1. Yehowa a myit ra ai lam gaw hpa rai kun?

 YEHOWA a myit ra ai lam gaw, Mungdan kabu gara shiga hpe mungkan ting hta hkaw tsun na matu re. (Mrk 13:10; 1 Tm 2:3, 4) Dai gaw Shi a magam bungli re. Grai ahkyak ai majaw, tsawra ai Kasha hpe woi awn shangun ai. Jahtum n du shi yang, Yehowa myit ra ai hte maren, Yesu woi awn ai npu hta, hkaw tsun bungli ngut kre na hpe kam mai ai.​—Mat 24:14.

2. Ndai sumhpa hta hpa lam chye lu na kun?

² Wenyi malu masha jaw sha na matu, labau hta ahkyak htum hkaw tsun magam hpe hpawng de na matu, “sadi ai hte myit su ai mayam” hpe Yesu akyu jashawn nga ai lam ndai sumhpa hta chye lu na re. (Mat 24:45) Yesu hte myitsu ai mayam hpe anhte langai hpra gara hku madi shadaw lu ai lam hpe mung chye lu na re.

3. Yesu hpe gara aya ap da ai kun?

³ Hkaw tsun bungli hpe Yesu woi awn nga ai. Gara hku chye lu ai kun? Yesu sumsing lamu de n lung shi yang, Galile bum ntsa hta, sadi dung ai sape nkau hte hkrum ai. “Sumsing lamu hta e mung, ginding aga hta e mung, uphkang na ahkang nlang hte, ngai hpe ap ya ni ai” ngu tsun ai. Dai hpang, “pru sa nna, masha amyu baw shagu hpe sape shatai” na matu, matut tsun ai hpe sadi yu u. (Mat 28:18, 19) Kaga lam ni hte hpawn, hkaw tsun bungli hpe woi awn na matu, Yesu hpe aya ap da ai.

4. Hkaw tsun bungli hpe Yesu matut woi awn nga ai lam hpa majaw kam mai ai kun?

 ⁴ Hkaw tsun ai hte sape shatai ai bungli gaw, “masha amyu baw shagu” hpang de du nna, hkaw tsun ai ni hte rau “lamu ga aprat htum hkra” nga na ngu Yesu tsun ai. (Mat 28:20) Yesu woi awn ai npu hta, hkaw tsun bungli hpe anhte a prat du hkra matut galaw na ngu ai hpe dai ga ni gaw, asan sha chye shangun ai.

5. Shakawn 110:3 hpring tsup ai lam hta anhte gara daw kaw lawm nga ai kun?

⁵ Ndai nhkru ai mungkan jahtum hta, bungli masha n law na hpe Yesu n tsang ai. “Na a hpyen majan shani e, na a amyu masha ni gaw . . . hkan nang mayu nga ma ai” ngu ai shakawn kungdawn sara a myihtoi ga hpring tsup na hpe Yesu chye ai majaw re. (Shk 110:3) Hkaw tsun bungli hta nang shang lawm nga ai gaw, Yesu hte myitsu ai mayam hpe madi shadaw ya ai re. Dai myihtoi ga hpring tsup hkra karum ya nga ai re. Dai bungli gaw matut ngut kre taw nga ai. Raitim, mayak mahkak ni gaw nga ai.

6. Kabu gara shiga hkaw tsun ai ni hkrum nga ai mayak mahkak langai gaw hpa rai kun?

⁶ Kabu gara shiga hkaw tsun ai ni hkrum nga ai mayak mahkak langai gaw, ninghkap ai lam re. Makam masham htak ai ni, nawku htung ningbaw ni, mung masa galaw ai ni gaw, anhte a bungli hte seng nna, n jaw ai shiga ni shabra ai. Jinghku ni, chye hkat ai ni, bungli manang ni gaw, dai shiga ni hpe kam nna, Yehowa hpe matut n nawku na matu, matut n hkaw tsun na matu shadut chye ai. Mungdan nkau hta, jahkrit shama ai, gasat ai, rim ai, htawng jahkrat ai du hkra re. Dai hte seng nna Yesu ndai hku tsun da ai majaw anhte n mau ga ai: “Nye amying a majaw amyu baw shagu nanhte hpe ndawng n wawm na myit dai.” (Mat 24:9) Dai zawn n ju n dawng hkrum nga ai lam gaw, Yehowa a myiman lu nga ai ngu ai madi madun lam re. (Mat 5:11, 12) Dai ninghkap ai lam a hpang hta, Satan nga ai. Raitim, Satan hta na Yesu grau atsam kaba ai. Yesu madi shadaw ya nga ai majaw, masha amyu baw shagu hpang, kabu gara shiga du nga ai. Madi madun lam ni hpe yu yu ga.

7. Shingran 14:6, 7 gaw gara hku hpring tsup nga ai kun?

⁷ Mungdan shiga hkaw tsun ai ni gaw, amyu ga mayak mahkak ni hpe mung hkrum nga ai. Dai mayak mahkak hpe tawt lai lu na ngu, kasa Yawhan hpe jaw ai shingran hta Yesu tau hkrau tsun da ai. (Shingran 14:6, 7 hpe hti u.) Gara hku nna kun? Mungdan shiga hpe hkap la na matu, masha law law hpe dang lu ai daram ahkaw ahkang jaw nga ai. jw.org website hta, Chyum Laika hte seng ai lam ni hpe amyu ga 1,000 jan hte mara da ya ai majaw, mungkan ting na masha ni lu hti sai. Sape shatai ai bungli a matu, madung hkaja laika buk re ai Htani Htana Ngwi Pyaw Ai Prat! hpe amyu ga 700 jan hte ga gale na matu ahkang jaw da sai. Na n na ai ni a matu, video ni, myi n mu ai ni a matu laika ni lu mai sai. Chyum Laika myihtoi ga ni hpring tsup nga ai hpe mu lu nga ai. “Ga amyu baw kaga ga tsun ai” ni gaw, “san seng ai” amyu ga re ai Chyum Laika tengman lam hpe hkaja nga sai. (Zeh 8:23; Zep 3:9) Yesu Hkristu woi awn ai npu hta dai ni yawng hpring tsup nga ai re.

8. Hkaw tsun bungli kade daram awng dang nga ai kun?

⁸ Dai ni aten hta, mungdan hte ginra 240 hta, masha wan 8 jan gaw,  Yehowa a uhpung hte kanawn mazum nga ai. Shaning shagu sen hku law ai masha ni hkalup hkam nga ai. Hti hkum hta na grau ahkyak ai gaw, dai sape nnan ni madun nga ai “gawng shing-yan ningnan” re ai Hkristan atsam ningja ni re. (Kol 3:8-10) Akyang hten ai, grai mazut ai, myiman lata ai, myu tsaw myit ni hpe shanhte tawn kau lu sai. “Hpyen majan sharin sa na n rai” ngu ai Esaia 2:4 hta lawm ai myihtoi ga mung hpring tsup nga ai. Anhte gaw gawng shing-yan ningnan hpe hpun na matu shakut nga ai. Karai a uhpung de kaga ni shang lawm wa hkra mung karum ya nga ai. Yesu Hkristu woi awn ai kaw hkan nang nga ai hpe sakse madun nga ai re. (Yhn 13:35; 1 Pe 2:12) Dai lam ni gaw ang katut byin wa ai n re. Anhte hpe Yesu madi shadaw nga ai majaw re.

9. Mahte 24:45-47 hta, hpang jahtum nhtoi hte seng nna Yesu hpa hpe tau hkrau tsun ai kun?

⁹ Mahte 24:45-47 hpe hti u. Jahtum nhtoi ni laman, Chyum Laika lam matsun ni jaw na matu, “sadi ai hte myit su ai mayam” hpe aya tang na ngu Yesu tau hkrau tsun ai. Dai majaw, dai ni aten hta, dai mayam bungli shakut nga na ngu myit mada mai ai. Dai hte maren byin nga ai. Woi awn ai wa re ai Yesu gaw, Karai a amyu masha ni hte myit lawm ai masha ni a matu, “aten du jang shanhte hpe lusha karan jaw” na matu, namman chya hkam ai uhpung langai hpe akyu jashawn nga ai. Dai la ni gaw, kaga ni a makam masham hpe hkang nga ai n re. (2 Ko 1:24) Yesu Hkristu hpe sha, “du hte up hkang ai wa” hku nna hkap la ma ai.​—Esa 55:4.

10. Sumla hta madun da ai gara laika gaw, htani htana asak lam de du wa hkra nang hpe karum ya ai kun?

¹⁰ 1919 kaw nna, dai mayam gaw, myit lawm ai ni a matu, Chyum Laika lam amyu myu lajang ya ai. 1921 hta shapraw ai  Karai Kasang A Wanai Tingse laika buk gaw, Chyum Laika madung lam ni hpe chye hkra karum ya ai. Aten ni galai shai wa ai hte maren, kaga laika ni hpe mung lajang ya nga ai. Gara laika gaw, Karai Kasang hpe chye chyang wa hkra, nang hpe karum ya ai kun? “Karai Kasang Sadi Dung U Ga” laika buk i? Htani Htana Asak De Lam Woi Ya Ai Teng Man Lam, Mungkan Hparadisu Hta Htani Htana Asak Hkrung Lu, Htani Htana Asak Lu Shangun Ai Machye Machyang, Chyum Laika Teng Sha Sharin Ya Ai Gaw Hpa Rai Kun? Chyum Laika Anhte Hpe Hpa Sharin Ya Ai Kun? (sh) hpang jahtum shapraw ai Htani Htana Ngwi Pyaw Ai Prat! laika buk i? Dai laika buk yawng gaw, shapraw ai aten hta, shi prat hte shi, ra nga ai lam hte hkrak sha re.

11. Anhte yawng, sung htum ai Chyum Laika lam ni hpe hpa majaw chye ra ai kun?

¹¹ Myit lawm ai ni sha, sung htum ai Chyum Laika lam ni hpe chye ra ai n re. Anhte yawng chye ra ai. “Ja ai shahpa” hpe kunghpan ai ni sha, sha ai ngu kasa Pawlu tsun ai. Chye wa ai ni hpe tatut hkan sa ai gaw, “kaja ai hte n kaja ai hpe chye ginhka lu hkra” karum ya ai ngu, shi matut tsun ai. (Heb 5:14) Akyang lailen tsang madang ni yawm nga ai aten hta, Yehowa a tsang madang ni hte maren hkan sa na matu yak chye ai. Raitim, makam masham ngang kang na matu, ra nga ai wenyi malu masha ni lu hkra, Yesu lajang ya nga ai. Dai hta, Chyum Laika gaw madung re. Yesu a lam matsun npu hta, myitsu ai mayam gaw, dai malu masha ni hpe hkyen lajang nna, shapraw ya nga ai.

12. Anhte gaw Yesu zawn, Karai a mying hpe gara hku shagrau ai kun?

¹² Anhte mung, Yesu zawn, Karai a mying hpe shagrau ai. (Yhn 17:6, 26) Ga shadawn, 1931 hta, Chyum Laika hta madung tawn ai Yehowa Sakse ni ngu ai mying hpe hkam la ai. Dai lam hku nna, anhte a matu Karai a mying kade daram ahkyak ai lam, Karai a mying hte shaga hkrum mayu ai lam madun ai. (Esa 43:10-12) 1931, October shata kaw nna,  Sin Langchyi magazine a makawp hta Karai a mying lawm wa ai. Mungkan Nnan Ga Gale Chyum Laika hta mung, Karai a mying hpe madung shara hta, bai bang da ai. Ga gale Chyum law law kaw na Yehowa a mying hpe shaw kau ai, Hkristan ngu amying hkam la da ai kaga nawku hpung ni hte n bung ai.

13. “Sadi ai hte myit su ai mayam” hpe Yesu akyu jashawn nga ai hpe hpa gaw kam shangun ai kun? (Yhn 6:68)

¹³ Ginding aga hta, san seng ai nawku dawjau lam hpe n-gun jaw na uhpung langai hpe “sadi ai hte myit su ai mayam” hku nna Yesu hpawng de wa ai. Dai uhpung hte seng nna nang gara hku hkamsha ai kun? “Anhte kadai hpang de wa na rai nga a ta? nang gaw htani htana asak hte seng ai mungga lu ndai” ngu Yesu hpe tsun wa ai kasa Petru zawn hkamsha na re. (Yhn 6:68) Yehowa a uhpung hte sha n hkrum wa yang, anhte ya, gara kaw nga nga na kun? Karai Kasang ntsa matut sadi dung lu hkra, ra ai lam yawng hpe uhpung hku nna Hkristu lajang ya nga ai. Yehowa a ra sharawng ai lam lu hkra “gawng shing-yan ningnan” hpun lu hkra mung, karum ya nga ai.​—Ehp 4:24.

14. Yehowa a uhpung hta lawm lu ai majaw, Kobit-19 kap bra ana laman, nang gara hku akyu lu ai kun?

¹⁴ Yakhkak ai aten ni hta, hpaji rawng ai lam matsun ni Yesu jaw ai. Dai akyu ni hpe Kobit-19 kap bra ana byin hpang ai aten hta asan sha mu lu ai. Mungkan kaw na masha law malawng hpa galaw ra na hpe n chye shi ai aten hta, anhte shim lum hkra, lam matsun ni hpe Yesu jaw ai.  Masha hpawng de sa ai aten, n-gup magap na matu, gang nna nga na matu anhte n-gun jaw hkrum ai. Myitsu salang ni hpe gaw, nawku hpung hta nga ai ni yawng hte galoi mung matut mahkai nga na matu, hkum hkrang hte wenyi lam hta ra kadawn nga ai lam ni hpe ayan lanu lahku ya na matu htet da ai. (Esa 32:1, 2) Uphkang Hpung kaw na shana ai lam ni hku nna mung, lam matsun ni hte n-gun jaw lam ni lu la ai.

15. Kap bra ana laman, zuphpawng, hkaw tsun bungli hte seng ai gara lam matsun ni lu ai kun? Hpa akyu ni lu ai kun?

¹⁵ Kap bra ana laman, nawku hpung zuphpawng ni gara hku galaw ra na, hkaw tsun bungli hta gara hku galaw ra na ngu ai lam matsun ni hpe mung anhte lu la ai. Aten kadun laman hta sha, bat shagu zuphpawng, ninghtawn zuphpawng, ginwang zuphpawng ni hpe video hte matut mahkai nna galaw ai. Laika ka ai, phone shaga ai hku nna hkaw tsun ai. Anhte a shakut shaja ai lam hpe Yehowa shaman chyeju jaw ai. Hkaw tsun masha jahpan nnan ni lu la ai ngu ginjaw garan rung law law shiga sa ya ai. Ndai laman, n-gun lu hpa mahkrum madup ni law law lu la ai.​—“ Hkaw Tsun Bungli Hpe Yehowa Shaman Chyeju Jaw” ngu ai lawk hpe yu u.

16. Hpa hpe kam mai ai kun?

¹⁶ Kap bra ana hte seng nna, uhpung galaw ai lam ni gaw, lai lai jan jan re ngu, nkau hkamsha na re. Raitim, anhte lu la ai lam matsun ni gaw, hpaji rawng ai hpe chyahkring hkring mu lu ai. (Mat 11:19) Amyu masha ni hpe Yesu tsawra myit hte woi awn nga ai lam hpe myit dat yang, hpawt ni hpa ni hkrum wa tim, anhte hte rau Yehowa hte Kasha nga nga na ngu ai hpe grau kam wa ai.​—Hebre 13:5, 6 hpe hti u.

17. Yesu a woi awn ai npu hta magam gun lu ai hpe gara hku hkamsha ai kun?

¹⁷ Yesu woi awn ai npu hta magam gun lu ai gaw, shaman chyeju re. Htung hking, amyu baw sang, amyu ga n ginhka ai uhpung hta anhte lawm lu ai. Chyum Laika lam matsun law law lu nga ai. Hkaw tsun bungli a matu atsawm shaman shakyang hkrum ai. Gawng shing-yan ningnan hpun lu na matu, shada da tsawra na matu, langai hpra sharin achyin hkrum nga ai. Woi awn ai wa Yesu hpe lu da ai majaw, arawng la hpa lam law law nga ai.