Hpunau Jek yan Mari-Lin gaw 1988 kaw nna aten hpring magam hpe arau gun hpai wa ai. Shan gaw masa amyu myu hte maren galai shai lu nna, Guadeloupe zunlawng hte Pyintit Guiana hta magam lit amyu myu hpe gunhpai wa ai. Dai shara lahkawng hpe Pyintit ginjaw garan rung gaw woi awn nga ai. Shan hpe ga san nkau san yu ga.

Aten hpring magam gun na matu nan hpe hpa gaw shadut ya ai kun?

Mari-Lin: Guadeloupe zunlawng hta ngai nga kaba wa ai. Myit rawt ai Sakse Hkam nu hte shani tup hkaw tsun bungli hta chyahkring hkring shang lawm wa ai. Masha ni hpe ngai tsawra ai. Dai majaw, 1985 jawng ngut ai shaloi, ningshawng galaw hpang ai.

Jek: Hkaw tsun magam hpe ra sharawng ai aten hpring magam gun ai ni hte ramma aten hta ngai nga kaba wa ai. Jawng pat ai aten ni hta aten kadun ningshawng galaw ai. Kru ya hte Laban nhtoi ni hta, anhte gaw kalang lang mawdaw jawn nna, ningshawng ni hte hkaw tsun sa ai. Shani tup hkaw tsun sa nna, shana maga de gaw panglai de sa ai. Grai pyaw ai nhtoi ni re.

1988 hta Mari-Lin hte hkungran ngut nna kade n na yang, tinang hkum tinang ndai hku tsun ai: ‘An hta hpa lit mung n nga ai majaw, hkaw tsun magam hta grau shang lawm ging ai.’ Ngai gaw Mari-Lin hte arau ningshawng galaw hpang ai. Laning mi na nna, ningshawng jawng lung ngut ai hpang an hpe laksan ningshawng ni hku nna lit shatsam ai. Pyintit Guiana de saw shaga n hkrum shi yang, Guadeloupe zunlawng hta lit amyu myu hpe gun hpai wa ai.

Shaning ni laman lit amyu myu hpe nan lu la wa ai. Masa nnan ni hte maren chye nga hkra hpa gaw karum ya wa kun? 

Mari-Lin: Pyintit Guiana Behtela kaw nna hpunau ni gaw, an a ra sharawng dik htum Chyum daw gaw Esaia 6:8 re ai hpe chye ma ai. Dai majaw an hpe shanhte shaga ai shaloi, “nan a ra dik htum Chyum daw hpe dum ai kun?” ngu shala let tsun hpang ai. Lit nnan lu wa na lachyum re ai hpe an chye ai. An mung “an nga nga ai! an hpe shangun dat u!” ngu tsun ai.

An gaw lu la ai lit ni hpe n shingdaw ai. Hpa majaw nga yang, an lu da ai hpe chyeju dum ai myit mat  mat chye ai majaw re. An gaw hpunau nauna ni hpe hku hkau hkra shawng galaw ai.

Jek: Lai wa sai aten hta, manang nkau gaw an hpe shanhte hte rau nga shangun mayu ai majaw, an htawt na hte seng nna myit daw na zawn re ai lam ni hpe tsun ma ai. Raitim, an Guadeloupe kaw nna htawt ai shaloi, “hkauna gaw, mungkan ga, rai nga ai” ngu Mahte 13:37 kaw tsun da ai Yesu a ga hpe hpunau langai gaw bai shadum ya ai. Dai majaw, an lit galai shai ra ai shaloi, gara shara kaw nga ai raitim, maren re ai hkauna kaw sha galaw nga ai re ngu shada da sadi jaw ai. Yawng hta na ahkyak htum gaw masha hte magam lawk re.

Magam lawk nnan de an du ai shaloi, kaga ni gaw dai shara hta grai pyaw hkra chye nga ai hpe an mu ai. Dai majaw, buga na masha ni zawn nga chye hkra shakut ai. Malu masha n bung ai. Raitim, shanhte a lusha hpe sha an sha ai. Hkamja lam hte seng ai htap htuk ai sadi jaw lam ni hpe hkan sa ai. An gaw lu la ai lit ni hte seng nna kaja ai ningmu hte sha galoi mung tsun na matu shakut ai.

Mari-Lin: Buga kaw nga ai hpunau nauna ni kaw nna mung grai sharin la ai. Pyintit Guiana de an shawng nnan du ai shaloi na lam hpe bai myit dum ai. Marang grai htu ai shani hta, marang zim mat yang she hkaw tsun sa lu na ngu an myit da ai. Raitim, “Hkaw tsun sa sana i?” ngu nauna langai ngai hpe san ai. “Gara hku sa na!” ngu ngai grai mau nna tsun dat ai. “Jawng gup nna lagaw leng hte anhte sa na re” ngu nna shi bai tsun ai. Jawng gup nna lagaw leng gara hku jawn na hpe ngai sharin la wa ai. Ngai n sharin la yang, lanam ta laman galoi mung hkaw tsun sa lu sana n re.

Nan gaw 15 lang daram htawt wa ai. Htawt ai hte seng nna kaga ni hpe karum ya lu ai hpaji jaw ga ni nan hta nga ai kun?

Mari-Lin: Htawt ai shaloi mayak mahkak ni nga chye ai. Hkaw tsun bungli kaw nna bai wa ai shaloi, atsawm hkring sa lu ai nta tam na matu ahkyak ai.

Jek: Ngai gaw an a nta nnan a kata hta galoi shagu tsi bai chya ai. Ginjaw garan rung kaw nna hpunau ni gaw an aten na na nga na n re ai hpe chye ai majaw, “Jek, ndai kalang gaw tsi n chya ra ai” ngu kalang lang tsun ai.

Mari-Lin gaw rai baw ai hta grai ram ai. Sutdek ni hta rai ni bang nna, “hka shin gawk,” “yup gawk,” “shat gawk” ngu nna amying ni shakap da ai. Dai majaw, an nta nnan de du ai shaloi, sutdek ni hpe shi gawk hte shi aloi sha tawn da lu ai. Sutdek langai hpra kaw lawm ai arai ni hpe ka da ai majaw, an ra ai shaloi alawan tam lu ai.

 Mari-Lin: An atsawm lajang chye na matu sharin la wa ai majaw, an du ai hte kalang ta hkaw tsun magam hta shang lawm lu ai.

“Amu hpe hkum tsup hkra shatup” lu na matu nan a aten hpe chyarang gara hku galaw da ai kun?​—2 Tm 4:5.

Mari-Lin: Bat langai ya shani ni hta, hkring la nna zuphpawng a matu hkyen lajang ai. Bat Lahkawng ya kaw nna hkaw tsun sa ai.

Jek: An hta aten hpyi shawn da ai lam ni nga tim, dai hpe myit maju n jung ai. Hkaw tsun bungli gaw an a matu ahkyak htum re. Nta kaw nna pru ai aten kaw nna bai wa ai aten du hkra, mu ai masha yawng hpe hkaw tsun na matu shakut ai.

Mari-Lin: Ga shadawn, ban sa ai shara de sa ai shaloi, garan laika hpe ngai ayan la sa ai. An gaw Yehowa Sakse ni re ai ngu n tsun tim pyi, masha nkau gaw an hpang de sa nna laili laika ni hpyi ai. Bu hpun mawn sumli ai lam hte nga sat nga sa hpe atsawm sadi ai majaw re. Masha ni gaw dai zawn lam ni hpe sadi hkrup ma ai.

Jek: Htingbu kaja byin hkra galaw nna mung sakse hkam ai. Ngai gaw nta makau grup-yin na maisau ni hpe hta ai, maza ni hpe kabai ai, namlap ni hpe ye ya ai. Htingbu ni gaw sadi hkrup nna, kalang lang “ngai Chyum Laika ra ai, nang kaw nga ai i?” ngu nna san chye ai.

Nan gaw san san rai nga ai hkaw tsun lawk de chyahkring hkring sa ai. Dai shara de sa ai shaloi na mabyin ni hpe naw dum ai kun?

Jek: Guiana kaw nna hkaw tsun lawk nkau gaw du na matu grai yak ai. An gaw bat mi laman deng 370 daram bu hkawm ai. Hkrun lam grai sawng tim chyahkring hkring bu hkawm ai. Amazon nam maling hta nga ai St. Élie de bu hkawm ai hpe ngai n malap ai. Dai de du na matu, grai sawng ai lam hta gawt mai ai mawdaw hte n-gun ja ai jak hkali hte hkying hkum law law sa ra ai. Dai shara kaw nga ai masha law law gaw, ja nhprang sut tam ma ai. Anhte a laili laika ni hpe chyeju dum ai majaw, nkau mi gaw ja loi li alu jaw ma ai. Shana maga hta, uhpung a video langai madun ai. Masha law law sa yu ma ai.

Mari-Lin: Kade n na shi ai shaloi hta, Jek hpe Kamopi kahtawng kaw Myit Dum Poi hta mungga htawn ya na matu tsun ai. Dai de du na matu, jak hkali hte Oyapok Hkanu hku nna hkying hkum 4 na hkra sa ra ai. Myit kahpra na zawn re ai mahkrum madup re.

Jek: Dai hkanu gaw hka hpung la ja ai majaw, grai shoihpa nga ai. Dai zawn masa hta hkali jawn ra ai. Grai ja ai hka hpung la ni mu lu ai hpe ngai grai ra sharawng ai. Hkali gau ai wa gaw shi gara hku galaw ra ai hpe chye ai. Grai kaja ai mahkrum madup re. Sakse Hkam marai 6 sha nga tim, Myit Dum Poi hpe marai 50 daram sa lung ai. Dai hta Amerindian masha nkau mung lawm ai.

Mari-Lin: Ramma ni hku nna Yehowa hpe grau sak jaw mayu yang, dai zawn kaja ai mahkrum madup ni hpe lu la na re. Dai zawn masa ni hta Yehowa hpe nang kamhpa yang, makam masham ngang kang wa na re. Yehowa karum ya wa ai hpe an tatut hkamsha wa ai.

Nan gaw amyu ga law law hpe sharin la wa ai. Dai hku sharin la na matu loi ai kun?

Jek: N loi ai. Nawku hpung hpe karum ya na matu hte hkaw tsun lu na matu dai amyu ga ni hpe sharin la ai re. Chyum hti lamang hta garai n lawm shi yang, Sranantongo * amyu ga hte Sin Langchyi Hkaja Lamang hpe woi awn ra ai. Ngai tsun ai ga hpe chye na ai kun? ngu hpunau langai hpe san ai. Shi ndai hku tsun ai: “Kalang lang ga si nkau hpe gaw anhte n chye na ai. Raitim, grai kaja ai.” Ma ni gaw ngai hpe grai karum ya ai. Ngai shut yang, shanhte gaw lama ma tsun ya ai. Raitim, masha kaba ni gaw n tsun ai. Dai majaw ma ni kaw nna ngai grai sharin la lu ai.

Mari-Lin: Hkaw tsun lawk langai hta, Pyintit, Potugi, Sranantongo amyu ga ni hte Chyum ga sharin galaw ai. Nye a matu yak ai amyu ga hte shawng sharin hpang nna, loi ai amyu ga hte hpang jahtum hta sharin na matu, nauna langai hpaji jaw ai. Shi a hpaji jaw ga gaw grai kaja ai hpe kade n na yang, ngai chye na mat ai.

Lani mi hta, Chyum ga sharin ai lamang hpe Sranantongo amyu ga hte shawng sharin nna kaga  langai hpe gaw Potugi amyu ga hku sharin ai. Nambat lahkawng hkaja lamang galaw ai shaloi, nauna langai gaw “Mari-Lin, nang shut taw sai” ngu ngai hpe tsun ai. Brazi num hpe Potugi amyu ga hte tsun na malai, Sranantongo amyu ga hte tsun nga ai hpe ngai chye dat ai.

Nan gaw magam gun ai shara kaw nna hpunau nauna ni hpe grai tsawra ai. Shanhte hte hku hkau na matu gara hku galaw wa ai kun?

Jek: Ga Shagawp 11:25 (JCLB) hta “ndaw nhta jaw ya u, shing rai jang, nang ngamu ngamai wa na ra ai” ngu tsun da ai. Kaga ni hpe sak jaw na matu an n htingnut ai. Nawku Htingnu gram lajang ai hte seng nna, nkau mi ngai hpe ndai hku tsun ai: “Hkaw tsun masha ni galaw u ga.” Raitim, ngai ndai hku bai tsun ai: “Ngai mung hkaw tsun masha sha re. Dai majaw, bungli shangut ra na shara hta ngai mung lawm mayu ai.” Anhte yawng gaw tinang hkrai sha nga mayu ai aten ni nga tim, kaga ni a matu kaja ai lam ni n galaw ya lu ai du hkra gaw san san n nga na matu an shada shadum hkat ai.

Mari-Lin: Hpunau nauna ni hpe myit lawm ai lam madun na matu an shakut ai. Dai majaw, shanhte a ma ni hpe yu ya na matu (sh) jawng sa tau ya na matu ra nga ai lam ni hpe chye wa ai. Shanhte hpe karum ya lu na matu an a chyarang hpe bai galai shai ai. Dai lam hku nna, shanhte hte an a hku hkau lam rawt jat wa ai. Shanhte ra nga ai aten hta karum ya na matu jin jin rai wa ai.

Grau ra ai shara hta magam gun wa ai kaw nna lu la ai shaman chyeju ni gaw hpa ni rai kun?

Jek: Aten hpring magam gaw an hpe shaman chyeju law law lu shangun ai. Yehowa a hpan da ai lam amyu myu hpe ayan mu lu ai. Mayak mahkak ni nga tim, gara shara de mi du tim, Karai a masha ni madi shadaw ya na hpe an chye ai majaw, simsa lam lu ai.

Ngai asak kaji ai shaloi, Hkristan lapran nga ai majaw, Pyintit Guiana hta htawng hkrat ga ai. Lani mi hta dai shara de sasana langai hku nna bai du na, magam gun langai hku nna htawng de sa chyai lu na ngu galoi mung n myit ga ai. Yehowa gaw ngai hpe shaman chyeju n hpaw n ya jaw ai.

Mari-Lin: Kaga ni hpe ngai sak jaw lu ai gaw nye a matu pyaw dik htum re. Yehowa a magam hta shang lawm lu ai majaw an grai pyaw ai. An mung grau nna hku hkau ni htep wa ai. Myit daw nga ai yan la ni hpe shat daw mayu ai kun? nga nna Jek ngai hpe san ai. “Ngai mung dai hku myit nga ai” ngu bai tsun ai. An a myit mang ai lam gaw bung ai.

Jek: Kade n na shi yang, ngai kaw mawng ana (prostate cancer) byin nga ai hpe chye dat ai. Mari-Lin gaw dai hpe na mayu na n raitim, “tsawra e, lama na ngai hpawt ni si mat yang, ‘aprat kaba nna dingla sai’ majaw n re. Raitim, ngai gaw wenyi lam ni galaw ai, manu dan ai lam ni galaw ai hta nye a prat hpe sak jaw wa ai majaw ngai myit dik lam lu nna si na re” ngu nna shi hpe tsun ai.​—Nin 25:8.

Mari-Lin: Yehowa gaw an galoi n myit mada da ai lit ni jaw ai. N myit ga ai lam ni hpe galaw na matu ahkang jaw ai. An a prat hta kaja ai lam ni hte hpring nga ai. Karai Kasang hpe kamhpa myit hte uhpung sa shangun ai gara shara de raitim an sa na re.