Ngai gaw 1954 U.S.A., St. Paul, Minisota hta shangai wa ai. Kahtawlik hpung masha ni rai nna, yu maya masha ni re. An nau ni marai 5 nga ai kaw na ngai gaw ma naw mahtang re. Ngai gaw Kahtawlik jawng kaw hpaji sharin la nna, wa jau hpe karum ya ai. Chyum Laika machye machyang nau n nga ai. Yawng mayawng hpe hpan da ai Karai Kasang nga ai hpe gaw ngai kam tim, nawku jawng hpe gaw ngai n kam ai.

Wiliyam Mitchye Upadi kawlik jawng lung ai. Jawng nnan lung ai shaning hta, Yehowa Sakse ni gaw nye nta de sa chyai ai. Ngai rai hkrut nga ai majaw, shan la gaw hpang de bai sa na ngu tsun ai. Shan bai sa chyai ai shaloi, ndai ga san lahkawng hpe ngai san ai: “N kaja ai masha ni gaw kaja ai masha ni hta na hpa majaw grau awng dang nga ai kun? Teng sha ngwi pyaw hkra gara hku galaw lu na kun?” Htani Htana Asak De Lam Woi Ya Ai Tengman Lam laika buk hte makawp atsit hte re ai Mungkan Nnan Ga Gale Chyum Laika hpe ngai lu la ai. Chyum Laika hkaja na matu mung, ngai myit hkrum ai. De a majaw ngai myi hpaw wa ai. Karai a Mungdan asuya  gaw, ginding aga hpe uphkang na lam sharin la lu ai majaw ngai grai kabu ai. Shinggyim uphkang lam gaw tsep kawp hkrat sum nga nna, hkra machyi ai lam, yakhkak ai lam, n tara ai lam hte yawn hpa lam ni sha jaw lu ai hpe ngai chye wa ai.

Ngai gaw 1982 hta, Yehowa hpang apnawng nna, St. Paul Sibit Htingnu hta galaw ai “Mungdan Tengman Lam” ngu ai Ginwang Zuphpawng hta hkalup hkam la ai. Bat mi na ai hpang, dai htingnu kaw sha, tara kasa san poi sa htai ai. October shata hta san poi awng ai.

“Mungdan Tengman Lam” Ginwang Zuphpawng hta, Bruklin Behtela nta masha re ai Maik Richyason hte ngai hkrum ai. Shi gaw ginjaw rung hta tara upadi hte seng ai rung hpaw da sai lam tsun dan ai. Kasa 8:36 hta lawm ai Ehtiopi unuk a ga ni hpe ngai dum ai. ‘Tara upadi hte seng ai rung hta galaw na matu ngai hpe hpa hkum shara nga a ta?’ ngu nna tinang hkum tinang san ai. Dai majaw, Behtela shawk shawn laika mara dat ai.

Ngai Yehowa Sakse byin ai hpe nu yan wa n ra ai. Behtela kaw magam gun yang hpa lu la na kun? ngu awa san ai. Shawang lit gun ai sha re ngu ngai tsun dan ai. Behtela nta masha hku nna shata mi dawla gumhpraw 75 hpe lu na re ngu tsun dan ai.

Tara rung kaw bungli galaw na matu, myit hkrum da chyalu re ai majaw, Behtela de kalang ta n lu sa ai. Dai majaw, 1984 hta she, Nyu Yawk, Bruklin Behtela hta magam gun hpang ai. Tara Upadi Hte Seng Ai Rung hta lit ang ai. Tara rung hta lu la wa ai mahkrum madup ni gaw, hpang hta galaw na magam lit ni a matu hkyen lajang ya wa ai.

1983, November hta, Nyu Jasi, Jasi Siti hta nga ai Stanle Gawknu hpe mari la ai. Dai gawknu a myihprap wan hte hka paik bai gram lajang na matu hpyi shawn laika mara ai. Buga na ahkang aya nga ai ni hte hkrum ai shaloi, ndai Stanle gawknu hpe Yehowa Sakse ni a ginwang zuphpawng gawknu hku nna galaw mayu ai lam tsun dan ai. Raitim, manghkang byin wa ai. Ginwang upadi hku nga yang, ndai daw gaw dum nta hte seng ai lawk re ai majaw, nawku ai shara n mai galaw ai ngu nna hkum pat ai. Ngut nna, Stanle Gawknu gaw hpaga galaw ai shara hta nga ai majaw, mare salang ni gaw ahkang n jaw ai. Hpunau ni gaw ahkang lu na matu hpyi shawn tim, nyet kau hkrum ai.

Behtela bungli hpe nnan galaw hpang ai bat hta, uhpung gaw nyet kau hkrum ai lam hte seng nna, ginwang tara rung kaw bai tang shawn ai. Ngai gaw Minisota, St. Paul hta nga ai ginwang tara rung hta, 2 ning daram galaw wa ai majaw,  dai zawn manghkang ni hte hkrum ga ai. Stanle Gawknu hta, sumla hkrung ni madun ai, yungwi hte seng ai zawn re ai poi law law hpe mung galaw ga ai ngu anhte a tara kasa langai tsun dan ai. Rai yang, nawku htung hte seng ai lam galaw na matu hpa majaw tara n shang ai kun? Ginwang tara rung gaw, dai lam hpe bai myit ya nna, wanglu wanglang nawku na ahkang hpe Jasi Siti gaw hkum pat da ai ngu dawdan dat ai. Hpyi shawn da ai hpe mung ahkang jaw na matu tara rung gaw matsun dat ai. Yehowa gaw shi a bungli rawt jat na matu, uhpung hpe shaman chyeju jaw nga ai lam ngai mu wa ai. Dai hpung hta ngai lawm lu ai majaw grai kabu ai.

Hpunau ni gaw bai gram lajang ai bungli kaba hpe galaw hpang ai. Laning mi daram na ai hpang, 1985, September 8 hta Jasi Siti Zuphpawng Gawknu kaw 79 lang na Gilead jawng yu poi galaw ai. Mungdan lam rawt jat na matu tara upadi dap hta galaw lu ai majaw, ahkaw ahkang langai hku nna ngai hkamsha ai. Yehowa a bungli hta ngai karum ya lu ai majaw, ngai grai pyaw wa ai. Dai gaw Behtela garai n du shi yang ngai galaw wa ai tara kasa bungli hta na ngwi pyaw lam grau lu shangun ai. Tara upadi hte seng ai manghkang ni hpe hparan na matu, Yehowa ngai hpe akyu jashawn na ngu ngai n shadu wa ai.

1980 jan shaning ni hta, sarawun ni hte tsi rung ni gaw, asak hpring sai Sakse Hkam langai sai n bang ai sha tsi tsi na matu hpyi shawn ai hpe n hkap la ai. Ma hkum re ai num ni gaw grau nna manghkang hkrum ai. Tara agyi ni gaw, laksan hku nna ma hkum re ai num ni gaw, sai n bang na matu nyet kau na ahkang n nga ai ngu dawdan ai. Lama na, kanu gaw sai n bang na nga yang asak sum chye nna, ma mung kanu n nga ai sha kaba wa ra na re ngu, tara agyi ni tsun ai.

1988, December 29 hta, nauna Dini Nikalo gaw, ma shangai ngut ai hpang sai law law htaw mat ai. Shi a sai hkyeng di gaw, 5.0 lawu de hkrat mat ai majaw, sarawun gaw sai bang na matu tsun ai. Dai hpe nauna nyet kau ai. Hpang jahpawt hta, tsi rung kaw na ni gaw, shi hpe sai bang ya na matu, tara agyi kaw ahkang hpyi ma ai. Tara agyi gaw, nauna Nikalo yan la hpe shanhte a mu mada lam hpe tsun dan na ahkang pyi n jaw ai. Shanhte hpe n shana ai sha, sai bang na ahkang jaw dat ai.

Manga ya shani December 30 hta, nauna Nikalo a madu wa hte nta masha ni gaw, sai n bang na matu tsun tim pyi, tsi rung kaw na ni gaw nauna hpe sai bang dat ya ai. Dai shana maga hta, nta masha ni hte myitsu salang nkau rim hkrum ai. Shanhte gaw nauna Nikalo a makau hta nga nna, sai n bang na matu hkum pat ai majaw re. Kru ya jahpawt, December 31 hta, Nyu Yawk Siti hte Lawng zunlawng na shiga ni hta rim hkrum ai lam lawm wa ai.

 Langai ya jahpawt hta, lahta tara rung a tara agyi Mitan Molen hte sa jahkrum ai. Sai bang na matu ahkang jaw dat ai tara agyi ni gaw, tsun dan ai hpe n madat ya ai sha, sai bang na matu ahkang jaw dat ai lam tara agyi Mitan Molen hpe ngai tsun dan ai. Tara agyi Molen gaw, byin ai manghkang hte seng ai lam, tara upadi hte seng ai lam ni hpe bawngban na matu, shi na rung gawk de shana maga sa wa na matu tsun ai. Anhte a hpa-awn hpunau Hpilip Bramle gaw ngai hte arau hkan nang ai. Tara agyi gaw, anhte hte arau bawngban na matu, tsi rung dat kasa hpe mung saw shaga ai. Anhte aging agang bawngban hkat ai. Hpunau Bramle gaw, ngai hpe “nsen shayawm nna tsun na matu” laika ka nna tsun ai. Dai hpaji jaw ga gaw grai kaja ai. Hpa majaw nga yang, tsi rung dat kasa tsun ai gaw shut nga ai hpe sakse madun na matu, ngai gaw grai myit rawt let tsun nga ai majaw re.

Hkying hkum mi daram na ai hpang, ndai lam hpe hpang jahpawt tara rung hta shawng nnan bawngban ra na re ngu Tara Agyi Molen tsun ai. Anhte rung gawk kaw na pru wa ai shaloi, Tara Agyi Molen gaw, ndai tsi rung dat kasa gaw “hpawt ni grai yak na re” ngu tsun ai. Tsi rung dat kasa gaw, shi a masa hpe makawp maga na matu, grai yak na ngu ai lachyum re. Anhte awng dang lu na ngu Yehowa tsun ai zawn ngai hkamsha ai. Yehowa gaw shi a yaw shada lam awng dang lu hkra, anhte hpe akyu jashawn nga ai lam mu lu ai majaw grai mau ai.

Hpang jahpawt hta tsun ra na lam ni hpe shana grai jan du hkra anhte lajang ai. Tara rung gaw, Bruklin Behtela hte grai ni ai majaw, anhte a rung gawk kaw nna masha law malawng gaw lam hkawm sa lu ai. Anhte tsun ai lam hpe tara agyi 4 madat ya ngut ai hpang, shanhte gaw sai bang na matu ahkang n jaw ging ai ngu dawdan ma ai. Machyi masha tsun dan ai hpe n madat ai sha, sai bang na matu ahkang jaw dat ai gaw, shinggyim ahkaw ahkang hte nhtan shai ai ngu lahta tara rung gaw dawdan ai. Dai majaw, nauna Nikalo a amu dang mat ai.

Nyu Yawk mare a tsaw htum ai tara rung gaw nauna Nikalo hta sai n bang ai sha tsi tsi na ahkang nga ai hpe shagrin dat ya ai. Ndai kalang gaw, tara rung ni a sai hte seng nna dawdan lam 4 a shawng nnan lang re. Dai hta ngai lawm lu ai gaw ahkaw ahkang re. (“ Tara Rung Daju Hta Lu Ai Awng Dang Lam Ni” ngu ai lawk hpe yu u.) Ma bau la na ahkang, hka bra ai lam, hting ra ni, htingnu ni hte seng ai lam hte hpawn, kaga lam ni  hpe hparan na matu Behtela kaw nga ai kaga dat kasa ni hte arau ngai galaw wa ai.

Nye madu jan Dawn hte shawng nnan hkrum ai shaloi, shi gaw madu wa hte hka da nna ma 3 nga ai. Kan bau bungli galaw let ningshawng galaw nga ai. Grai yak tim pyi, Yehowa a magam gun na matu dawdan da ai hpe ngai mu ai shaloi, grai yu kaba mat ai. 1992, Nyu Yawk Siti hta galaw ai “Nhtoi Jahtoi Ya Ai Ni” ngu ai ninghtawn zuphpawng hpe anhte sa lung ai. Dai shaloi, ngai shi hpe sumtsaw ga tsun ai. Laning mi na ai hpang an hkungran ai. Wenyi myit jasat hte tsawra myit nga ai madu jan hpe lu la ai gaw, Yehowa kaw na kumhpa re. Dawn hte arau asak hkrung lu ai nhtoi ni gaw, nye a matu kaja ai kumhpa re.​—Gsh 31:12.

An hkungran ai shaloi, ma ni gaw asak 11, 13 hte 16 re. Ngai gaw kaja ai kawa byin mayu ai majaw, hpang kawa byin ai hte seng nna, anhte a laili laika ni hta lawm ai lam yawng hpe hkan sa lu na matu atsawm hti ai. Dai shaning ni laman, yakhkak ai lam ni nga tim, ma ni gaw ngai hpe kamhpa mai ai manang hte tsawra myit nga ai kawa langai hku nna hkap la wa ai majaw, grai kabu ai. Nta de ma ni a manang ni sa chyai ai hpe ayan hkap tau la nna, shanhte hte arau nga lu ai hpe anhte ra sharawng ai.

2013 hta Dawn hte ngai gaw asak kaba sai kanu kawa ni hpe yu lanu lahku na matu, Wikonsin de htawt ai. Raitim, Behtela magam hpe matut galaw lu ai. Aten kadun shawang lit gun ai hku nna, uhpung a tara upadi hte seng ai lam ni hpe matut karum ya na matu ngai hpe saw shaga ai.

2018 September hta, ngai na yu hkraw kaw lama mi byin nga ai hpe sadi hkrup ai. Buga na sarawun kaw sa madun ai. Raitim, hpa byin ai hpe shi n chye ai. Kaga sarawun langai gaw, bawnu hte seng ai sarawun kaw sa madun na matu tsun ai. 2019 January hta, hkum ting hpe hkra machyi shangun nna, nau n byin ga ai yawga ngai hta byin nga ai ngu sarawun langai tsun ai.

Masum ya na ai hpang, skik jawn nga ai shaloi nye a hkra lata daw mat ai. Ngai prat tup skik jawn wa ai majaw, ngai dai hta grai ningtawn ai. Raitim, nye a shamu shamawt ai lam hpe hkang lu ai atsam yawm wa ai hpe ngai chye dat ai. Dai yawga gaw grai sawng lawan ai majaw mau mat ai. Ga shaga na matu, shamu shamawt na matu hte lusha mayu bang na matu grau grau yak wa ai.

Tara kasa langai hku nna Yehowa a uhpung hta, ngai karum ya lu wa ai majaw grai kabu ai. Sarawun ni, tara kasa ni, tara agyi ni hti na matu shapraw ai magazin ni hta sumhpa law law hpe lu ka ai majaw grai kabu ai. Yehowa a masha ni gaw, sai n bang ai sha tsi tsi lu ai ahkang hte ga tsi lajang lu ai ahkang hpe makawp maga lu ai lam hte seng nna, mungkan ting hta tsun dan lu wa ai. ‘Anhte gaw akyu n rawng ai mayam ni rai nga ga ai; galaw ra ai hpunda hte sha anhte shatup saga ai’ ngu Luka 17:10 hta Luka tsun da ai zawn ngai tsun mayu ai.