1. Adam yan Ewa mara galaw ngut ai hpang, kade n na yang Yehowa hpa galaw wa ai kun? (Nin 3:15)

 ADAM yan Ewa mara galaw nna, kade n na yang, Yehowa gaw ahkyak ai myithoi ga hku nna, shinggyim masha ni hpe myit mada lam jaw wa ai. Dai myihtoi ga hpe Ningpawt 3:15 hta mu lu ai.​—Hti u.

2. Dai myihtoi ga gaw, hpa majaw laklai ai kun?

² Dai myihtoi ga gaw, Chyum Laika buk a shawng na laika re ai Ningpawt Ninghpang hta lawm tim, Chyum Laika buk ting hte mung, matut mahkai nga ai. Ga shadawn, sumri gaw hpun ni hpe shabawn ya ai zawn, Ningpawt 3:15 hta lawm ai ga ni gaw, Chyum Laika buk ting hta lawm ai lam ni hpe shiga langai hku nna shabawn da ya ai. Dai shiga gaw, Nat Satan hte shi hpang hkan ai ni yawng hpe jahten kau na matu, Karai Kasang gaw, hkye la ai wa hpe shangun dat na ngu ai lam re. * Yehowa hpe tsawra ai ni a matu shaman chyeju re.

3. Ndai sumhpa hta hpa lam bawngban na kun?

³ Ningpawt 3:15 hta lawm ai myihtoi ga hte seng nna, ndai sumhpa hta, ndai ga san ni hpe bawngban na re: Kadai ni a lam hpe myihtoi htoi da ai kun? Myihtoi ga gara hku hpring tsup wa ai kun? Dai myihtoi ga kaw na anhte gara hku akyu lu nga ai kun?

4. “Lapu” gaw kadai rai kun? Gara hku chye lu ai kun?

⁴ Ningpawt  3:14, 15 hta “lapu” hte lapu a “amyu matu,” “numsha” hte numsha a “amyu matu” a lam tsun da ai. Shanhte kadai re ai hpe chye na matu, Chyum Laika gaw karum ya ai. * “Lapu” a lam kaw na hpang ga. Lapu langai gaw, Edin sun hta Yehowa tsun ai hpe n chye na lu ai. Dai majaw, Yehowa tara jeyang dat ai gaw, nyan rawng ai wa hpe rai na re. Kadai rai kun? Shingran 12:9 hta, “moi na lapu” gaw, Nat Satan re ai ngu tsun da ai. Rai yang, lapu a amyu matu gaw, kadai rai kun?

5. Lapu a amyu matu hta kadai ni lawm ai kun?

⁵ Chyum Laika hta “amyu matu” ngu na tsun ai shaloi, marai langai ngai hpe kasi la nna hkan galaw ai ni hpe tsun chye ai. Dai majaw, lapu a amyu matu ngu ai gaw, Satan zawn sha, Yehowa hpe gumlau ai, Karai a amyu masha ni hpe ninghkap ai sadi n dung ai lamu kasa ni, masha ni hpe tsun ai re. Noa prat hta, sumsing ahkang aya hpe kau da ai lamu kasa ni, kawa Nat Satan zawn galaw ai nhkru ai ni lawm ai.​—Nin 6:1, 2; Yhn 8:44; 1 Yh 5:19; Yud 6.

6. “Numsha” gaw hpa majaw Ewa n mai byin ai kun?

⁶ “Numsha” gaw kadai rai na hpe mahtai tam yu ga. Ewa gaw n mai byin ai. Hpa majaw kun? Lam langai hpe sha myit yu ga. Lapu a baw hpe numsha a amyu matu “abrep” na ngu tau hkrau tsun da ai. Bawngban wa sai hte maren, lapu gaw nhkru ai lamu kasa Nat Satan re. Ewa kaw na yu hkrat wa ai n hkum tsup ai shinggyim masha kadai mung, Satan hpe jahten kau lu na atsam n nga ai. Rai yang, Satan gara hku jahten hkrum na kun?

7. Shingran 12:1, 2, 5, 10 hku nga yang, Ningpawt 3:15 hta lawm ai numsha gaw kadai rai kun?

 ⁷ Ningpawt 3:15 hta lawm ai numsha gaw kadai re ai hpe hpang jahtum laika re ai Shingran Laika hta tsun da ai. (Shingran 12:1, 2, 5, 10 hpe hti u.) Shinggyim numsha n re. Shata hpe lagaw hte kabye da ai. Baw ntsa kaw shagan 12 lawm ai lagup gup da ai. Yu maya n re ai ma hpe shangai ai. Dai gaw, Karai Mungdan re. Mungdan gaw, sumsing lamu hta re ai majaw, numsha mung sumsing lamu kaw na rai ra ai. Dai majaw, numsha ngu ai gaw, sadi dung ai lamu kasa ni hte hpawng de da ai Yehowa uhpung a sumsing lamu daw hpe tsun mayu ai re.​—Gal 4:26.

8. Numsha amyu matu a madung daw gaw, kadai rai kun? Gara aten hta byin wa ai kun? (Ningpawt 22:15-18)

⁸ Numsha amyu matu a madung daw gaw, kadai re ai hpe chye na matu mung, Chyum Laika gaw karum ya ai. Amyu matu gaw, Abraham a aru arat kaw na rai ra ai. (Ningpawt 22:15-18 hpe hti u.) Myihtoi htoi da ai hte maren, Yesu gaw, sadi dung ai Abraham a amyu matu kaw na yu hkrat wa ai. (Luk 3:23, 34) Raitim, Nat Satan hpe jahten ra ai majaw, amyu matu gaw, yu maya masha hta grau atsam kaba ra ai. Dai majaw, Yesu asak 30 daram hta, chyoi pra ai wenyi hte namman jaw hkrum ai. Dai aten hta, numsha amyu matu a madung daw byin wa ai. (Gal 3:16) Yesu si nna, bai hkrung rawt ai hpang, Karai Kasang gaw, “hpung shingkang hte arawng sadang ka-up ya nu ai.” “Nat a amu bungli hpe sharun jahten” na ahkang aya hte hpawn, “sumsing lamu hta e mung, ginding aga hta e mung, uphkang na ahkang nlang hte” hpe jaw ai.​—Heb 2:7; Mat 28:18; 1 Yh 3:8.

9-10. (a) Numsha a amyu matu hta kadai ni naw lawm ai kun? Gara aten hta amyu matu byin wa ai kun? (b) Kaga hpa naw bawngban na kun?

⁹ Amyu matu a nambat 2 daw naw nga ai. “Nanhte Hkristu hte seng nga myit yang gaw, nanhte Abraham a aru arat rai nga myit dai hte, dai ga ndat nga ai hte maren, sali wunli hkam la ai ni rai nga myit dai” ngu, namman chya hkam ai Yuda amyu hte maigan amyu re ai Hkristan ni hpe kasa Pawlu tsun ai aten hta, dai amyu matu gaw kadai re ai hpe tsun dan wa ai. (Gal 3:28, 29) Hkristan langai chyoi pra ai wenyi hte namman jaw hkrum ai aten hta, numsha a amyu matu byin wa ai. Dai amyu matu hta, Yesu Hkristu, shi hte rau uphkang na 144,000 lawm ai. (Shr 14:1) Shanhte yawng gaw, Kawa Yehowa zawn myit na, galaw na matu shakut ai.

¹⁰ Ningpawt 3:15 hta lawm ai ni gaw, kadai ni re ai hpe chye wa sai. Dai myihtoi ga hpe Yehowa gaw tsang hte tsang gara hku hpring tsup shangun ai lam, anhte gara hku akyu lu nga ai lam hpe bawngban yu ga.

11. Numsha amyu matu gaw gara hku nna “lahtin” machyi mat ai kun?

¹¹ Ningpawt 3:15 hta lawm ai myihtoi ga hku nga yang, lapu gaw, numsha amyu matu a “lahtin” hpe achye na re. Yuda ni, Roma ni hpe lang nna, Karai a Kasha hpe Satan sat ai aten hta, dai myihtoi ga hpring tsup wa ai. (Luk 23:13, 20-24) Gaja wa lahtin machyi ai masha gaw, chyahkring chyahkra lam n lu hkawm ai zawn, Yesu mung lup wa hta 3 ya nga nga ai shaloi, hpa mung n lu galaw wa ai.​—Mat 16:21.

12. Gara aten hta gara hku nna lapu a baw abrep hkrum na kun?

¹² Ningpawt 3:15 hta lawm ai myihtoi ga hpring tsup na matu, Yesu gaw lup wa hta, nga taw ai hte n ngut shi ai. Hpa majaw kun? Lapu a baw hpe naw abrep ra ai majaw re. Dai majaw, bai hkrung rawt ra ai. Gaja wa mung  si nna, 3 ya nhtoi hta, n si lu ai wenyi hkum hte bai hkrung rawt wa ai. Karai Kasang masat da ai aten hta, Satan hpe Yesu jahten na re. (Heb 2:14, 15) Karai a hpyen, lapu a amyu matu hpe jahten ai aten hta, Hkristu hte rau uphkang na ni lawm na re.​—Shr 17:14; 20:4, 10. *

13. Ndai myihtoi ga hpring tsup ai lam kaw na anhte gara hku akyu lu nga ai kun?

¹³ Nang gaw, Karai Kasang kaw apnawng da ai mayam rai yang, dai myihtoi ga hpring tsup ai lam kaw na akyu lu nga ai. Yesu ginding aga de shinggyim masha hku nna sa wa ai. Kawa a atsam ningja ni hpe raw kasi la ai. (Yhn 14:9) Dai majaw, Yesu a lam hkaja ai shaloi, Yehowa hpe anhte grau chye chyang wa nna, tsawra wa ai. Yesu a sharin achyin ai lam ni, ya prat na Hkristan nawku hpung hpe woi awn ai kaw na mung akyu lu nga ai. Yehowa a myiman lu na ladat hpe Yesu sharin ya ai. Dai sha n-ga, Yesu a lahtin ningma, lam mi hku tsun yang, si ai kaw na anhte yawng akyu lu nga ai. Gara hku nna kun? Yesu bai hkrung rawt ai hpang, shi a sai manu hpe hkum tsup ai shagu hkungga hku nna sak jaw dat ai majaw, anhte a ‘yubak nlang hte jasan jaseng’ hkrum ai.​—1 Yh 1:7.

14. Edin sun hta jaw ai myihtoi ga kalang ta hpring tsup na ngu myit mada ging ai kun? Sanglang dan u.

¹⁴ Edin sun hta Yehowa tsun ai myihtoi ga gaw, hpring tsup na matu aten ladaw mi daram na na hpe madun dan ai. Ga sadi tawn ai amyu matu hpe shangai na matu, Nat Satan mung shi hpang hkan na ni hpe kahkyin na matu, hpung 2 a lapran n ju n dawng lam byin na matu aten ra ai. Myihtoi ga hpe chye na ai gaw akyu nga ai. Satan hkang da ai mungkan gaw, Yehowa a mayam ni hpe n ju n dawng na hpe dai myihtoi ga gaw sadi jaw nga ai majaw re. Hpang de, sape ni hpe Yesu dai zawn sha sadi jaw wa ai. (Mrk 13:13; Yhn 17:14) Laksan hku nna, lai wa sai shaning 100 laman, myihtoi ga a dai daw hpring tsup nga ai hpe mu lu nga ai. Gara hku nna kun?

15. Karai a amyu masha ni hpe mungkan gaw hpa majaw grai n ju n dawng nga ai kun? Satan hpe hpa majaw n hkrit ra ai kun?

¹⁵ 1914 hta Yesu gaw, Meshia Hkawhkam hku aya ap hkrum nna kade n na yang, Satan gaw sumsing lamu kaw na kabai jahkrat hkrum ai. Jahten hkrum na aten hpe la let, Satan gaw mungkan ga grup-yin hta nga nga ai. (Shr 12:9, 12) Hpa n galaw ai sha, la nga ai gaw n re. Karai a amyu masha hpe grai masin pawt let gasat nga ai. (Shr 12:13, 17) Dai majaw mung, Karai a masha ni hpe mungkan gaw, grai n ju n dawng ai. Raitim, Satan hte shi hpang hkan ai ni hpe hkrit shara n nga ai. “Karai Kasang gaw anhte a maga e nga nga a yang gaw, anhte hpe hpyen ai maga de kadai wa mi nga lu na a ta?” ngu tsun wa ai kasa Pawlu zawn, kam ai myit anhte hta nga ai. (Rom 8:31) Ningpawt 3:15 hta lawm ai myihtoi ga a daw law law hpring tsup ai hpe mu lu ai majaw, Yehowa hpe tsep kawp kamhpa mai ai.

16-18. Ningpawt 3:15 hpe chye na ai majaw, Ka-tit, Asula hte Jetsika ni gara hku akyu lu ma ai kun?

¹⁶ Ningpawt 3:15 hta lawm ai Yehowa a ga sadi gaw, prat a manghkang ni hpe hkam jan nna, tawt lai na matu anhte hpe karum ya lu ai. Gu-am zunlawng kaw na sasana hpunau Ka-tit ndai hku tsun ai: “Yehowa ntsa sadi dung ai hte seng nna kalang lang chyam dinglik hkrum ai. Raitim, Ningpawt 3:15 hta lawm ai myihtoi ga hpe myit ai gaw, sumsing kawa  hpe matut kam na matu karum ya ai.” Mayak mahkak yawng hpe Yehowa jahtum kau na aten hpe Ka-tit la nga ai.

¹⁷ Ningpawt 3:15 hpe chye na ai gaw, Chyum Laika hpe Karai Kasang ka da ai lam kam shangun ai ngu, Jamani mungdan, Babariya mungdaw hta nga ai nauna Asula tsun ai. Myihtoi ga yawng gaw, dai myihtoi ga hte matut mahkai nga ai hpe mu lu ai majaw, grai ra mat ai. Shi ndai hku tsun ai: “Shinggyim masha ni myit mada lam n nga ai baw n byin na matu, Yehowa kalang ta galaw ai ngu ai hpe chye lu ai gaw myit hpe hkra ya ai.”

¹⁸ Maihkronisha kaw na nauna Jetsika mung, “tengman lam mu sai hpe chye dat ai shaloi, gara hku hkamsha ai hpe naw dum nga ai. Ningpawt 3:15 hta lawm ai myihtoi ga hpring tsup nga ai. Dai ni aten hkrum nga ai lam yawng gaw, Karai Kasang yaw shada da ai n re ai hpe dum hkra karum ya ai. Yehowa hpe nawku ai gaw, ya aten hta kaja htum asak aprat lu shangun nna, htawm hpang hta mung grau kaja ai aprat lu shangun na ngu ai makam masham hpe grau ngang kang shangun ai” ngu tsun ai.

19. Myihtoi ga a hpang jahtum daw hpring tsup wa na ngu hpa majaw kam mai ai kun?

¹⁹ Chye wa sai hte maren, Ningpawt 3:15 hpring tsup nga ai. Numsha a amyu matu, lapu a amyu matu kadai re ai hpe chye wa sai. Numsha amyu matu a madung daw Yesu gaw, lahtin ningma mai mat nna, ya nga yang, n si lu ai atsam kaba ai Hkawhkam byin nga sai. Amyu matu a nambat 2 daw hta lawm ai ni hpe lata ai gaw ngut hkyen sai. Myihtoi ga a nambat 1 daw hpring tsup wa ai zawn, lapu a baw hpe abrep na ngu ai hpang jahtum daw mung hpring tsup wa na hpe kam mai ai. Satan htenza mat ai hpang, sadi dung ai masha ni grai kabu na re. Dai aten garai n du shi yang, asum n jaw na matu shakut ra ai. Kamhpa mai ai Yehowa gaw, numsha amyu matu kaw nna, “ga ningtsa na amyu nlang hte” hpe, n dang hti lu ai shaman chyeju ni jahpring shatsup ya na re.​—Nin 22:18.