1. Sagu langai bai wa ai shaloi Yehowa gara hku hkamsha ai kun?

YEHOWA gaw shi hkum shi, tsawra myit rawng ai sagu rem wa hte shingdaw wa ai lam, shawng na sumhpa hta hkaja wa sai. Dam mat ai sagu ni hpe shi tam nga ai. Shi hpe kau da ai Israela ni hpe ndai hku tsun ai: “Ngai hpang de nhtang wa ma rit, shaloi ngai nanhte hpang de nhtang wa na nngai.” Yehowa gaw n galai shai ai majaw, ya mung dai zawn hkamsha ai. (Mal 3:6, 7) Tsan mat ai marai langai bai wa yang, Yehowa hte lamu kasa ni grai kabu ai ngu Yesu tsun ai.​—Luk 15:10, 32.

2. Ndai sumhpa hta hpa lam hkaja na kun?

² Yehowa hte tsan mat ai ni hpe karum ya lu ai Yesu a ga shadawn 3 hpe hkaja yu ga. Dam mat ai sagu ni bai wa na matu karum ya lu hkra, anhte hta nga ra na atsam ningja nkau hpe hkaja yu ga. Katsi mat ai ni hpe karum ya ai gaw grai akyu nga ai hpe chye lu na re.

3-4. Luka 15:8-10 hta tsun da ai num gaw mat mat ai dengga hpe hpa majaw shakut nna tam ai kun?

³ Yehowa hpang de bai wa mayu ai ni hpe anhte shakut nna tam ra ai. Luka Laika hta, manu dan ai gumhpraw dengga langai mat mat ai majaw hkan tam ai num a lam hpe Yesu tsun wa ai. Ndai ga shadawn hta shakut shaja let hkan tam ai lam hpe ahkyak shatai nna tsun da ai.​—Luka 15:8-10 hpe hti u.

⁴ Manu dan ai dengga hpe bai mu ai num a hkamsha lam hpe Yesu tsun dan ai. Yesu a prat hta, Yuda amyu na kanu nkau gaw, shayi sha hkungran ai shani hta, gumhpraw dengga 10 hpe jaw na masa nga ai. Mat mat ai dengga gaw, dai  gumhpraw 10 kaw na langai rai na re. Dai gumhpraw gaw chyinghkyen kaw hkrat mat ai ngu dai num shadu ai. Dai majaw, wan shatu na hkan tam ai. Raitim n mu ai. Shi a wan shadaw gaw, kaji ai gumhpraw dengga tam mu na daram n htoi ai. Dai majaw ding-ye ye na tam ai. Wan shadaw nhtoi a majaw, nhpu kata kaw manu dan ai gumhpraw dengga kabrim nga ai hpe mu dat ai. Shi grai kabu mat ai. Manang ni, htingbu ni hpe shaga nna, bai mu tam sai lam tsun dan ai.

5. Katsi mat ai ni a nga shara hpe tam na matu hpa majaw yak chye ai kun?

⁵ Yesu a ga shadawn hku nga yang, mat ai lama ma hpe tam na matu shakut ra ai. Dai majaw, katsi mat ai ni a nga shara hpe anhte tam ra ai. Anhte hte n kanawn ai shaning hku na sai mung rai chye ai. Shanhte htawt nga ai buga na hpunau ni shanhte hpe n chye ai mung rai na re. Nkau mi gaw Yehowa hpang de bai wa mayu ai hpe anhte chye ai. Tengman ai hku nawku daw jau nga ai ni hte arau Yehowa hpe nawku mayu nga ai. Dai majaw, anhte karum ya ra ai.

6. Katsi mat ai ni hpe hkan tam na matu nawku hpung na masha yawng gaw gara hku shang lawm mai ai kun?

⁶ Katsi mat ai ni hpe hkan tam ai hta kadai ni karum ya mai ai kun? Myitsu salang ni, ningshawng ni, nta masha ni hte hkaw tsun masha yawng karum ya mai ai. Na a manang ni hte jinghku ni hta katsi mat ai ni nga ai kun? Hkaw tsun sa ai (sh) shawa man sakse hkam ai shaloi katsi mat ai ni hte hkrum ga ai kun? Shi gaw sa chyai na hpe ra sharawng ai nga yang, shi a hkring dat hpe myitsu salang ni hpe jaw mai na kun? ngu nna san u.

7. Myitsu salang Tawmat tsun ai ga ni kaw na hpa sharin la lu ai kun?

⁷ Yehowa hpang de bai wa mayu ai ni hpe tam ai hta, myitsu salang ni galaw lu ai lam ni gaw hpa rai kun? Saping mungdan hta nga ai myitsu salang Tawmat * tsun ai hpe yu yu ga. Sakse Hkam 40 jan hpe nawku hpung de bai wa na matu shi karum ya wa ai. Shi ndai hku tsun ai: “Katsi mat ai ni a nga shara hpe chye ai hpunau nauna ni hpe shawng san ai. Zuphpawng n lung ai grai na sai ni hpe chye ai kun? ngu nna mung san ai. Law malawng gaw, myit rawt let tam mayu ma ai. Katsi mat ai ni hpang de sa chyai ai shaloi, shanhte a kasha ni, jinghku ni a lam hpe san ai. Katsi mat ai nkau gaw, zuphpawng de ma ni hpe shaga sa chye ai. Dai ma ni mung hkaw tsun masha byin ga ai ni rai chye ai. Ma ni mung Yehowa hpang de bai wa na matu karum shingtau lu la ma ai.”

8. Luka 15:17-24 hku nga yang dam mat ai ma hpe kawa gaw gara hku galaw ya wa ai kun?

⁸ Yehowa hpang de bai wa mayu ai ni hpe karum ya mayu yang, gara atsam ningja ni nga ra ai kun? Nta kaw na pru mat ai ma hte seng ai Yesu a ga shadawn kaw nna, sharin la lu ai lam nkau hpe yu yu ga. (Luka 15:17-24 hpe hti u.) Dai ma gaw shi galaw ai lam kade daram angawk ai hpe chye mat nna nta de bai wa ai. Kawa gaw kasha hpe ahpum nna, grai tsawra ai lam madun wa ai. Kasha gaw shi hkum shi mara nga ai, kasha ngu na pyi n ging dan ai ngu hkamsha ai. Kade daram hkamsha ai hpe tsun dan ai shaloi, kawa gaw grai matsan dum mat ai. Mayam langai hku n re ai sha, tsawra ai nta masha langai hku nna kabu gara let hkap la ai lam madun wa ai. Myit malai lu ai ma hpe kaja ai bu hpun palawng ni jahpun ya nna, lusha poi lajang ya ai.

9. Katsi mat ai ni Yehowa hpang de bai wa na matu karum ya ai shaloi gara atsam ningja ni nga ra ai kun? (“ Bai Wa Mayu Ai Ni Hpe Karum Ya Lu Ai Lam” ngu ai lawk hpe yu u.)

 ⁹ Yehowa mung dai ga shadawn na kawa hte bung ai. Wenyi lam hta katsi mat ai ni hpe tsawra nna, bai wa shangun mayu ai. Yehowa hpe kasi la nna, anhte mung shanhte bai wa lu hkra karum ya mai ai. Myit galu nna, tsawra matsan dum let myit tau ya ai lam madun ra ai. Hpa majaw madun ging ai kun? Gara hku madun mai ai kun?

10. Marai langai Yehowa hte bai hku hkau wa na matu karum ya ai shaloi hpa majaw myit galu ra ai kun?

¹⁰ Marai langai Yehowa hpang de bai wa na matu, aten ra ai majaw myit galu ra ai. Myitsu salang ni hte hpunau nauna ni chyahkring hkring sa chyai ai majaw, Yehowa hpe bai nawku wa ai ngu katsi mat ga ai masha law law tsun ai. Sinpraw Dingda Asha kaw nga ai nauna Nansi ndai hku laika ka ai: “Grai hkau ai nauna gaw ngai hpe karum ya ai. Kana langai zawn ngai hpe tsawra ai. An arau galaw wa ai kaja ai lam ni hpe bai tsun dan ai. Nye a hkamsha lam ni hpe myit galu let madat ya nna, hpaji jaw na matu n htingnut ai. Ngai hpe karum ya na matu galoi mung jin jin rai nga ai hku nna, manang ajet re ai hpe madun wa ai.”

11. Myit daw ai ni hpe shalan shabran ya na matu matsan dum myit hpa majaw ra ai kun?

¹¹ Matsan dum myit gaw grai kaja ai tsi hte bung nna, hkra machyi ai hkamsha lam ni hpe shamai ya lu ai. Katsi mat ai masha nkau gaw, nawku hpung na marai langai ngai a majaw, shaning law law myit machyi nga ai rai na re. Dai majaw, Yehowa hpang de bai wa mayu ai myit n nga taw ai. Nkau mi gaw n tara ai ngu hkamsha ai majaw rai na re.  Shanhte tsun dan ai hpe madat ya nna, myit tau ya chye ai marai langai ngai ra chye ai. (Yak 1:19) Katsi mat ga ai Maria ndai hku tsun ai: “Ngai tsun ai hpe madat ya ai, shalan shabran ya ai, lam matsun ya ai marai langai ra ai.”

12. Yehowa a tsawra myit gaw sumri hte gara hku bung ai kun?

¹² Chyum Laika hta, Yehowa a tsawra myit hpe sumri langai hte shingdaw da ai. Gara hku bung ai kun? Ndai ga shadawn hpe yu yu ga. Panglai hta nang hka lim nga ai shaloi, marai langai gaw asak hkye palawng kabai ya ai ngu shingran yu u. Dai palawng gaw hka ntsa waw lu hkra karum ya ai majaw, grai chyeju dum na re. Raitim, matut asak hkrung na matu gaw n karum ya lu ai. Hka gaw grai katsi ai majaw, asak hkye ai hkali de n du dingsa, asak lawt lu na n re. Sumri hpe jahkrat ya nna, hkali ntsa de gang shalun ya ai marai langai ngai ra ai. Yehowa gaw shi hte tsan mat ai Israela ni hte seng nna ndai hku tsun ai: “Masha hpe dun ga ai sumri ngu ai, tsaw ra ai sumri hte, ngai shanhte hpe dun nngai.” (Hos 11:4) Manghkang ni, myit tsang ai lam ni hta lup nga ai ni hte seng nna, Karai Kasang gaw dai hte maren hkamsha ai. Shanhte hpe tsawra ai lam chye shangun mayu nna, bai wa na matu karum ya mayu ai. Yehowa gaw shanhte hpe tsawra myit madun na matu, nang hpe akyu jashawn chye ai.

13. Tsawra myit a atsam hte seng ai mahkrum madup langai hpe tsun dan u.

¹³ Wenyi lam hta katsi mat ai ni hpe Yehowa hte anhte tsawra ai lam tsun dan na matu grai ahkyak ai. Shawng na sumhpa hta lawm ai shaning 30 jan katsi mat ga ai Pabalo ndai hku tsun ai: “Lahpawt mi hta, ngai nta kaw na  pru wa ai shaloi, asak kaba ai nauna langai hte hkrum ai. Shi gaw ngai hpe tsawra myit hte tsun shaga ai. Ma langai zawn ngai grai yawn nna hkrap ai. Ngai hpe ga shaga na matu, Yehowa nang hpe shangun dat sam ai ngu shi hpe ngai tsun ai. Dai laman hta sha, Yehowa hpang de bai wa na matu ngai dawdan kau ai.”

14. Luka 15:4, 5 na ga shadawn hku nga yang dam mat ai sagu hpe bai mu ai shaloi sagu rem wa hpa galaw ai kun?

¹⁴ Katsi mat ai ni gaw anhte a karum shingtau lam ra ai. Yesu a ga shadawn hta na dam mat ai ma zawn, shanhte mung grai yawn nga na re. Satan mungkan hta hkrum wa ai lam ni a majaw, wenyi lam hta katsi mat wa ai rai na re. Yehowa a ntsa, shanhte a makam masham bai ngang kang wa hkra karum ya ra ai. Dam mat ai sagu ga shadawn hta, sagu rem wa gaw sagu hpe shi a lahpa ntsa mara nna, bai woi wa ai ngu Yesu tsun ai. Dam mat ai sagu hpe bai tam na matu, aten jaw ai, n-gun shadat ai. Sagu gaw shi hkrai bai n wa lu ai majaw, pawn wa ra na hpe shi chye ai.​—Luka 15:4, 5 hpe hti u.

15. Yehowa hpang de bai wa mayu ai ni hpe anhte gara hku karum ya lu ai kun? (“ Manu Dan Ai Hkingrai” ngu ai lawk hpe yu u.)

¹⁵ Gawng kya ai lam ni tawt lai lu hkra, katsi mat ai ni hpe karum ya ai shaloi, aten hte n-gun atsam ra chye ai. Raitim, Yehowa a chyoi pra ai wenyi, shi a Mungga hte nawku hpung kaw na madi shadaw ya ai laili laika ni hte wenyi lam hta bai kaja wa hkra anhte karum ya lu ai. (Rom 15:1) Dai hpe gara hku galaw lu ai kun? Mahkrum madup nga ai myitsu salang langai ndai hku tsun ai: “Katsi mat ai masha law malawng gaw, Yehowa  hpang de bai wa na matu dawdan ai shaloi, Chyum Laika bai hkaja ra ai.” * Dai majaw, katsi mat ai marai langai hte Chyum Laika hkaja na matu, nang hpe karum hpyi yang kabu gara hte hkap la ging ai. Myitsu salang ndai hku mung tsun ai: “Katsi mat ai marai langai hte Chyum ga sharin ai hkaw tsun masha gaw, kaja ai manang byin ra nna, kam mai ai, hkamsha lam ni hpe tsun dan mai ai wa byin ra ai.”

16. Lamu kasa ni anhte hpe karum ya ai lam gara hku chye lu ai kun?

¹⁶ Yehowa hpang de bai wa mayu ai ni hpe tam mu hkra, lamu kasa ni anhte hpe karum ya nga ai mahkrum madup ni nga ai. (Shr 14:6) Ga shadawn, Ikwedaw mung kaw na Sibiyo gaw, nawku hpung de bai wa mayu ai majaw karum ya na matu akroi anoi akyu hpyi nga ai. Dai shaloi, myitsu salang lahkawng gaw nta chyinghka sa akawk ai. Shan sa chyai ai laman, ra nga ai karum shingtau lam hpe lajang ya wa ai.

17. Katsi mat ai ni hpe anhte karum ya ai shaloi gara hku hkamsha ai kun?

¹⁷ Yehowa hpang de bai wa ai ni hpe karum ya ai shaloi, anhte grai kabu ga ai. Katsi mat ai ni hpe laksan hku nna myit lawm ai lam madun ai ningshawng Sabedaw ndai hku tsun ai: “Shanhte bai wa ai shaloi ngai grai kabu ai majaw, myiprwi si pyi hkrat ai. Yehowa gaw shi a sagu ni hpe Satan mungkan kaw na hkye la na matu hte nawku hpung de bai wa na matu karum ya ai hta, ngai lawm lu ai majaw grai kabu ai.”​—Kas 20:35.

18. Nang gaw katsi mat ai wa rai yang hpa hpe kam mai ai kun?

¹⁸ Nang gaw wenyi lam hta katsi mat ai wa rai yang, Yehowa nang hpe tsawra nga dingyang re ai hpe kam u. Nang hpe shi hpang de bai wa shangun mayu ai. Bai wa na matu lam nkau hpe nang galaw ra ai. Yesu a ga shadawn hta lawm ai kawa zawn, Yehowa mung nang bai wa na matu la nga nna, bai wa ai shaloi kabu gara hte hkap tau la na re.