“Amen” ngu ai Inglik ga si gaw “dai hte maren byin u ga,” “teng sha byin u ga” ngu ai lachyum re. Dai gaw, “sadi dung ai” “kamhpa ging ai” ngu lachyum nga ai Hebre ga si kaw nna yu hkrat wa ai. Kalang lang, dai ga si hpe tara upadi hte seng ai lam hta mung lang ai. Marai langai gaw, dagam ga tsun ngut ai hpang, shi tsun ai ga hpe shagrin na matu, shi tsun ai ga gaw jaw ai hpe tsun na matu hte byin wa ai akyu ni hpe hkap la na matu, “amen” ngu nna tsun ai. (Bhk 5:21, 22) Shawa hpawng man hta “amen” ngu nna tsun yang, ga sadi dung na matu grau nna pyi ahkyak ai.​—⁠Neh 5:13.

“Amen” ngu tsun ai lam hte seng nna, Tara Jahprang daw kaba 27 hta grai kaja ai ga shadawn hpe mu lu ai. Israela ni gaw, Ga Sadi Tawn Da Ai Mungdan de shang ngut ai hpang, Ebala bum hte Gerizim bum lapran hta Tara ni hti dan ai hpe madat na matu zuphpawng ma ai. Shanhte gaw madat hkam la ai sha n-ga, Tara ni hpe hkap la ai lam hpe mung ndau shana ma ai. Hti dan ai lam ni hpe n hkan sa yang, byin wa na n kaja ai akyu ni hpe myit hkrum ai majaw “amen” ngu tsun nna dai hpe madun wa ai. (Trj 27:15-26) Hkying lam hku law ai num, la hte ma ni a nsen ja ja hte bai htang ma ai nsen hpe shingran yu u. (Ysh 8:30-35) Dai shani hta shanhte tsun wa ai ga hpe galoi mung malap sana n re. Israela ni gaw, dai ga hpe matut nna sadi dung wa ai hpe ndai hku ka matsing da ai: “Yawshu a prat tup hta mung, Israela masha ni a matu Yehowa galaw ai lam magup hpe chye nna Yawshu a hpang e shi hpe mu dep ai salang ni a prat tup hta mung, Israela masha ni Yehowa hpe jaw jau ma ai.”​—⁠Ysh 24:31.

Yesu mung, shi tsun ai lam ni teng ai hpe tsun mayu ai shaloi hta “amen” ngu nna tsun wa ai. Laksan lam hku nna mung dai ga hpe tsun wa ai. Ga ni tsun ngut ai hpang she, “amen” ngu tsun na malai,  lama ma hpe garai n tsun shi yang, “amen” ngu tsun nna shi a ga jaw ai hpe madun ai. * Shi tsun ai ga tsep kawp jaw ai hpe madat ai ni kam hkra, dai lam hku nna galaw wa ai. Karai Kasang a ga sadi ni hpring tsup wa hkra, galaw lu na ahkaw ahkang nga ai wa gaw shi langai sha re ai majaw, dai hku shi tsun lu ai re.​—⁠2 Ko 1:20; Shr 3:14.

Israela ni gaw, Yehowa hpe shakawn shagrau nna akyu hpyi ai shaloi “amen” ngu nna mung tsun ma ai. (Neh 8:6; Shk 41:13) Akyu hpyi ngut ai hpang, madat ai ni gaw dai ga tsun ai hku nna, akyu hpyi ai ga hpe myit hkrum ai lam madun ma ai. Sa du ai ni yawng gaw, dai lamang kaw shang lawm lu nna, Yehowa hpe dai lam hku nawku lu ai majaw kabu ma ai. Yerusalem de, Yehowa a sakse sumpu hpe Hkawhkam Dawi hpai wa ai shaloi, dai lam byin wa ai. Dai poi galaw nga ai laman, Dawi gaw, myit masin mahkra hte akyu hpyi ai mahkawn langai hpe hkawn wa ai. Dai hpe, 1 Hkawhkam Labau 16:8-36 hta mu lu ai. Dawi tsun ai ga hpe myit hkrum ai majaw, “shawa masha ni yawng, Amen, ngu nna, Yehowa hpe shakawn kungdawn” wa ai. Shanhte yawng gaw, Yehowa hpe arau nawku lu ai majaw grai kabu ma ai.

Tsaban langai na Hkristan ni mung, Yehowa hpe shakawn shagrau ai shaloi “amen” ngu nna tsun wa ai. Chyum Laika ka ai ni mung, dai ga hpe chyahkring hkring shalawm nna ka ma ai. (Rom 1:25; 16:27; 1 Pe 4:11) Sumsing lamu kaw nna wenyi hkum ni pyi, “Amen, Haleluya” ngu tsun nna, Yehowa hpe shakawn shagrau wa ai lam Shingran Laika hta tsun da ai. (Shr 19:1, 4) Tsaban langai na Hkristan ni gaw, zuphpawng hta akyu hpyi ngut ai hpang “amen” ngu ayan na tsun ma ai. (1 Ko 14:16) Dai hpe n myit yu ai sha tsun ai n re.

Amen ngu tsun ai lam a shingdu labau hpe hkaja ngut ai shaloi, akyu hpyi ngut ai hpang “amen” ngu tsun ai gaw hpa majaw htap htuk ai hpe anhte chye na wa sai. Tinang a akyu hpyi ga jahtum hta amen ngu tsun ai shaloi, anhte tsun ai ga ni gaw jaw ai hpe madun nga ai. Shawa hpawng hta na lu ai  akyu hpyi ga hpe anhte myit hkrum ai lam madun ai shaloi, nsen n pru tim pyi “amen” ngu tsun na matu anhte shadut hkrum ai. “Amen” ngu tsun ai gaw hpa majaw manu dan ai hpe hkaja yu ga.

Akyu hpyi ai gaw nawku dawjau ai lam hta lawm ai majaw myit maju jung. Amen hpe myit madung hte tsun mayu ga ai. Dai majaw, akyu hpyi ga hpe jaw ai ningmu hte atsawm myit maju jung madat la mayu ga ai. Akyu hpyi nna Yehowa hpe nawku ai shaloi, “amen” ngu tsun ai daram sha n-ga, akyu hpyi ga hpe myit maju jung ai hku nna nawku ga ai.

Anhte gaw nawku daw jau ai ni hku nna kahkyin gumdin nga. Shawa hpawng a matu akyu hpyi ai aten gaw, nawku hpung masha yawng shiga langai hpe sha kahkyin gumdin let madat nga ai re. (Kas 1:14; 12:5) Hpunau nauna ni hte arau “amen” ngu nna tsun na nga yang, grau nna kahkyin gumdin wa ai. “Amen” ngu anhte arau tsun ai shaloi, nsen pru ai raitim, n pru ai raitim, anhte hpyi shawn ai lam hpe galaw ya na matu Yehowa hpe shadut ya nga ai re.

Yehowa hpe shakawn shagrau. Nawku dawjau ai lam hta anhte galaw ai lam yawng hpe Yehowa sadi hkrup ai. (Luk 21:2, 3) Anhte a myit masin hta hpa nga ai, hpa gaw anhte hpe shadut ya ai ngu ai lam ni hpe shi chye ai. Zuphpawng hpe phone hte matut mahkai nna lung nga ai raitim, shagrit shanem let “amen” ngu nna anhte tsun ai hpe Yehowa teng sha sadi hkrup ai. “Amen” ngu anhte tsun ai gaw, dai zuphpawng hta Yehowa hpe arau shakawn shagrau nga ai re.

“Amen” ngu tsun ai ga gaw loi mi sha manu dan ai zawn raitim, grai ahkyak ai lam re. Dai ga hpe akyu jashawn ai hte seng nna, Karai a mayam ni gaw, “kamhpa ai lam, myit hkrum ai lam, myit masin hta nga ai myit mada lam” hpe madun dan lu ai ngu nna Chyum Laika hparat chyum langai hta tsun da ai. “Amen” ngu anhte tsun shagu Yehowa a myit hpe shapyaw ya lu u ga.​—⁠Shk 19:14.