1. Mara galaw ai ni myit malai lu yang, Yehowa hpa galaw ya na kun?

 YEHOWA gaw Hpan Madu, Tara Jaw Ya Ai Wa, Tara Agyi rai nna, tsawra myit nga ai Kawa mung re. (Shk 100:3; Esa 33:22) Karai hte n htang shai nna mara ni galaw tim, jat ai myit malai lu yang, anhte hpe shi mara raw ya na ahkang nga ai sha n-ga, sharawng awng let mara raw ya ai. (Shk 86:5) Myihtoi Esaia hku nna ndai hku ga sadi jaw da ai: “Nanhte a yubak gaw, sai zawn hkyeng ti mung, hkyen zawn hpraw na ra ai.”​—Esa 1:18.

2. Shada da hku hkau lam nga na matu hpa galaw ra ai kun?

² Anhte n hkum tsup ai ni re ai majaw, shada da myit hkra machyi hkra, tsun hkrup, galaw hkrup chye ai. (Yak 3:2) Raitim, mara raw ya chye hkra shakut na nga yang, bai hku hkau lu ai. (Gsh 17:9; 19:11; Mat 18:21, 22) Anhte shada da myit hkra machyi hkra kachyi mi tsun hkrup, galaw hkrup yang pyi, Yehowa gaw mara raw ya shangun mayu ai. (Kol 3:13) Dai zawn, mara raw ya na matu, kaja ai lam ni nga ai. Anhte a mara hpe, Yehowa gaw “htum hkra raw dat kau ya” ai majaw re.​—Esa 55:7.

3. Ndai sumhpa hta hpa lam bawngban na kun?

³ Ndai sumhpa hta ndai ga san ni hpe bawngban mat na re: Yehowa a mara raw ya ai lam hpe n hkum tsup ai masha ni gara hku kasi la mai na kun? Gara zawn mara ni hpe myitsu salang ni chye hkra tsun dan ra ai kun? Shada da mara raw ya na matu, Yehowa hpa majaw n-gun jaw ai kun? Kaga ni a mara a majaw grai hkra machyi ga ai hpunau  nauna ni kaw na hpa sharin la mai ai kun?

4. (a) Yehowa a mayam langai mara kaba galaw hkrup yang hpa galaw ra ai kun? (b) Mara galaw da ai wa hte hkrum ai shaloi, myitsu salang ni a lit gaw hpa rai kun?

⁴ Mara kaba ni hpe myitsu salang ni chye hkra tsun dan ra ai. Dai zawn mara nkau hpe, 1 Korinhtu 6:9, 10 hta mu lu ai. Karai a tara ni hpe tawt lai ai gaw, mara kaba re. Hkristan langai gaw, dai zawn mara hpe galaw hkrup yang, Yehowa kaw akyu hpyi nna mara raw ya na matu, hpyi nem ra ai. Nawku hpung kaw na myitsu salang ni hpe mung tsun dan ra ai. (Shk 32:5; Yak 5:14) Gawng malai hkungga hpe madung tawn nna, mara ni hpe tsep kawp raw ya na ahkang Yehowa chyu sha nga ai. b Myitsu salang ni a lit gaw hpa rai kun? Mara galaw ai wa, nawku hpung hta matut nga ging, n nga ging ngu ai hpe Chyum Laika hta madung nna dawdan na matu, myitsu salang ni hpe Yehowa lit jaw da ai. (1 Ko 5:12) Ndai ga san ni hpe myitsu salang ni myit shalawm ai: Mara hpe dingsang galaw ai kun? Mara hpe tau hkrau hkyen lajang nna galaw ai kun? Galaw ai grai na sai kun? Chyahkring hkring galaw ai kun? Jet ai myit malai lu ai madi madun lam nga ai kun? Yehowa mara raw ya ai ngu ai dan leng ai madi madun lam nga ai kun?​—Kas 3:19, 20.

5. Myitsu salang ni a galaw ai lam a majaw hpa akyu ni lu ai kun?

⁵ Mara galaw da ai wa hte myitsu salang ni hkrum ai shaloi, yaw shada lam gaw, sumsing lamu hta dawdan ai hte maren, ginding aga hta dawdan lu na matu re. (Mat 18:18) Dai lamang gaw nawku hpung hpe gara hku akyu shabyin ya ai kun? Myit malai n lu ai mara galaw ai wa hpe nawku hpung kaw na shapraw kau ai. Dai gaw, Yehowa a manu dan ai sagu ni hpe shoihpa kaw na makawp maga ya ai re. (1 Ko 5:6, 7, 11-13; Tit 3:10, 11) Mara galaw ai wa hpe mung, myit malai lu na matu, Yehowa mara raw ya ai lam kaw na akyu lu na matu karum ya ai. (Luk 5:32) Wenyi lam bai kaja wa hkra karum ya na matu, myit malai lu ai wa hpe myitsu salang ni akyu hpyi ya ai.​—Yak 5:15.

6. Marai langai shapraw hkrum ai nga yang, shi hpe Yehowa mara raw ya na matu mai byin ai kun? Sanglang dan u.

⁶ Mara galaw da ai wa gaw, myitsu salang ni hte hkrum ai shaloi, myit malai n lu ai ngu saga. Rai yang, shi gaw nawku hpung kaw na shapraw hkrum na re. Mungdan a tara upadi hpe tawt lai da ai nga yang, tara jeyang n hkrum hkra, myitsu salang ni maga ya na n re. Myit malai lu ai raitim, n lu ai raitim, tara tawt lai ai kadai hpe raitim, tara jeyang na matu, dam jaw na matu, asuya ni hpe Yehowa ahkang jaw da ai. (Rom 13:4) Hpang hta, mara galaw ai wa gaw jet ai myit malai lu ai, galai shai ai nga yang, mara raw ya na matu Yehowa jin jin re. (Luk 15:17-24) Mara kaba ni galaw da ai nga yang pyi mara raw ya ai.​—2 Hl 33:9, 12, 13; 1 Tm 1:15.

7. Tinang hpe shut hpyit ai wa hpe gara lam hku nna mara raw ya lu ai kun?

⁷ Mara galaw da ai wa hpe Yehowa mara raw ya, n raw ya ngu ai hpe dawdan na matu, anhte hta lit n nga ai majaw chyeju dum hpa re. Raitim, anhte nan dawdan ra ai lam nga ai. Hpa rai kun? Masa nkau hta, tinang hpe grai nan shut hpyit da ai wa gaw, mara raw ya na matu, sa hpyi nem chye ai. N sa hpyi nem ai mung rai chye ai. Dai zawn masa ni hta, shi hpe mara raw ya na matu, masin n pawt na matu dawdan mai ai. Laksan hku nna, tinang grai hkra machyi mat ai nga yang, dai zawn  mara raw ya na matu, aten hte shakut ai lam ra ai. 1994, September 15 kaw shapraw ai Sin Langchyi (Myen) hta ndai hku ka da ai: “Mara galaw ai wa hpe mara raw ya ai gaw, mara hpe hkap la ai ngu ai lachyum n re. Hkristan ni a matu, mara raw ya ai ngu ai gaw, masa lam ni hpe Yehowa a lata hta kam ai myit hte ap dat ai re. Yehowa gaw ninggawn tawa hta dingman dik htum Tara Agyi rai nna, htap htuk ai aten hta tara rap ra ai hku galaw ya na re.” Mara raw ya na matu, rap ra ai hku tara dara ya na Yehowa a lata hta ap da na matu, Yehowa hpa majaw n-gun jaw ai kun?

8. Yehowa a matsan dum myit hpe chyeju dum ai lam gara hku madun lu ai kun?

⁸ Mara raw ya ai gaw, chyeju dum ai lam madun ai re. Ga shadawn langai hta, hka grai kap nna n lu wa ai mayam hpe, hka shaprai kau ya ai hkawhkam hte Yehowa hpe Yesu shingdaw wa ai. Dai mayam gaw, shi hpe hka loi mi kap nga ai mayam hpe matsan dum myit n madun ai. (Mat 18:23-35) Yesu hpa sharin ya ai kun? Yehowa a grai kaba ai matsan dum myit hpe anhte teng sha chyeju dum yang, kaga ni hpe mara raw ya na re. (Shk 103:9) Grai na sai aten hta shapraw ai Sin Langchyi hta ndai hku tsun da ai: “Shada da hpe kade lang mara raw ya tim, Hkristu hku nna Karai madun ai mara raw ya ai lam hte matsan dum myit hpe gaw kadai mung dep lu na n re.”

9. Kadai ni hpe Yehowa matsan dum ai kun? (Mahte 6:14, 15)

⁹ Mara raw ya ai wa gaw mara raw hkrum na re. Matsan chye dum ai ni hpe Yehowa matsan dum ai lam madum ai. (Mat 5:7; Yak 2:13) Sape ni hpe gara hku akyu hpyi ra ai hpe sharin ya ai shaloi, Yesu dan leng hkra dai lam hpe tsun wa ai. (Mahte 6:14, 15 hpe hti u.) Mayam Yoba hpe Yehowa tsun ai ga kaw nna mung, dai lam hpe sharin la lu ai. Elihpa, Bilda, Zohpa ni a grai mazup ai ga ni a majaw, Yoba grai hkra machyi ai. Raitim, shanhte a matu akyu hpyi ya na matu, Yoba hpe Yehowa tsun ai. Dai zawn, akyu hpyi ya ngut ai hpang hta, Yoba hpe Yehowa shaman chyeju jaw ai.​—Yob 42:8-10.

10. Myit machyi nga yang, hpa majaw tinang sha hkra machyi ai kun? (Ehpesu 4:31, 32)

¹⁰ Myit machyi nga yang, tinang sha hkra machyi na re. Myit machyi ai lam gaw, grai li ai lit hte bung ai. Dai lit n nga yang lu la na myit simsa lam hpe Yehowa hkamsha shangun mayu ai. (Ehpesu 4:31, 32 hpe hti u.) Shi ndai hku n-gun jaw da ai: “Masin pawt ai kau u, n-yun hkum bu et.” (Shk 37:8) Dai hpaji jaw ga hpe hkan sa ai gaw hpaji rawng ai lam re. Myit machyi ai gaw, myit hte hkum hkrang hpe hkra machyi shangun ai. (Gsh 14:30) Anhte maga kaw na myit machyi nga tim, kaga wa gaw hpa mung n byin ai. Dai zawn masa gaw, tinang gaw gung lu taw ai rai nna tinang sha hkra machyi ai. Kaga wa n hkra machyi ai. Dai majaw mara raw ya ai gaw, tinang hpe akyu jaw ai. (Gsh 11:17) Myit simsa nna, Yehowa a magam hpe matut gun hpai lu na re.

11. Matai htang ai hte seng nna Chyum Laika hta gara hku tsun da ai kun? (Roma 12:19-21)

¹¹ Matai htang ai gaw Yehowa a bungli re. Tinang hpe shut hpyit ai wa hpe matai htang na matu, anhte hpe Yehowa ahkang n jaw da ai. (Roma 12:19-21 hpe hti u.) Anhte a ningmu gaw shadawn sharam sha nga nna, n hkum tsup ai. Masa lam ni hpe jaw ai hku n dawdan lu ai. (Heb 4:13) Kalang lang, hkamsha lam ni a majaw, atsawm n dawdan lu ai. Yaku ndai hku ka na matu Yehowa shung ya  ai: “Masha a masin pawt ai gaw, Karai Kasang a ding hpring ai lam hpe shachyen nga lu ai n rai.” (Yak 1:20) Jaw ai hpe Yehowa galaw na, tara rap ra ai hku dawdan ya na hpe kam mai ai.

12. Yehowa a tara rap ra ai lam hpe kam ai lam gara hku madun lu ai kun?

¹² Mara raw ya ai gaw, Yehowa tara rap ra ai hpe kam ai re. Masa lam ni hpe Yehowa lata hta ap da ai gaw, mara a majaw hkra machyi ai lam ni hpe Yehowa bai shading sharai ya na hpe kam ai re. Karai ga sadi jaw da ai mungkan nnan hta, myit hkra machyi wa ai lam ni hpe, “dum na” mung n rai, “myit sumru yu na mung n rai” sai. (Esa 65:17) Raitim, tinang grai hkra machyi mat ai shaloi, myit machyi hpa lam ni hpe malap kau lu ai kun? Nkau gara hku malap kau lu wa ai lam hpe hkaja yu ga.

13-14. Toni hte Hose a mabyin kaw na mara raw ya ai hte seng nna hpa chye lu ai kun?

¹³ Kaga ni galaw ai lam a majaw, grai hkra machyi mat ai shaloi hta pyi, mara raw ya na matu, hpunau nauna nkau dawdan ai. Shanhte hpa shaman chyeju ni lu la ai kun?

¹⁴ Hpilipai hta nga ai Toni c gaw, Sakse Hkam n byin shi ai yang, Hose ngu ai wa gaw shi kahpu ba hpe sat kau ai. Dai aten hta, masin pawt ja nna, grai mazut ai Toni gaw matai htang mayu wa ai. Hose rim hkrum nna, htawng hkrat mat ai. Hpang hta, shi lawt wa ai majaw, shi hpe sat na matu, Toni sinat mari ai. Dai aten hta, Toni gaw Yehowa Sakse ni hte Chyum Laika hkaja hpang ai. Shi ndai hku tsun ai: “Prat hpe galai shai na matu, myit n machyi na matu ra ai hpe Chyum Laika hkaja ai shaloi chye wa ai.” Hpang hta, Toni gaw hkalup hkam nna myitsu salang byin wa ai. Hose mung hkalup hkam ngut sai Sakse Hkam byin nga ai hpe Toni chye ai shaloi, grai mau mat ai. Shan bai hkrum ai shaloi,  shada da ahpum hkat nna, Hose hpe mara raw ya ai ngu Toni tsun ai. Dai zawn mara raw ya dat ai majaw, grai pyaw ai ngu Toni tsun ai. Sharawng awng let mara raw ya ai Toni hpe Yehowa shaman chyeju jaw ya ai re.

15-16. Peta yan Su a mabyin kaw na mara raw ya ai hte seng nna hpa chye lu ai kun?

¹⁵ 1985 hta, Peta yan Su gaw Nawku Htingnu hta zuphpawng lung nga ai shaloi, akajawng sha kapaw ai lam hkrum wa ai. Marai langai gaw Nawku Htingnu hta bawm sa hkam da ai re. Su grai sawng hkra, hkra machyi mat ai. Mu lu, na lu, hkamsha lu ai atsam ni n nga mat ai. d Shan ndai hku chyahkring hkring myit ma ai: ‘Dai daram sawng ai hpe kadai galaw ai i?’ Shaning law law na ai hpang, bawm sa hkam ai wa rim hkrum nna, htawng hkrak mat ai. Shi gaw Yehowa Sakse n re. Shi hpe mara raw ya ai kun? ngu Peta yan Su hpe san ai shaloi ndai hku tsun ai: “Myit machyi ai, masin n si hkraw ai gaw myit masin, hkum hkrang hkra machyi shangun ai ngu Yehowa sharin ya ai. Dai majaw, masin pawt ai, myit machyi ai hpe malap kau nna, shawng de sha matut hkawm sa lu hkra karum ya na matu, Yehowa kaw akyu hpyi ai.”

¹⁶ Mara raw ya na matu shan loi ai kun? N loi ai. Shan ndai hku matut tsun ai: “Su hkrum nga ai lam ni a majaw, prat hta yakhkak ai lam ni hkrum wa shagu grai masin pawt wa ai. Raitim, dai lam hpe sha, matut n myit nga ai majaw, masin kawp mat ai. Bawm sa hkam ai wa lani mi hta hpunau byin wa yang, alum ala hte hkap tau la na re. Ndai mabyin kaw na sharin la lu ai gaw, Chyum Laika npawt tara ni hpe hkan sa yang, jet ai lawt lu ai lam hkamsha ai hpe re. Hkra machyi ai lam yawng hpe, kade nna yang, Yehowa yeng seng kau ya sana re ai hpe chye ai majaw mung shalan shabran lam lu ai.”

17. Maira a mabyin kaw na mara raw ya ai hte seng nna hpa chye lu ai kun?

 ¹⁷ Maira tengman ai lam hpe hkaja hpang ai shaloi, shi gaw dinghku num rai nna, ma 2 nga sai. Madu wa gaw tengman lam hpe n hkap la ai. Dinghku htak nna nta masha ni hpe kau da mat ai. Maira ndai hku tsun ai: “An nu ni hpe shi kau da mat ai shaloi, sadi run hkrum ai majaw, grai myit tsang ai, n kam ai, yawn ai, myit malai lu ai, tinang hkum tinang mara shagun ai, masin pawt ai.” Dinghku matut mahkai lam htum mat tim, sadi run hkrum ai ngu ai hkra machyi lam gaw matut ngam nga ai. Shi ndai hku matut tsun ai: “Shata law law grai hkamsha ra ai. Yehowa hte, kaga ni hte, hku hkau lam htenza wa ai.” Ya gaw, masin pawt ai, myit machyi ai ni mat mat sai ngu shi tsun ai. Ma ni a kawa pyi lani mi aten hta, Yehowa hte hku hkau wa na ngu Maira myit mada nga ai. Htawm hpang hpe sha shi myit maju jung lu sai. Ningrum ningtau n nga ai kanu hku nna, ma 2 hpe Yehowa a mayam byin wa hkra bau maka lu wa ai. Dai ni aten hta shi gaw, ma ni, kanam ni, kashu ni hte rau Yehowa hpe kabu gara let nawku nga ai.

18. Kaba Htum Ai Tara Agyi Yehowa hte seng nna hpa hpe kam mai ai kun?

¹⁸ Kadai hpe mung tara dawdan na ahkang anhte n lu da ai majaw, chyeju dum hpa re. Tara dawdan lam hpe Kaba Htum Ai Tara Agyi Yehowa gaw shi nan galaw ai. (Rom 14:10-12) Karai Kasang gaw, hkum tsup nna jaw ai tsang madang hte maren galoi mung dawdan na ngu ai hpe anhte kam mai ai. (Nin 18:25; 1 Hk 8:32) N dingman ai hpe shi galoi n galaw ai.

19. Hkum tsup ai tara agyi Yehowa gaw hpa ni galaw ya na kun?

¹⁹ Shinggyim masha ni a n hkum tsup ai lam hte yubak mara hpe, Yehowa tsep kawp yeng seng kau ya na aten hpe anhte myit mada nga ai. Myit masin, hkum hkrang hkra machyi ai lam yawng hpe Karai tsep kawp shamai ya na re. (Shk 72:12-14; Shr 21:3, 4) Hkra machyi ai lam ni myit hta pru wa sana n re. Grai kaja ai dai aten hpe la nga ai laman, shada da mara raw ya ai hku nna, Yehowa hpe kasi la na matu, Shi atsam jaw nga ai majaw chyeju dum hpa re.