1-2. Hkalup hkam na matu garai n jin shi yang, hpa majaw myit n daw ging ai kun? (Makawp sumla hpe yu u.)

 HKALUP hkam mayu yang, kaja ai bandung tawn ra ai. Hkalup hkam na matu jin jin rai sai kun? Nang jin nga sai, myitsu salang ni mung myit hkrum sai rai yang, hkalup hkam na matu hkum htingnut. Yehowa a magam gun lu na shaman chyeju gaw la nga ai.

² Raitim, hkalup n hkam shi yang, rawt jat ra na lam nga ai ngu langai ngai tsun ai kun? Shing nrai, tinang hkrai chye ai kun? Rai yang, myit hkum daw. Nang gaw asak kaba tim, kaji tim, dai ahkyak ai bandung de du hkra lu shakut ai.

3. Ehtiopi unuk gaw Hpilip hpe hpa san ai kun? Gara ga san pru wa ai kun? (Kasa 8:36, 38)

³ Kasa 8:36, 38 hpe hti u. Ehtiopi unuk gaw kabu gara shiga hkaw ai Hpilip hpe ndai hku san ai: “Ngai baptisma hkam na, hpa hkum shara nga a ta?” Ehtiopi masha gaw hkalup hkam mayu tim, hkalup hkam na matu jin jin rai nga sai kun?

4. Ehtiopi wa gaw matut nna sharin la na matu dawdan da ai hpe gara hku madun wa ai kun?

⁴ Ehtiopi masha gaw, “naw ku na nga, Yerusalem de sa” ai. (Kas 8:27) Shi gaw Yuda hpung de shang wa ai wa re ai majaw, Yuda ni kam ai lam law malawng hpe hkap la da ai rai na re. Hebre Chyum Laika ni hta na Yehowa a lam hpe sharin la wa na re. Matut nna mung sharin la na matu myit rawt nga ai.  Lam hta shi hpe Hpilip mu ai shaloi, hpa galaw nga ai hpe sadi hkrup ai kun? Myihtoi Esaia a laika katsu hti nga ai hpe re. (Kas 8:28) Dai gaw sung htum ai tengman lam re. Unuk wa gaw Chyum Laika madung lam loi mi chye da ai hte sha myit n dik ai. Matut nna sharin la mayu ai.

5. Sharin la wa ai ni hpe Ehtiopi masha hpa galaw ai kun?

⁵ Ehtiopi wa gaw, dai mung a hkawhkam jan Kandake a man hta ahkang kaba lu nna, shi a “sut gan yawng sin ai” unuk re. (Kas 8:27) Dai majaw, lit grai law nna bungli grai kyin na re. Raitim, Yehowa hpe nawku na matu aten jaw ai. Tengman ai lam hpe sharin la ai daram hte myit n dik ai sha, tatut hkan sa ai. Dai majaw mung, Yerusalem nawku htingnu hta Yehowa hpe nawku na matu grai tsan ai Ehtiopi mung kaw na sa ai re. Dai hku bu hkawm na matu aten hte jarik grai ma ai. Raitim, Yehowa hpe nawku dawjau ai shara de sa na matu n htingnut ai.

6-7. Yehowa hpe tsawra ai myit law htam wa hkra Ehtiopi masha gara hku galaw ai kun?

⁶ Ehtiopi masha gaw, Hpilip kaw na Meshia a lam hte hpawn, ahkyak ai tengman lam nkau mi hpe sharin la ai. (Kas 8:34, 35) Unuk wa gaw shi a matu Yesu galaw ya wa ai lam ni hpe chye lu ai majaw grai kabu mat ai. Shi gara hku bai htang ai? Hkungga hkrum ai Yuda hpung shang masha hku nna matut nga mai ai. Raitim, Yehowa hte Shi Kasha hpe tsawra ai myit law htam wa ai. Yesu Hkristu a hpang hkan ai wa hku nna hkalup hkam la lu hkra, ahkyak ai dawdan lam jahkrat na matu shadut hkrum wa ai. Shi jin jin rai nga sai hpe Hpilip mu nna hkalup hkam ya ai.

⁷ Ehtiopi masha hpe kasi la ai rai yang, hkalup hkam na matu nang shajin lu na re. Nang mung kam ai myit hte, “Ngai baptisma hkam na, hpa hkum shara nga a ta?” ngu lu tsun na re. Shi galaw ai zawn galaw mai na lam ni hpe yu yu ga: Shi gaw matut sharin la ai, sharin la ai lam ni hpe tatut hkan sa ai, Karai Kasang hpe tsawra ai myit law htam hkra matut galaw ai.

8. Yawhan 17:3 hpe gara hku hkan sa mai ai kun?

⁸ Yawhan 17:3 hpe hti u. Yesu a dai ga ni gaw Chyum Laika hkaja na matu dawdan lu hkra karum ya ai kun? Anhte law malawng hpe karum ya ai gaw teng sha re. Raitim, matut naw sharin la na matu mung tsun nga ai rai kun? Re ai. ‘Langai sha rai nga ai hte teng man re ai Karai Kasang hpe . . . chye chyang lu’ na matu matut shakut ra ai. (Hpj 3:11)  Matut nna mung htani htana sharin la ra na re. Yehowa a lam grau sharin la yang, Shi hte grau hku hkau wa na re.​—Shk 73:28.

9. Chyum Laika a madung sharin achyin lam ni hpe sharin la ngut tim, hpa naw galaw ra ai kun?

⁹ Yehowa a lam sharin la hpang ai shaloi, Chyum Laika madung sharin ya ai lam ni hpe sha anhte chye ai. Hebre ni hpe shagun dat ai laika hta, kasa Pawlu gaw madung sharin achyin lam ni hpe “shawng na ga kanu” ni ngu nna tsun wa ai. Dai “shawng npawt na ga kanu” ni hpe n ahkyak ai ngu shi n tsun ai. De a malai, ma chyangai ni hpe n-gun lu shangun ai chyu hte shingdaw da ai. (Heb 5:12; 6:1) Raitim, Hkristan yawng gaw dai madung sharin achyin lam ni hta n-ga, sung htum ai tengman lam ni hpe mung sharin la na matu n-gun jaw ai. Sung htum ai sharin achyin lam ni hpe sharin la mayu ai myit grau nga hkra nang galaw ai kun? Matut rawt jat mayu ai myit, Yehowa hte shi a yaw shada lam hpe matut sharin la mayu ai myit nga ai kun?

10. Nkau mi ai matu hkaja ai gaw hpa majaw yakhkak ai lam langai rai kun?

¹⁰ Anhte law malawng gaw, hkaja ai lam galaw na matu yak chye ai. Na matu gaw gara hku kun? Jawng lung ai shaloi, laika hti nna atsawm hkaja wa ai kun? Hkaja ai hpe ra sharawng nna, law law hkaja mayu ai kun? (sh) Laika buk ni kaw na atsawm n sharin la byin ai ngu hkamsha ai kun? Rai yang, nang hkrai n re. Raitim, Yehowa lu karum ya ai. Shi gaw grai ningtawn ai wa rai nna kaja htum Sara langai re.

11. Yehowa gaw “Grau Htum Ai Sharin Achyin Ai Wa” re ai hpe gara hku sakse madun ai kun?

¹¹ Yehowa gaw shi hkum shi “Grau Htum Ai Sharin Achyin Ai Wa” ngu tsun ai. (Esa 30:20, 21, NWT) Shi gaw myit galu ai, matsan dum ai, chye na ya ai Sara re. Jawng ma ni a kaja ai lam hpe tam ai. (Shk 130:3) Anhte galaw lu ai hta jan nna galaw na matu, galoi n myit mada ai. Mauhpa kumhpa re ai na a bawnu hpe shi hkrang shachyaw da ai hpe dum u. (Shk 139:14) Anhte hta sharin la mayu ai myit nga ai. Hpan Madu gaw htani htana sharin la shangun mayu nna, dai hta kabu shangun mayu ai. Dai majaw, ya aten kaw na Chyum Laika tengman lam ni hpe “myit marin” nna sharin la ai gaw hpaji rawng ai. (1 Pe 2:3) Chyum Laika hti nna hkaja ai hpe ayan galaw u, du dep lu na bandung ni hpe jahkrat u. (Ysh 1:8) Yehowa a karum shingtau lam hte Shi a lam hpe hti ai, sharin la ai lam hta grau pyaw wa na re.

12. Tinang hkrai hkaja ai lamang hta Yesu a lam hpe hpa majaw myit maju jung ging ai kun?

¹² Yesu a prat hte hkaw tsun magam a lam hpe, aten la nna ayan myit sawn sumru u. Grau nna gaw ya na zawn yakhkak ai aten ni hta, Yehowa hpe nawku lu hkra, Yesu a hkang hpe htep lahti hkan sa na matu ahkyak ai. (1 Pe 2:21) Shi a sape ni hkrum ra na mayak mahkak ni hpe Yesu asan sha tsun wa ai. (Luk 14:27, 28) Raitim, jet ai sape ni mung shi zawn awng dang lu na hpe kam ai. (Yhn 16:33) Yesu a prat hkrun lam hpe ahkri ahkrai hkaja nna, shani shagu na prat hkrun lam hta shi hpe kasi la lu na bandung ni jahkrat u.

13. Yehowa hpe matut nna hpa lam hpyi shawn ra ai kun? Hpa majaw kun?

¹³ Machye machyang langai hte sha n mai ai. Machye machyang grau jat hkra galaw ra ai. Rai yang she, Yehowa a lam grau chye lu na, tsawra myit, kamsham ai myit zawn re ai atsam ningja ni grau nga wa na re. (1 Ko 8:1-3) Matut hkaja nga ai laman, makam masham grau nga hkra karum ya rit ngu Yehowa hpe hpyi shawn u. (Luk 17:5) Dai zawn akyu hpyi ga ni hpe sharawng awng let htai ya ai. Karai hte seng ai tup hkrak re ai machye machyang hta madung ai jet ai makam masham gaw, matut rawt jat hkra nang hpe karum ya na re.​—Yak 2:26.

14. Sharin la da ai lam hpe hkan galaw na matu ahkyak ai hpe kasa Petru gara hku ahkyak shatai tsun wa ai kun? (Sumla hpe mung yu u.)

¹⁴ Hkristu a hpang hkan ai ni gaw, chye da ai lam ni hpe matut hkan sa na matu ahkyak ai hpe kasa Petru ahkyak shatai tsun wa ai. Noa hte seng ai Chyum Laika labau hpe tsun wa ai.  Yehowa gaw Noa hpe dai aten na nhkru ai masha ni hpe, hka sha-u ing nna jahten kau na lam tsun wa ai. Noa hte nta masha ni asak lawt na matu, hka sha-u ing wa na ngu ai hpe chye da ai hte sha n mai ai. Hka sha-u n ing shi yang na aten hpe, “shanghpaw li hpe shachyaw da nga ai shaloi” ngu Petru tsun ai hpe sadi yu u. (1 Pe 3:20) Grai kaba ai sanghpaw langai shachyaw ai hku nna, Karai Kasang kaw na chye wa ai lam hpe Noa hte nta masha ni hkan sa wa ai. (Heb 11:7) Petru gaw Noa galaw wa ai lam hpe hkalup hkam ai lam hte ndai hku shingdaw wa ai: “Ya e baptisma ngu ai kumla gaw, nanhte hpe hkye hkrang la lu nga ai.” (1 Pe 3:21) Hkalup hkam na matu ya nang shajin nga ai lam hte, Noa hte shi a nta masha ni shaning law law sanghpaw gap wa ai lam hte shingdaw mai ai. Hkalup hkam na matu shajin ai shaloi gara bungli hpe nang galaw ra ai kun?

15. Jet ai myit malai hta hpa ni lawm ai kun?

¹⁵ Shawng nnan anhte galaw ra na lam langai gaw mara ni a matu jet ai myit malai lu ra ai. (Kas 2:37, 38) Jet ai myit malai gaw teng sha galai shai lu hkra karum ya ai. Akyang hten ai prat hkrun lam, malut maya ai, hkayawm lu ai, masai marai ga ni tsun ai zawn re ai Yehowa n ra ai akyang lailen ni hpe koi kau sai kun? (1 Ko 6:9, 10; 2 Ko 7:1; Ehp 4:29) Dai ni hpe n galaw shi ai nga yang, matut galai shai na matu shakut u. Karum shingtau hte lam matsun lu na matu, nang hpe Chyum Laika sharin ya ai wa hpe raitim, nawku hpung myitsu salang ni hpe raitim karum hpyi u. Nang gaw naw kaji nna kanu kawa ni hte rau nga ai rai yang, hkalup hkam na matu hkum pat shangun ai n kaja ai lailen yawng hpe koi lu na matu shanhte hpe karum hpyi u. 

16. Wenyi lam ayan galaw ai hta hpa ni lawm ai kun?

¹⁶ Wenyi lam hpe ayan galaw na matu ahkyak ai. Dai hta Hkristan zuphpawng ni lung nna, mahtai jaw ai lam lawm ai. (Heb 10:24, 25) Hkaw tsun na matu atsam hpring ai shaloi ayan shang lawm u. Grau shang lawm yang, grau pyaw wa na re. (2 Tm 4:5) Nang gaw naw kaji nna kanu kawa ni hte rau nga ai rai yang, tinang hkum tinang ndai hku san u: ‘Zuphpawng lung na matu, hkaw tsun sa na matu kanu kawa ni ngai hpe ayan tsun ra taw ai kun? (sh) Tinang myit hte galaw ai kun?’ Dai ni hpe tinang hkrai galaw ai gaw, Yehowa  Karai Kasang hpe kamsham ai lam, tsawra ai lam, chyeju dum ai lam madun ai re. Dai lam ni gaw, “Karai Kasang hpe tsawra hkungga ai” lam ni rai nna, Shi hpe anhte jaw ai kumhpa ni re. (2 Pe 3:11, NWT; Heb 13:15) Sharawng awng let jaw ai kumhpa yawng gaw, Yehowa hpe myit shapyaw ya ai. (2 Korinhtu 9:7 hte shingdaw yu u.) Yehowa hpe kaja htum jaw ai lu shaloi, anhte myit pyaw ai majaw, dai lam ni hpe galaw ai re.

17-18. Hkalup hkam na matu rawt jat lu hkra gara ahkyak ai atsam ningja gaw karum ya ai kun? Hpa majaw kun? (Ga Shagawp 3:3-6)

¹⁷ Hkalup hkam na matu rawt jat hkra shakut nga ai laman mayak mahkak ni nga na re. Na a makam masham nnan hpe nkau mi jahpoi asawng nna, ninghkap ai baw pyi nga na re. (2 Tm 3:12) N kaja ai arawn alai hpe awng dang hkra shakut nga tim, dai hpe kalang lang galaw hkrup na re. Shing nrai, bandung n dep hkraw ai majaw, myit n galu wa ai, myit shuk wa chye ai. Awng dang lu hkra hpa gaw karum ya na kun? Ahkyak ai atsam ningja re ai Yehowa hpe tsawra ai myit re.

¹⁸ Yehowa hpe tsawra ai myit gaw nang hta nga ai kaja htum atsam ningja langai re. (Ga Shagawp 3:3-6 hpe hti u.) Karai Kasang hpe tsawra ai myit ngang kang yang, prat a mayak mahkak ni hpe awng dang lu na re. Chyum Laika hta, mayam ni hpe tsawra ai Yehowa a ngangkang ai tsawra myit a lam hpe chyahkring hkring tsun dan da ai. Dai ngangkang ai tsawra myit gaw, htani htana grin ai. (Shk 100:5) Nang gaw Karai a hkrang bung sumla hte maren hpan da hkrum ai. (Nin 1:26) Dai tsawra myit hpe nang gara hku madun lu ai kun?

19. Yehowa galaw ya ai lam yawng a matu chyeju dum myit grau law htam wa hkra gara hku galaw lu ai kun? (Galati 2:20)

¹⁹ Chyeju dum myit hte hpang u. (1 Hl 16:34) Shani shagu ndai hku san yu u, ‘Yehowa ngai hpe tsawra ai lam gara hku madun ai kun?’ Akyu hpyi ai shaloi, na a matu shi galaw ya wa ai lam ahkri ahkrai tsun dan nna chyeju dum ai lam tsun u. Nang hpe tsawra ai majaw mai kaja ai lam ni Yehowa galaw ya ai ngu ai hpe, kasa Pawlu yin la ai zawn nang mung yin la u. (Galati 2:20 hpe hti u.) ‘Shi hpe tsawra ai lam ngai mung bai madun mayu ai kun?’ ngu tinang hkum tinang san u. Yehowa hpe tsawra ai myit gaw, mayak mahkak ni,  chyam dinglik lam ni hpe matut nna hkamjan lu hkra, tawt lai lu hkra karum ya na re. Dai gaw, shani shagu Kawa hpe tsawra ai lam madun na matu, wenyi lam ni hpe matut galaw na matu shadut ya na re.

20. Yehowa hpe tinang hkum tinang apnawng ai hta hpa lawm ai kun? Ndai dawdan lam gaw kade ahkyak ai kun?

²⁰ Aten na wa ai shaloi, Yehowa hpe tsawra ai myit gaw, laksan akyu hpyi tsun dan lu hkra shadut ya na re. Karai Kasang kaw tinang hku tinang apnawng lu na re. Yehowa hpe apnawng ai shaloi, ndai mauhpa myit mada lam nang lu sai: Nang hpe shi htani htana madu sai. Prat hta pyaw tim, yak tim Yehowa hpe matut nawku na ngu ga sadi jaw sai. Dai ga sadi hpe hpang kalang bai n jaw ra sai. Apnawng ai lam galaw ai gaw grai ahkyak ai lahkam hpe hkam dat ai re. Raitim, ndai lam hpe myit yu u: Prat hta dawdan lam law law jahkrat wa na re. Nkau dawdan lam ni gaw grai kaja na re. Raitim, na a prat hpe Yehowa kaw apnawng ai dawdan lam gaw, nang galoi n galaw ga ai kaja htum dawdan lam re. (Shk 50:14) Wa hpe tsawra ai myit yawm mat na matu, matut sadi n dung na matu Satan shakut na re. Dai hku byin na ahkang hkum jaw! (Yob 27:5) Yehowa hpe tsawra ai myit ngangkang yang, Yehowa hpe htani htana nawku na ga sadi grin lu na matu, sumsing Kawa hte grau ni htep lu na matu karum ya na re.

21. Hkalup hkam ai gaw jahtum n re ai sha, nnan hpang ai lam re ngu nna hpa majaw lu tsun ai kun?

²¹ Yehowa kaw apnawng ngut ai hpang, ahkyak ai lahkam bai hkam lu na matu, myitsu salang ni hpe tsun dan u. Hkalup hkam ai gaw jahtum n re ai sha, nnan hpang ai lam re ai hpe galoi mung dum ra ai. Yehowa hpe htani htana nawku mat na prat hkrun lam hpe nnan hpang ai re. Dai majaw ya kaw nna, Kawa hpe tsawra ai myit grau ngangkang hkra galaw u. Bandung jahkrat u. Rai yang, lani hte lani tsawra ai myit grau ngangkang wa na re. Dai gaw hkalup hkam na matu nang hpe shadut ya na re. Dai shani gaw kabu dik htum shani rai na re. Raitim, ndai gaw nnan hpang ai lam sha naw re. Yehowa hte shi Kasha hpe tsawra ai myit grau nna law htam wa u ga!