Dai Chyum daw hta ndai Hkristan atsam ningja 9 lawm ai: Tsawra ai, kabu gara ai, ngwi pyaw ai, myit galu kaba ai, matsan dum ai, mai kaja ai, kam sham ai, sumnung shingdi ai, tinang myit hpe hkang lu ai. Anhte hpe rawt jat hkra karum ya lu ai “wenyi a asi” gaw dai daram sha n re.

Kasa Pawlu ka wa ai dai Chyum daw a lahta na ndai Chyum daw ni hpe sadi yu u: “Hkum shan a bungli gaw . . . hpye ai amu, n san n seng ai amu, ngang ai amu, gawng-ngu sumla naw ai lam, mandan lakle amu, ndawng n yawt ai, ga law ga la ai, manawn masham ai, pawt sindawng ai, shai wa bra wa ai lam, daw hka wa ai lam, hpung karan wa ai lam, nsu nnawn ai, chyaru nang ai, sawse lawklek ai hte dai hte bung ai lam rai nga ma ai.” (Gal 5:19-21) Dai hte bung ai lam ngu Pawlu tsun da ai majaw, “hkum shan a bungli” hta Kolose 3:5 kaw lawm ai lam ni mung naw lawm na re. Dai hte maren, kaja ai atsam ningja 9 hpe ka ngut ai hpang, “dai lam hte hpe hkum lu na tara mi n nga ai” ngu nna mung tsun wa ai. Dai majaw, Pawlu ka wa ai kaja ai atsam ningja ni gaw chyoi pra ai wenyi a karum shingtau lam hte shalat la lu ai atsam ningja yawng n rai shi ai.

Wenyi a asi hte Ehpesu nawku hpung de Pawlu ka ai ndai nhtoi a asi hpe shingdaw yu ai shaloi, dai lam hpe anhte chye na lu ai: “Nhtoi a asi gaw mai kaja ai, ding hpring ai hte teng man ai hkrai hkrai rai nga ai.” (Ehp 5:8-10) “Mai kaja ai,” hte rau ding hpring ai hte tengman ai lam gaw “nhtoi a asi” sha n-ga, “wenyi a asi” mung re.

Dai zawn sha, Pawlu gaw Timohti hpe “ding hpring ai, tara hkungga ai, kam sham ai, tsaw ra ai, shakut sharang ai hte sumnung ai myit” ngu ai kaja ai atsam ningja 6 hpe hkan galaw na matu n-gun jaw wa ai. (1 Tm 6:11) Dai ni kaw na 3 (kam sham ai, tsaw ra ai hte sumnung ai) gaw “wenyi a asi” hta mung lawm ai. Raitim, Timohti gaw ding hpring ai, tara hkungga ai, shakut sharang ai ngu ai atsam ningja ni rawt jat na matu, chyoi pra ai wenyi a karum shingtau lam ra ai.​—Kol 3:12 hte 2 Pe 1:5-7 ni hte mung shing daw yu u.

Dai majaw, Galati 5:22, 23 hta lawm ai atsam ningja ni gaw Hkristan atsam ningja yawng n rai shi ai. Karai a wenyi gaw “wenyi a asi” hta lawm ai atsam ningja 9 hpe rawt jat hkra karum ya lu ai. Raitim, “teng man ai hte seng ai ding hpring ai hte chyoi pra re ai Karai Kasang hpan tawn da ai gawng shing-yan ningnan hpe dagraw lu” na matu hte kung hpan ai Hkristan byin na matu kaga atsam ningja ni mung naw ra ai.​—Ehp 4:24.