1. (a) Anhte hpe Yehowa hpa myit mada lam jaw da ai kun? (b) “Yehowa hpe myit mada nga” ai ngu ai lachyum gaw hpa rai kun? (“Ga Si A Lachyum” hpe yu u.)

 YEHOWA gaw shi hpe tsawra ai ni hpe grai kaja ai myit mada lam jaw da ai. Kade n na yang, machyi makaw ai lam, yawn hkyen ai lam hte si hkrung si htan hpe yeng seng kau ya sana re. (Shr 21:3, 4) Shi hpe myit mada ai, “myit gyip ai ni” ginding aga hpe hparadisu byin hkra galaw ai shaloi, Shi karum ya na re. (Shk 37:9-11) Anhte langai hpra mung, shi hte grau hku hkau lu wa na re. Mauhpa myit mada lam re. Karai a ga sadi hpring tsup wa na hpe kam mai ai lam hpa nga ai kun? Yehowa gaw galoi mung ga sadi dung ai. Dai gaw, “Yehowa hpe myit mada nga” lu ai madung lam re. b (Shk 27:14) Ga sadi ni hpe Karai jahpring shatsup ya na ten hpe myit galu let, kabu gara let la nga ai hku nna, myit mada lam anhte madun lu ai.​—Esa 55:10, 11.

2. Yehowa hpa galaw wa sai kun?

² Yehowa gaw ga sadi dung ai lam sakse madun wa sai. Ga shadawn langai hpe yu yu ga. Anhte a prat hta, mungdan shagu, amyu shagu, amyu ga shagu kaw na masha ni hpe kahkyin na, san seng ai nawku dawjau lam hta kahkyin gumdin shangun na ngu, Shingran Laika hta Yehowa ga sadi jaw da ai. Dai laklai ai masha hpawng hpe, “wunawng wuwa kaba” ngu dai ni chye da ai. (Shr 7:9, 10) Amyu bawsang, amyu ga hte shingdu labau amyu myu kaw na, num, la, ma  ni hte hpawng de da tim, simsa nna kahkyin gumdin let mungkan grup hpunau nauna ni byin nga ai. (Shk 133:1; Yhn 10:16) Shanhte gaw myit rawt let hkaw tsun nga ai. Madat mayu ai ni hpe, grau kaja ai myit mada lam hte seng ai lam hpe tsun dan na matu ayan jin jin rai nga ai. (Mat 28:19, 20; Shr 14:6, 7; 22:17) Nang gaw wunawng wuwa kaba hta lawm ai nga yang, grau kaja ai lam ni byin wa sana ngu ai myit mada lam hpe grai manu shadan na re.

3. Satan a yaw shada lam gaw hpa rai kun?

³ Na a myit mada lam hpe Satan htenza mat shangun mayu ai. Shi a yaw shada lam gaw, Yehowa gaw lanu lahku lam n nga ai, ga sadi n dung ai ngu nang kam mat na matu re. Anhte a myit mada lam mat mat yang, nden marai n nga mat nna Yehowa hpe pyi kau da mat chye ai. Ndai sumhpa hta mu lu na hte maren, Yoba a myit mada lam htenza mat hkra, Yehowa hpe n nawku mat hkra Satan shakut wa ai.

4. Ndai sumhpa hta hpa lam bawngban na kun? (Yoba 1:9-12)

⁴ Yoba sadi n dung hkra, Satan lang wa ai ladat ni hpe ndai sumhpa hta bawngban na re. (Yoba 1:9-12 hpe hti u.) Yoba a kasi ningli kaw na hpa sharin la lu ai lam, anhte langai hpra hpe Karai tsawra ai lam, ga sadi ni hpring tsup wa na hpe dum na matu hpa majaw ahkyak ai lam mung bawngban na re.

5-6. Aten kadun laman Yoba hpa byin mat ai kun?

⁵ Yoba a prat gaw grai ngwi pyaw ai. Yehowa hte hku hkau lam kaja ai. Nta masha grai law tim, kahkyin gumdin ai. Grai lusu ai. (Yob 1:1-5) Raitim, lani mi laman hta sha, yawng ngu na daram sum mat ai. Shawng nnan, shi a dusat ni si mat ai. (Yob 1:13-17) Dai hpang, shi tsawra ai kasha ni yawng si mat ai. Dai yawn hkyen lam hpe myit yu u. Kasha langai si mat yang pyi, kanu kawa ni grai yawn ai. Kasha 10 ting si mat ai ngu ai shiga hpe Yoba yan la na dat ai aten hta, kade daram kajawng kaja byin nga na, yawn nga na hpe shingran yu u. Yoba gaw grai yawn let shi palawng gang je nna ga de galau mat ai gaw mauhpa n re.​—Yob 1:18-20.

⁶ Dai hpang, Satan gaw Yoba hpe kaya hkrum hkra ana kaba byin shangun ai. (Yob 2:6-8; 7:5) Moi aten hta, Yoba hpe masha ni grai hkungga ma ai. Hpaji sa hpyi ma ai. (Yob 31:18) Ya gaw, shi hpe kau da mat sai. Hpunau majing ni, jinghku majing ni, nta kaw na mayam ni pyi n hkap la mat sai.​—Yob 19:13, 14, 16.

7. (a) Hpa majaw mayak mahkak ni hkrum ai ngu Yoba shadu wa ai kun? (b) Sumla hta mu lu ai zawn, Hkristan langai gara hku hkrum chye ai kun?

⁷ Yehowa a myiman sum mat ai majaw, ya na zawn hkrum sha ai re ngu nna Yoba hpe Satan kam shangun mayu ai. Ga shadawn, Satan gaw nbung laru kaba hpe jailang nna, Yoba a kasha 10 arau lusha nga ai nta hpe jahten kau ai. (Yob 1:18, 19) Sumsing lamu kaw na wan jahkrat nna Yoba a dusat ni, mayam ni hpe mung wan hkru shangun dat ai. (Yob 1:16) Nbung laru ni, wan ni gaw sumsing lamu kaw na hkrat wa ai majaw, Yehowa galaw ai ngu Yoba kam mat ai. Shi gaw Yehowa masin pawt hkra lama ma galaw da ai majaw re ngu shadu mat ai. Dai pyi, sumsing Kawa hpe mara n shagun wa ai. Shaning ni laman, Yehowa kaw na kaja ai ni grai law hkra lu da ai hpe myit dum ai. Kaja ai hpe kabu gara let hkap la yang, n kaja ai ni hpe  mung sharawng awng let hkap la ra ai ngu myit la ai. Dai majaw, “Yehowa mying nsang gaw a nga u ga law” ngu tsun wa ai. (Yob 1:20, 21; 2:10) Ja gumhpraw ni, kasha ni, hkamja lam ni hkra machyi tim, Yoba matut sadi dung ai. Raitim, Satan asum n jaw shi ai.

8. Kaga gara ladat hpe Satan naw jailang ai kun?

⁸ Tinang hkum tinang manu n dan ai ngu, Yoba hkamsha hkra, hpyi hpun ai manang 3 hpe Satan jailang ai. Shut ai mara ni grai law ai majaw, ya na zawn hkrum sha ai ngu shanhte jawm tsun ai. (Yob 22:5-9) Kade daram kaja hkra Yoba shakut tim, Karai ahkyak n shatai ai ngu hkamsha hkra mung shanhte galaw ma ai. (Yob 4:18; 22:2, 3; 25:4) Yoba hpe Karai Kasang tsawra ai, lanu lahku ai, manu shadan ai hpe ntsen wa hkra shakut ma ai. Shanhte a ga ni a majaw, myit mada lam n nga sai ngu Yoba hkamsha na re.

9. Nden marai nga na matu, Yoba hpe hpa gaw karum ya ai kun?

⁹ Ndai lam hpe shingran yu ga. Yoba gaw wan dap hta grai machyi sawng let dung nga ai. (Yob 2:8) Akyang lailen n kaja ai wa ngu nna, manang ni jahpoi asawng ai. Dai gaw, kasha ni si mat ai majaw yawn hkyen nga ai Yoba hpe grau myit hkyi lit li shangun ai. Nnan hta, Yoba atsin sha nga taw ai. (Yob 2:13–3:1) Yoba atsin sha nga nga ai gaw, Hpan Madu hpe kau da mayu ai majaw ngu manang ni shadu yang shut mat na. Kalang mi hta, Yoba gaw baw hpe sharawt dat nna, hpyi hpun ai manang ni hpe azi yu let, “ngai si ai du hkra nye myit tsup ai hpe ngai nyet kau na n rai” ngu tsun dat ai. (Yob 27:5) Mayak mahkak ni hkrum nga tim, nden marai nga na matu, Yoba hpe hpa gaw karum ya ai kun? Mayak mahkak ni hpe tsawra myit nga ai Karai Kasang jahtum kau ya na ngu ai hpe myit mada ai majaw re. Si mat yang pyi,  Yehowa bai jahkrung ya na hpe Yoba chye ai.​—Yob 14:13-15.

10. Yoba a labau gaw hpa sharin ya ai kun?

¹⁰ Yehowa hpe anhte kau da mat hkra, Satan atik anang n lu galaw ai lam, anhte hkrum ai lam yawng hpe Karai chye ai lam, Yoba a labau gaw sharin ya ai. Masa lam hte seng ai lam ni hpe grau chye hkra mung karum ya ai. Yoba kaw na sharin la lu ai laksan lam nkau hpe yu yu ga.

11. Yehowa hpe matut kamhpa yang hpa hpe kam mai ai kun? (Yaku 4:7)

¹¹ Yehowa hpe matut kamhpa yang, gara mayak mahkak hpe raitim anhte hkamjan lu nna, Satan hpe ninghkap lu ai lam, Yoba a mabyin gaw sakse madun ai. Akyu gaw hpa kun? Satan gaw anhte kaw na hprawng mat na ngu Chyum Laika hta hkrak tsun da ai.​—Yaku 4:7 hpe hti u.

12. Hkrung rawt ai myit mada lam gaw Yoba hpe gara hku n-gun lu shangun ai kun?

¹² Hkrung rawt ai myit mada lam hpe anhte aja awa kam ra ai. Shawng na sumhpa hta, tsun wa ai hte maren, anhte sadi run mat na matu, si na hkrit ai myit hpe Satan jailang ai. Asak hkrung na matu, Yoba gaw hpa hpe raitim galaw na, sadi pyi run na ngu Satan tsun wa ai. Satan shut mat ai. Si sana ngu sawn ai aten hta pyi, Yoba matut sadi dung wa ai. Yehowa a mai kaja ai lam hpe kam ai majaw, masa lam ni hpe Karai hparan ya na ngu ai hpe tsep kawp kam ai majaw re. Shi asak hkrung nga ai shaloi, masa lam ni hpe Karai n hparan ya yang pyi, htawm hpang hta shi hpe bai jahkrung ya na lam kam ai. Anhte hta mung, hkrung rawt ai myit mada lam nga nga yang, si na hpe hkrit ai majaw, sadi run mat ai baw byin na n re.

13. Yoba mabyin kaw Satan jailang ai ladat ni hpe hpa majaw sadi ra ai kun?

¹³ Yoba a mabyin hta, Satan jailang wa ai ladat ni hpe anhte sadi ra ai. Dai ni aten hta mung, dai zawn ladat hpe sha shi jailang nga ai. Satan ndai hku mara shangun da ai: “Masha [Yoba sha n-ga lawm] gaw shi a asak a matu tinang lu malu jaw kau na ra ai.” (Yob 2:4, 5) Dai gaw, Yoba hpe sha n-ga, masha yawng hpe mara shagun dat ai re. Yehowa hpe anhte teng sha n tsawra ai, asak hte seng wa yang, Karai hpe kau da na re ngu Satan tsun nga ai re. Anhte hpe Karai Kasang n tsawra ai, anhte shakut shaja ai lam hpe ahkyak n shatai ai ngu nna mung tsun ai. Yehowa hpe myit mada ai ni gaw, Satan a ladat ni hpe chye da ai majaw hkalem n hkrum ai.

14. Mayak mahkak ni gaw hpa byin shangun ai kun? Ga shadawn jaw u.

¹⁴ Mayak mahkak ni hpe tinang hkum tinang maram lu ai ahkaw ahkang re ngu nna mu mada ging ai. Hkrum wa ai mayak mahkak ni a majaw, Yoba gaw shi a gawng kya lam ni hpe chye wa nna sharai lu wa ai. Ga shadawn, grau nna shagrit shanem ra ai hpe chye wa ai. (Yob 42:3) Anhte mung mayak mahkak ni hkrum wa ai shaloi, tinang a lam grau chye wa lu ai. Grai hkam n kaja tim, htawng jahkrat hkrum ai hpunau Nikolai c ndai hku tsun ai: “Htawng gaw, dat man kayat ai jak (X-ray) hte bung ai. Hkristan langai hta gara atsam ningja ni nga ai hpe mu wa shangun ai. Tinang a gawng kya ai lam hpe chye yang she, sharai ra ai lam hpe shading sharai lu na re.

15. Kade a ga anhte madat ging ai kun? Hpa majaw kun?

 ¹⁵ Hpyen ni a ga n re ai sha, Yehowa a ga hpe anhte madat ra ai. Yehowa tsun ai hpe Yoba atsawm madat wa ai. ‘Nye a hpan lu ai atsam hpe nang mu ai kun? Nang hpa ni hkrum nga ai hpe ngai yawng mu ai. Nang hpe n lanu lahku ya lu ai ngu shadu nga ai kun?’ ngu Yoba hpe Yehowa tsun wa ai. Yehowa a mai kaja ai lam hpe chyeju dum let shagrit shanem ai hku nna Yoba ndai hku bai tsun ai: “Ngai gaw na a lam na hte na yu ni ai; ya chyawm gaw, nye myi hte nan nang hpe mu sa de ai.” (Yob 42:5) Dai ga ni tsun ai shaloi, Yoba gaw hkum ting ana ni byin nga nna, wan dap kaw dung let kasha ni a majaw yawn hkyen nga ai rai na re. Yehowa gaw Yoba hpe tsawra ai, ra sharawng ai ngu ai hpe shi kam hkra galaw wa ai.​—Yob 42:7, 8.

16. Esaia 49:15, 16 hku nga yang, mayak mahkak ni hkrum ai aten hta hpa hpe dum ging ai kun?

¹⁶ Dai ni aten hta mung, anhte hpe masha ni nkaw nlaw di chye ai. Manu n dan ai ngu hkamsha hkra galaw chye ai. Marai langai hpra hpe raitim, uhpung ting hpe raitim “masu ai hku hkan let mara amyu myu shagun” nna mying hten hkra galaw chye ai. (Mat 5:11) Yakhkak hkrum ai aten hta, anhte matut sadi dung na hpe Yehowa kam ai lam Yoba a labau kaw nna chye lu ai. Yehowa gaw Shi hpe myit mada ai ni hpe tsawra ai, galoi n kau da ai. (Esaia 49:15, 16 hpe hti u.) Karai a hpyen ni tsun ai masu ga ni hpe hkum madat. Turaki kaw na hpunau Jim a dinghku gaw grai sawng ai mayak mahkak ni hkrum wa ai. Shi ndai hku tsun ai: “Karai amyu masha hte seng nna n jaw ai shiga ni madat ai gaw, myit daw shangun ai hpe anhte chye ai. Dai majaw, Mungdan myit mada lam hpe sha myit maju jung ai.  Yehowa a magam hta sha amu law nga ai. Dai majaw, ngwi pyaw lam matut hkang lu ai.” Yoba zawn, anhte mung, Yehowa a ga hpe madat ai. Hpyen ni a masu ga ni a majaw, myit mada lam n mat mat ai.

17. Hebre daw kaba 11 hta madun da ai sadi dung ai num, la ni a kasi ningli kaw na hpa sharin la lu ai kun?

¹⁷ Yoba gaw grai sawng ai mayak mahkak ni hkrum wa tim, nden marai nga ai, sadi dung ai mayam re. Sumwi zawn law ai “sakse ni” a lam Hebre Laika hta kasa Pawlu tsun da ai. (Heb 12:1) Shanhte yawng mung grai sawng ai chyam dinglik lam ni hkrum wa tim, Yehowa hpe matut sadi dung ai. (Heb 11:36-40) Shanhte a hkamjan lu ai atsam hte shakut sharang ai lam gaw majoi byin mat ai kun? N byin ai. Shanhte asak hkrung nga ai laman, Karai a ga sadi ni yawng, hpring tsup ai hpe n mu lu wa tim, Yehowa hpe matut myit mada wa ai. Yehowa a myiman lu da ai hpe kam ai majaw, ga sadi ni hpring tsup wa ai hpe mu lu na ngu kam ai. (Heb 11:4, 5) Shanhte a kasi ningli gaw Yehowa hpe matut myit mada nga na ngu ai anhte a dawdan lam hpe ngang kang shangun ai.

18. Nang hpa hpe dawdan da ai kun? (Hebre 11:6)

¹⁸ Anhte asak hkrung nga ai mungkan gaw grau grau nna sawng wa ai. (2 Tm 3:13) Karai a amyu masha ni hpe Satan matut naw chyam dinglik nga ai. Shawng hta, gara mayak mahkak mi hkrum wa tim, “a hkrung nga ai Karai Kasang gaw anhte a myit mada shara rai nga ai” ngu ai hpe kam hpa let, Yehowa a matu shakut shaja let magam gun na matu dawdan da ga. (1 Tm 4:10) “Dai Madu gaw nachying myit yu machyi nga ai hte matsan yu dum nga ai” lam Yoba hpe jaw wa ai Karai a shaman chyeju ni gaw sakse re. (Yak 5:11) “Shi e hkan tam ai ni hpe chyeju htang jaw” ai hpe anhte kam let, Yehowa hpe matut sadi dung mat ga.​—Hebre 11:6 hpe hti u.