 hta chyum jawng ma hpung hpa hpe chye na wa ai kun?

⁶ Tsa ban 19 hpang daw hta, C.T. Rase woi awn ai chyum jawng ma hpung gaw Chyum Laika hpe ahkri ahkrai hkaja hpang wa ai. Yesu a gawng malai jahpu a manu, ndai poi hpe gara hku galaw ai kun? ngu ai hpe chye mayu ai. Masha yawng a matu Yesu gawng malai jahpu jaw wa ai ngu ai hpe 1872 hta shanhte chye na wa ai. Chye wa ai ni hpe n makoi da ai. De a malai, laika buk, shi laika hte magazin ni kaw nna kaga masha ni chye hkra shabra ai. Dai hpang, tsa ban langai na Hkristan ni zawn sha Myit Dum Poi hpe laning mi kalang galaw ma ai.

7. Chyum jawng ma ni sawk sagawn wa ai lam kaw nna, anhte gara hku akyu hkamsha nga ai kun?

⁷ Dai myit dingman ai masha ni a sawk sagawn ai lam kaw nna, dai ni anhte akyu lu nga ai. Gara hku nna kun? Yesu a gawng malai jahpu gaw hpa hpe tsun ai kun? Masha ni a matu hpa galaw ya na kun? ngu ai hpe Yehowa karum ya ai majaw chye wa ai. (1 Yh 2:1, 2) Karai ra sharawng ai masha ni a matu myit mada lam lahkawng nga ai ngu, Chyum Laika kaw na chye wa ai. Nkau gaw sumsing lamu hta n si lu ai asak lu la nna, ngam ai wan hku law ai masha ni gaw mungkan ntsa htani htana asak hkrung lu na re. Anhte hpe Yehowa kade tsawra ai, Yesu a gawng malai jahpu  jaw nna, langai hpra kade daram akyu lu nga ai hpe myit yu shagu, Yehowa hte grau hku hkau wa ai. (1 Pe 3:18; 1 Yh 4:9) Dai majaw, moi aten na sadi dung ai hpunau ni zawn, Yesu htet da ai hte maren Myit Dum Poi galaw ai hta anhte hte rau shang lawm na matu kaga masha ni hpe saw shaga ai.

8. Myit Dum Poi lung na matu kaga masha ni hpe saw shaga ai hta, Yehowa a amyu masha ni hpa ni galaw wa sai kun? (Sumla hpe yu u.)

⁸ Shaning law law Yehowa a amyu masha ni gaw, masha law law hpe Myit Dum Poi sa lung na matu saw shaga wa ai. 1881 shawng daw hta, Amerikan mungdan, Pensibeniya mungdaw, Alegeni mare na nta langai kaw ndai poi hpe galaw na matu, Amerikan mungdan kaw na hpunau nauna ni saw shaga hkrum ai. Hpang de, tinang a nawku hpung hte sha galaw ai. 1940, March shata hta myit lawm ai masha ni hpe saw shaga mai ai ngu, hkaw tsun masha ni chye wa ai. 1960 hta shawng nnan lang hku nna dip shabra wa ai saw shaga laika ni hpe, Behtela gaw nawku hpung ni hpang de shagun ya ai. Dai aten kaw nna, Myit Dum Poi saw shaga laika wan law law hpe shabra wa ai. Kaga masha ni hpe saw shaga na matu, hpa majaw dai daram aten hte n-gun atsam shadat ra ai kun?

9-10. Myit Dum Poi sa lung na matu shakut shaja let saw shaga ai gaw kadai ni hpe akyu lu shangun ai kun? (Yhn 3:16)

⁹ Myi Dum Poi lung na matu kaga ni hpe saw shaga ra ai lam langai gaw, anhte yawng a matu Yehowa hte Yesu galaw ya wa ai tengman ai lam hpe chye shangun mayu ai majaw re. (Yawhan 3:16 hpe hti u.) Myit Dum Poi  hta mu lu, na lu ai lam ni a majaw grau sharin la mayu wa na matu, Yehowa a mayam byin wa na matu, shanhte shadut hkrum na ngu anhte myit mada ai. Raitim, kaga masha ni mung akyu lu ma ai.

¹⁰ Yehowa hpe n nawku mat ai ni hpe mung anhte saw shaga ai. Dai hku nna shanhte hpe Karai Kasang matut tsawra nga ai lam shadum ya ai. Saw shaga ai lam hpe law malawng hkap la nna sa lung ai majaw kabu ai. Myit Dum Poi lung ai shaloi, Yehowa hpe grai pyaw let nawku wa ai aten hpe bai dum ai. Monika a lam yu yu ga. c Kobit-19 kap bra ana laman, myit rawt ai hkaw tsun masha byin wa ai. 2021 ning a Myit Dum Poi lung ngut ai hpang, ndai hku tsun ai: “Ndai Myit Dum Poi gaw nye a matu grai lak lai ai. 20 ning laman, kaga masha ni Myit Dum Poi sa lung na matu saw shaga wa ai. Nye a matu Yehowa hte Yesu galaw ya wa ai ni hpe grai chyeju dum ai majaw, kaga ni Myit Dum Poi lu lung hkra saw shaga ai.” (Shk 103:1-4) Masha ni gara hku mi bai htang tim, Myit Dum Poi sa lung na matu shakut shaja let saw shaga ai lam hpe Yehowa manu shadan ai majaw, dang lu ai made saw shaga ai.

11. Kaga ni Myit Dum Poi sa lung hkra shakut shaja let saw shaga ai hpe Yehowa gara hku shaman chyeju jaw ai kun? (Hagi 2:7)

¹¹ Kaga masha ni Myit Dum Poi sa lung hkra shakut shaja let saw shaga ai hpe Yehowa shaman chyeju law law jaw ai. 2021 ning hta, Kobit-19 kap bra ana a majaw hkum pat da ai lam ni nga tim, marai 21,367,603 sa lung ai. Mungkan ting na Yehowa Sakse hti hkum a htam lahkawng jan daram re. Masha kade sa lung ai hpe sha Yehowa myit lawm ai n re. Marai langai hpra hpe myit lawm ai. (Luk 15:7; 1 Tm 2:3, 4) Ndai saw shaga ai bungli gaw myit ding man ai ni hpe tam mu hkra, Yehowa akyu jashawn ai lam re ai hpe anhte kam ai.​—Hagi 2:7 hpe hti u.

12. Gara masa ni gaw Myit Dum Poi lung na matu yak shangun ai kun? (Sumla hpe yu u.)

¹² Jahtum nhtoi ni hta, dinghku hta ninghkap ai lam, zingri zingrat ai lam, majan, lusha hku hku ai lam hte hpawn, grai sawng ai masa ni hkrum na ngu Yesu tau hkrau tsun ai. (Mat 10:36; Mrk 13:9; Luk 21:10, 11) Kalang lang, dai zawn masa ni gaw Myit Dum Poi galaw na matu yak shangun ai. Dai zawn mayak mahkak ni hpe hpunau nauna ni gara hku tawt lai wa ai kun? Shanhte hpe Yehowa gara hku karum ya wa ai kun?

13. Htawng hta Myit Dum Poi galaw na matu, Achyum a nden marai hte dawdan lam hpe Yehowa gara hku shaman chyeju jaw ai kun?

¹³ Htawng jahkrat hkrum ai. Makam masham a majaw htawng hkrat nga ai hpunau ni gaw, Myit Dum Poi galaw na matu dang lu ai daram shakut ai. Hpunau Achyum a lam hpe yu yu ga. 2020, Myit Dum Poi aten ladaw hta, maga mi pe 13 grup daram re ai gawk kaji hta sharawng hkrum ai. Kaga htawng masha marai 5 mung lawm ai. Htawng hkrat nga tim, Myit Dum Poi masat dingsat ni lajang da ai, mungga htawn lu hkra mung lajang da ai. Raitim, htawng manang ni gaw hkayawm lu ai, matsa mawa ga ni grai tsun ai. Achyum hpa galaw ai kun? Hkying hkum mi daram n matsa na matu, hkayawm n lu ya na matu hpyi shawn da ai. Shanhte myit hkrum ya ai majaw shi grai mau mat ai. Shi gaw “Myit Dum Poi a lam tsun dan mayu ai” ngu tsun ai. Raitim, shanhte myit n hkrum ai. Shanhte gaw Myit Dum Poi galaw nga ai  hpe mu lu, na lu ai hpang, dai lam hte seng nna shi hpe san ai.

14. Kobit-19 kap bra ana nga tim Myit Dum Poi hpe gara hku galaw wa ai kun?

¹⁴ Kobit-19 kap bra ana. Kap bra ana a majaw Yehowa a masha ni gaw Myit Dum Poi hpe masha nan n sa lung lu ai. Raitim, n galaw ai sha n nga ai. d Intanet nga ai nawku hpung ni gaw video matut mahkai nna galaw ai. Raitim, Intanet n nga ai ni gaw gara hku kun? Mungdan nkau hta Myit Dum Poi mungga hpe TV, Radio kaw na shapoi ya na matu lajang ai. Sum tsan hta nga ai ni a matu Myit Dum Poi mungga hpe, amyu ga 500 jan hte nsen rim na matu, ginjaw garan rung ni lajang ya ai. Dai ni hpe ra kadawn ai ni hpang de shagun ya ai.

15. Chyum ga sharin, Su a kasi kaw na hpa sharin la lu ai kun?

¹⁵ Dinghku hta ninghkap ai lam. Nkau mi a matu, Myit Dum Poi galaw na matu yak dik htum masa gaw, dinghku a ninghkap ai lam re. Chyum ga sharin Su a lam hpe yu yu ga. 2021, Myit Dum Poi a shawng shani hta, nta  masha ni ninghkap ai majaw, Myit Dum Poi n lu lung sai ngu, chyum ga sharin ya ai wa hpe tsun dan ai. Chyum ga sharin ya ai wa gaw, Luka 22:44 hpe hti dan ai. Dai hpang, yakhkak ai masa ni hkrum ai aten Yehowa hpe akyu hpyi ai, kamhpa ai lam madun ai hku nna, Yesu a kasi ningli hpe hkan sa ging ai ngu tsun dan ai. Hpang shani hta, Su gaw Myit Dum Poi masat dingsat ni hpe shajin ai. jw.org hta na laksan jahpawt manap nawku dawjau lamang hpe yu ai. Dai shana maga, shi a yup gawk kaw na Myit Dum Poi lung na matu phone hte matut mahkai wa ai. Shi hpe chyum ga sharin ya ai wa hpe ndai hku ka ai: “Mani, ngai hpe grai n-gun jaw ai majaw, Myit Dum Poi hpe lu lung hkra dang lu ai made shakut wa ai. Yehowa mung karum ya ai. Ngai kade kabu ai, kade daram chyeju dum ai hpe n chye tsun dan hkra re!” Dai zawn masa hte nang hkrum yang, Yehowa karum ya na ngu shadu ai kun?

16. Myit Dum Poi lung na matu shakut ai hpe Yehowa shaman chyeju jaw na ngu hpa majaw kam mai ai kun? (Roma 8:31, 32)

¹⁶ Myit Dum Poi galaw na matu anhte shakut ai hpe, Yehowa grai manu shadan ai. Anhte a matu shi galaw ya wa ai ni hpe chyeju dum ai lam madun ai shaloi, Yehowa shaman chyeju jaw na hpe kam mai ai. (Roma 8:31, 32 hpe hti u.) Dai ning na Myit Dum Poi hpe lung na matu dawdan da ga. Myit Dum Poi garai n du shi yang hte ngut ai bat ni hta, Yehowa a matu anhte grau galaw ya mayu ga ai.