1. Tsawra myit rawng ai Yehowa hpe gara hku kasi la mai na kun?

YEHOWA gaw anhte yawng hpe grai tsawra ai. (Yhn 3:16) Tsawra myit nga ai Kawa hpe anhte kasi la mayu ga ai. Dai majaw, yawng hpe “tsawra nna matsan dum ai” myit shakut nna madun ga ai. Laksan hku nna, “makam masham a dinghku na ni” hpe grau nna madun ga ai. (1 Pe 3:8; Gal 6:10) Yehowa hpe nawku ai hpunau nauna ni myit ru myit tsang hkrum ai shaloi anhte karum ya mayu ai.

2. Ndai sumhpa hta hpa lam hkaja mat na kun?

² Yehowa a dinghku hta nga mayu ai ni gaw, myit ru myit tsang lam ni hkrum wa na re. (Mrk 10:29, 30) Ndai hpang jahtum nhtoi htum hkyen sai majaw, yakhkak jamjau lam ni hpe grau nna hparan ra na re. Anhte shada da gara hku karum ya na kun? Chyum Laika kaw nna Lawt, Yoba hte Naomi ni a labau kaw nna sharin la lu ai lam ni hpe hkaja mat wa ga. Dai ni aten hta hpunau nauna ni hkrum nga ai manghkang ni hte dai manghkang ni hpe hparan ai shaloi, anhte gara hku karum ya lu ai lam ni hpe mung hkaja yu ga.

3. 2 Petru 2:7, 8 hpe hti yu na nga yang Lawt gaw gara n kaja ai dawdan lam jahkrat wa ai kun? Hpa lam ni hkrum wa ai kun?

³ Lawt gaw akyang grai hten ai masha ni hte hpring nga ai Sodom mare hta nga na matu lata wa ai gaw grai shut ai. (2 Petru 2:7, 8 hpe hti u.) Dai buga gaw grai sut su nga mai ai shara re. Raitim, Lawt gaw dai de htawt ai majaw manu mana sak jaw kau ra ai. (Nin 13:8-13; 14:12) Shi a madu jan gaw dai mare hte  mare masha ni hpe grai ra sharawng mat ai rai na re. Dai majaw, Yehowa a ga hpe shi n madat wa ai. Karai Kasang gaw dai buga hpe wan hte kan jahtu nna jahten kau ai shaloi, shi asak sum mat ai. Lawt a shayi sha lahkawng gaw gara hku kun? Shanhte mung Sodom mare hta si mat ai la ni hte mahtan da ai. Lawt gaw shi a nta, arung arai ni sum mat ai sha n-ga, madu jan si mat ai majaw grai hkra machyi mat ai. (Nin 19:12-14, 17, 26) Myit ru myit tsang nga ai shaloi, Yehowa gaw Lawt hpe myit n galu mat sai kun? N re.

4. Yehowa gaw Lawt hpe myit galu ai lam gara hku madun wa ai kun? (Makawp sumla hpe yu u.)

⁴ Lawt gaw Sodom mare kaw nga na matu lata wa tim, Yehowa gaw matsan dum wa ai. Shi hte shi a nta masha ni hpe hkye la na matu lamu kasa yan hpe shangun dat ai. Raitim, Sodom mare kaw nna pru na matu lamu kasa ni tsun ai hpe alawan madat na malai, Lawt gaw lanyan taw nga ai. Lamu kasa ni gaw shi a lata hpe magra nna, shi hte shi a nta masha ni mare kaw nna lawt lu na matu karum ya ai. (Nin 19:15, 16) Lamu kasa ni gaw bum ga de hprawng na matu shi hpe tsun ai. Yehowa a ga madat na malai, ni ai mare de hprawng na matu hpyi shawn wa ai. (Nin 19:17-20) Yehowa gaw myit galu let madat ya nna dai mare de hprawng na matu ahkang jaw wa ai. Raitim, dai mare kaw n nga gwi sai majaw, Yehowa tsun wa ai bum ga de bai htawt mat ai. (Nin 19:30) Yehowa gaw grai myit galu ai lam madun wa ai. Anhte gara hku kasi la mai na kun?

5-6. Karai Kasang hpe kasi la ai hku nna 1 Htesaloni 5:14 hpe gara hku hkan sa na kun?

⁵ Lawt zawn, hpunau nauna ni mung n kaja ai dawdan lam ni jahkrat ai majaw, manghkang kaba ni hkrum nga ai. Dai hku byin yang, anhte hpa galaw ya na kun? Gat hkai ai hte maren dan la lu sai n re i? ngu nna anhte tsun mayu na re. (Gal 6:7) Raitim, dai hta grau kaja hkra tsun mai ai. Lawt hpe Yehowa karum ya wa ai lam ni hpe anhte kasi la mai ai. Gara hku nna kun?

⁶ Lamu kasa ni hpe Yehowa shangun dat ai gaw Lawt hpe sadi jaw na matu sha n-ga, Sodom mare tsin-yam hkrum ai kaw nna lawt hkra tatut karum ya na matu mung re. Dai zawn sha, hpunau nauna ni dawdan shut ai majaw, manghkang ni hkrum wa ai shaloi anhte sadi jaw ra na re. Shanhte hpe karum na matu mung shakut ra na re. Lu la ai Chyum Laika hpaji jaw ga ni hpe shanhte alawan n hkan sa yang pyi, myit galu ra ai. Lamu kasa yan zawn galaw ra ai. Shanhte hte tsan tsan nga na malai, tatut karum ya lu ai lam ni hpe tam ging ai. (1 Yh 3:18) Ta gindun let shawang myit hte karum ya ra ai. Dai gaw shanhte lu la ai hpaji jaw ga ni hpe hkan sa lu na matu karum ya nga ai re.​—⁠1 Htesaloni 5:14 hpe hti u.

7. Lawt hpe Yehowa mu mada ai kasi hpe anhte gara hku hkan sa lu na kun?

⁷ Yehowa gaw Lawt a shut ai lam hpe myit maju jung mai ai. Raitim, Lawt gaw dinghpring ai masha re ai ngu ka na matu kasa Petru hpe shung ya wa ai. Anhte a mara ni hpe Yehowa raw ya ai majaw kabu hpa re. (Shk 130:3) Lawt hpe Yehowa mu mada ai kasi hpe anhte hkan sa lu na kun? Hpunau nauna ni a kaja ai atsam ningja ni hpe myit maju jung na nga yang, shanhte hpe grau nna myit galu wa na re. Anhte karum ya ai hpe shanhte aloi sha hkap la lu na re.

8. Matsan dum myit gaw hpa galaw na matu shadut ya ai kun?

⁸ Yoba gaw ladu lai hkra tsin-yam ni hkrum wa ai. Lawt zawn n kaja ai dawdan lam ni jahkrat ai majaw n re. Shi a ahkang aya, hkam ja lam hte arung arai ni sum mat ai. Grau sawng  ai gaw, kasha yawng si mat ai. N kaja ai manang 3 mung shi hpe mara shagun ai. Sa shalan ya ai dai marai 3 gaw shi hpe matsan dum myit hpa majaw n madun ai kun? Lam langai gaw masa lam hpe shanhte ntsa lam sha chye ai majaw re. Dai majaw shut ai hku sawn la nna Yoba hpe n tara ai hku jeyang wa ai. Dai zawn n byin hkra gara hku koi lu na kun? Yehowa chyu sha masha a masa lam yawng chye lu ai. Manghkang hkrum nga ai wa tsun ai hpe atsawm madat ya u. Shi tsun ai hpe madat ai sha n-ga, shi a hkamsha lam hpe chye na hkra shakut u. Dai hku nna, hpunau nauna ni hpe matsan dum myit madun mai ai.

9. Matsan dum myit nga yang anhte hpa hpe koi na kun? Hpa majaw kun?

⁹ Kaga ni hkrum nga ai manghkang ni hte seng nna shatan nhkan n tsun na matu matsan dum myit gaw shadut ya ai. Shatan nhkan tsun ai wa gaw, nawku hpung hpe kahkyin gumdin ya na malai jahten sharun ya ai. (Gsh 20:19; Rom 14:19) N myit yu ai sha tsun ai ga gaw tsawra myit n nga nna, manghkang hkrum ai wa hpe grau hkra machyi shangun ai. (Gsh 12:18; Ehp 4:31, 32) De a malai, shi a kaja ai atsam ningja ni hpe tam nna, gara hku karum ya lu na hpe myit ai gaw grau kaja ai.

10. Yoba 6:2, 3 hta tsun da ai lam gaw anhte hpe hpa sharin ya ai kun?

¹⁰ Yoba 6:2, 3 hpe hti u. Kalang lang Yoba gaw “ga tsun lai” ai. Dai majaw, shi tsun ai ga ni hte seng nna myit malai lu wa ai. (Yob 42:6) Dai ni aten hta mung, myit ru myit tsang hkrum nga ai masha ni gaw Yoba zawn, hpang she myit malai lu na ga ni hpe tsun chye ai. Anhte gara hku bai htang na kun? Mara shagun na malai, matsan dum myit madun ging ai. Manghkang ni hte myit ru myit tsang lam ni hpe anhte hkrum na matu Yehowa n yaw shada da ai hpe dum u. Dai majaw, myit ru  myit tsang hkrum wa yang, Yehowa hpe sadi dung ai mayam ni gaw n myit yu ai sha tsun chye ai hpe chye na ya lu ai. Yehowa hte anhte a lam hpe n jaw ai hku tsun yang pyi, shi hpe alawan masin pawt ai (sh) jeyang ai baw n galaw ging ai.​—⁠Gsh 19:11.

11. Myitsu salang ni gaw hpaji jaw ga tsun ai shaloi Elihu hpe gara hku kasi la mai na kun?

¹¹ Kalang lang, manghkang hparan nga ai masha langai gaw, tatut re ai hpaji jaw ga (sh) sharin achyin lam nkau ra chye ai. (Gal 6:1) Myitsu salang ni gaw dai hpe gara hku galaw mai na kun? Yoba hpe matsan dum myit madun nna atsawm madat ya wa ai Elihu hpe kasi la mai ai. (Yob 33:6, 7) Elihu gaw Yoba a myit mang lam ni hpe atsawm chye na ngut ai hpang she hpaji jaw wa ai. Myitsu salang ni mung Elihu a kasi hpe hkan sa nna, masha langai a masa lam hpe chye na hkra shakut nna atsawm madat ya ra ai. Rai yang she, hpaji jaw ga tsun ai shaloi madat ai ni a myit masin de du hkra tsun lu na re.

12. Madu wa hte kasha lahkawng si mat ai hpang Naomi gara hku hkamsha ai kun?

¹² Naomi gaw Yehowa hpe tsawra nna sadi dung ai wa re. Raitim, madu wa hte kasha lahkawng si mat ai hpang, shi a amying Naomi kaw nna “Nachying Hka Ai” ngu lachyum nga ai “Mara” ngu nna shamying mayu wa ai. (Rut 1:3, 5, 20, 21) Naomi a kanam Ruhta gaw dai aten ni hta shi hte arau nga ya ai. Tatut karum ya ai sha n-ga, shalan shabran ya wa ai. Naomi hpe tsawra ai lam, madi shadaw ya na lam myit madung hte Ruhta tsun wa ai.​—⁠Rut 1:16, 17.

13. Ningrum ningtau n nga mat ai ni hpe hpa majaw karum ya ra ai kun?

¹³ Ningrum ningtau n nga mat ai hpunau nauna ni hpe anhte karum madi shadaw ya ra ai. Yan la ni gaw, hpun lahkawng rau yep rai nna kaba wa ai hte bung ai. Shaning ni na wa ai hte maren, hpun a aru ni gaw langai hte langai manai dumbat nga ai. Hpun langai baw kau hkrum nna si mat ai shaloi, kaga hpun mung manu mana hkra machyi ai. Dai zawn sha, ningrum ningtau si mat ai shaloi, ngam nga ai wa gaw aten grai na hkra hkamsha nga na re. N myit mada ai sha madu wa si mat ai Pola * ndai hku tsun ai: “Nye a prat tsep kawp galai shai mat ai. Karum shingtau n nga ai zawn hkamsha ai. Grai hkau ai manang sum mat ai. Lam yawng mayawng shi hpe ngai tsun dan ai. Ngai hte arau shi kabu lawm nna mayak mahkak ni hpe mung hparan ya ai. Ngai tsun dan ai lam yawng hpe madat ya ai. Hkum chyen mi n nga mat ai ngu ngai hkamsha ai.”

14-15. Ningrum ningtau n nga mat ai ni hpe anhte gara hku shalan shabran ya na kun?

¹⁴ Ningrum ningtau n nga mat ai wa hpe shalan shabran ga gara hku tsun na kun? Shi hpe hpa tsun na matu n chye yang pyi, tinang maga hku nna ga shaga hpang na matu shakut u. Pola ndai hku tsun ai: “Si hkrung si htan gaw masha ni hpe grai nga yak shangun ai. Tinang tsun ai ga a majaw, yawn nga ai wa hkra machyi mat na hpe masha ni tsang chye ai. Raitim, hpa mung n tsun ai sha nga ai gaw grau sawng ai.” Yawn nga ai wa gaw anhte kaw na hpaji rawng ai ga ni na lu na ngu myit mada da na n re. Pola ndai hku tsun ai: “‘Ngai grai myit n pyaw ya ai yaw’ ngu nna nye manang ni sa tsun ai sha pyi ngai grai chyeju dum ai.”

¹⁵ Lai wa sai shaning ni hta madu jan n nga mat ai Wiliyam ndai hku tsun dan ai: “Shi hte seng ai kaja ai lam ni hpe kaga ni sa tsun dan ai shaloi ngai grai chyeju dum ai. Shi hpe tsawra nna hkungga ma ai lam ngai chye mat ai. Ndai zawn madi shadaw ya ai gaw ngai hpe  grai akyu jaw ai. Shanhte a ga ni gaw ngai hpe grai shalan shabran ya ai. Hpa majaw nga yang, shi gaw nye matu grai manu dan nna, nye prat a adaw achyen re.” Gaida jan Biyanka ndai hku tsun ai: “Kaga ni ngai hte arau akyu hpyi nna Chyum daw langai lahkawng hti ai majaw shalan shabran lam lu la ai. Nye madu wa a lam arau tsun jahta hkat ai gaw ngai hpe grai myit simsa shangun ai.”

16. (a) Tsawra ai marai langai n nga mat ai wa hpe gara hku karum ya ging ai kun? (b) Yaku 1:27 hku nga yang anhte hta hpa lit nga ai kun?

¹⁶ Gaida jan Naomi hpe Ruhta karum ya wa ai zawn, tsawra ai marai langai ngai si mat ai ni hpe matut nna karum ya ra ai. Pola ndai hku tsun ai: “Nye madu wa n nga mat ai hte kalang ta, karum shingtau lam ni lu wa ai. Raitim, aten ni na mat ai hpang, shanhte mung shanhte a bungli hte rai mat ai. Nye prat gaw tsep kawp galai shai mat ai. Yawn hkyen nga ai marai langai hpe shata hku, shaning hku madi shadaw ya ra ai hpe kaga ni chye na ya yang grai kaja ai.” Marai langai hte langai gaw bung na n re. Nkau mi gaw masa lam nnan ni hpe ra ang ai hku alawan galai shai lu ai. Raitim, nkau chyawm gaw lama ma hpe galaw shagu, n nga mat sai wa hpe bai dum wa chye ai. Yawn hkyen ai lam gaw langai hte langai n bung ai. Ningrum ningtau n nga mat ai ni hpe lanu lahku na matu, Yehowa lit jaw da ai hpe dum ga.​—⁠Yaku 1:27 hpe hti u.

17. Ningrum ningtau a kau da hkrum ai ni hpe anhte hpa majaw karum ya ra ai kun?

¹⁷ Ningrum ningtau a kau da hkrum ai ni gaw, myit ru myit tsang nna myit daw myit hten nga chye ai. Joi a madu wa gaw shi hpe  kau da nna kaga num la mat ai. Shi ndai hku tsun ai: “Nye madu wa si mat yang pyi, dinghku hka ai daram hkamsha na n re. Lama na, n myit mada ai sha shi si mat ai (sh) machyi nna si mat yang, shi hta lata na lam nga sana n re. Ya chyawm gaw ngai hpe kau da na matu shi lata wa ai. Ngai hpe kaya jahkrum ai, myit kaji shangun ai.”

18. Ningrum ningtau a kau da hkrum ai ni hpe anhte gara hku karum ya mai na kun?

¹⁸ Ningrum ningtau a kau da hkrum ai ni hpe tsawra myit hte karum ya ai gaw, shanhte hpe anhte tsawra ai lam chye shangun ai. Shanhte gaw moi na hta grau nna manang kaja ni ra chye ai. (Gsh 17:17) Shanhte a manang re ai hpe gara hku sakse madun na kun? Shat sha shaga mai ai. Kalang lang arau ban sa na matu (sh) hkaw tsun sa na matu saw shaga mai ai. Dinghku nawku hta sa lawm na matu mung, kalang lang saw shaga mai ai. Dai hku galaw ai gaw, “myit daw myit hten ai ni hte ani sha nga” nna “gaida jan ni hpe makawp maga ya” ai Yehowa hpe anhte myit shapyaw ya nga ai re.​—⁠Shk 34:18; 68:5 JCLB.

19. 1 Petru 3:8 hta hpa galaw na matu tsun da ai kun?

¹⁹ Kade n na yang, Karai a Mungdan mungkan ga hpe uphkang ai shaloi, “lai sai aten na tsin-yam tsindam ni gaw lai mat wa nna malap kau” sana re. “Lai sai aten na mabyin lam ni gaw atsai awai malap kau ai hkrum na” aten hpe anhte myit mada nga ga ai. (Esa 65:16, 17, JCLB) Dai aten n du shi ai laman, hpunau nauna ni hpe tsawra ai lam madun mat wa ga. Tsun shaga ai, galaw hkawm sa ai lam hte shada da madi shadaw mat wa ga.​—⁠1 Petru 3:8 hpe hti u.