“HPANG jahtum na nhtoi ni” laman, Yehowa gaw shi a masha ni hpe lam matsun ya nna, wenyi lam hta madi shadaw ya nga ai hpe anhte kam ai. (2 Tm 3:1) Raitim, anhte maga hku nna Yehowa a ga madat ra ai. Nam mali hta nga wa ai Israela ni a masa hte shingdaw mai ai. Shanhte gaw pahtau dum ai nsen hpe madat nna hkan galaw wa ai.

‘Jahpawng yang dum na matu, dap sharawt yang dum na matu’ gumhpraw pahtau lahkawng hpe galaw u ngu nna Mawshe hpe Yehowa matsun ai. (Bhk 10:2) Masha ni hpa galaw ra na hpe matsun na matu, hkinjawng ni gaw pahtau hpe n bung ai hku dum ra ai. (Bhk 10:3-8) Dai ni aten hta mung, Karai a masha ni gaw n bung ai lam hku nna lam matsun ni lu la nga ai. Moi prat na pahtau dum ai nsen kaw nna, anhte hpe bai shadum ya ai lam 3 hpe yu yu ga. Dai ni aten na Karai a masha ni gaw, zuphpawng kaba ni lung na matu saw shaga hkrum ai, aya tang hkrum ai myitsu salang ni gaw shaman shakyang ai lam lu la ai, nawku hpung yawng mung lam matsun nnan ni, galai shai ai lam ni lu la ma ai.

Shawa sum shawng na chyinghka hta, “shawa hpung ting” hpe Yehowa zup hpawng shangun mayu yang, hkinjawng ni gaw pahtau lahkawng yan hpe dum ai. (Bhk 10:3) Amyu masha yawng gaw, pahtau dum ai nsen hpe na lu ai nawku sum a man 4 hta nga ai. Shawa sum hte ni ai ni gaw, minit chyahkring mi laman bai htang lu na re. Tsan ai shara hta nga ai ni gaw, aten jaw ra nna shakut shaja ra na re. Gara hku mi raitim, masha yawng hpe zuphpawng de sa na matu hte akyu lu la na matu Yehowa ra sharawng ai.

Dai ni aten hta, anhte gaw nawku sum hta n zup hpawng ra tim, Karai a masha ni hte arau zup hpawng na matu saw shaga hkrum ai. Dai hta, ginwang zuphpawng ni hte laksan lamang ni lawm ai. Dai shara kaw nna, ahkyak ai lam matsun ni lu la ai. Mungkan ting na Yehowa a masha ni gaw, lamang ni hpe maren sha lu la nga ai. Sa hpawng na matu saw shaga ai hpe hkap la nna, sa lung ai ni yawng gaw, uhpung nawng ngwi pyaw ai lam hkamsha ai. Nkau mi gaw, grai tsan ai shara kaw na sa ra ai. Saw shaga ai hpe hkap la ai ni gaw, shakut shaja ai kaw nna akyu lu la ma ai.

Uhpung hte tsan nna san san rai nga ai ni gaw, dai zawn hkrum zup ai lam ni kaw nna akyu lu la ai kun? Prat dep ladat hpaji a majaw, shanhte gaw dai lamang ni kaw nna akyu lu la ai. Dai zuphpawng ni hta, shanhte nan lawm ai zawn pyi hkamsha ai. Ga shadawn, ginjaw dat kasa sa chyai ai shaloi, Binin hta nga ai ginjaw garan rung gaw, Sahara Zaibru Jang kaw nga ai nhprang pru ai mare ni re ai Alet hte Nija mare ni de lamang hpe shapoi ya ai. Hpunau nauna ni hte myit lawm ai ni yawng marai 21 sa madat ai. Shanhte gaw san san rai nga ai shara hta nga tim, 44,131 hte arau zuphpawng  hta shang lawm nga ai ngu hkamsha ai. Hpunau langai ndai hku laika ka ai: “Lamang hpe shapoi ya ai majaw grai chyeju dum ai. Anhte hpe kade daram tsawra ai lam chye lu ai.”

Israela hkinjawng ni gaw pahtau hpe kalang sha dum yang, “masha hkying mun a du agyi ni” gaw shawa sum de sa ra ai. (Bhk 10:4) Dai shara hta, Mawshe kaw na lam matsun hte shaman shakyang ai lam ni lu la ai. Dai gaw, lit ni hpe atsawm gun lu hkra karum ya ai. Nang gaw du agyi ni kaw na langai rai yang, dai shara de sa na matu hte akyu lu la na matu, galaw lu ai lam yawng hpe galaw na re.

Dai ni aten na myitsu salang ni gaw, “du agyi ni” n re ai zawn, Karai sagu hpung a madu mung n re. (1 Pe 5:1-3) Raitim, sagu hpung hpe kaja htum lanu lahku ma ai. Dai majaw, Mungdan Magam Jawng zawn re ai jawng ni hta, shaman shakyang lam lu na matu saw shaga hkrum ai shaloi, sa na matu jin jin re. Dai zawn jawng ni hta, myitsu salang ni gaw nawku hpung hpe lanu lahku ai shaloi, tang du hkra gara hku galaw lu na hpe sharin la ma ai. Akyu hku nna, yawng a matu wenyi lam hta rawt jat wa shangun ai. Nang gaw dai jawng ni kaw nna langai ngai hpe n lu lung shi yang pyi, lung wa ai ni kaw nna akyu lu la mai ai.

Israela hkinjawng ni gaw, masa hta hkan nna pahtau hpe nsen nem tsaw dum ai. Dai nsen gaw, dap nawng hpe Yehowa htawt shangun mayu ai lachyum re. (Bhk 10:5, 6) Dap nawng htawt ai gaw, kahkyin gumdin lam hpe madun ai sha n-ga, yawng arau shakut shaja ai hpe mung madun ai re. Kalang lang, nkau mi gaw htawt na matu ung-ang nga na re. Hpa majaw kun?

Nkau mi a matu, pahtau dum ai nsen gaw n myit mada da ai aten hta, chyahkring hkring na ai ngu, hkamsha ai majaw rai na re. ‘Kalang lang sumwi gaw shana de nna jahpawt du hkra jung nga ai.’ Kaga aten ni hta dai sumwi gaw, lahkawng ya, shata mi, laning mi ting nga nga ai. (Bhk 9:21, 22) Rai yang kade lang dap htawt wa ra ai kun? Bu Hkawm Laika daw kaba 33 hta, shara 40 daram htawt wa ra ai ngu tsun da ai.

Kalang lang Israela ni gaw, shingnip nga ai shara hta dap jung ra ai mung rai chye ai. “Hkrit hpa nam mali kaba” hta dai zawn shingnip nga ai shara kaw dap jung lu ai gaw, ngwi pyaw hpa rai na re. (Trj 1:19) Dai majaw, htawt na shara gaw grau sawng ai shara rai na kun? ngu nna myit wa chye ai.

Dap htawt ai shaloi, masha nkau gaw shanhte htawt na aten hpe myit galu let la ra ai. Nsen nem tsaw pahtau dum ai hpe yawng na tim, yawng gaw kalang ta n mai htawt ai. Dai zawn pahtau dum ai nsen hpe na yang, sinpraw maga hta dap jung nga ai Yuda, Yishahka hte Zebulun amyu ni gaw dap htawt ra ai. (Bhk 2:3-7; 10:5, 6) Shanhte htawt ngut nna, hkinjawng ni gaw dai zawn nsen hte pahtau bai dum yang, dingda maga kaw dap jung nga ai amyu lakung 3 gaw dap htawt ra ai. Dap yawng htawt ngut ai du hkra, hkinjawng ni gaw dai zawn pahtau dum ra ai.

Uhpung a galai shai ai lam nkau hte seng nna, hkap la na matu yak ai aten ni mung nga chye ai. Galai shai ai lam ni grai law ai ngu nna mung nang myit chye ai. Shing nrai, shawoi galaw ai lam ni hpe nang ra sharawng nna, n kam galai shai ai mung rai chye ai. Galai shai ai hte maren galaw ai shaloi, myit galu na matu yak chye nna, dai hpe hkap la na matu aten ra chye ai. Galai shai ai lam hpe shakut shaja let galaw na nga yang, Karai Kasang anhte hpe shaman chyeju jaw nga ai hpe mu lu na re.

Mawshe aten hta, wan hku law ai num, la hte ma ni hpe nam mali kaw nga ai aten ni laman, Yehowa lam matsun ya wa ai. Shi a lam matsun hte lanu lahku lam n nga yang, shanhte asak hkrung lawt lu na n re. Dai ni aten hta mung, anhte gaw Yehowa a lam matsun hte wenyi lam hta, matut ngang kang lu ai. Dai majaw, prat hta awng dang lu ai. Dan leng ai pahtau nsen hpe Israela ni madat wa ai zawn, anhte mung dai hte maren madat na matu dawdan da ga!