1-2. Masha ni hkalup hkam la ai shaloi hpa byin chye ai kun? Hpa hpe bawngban na kun?

 HKALUP hkam na masha ni hpe mu ga ai kun? Shanhte hkalup n hkam shi yang, ga san lahkawng hpe kam ai myit hte htai ai nsen hpe nang na na re. Shanhte a nta masha ni hte manang ni gaw grai arawng la ai hpe nang mu na re. Hkalup hkam ai ni hka kata kaw na pru wa ai shaloi, tahpawk dum ai nsen ni hpe nang na nna, shanhte a kabu ai myiman hpe mu na re. Bat shagu, hkying hku law ai masha ni Yehowa kaw apnawng nna, Yehowa Sakse hku nna hkalup hkam ai.

² Nang gaw gara hku kun? Hkalup hkam na matu myit ai nga yang, nang gaw ndai nhkru ai mungkan hta “Karai Kasang hpe tam ai” wa re ai majaw grai kaja ai. (Shk 14:1, 2) Ndai sumhpa gaw, kaji kaba yawng a matu ka da ai re. Raitim, hkalup hkam ngut sai anhte yawng mung, Yehowa hpe htani htana nawku na ngu ai dawdan lam hpe, grau ngang kang hkra galaw mayu na re. Dai majaw, Yehowa hpe nawku mayu ai lam law law nga ai kaw nna lam 3 hpe bawngban yu ga.

3. Yehowa a mayam ni gaw, tengman ai hte ding hpring ai hpe hpa majaw tsawra ai kun? (Shakawn 119:128, 163)

³ Yehowa gaw Shi a masha ni hpe “teng man ai . . . hpe tsaw ra” na matu htet da ai. (Zeh 8:19) Yesu gaw shi hpang hkan ai ni hpe ding hpring ai lam hta hkawm nga na matu n-gun jaw ai. (Mat 5:6) Karai a man hta jaw ai, kaja ai, san seng ai lam ni hpe galaw mayu ai myit nga ra ai ngu ai lachyum re. Tengman ai hte ding hpring ai lam hpe nang tsawra ai kun? Tsawra na re. Masu magaw ai, shut ai, nhkru ai lam yawng hpe nang n ju n dawng ai. (Shakawn 119:128, 163 hpe hti u.) Masu magaw ai gaw, ndai mungkan a uphkang du Satan hpe kasi la nga ai re. (Yhn 8:44; 12:31) Satan a bandung langai gaw, Yehowa Karai Kasang a chyoi pra ai mying hpe jahpoi asawng na matu re. Edin sun hta  gumlau ai aten kaw nna, Satan gaw Karai Kasang hte seng nna masu ai lam chyam bra hkra galaw wa ai. Yehowa gaw tingkyeng myit rawng ai, shinggyim masha ni hpe kaja ai lam ni n jaw mayu ai, n ding man ai Uphkang Madu re ai ngu sawn la hkra Satan shakut wa ai. (Nin 3:1, 4, 5) Yehowa hte seng ai Satan a masu ga ni gaw, masha ni a myit masin hta tuk hku nna matut rawng nga ai. “Teng man ai . . . hpe tsaw ra” na matu masha ni n lata yang, n ding hpring ai, nhkru ai lam yawng hpe galaw na matu, shanhte hpe Satan shingkang ka-up lu ai.​—Rom 1:25-31.

4. Yehowa gaw “teng man ai Karai” re ai hpe anhte gara hku sakse madun na kun? (Sumla hpe mung yu u.)

⁴ Yehowa gaw “teng man ai Karai” rai nna, shi hpe tsawra ai ni hpe tengman ai lam, nhpaw n ya sharin ya ai. (Shk 31:5) Dai hku nna, shanhte hpe Satan a masu magaw ai lam kaw nna lawt lu na matu karum ya ai. Yehowa gaw Shi a mayam ni hpe ding man na matu, ding hpring na matu sharin ya ai. Dai gaw, tinang hkum tinang grau hkungga na matu hte myit simsa na matu karum ya ai. (Gsh 13:5, 6) Chyum Laika hkaja ai shaloi, dai hku byin hkra Yehowa galaw ya wa sai kun? Yehowa sharin ya ai lam ni gaw, shinggyim masha yawng a matu sha n-ga, na a matu kaja htum re ai hpe chye wa sai. (Shk 77:13) Dai majaw, Karai a ding hpring ai maga de tsap mayu wa ai. (Mat 6:33) Tengman ai lam hpe nang makawp maga mayu nna, Yehowa Karai Kasang hte seng nna jahpoi asawng ai gaw n jaw ai hpe sakse madun mayu na re. Gara hku galaw lu na kun?

5. Tengman ai hte ding hpring ai maga de gara hku tsap lu na kun?

⁵ “Satan a masu magaw ga hpe ngai nyet kau na, tengman ai hpe tek da na. Yehowa hpe nye a Awmdawm Uphkang Madu hku nna hkap la na, jaw ai ngu shi tsun ai lam ni hpe galaw na” ngu lu tsun ai prat hkrun lam hpe nang lata mai ai. Dai zawn lu tsun hkra gara hku galaw lu ai kun? Yehowa kaw akyu hpyi sit shang u, tinang hkum tinang apnawng u, dai hpe shawa man hta hkalup hkam ai hku nna madun dan u. Tengman ai hte jaw ai hpe tsawra ai gaw, hkalup hkam na matu shadut ya lu ai atsam nga ai.

6. Yesu Hkristu hpe tsawra na matu, Shakawn 45:4 hta hpa tsun da ai kun?

⁶ Yesu Hkristu hpe hpa majaw tsawra ai kun? Dai hte seng ai lam nkau hpe Shakawn 45:4 (Hti u) hta tsun da ai. Yesu gaw tengman ai maga de tsap ai, shagrit shanem ai, ding hpring ai. Tengman ai hte ding hpring ai  hpe nang tsawra yang, Yesu Hkristu hpe mung tsawra ai hpe madun ai re. Tengman ai hte jaw ai hpe nden marai hte Yesu gara hku makawp maga wa ai hpe myit yu u. (Yhn 18:37) Raitim, shagrit shanem ai hpe Yesu gara hku madun wa ai kun?

7. Yesu shagrit shanem ai hte seng nna hpa hpe ra sharawng ai kun?

⁷ Yesu gaw shi a kasi ningli hte shagrit shanem ai lam madun ai. Ga shadawn, shi hpe n re ai sha, shi Kawa hpe shagrau na matu dingtawk tsun ai. (Mrk 10:17, 18; Yhn 5:19) Dai zawn shagrit shanem ai hpe mu ai shaloi, nang gara hku hkamsha ai kun? Karai a Kasha hpe tsawra nna shi hpang hkan na matu, dai gaw nang hpe shadut ya ai kun? Shadut ya na re. Yesu hpa majaw shagrit shanem ai kun? Shagrit shanem ai Kawa hpe tsawra nna kasi la ai majaw re. (Shk 18:35; Heb 1:3) Yehowa a atsam ningja ni hpe hkan sa ai Yesu hte ni htep mayu ai n re i?

8. Anhte a Hkawhkam hku nna Yesu hpe hpa majaw tsawra ai kun?

⁸ Yesu gaw kaja htum Uphkang Madu re ai majaw, anhte a Hkawhkam hku nna shi hpe tsawra ai. Yehowa nan shi a Kasha hpe shaman shakyang ya nna, uphkang na matu aya tang da ai. (Esa 50:4, 5) Yesu madun wa ai tingkyeng akyu n tam ai tsawra myit hpe mung myit yu u. (Yhn 13:1) Yesu gaw na a Hkawhkam re ai majaw, na a tsawra myit hte ging dan ai wa re. Shi hpe tsawra ai ni, shi a jinghku ngu shaga hkrum ai ni gaw, shi hkang da ai ga ni hpe hkan nna tsawra ai lam madun ai ngu shi tsun ai. (Yhn 14:15; 15:14, 15) Yehowa a Kasha hte manang byin ai gaw grai arawng la hpa re!

9. Hkristan ni a hkalup gaw Hkristu a hkalup hte gara hku bung ai kun?

⁹ Shi hpang hkan ai ni hpe Yesu htet da ai ga ni kaw na langai gaw hkalup hkam na matu re. (Mat 28:19, 20) Shi kasi madun wa ai. Shi a hkalup hkam ai lam hte shi hpang hkan ai ni a hkalup hkam ai lam hta shai ai lam nkau nga ai. (“ Yesu A Hkalup Hte Shi Hpang Hkan Ai Ni A Hkalup A Shai Ai Lam” ngu ai lawk hpe yu u.) Raitim, bung ai lam nkau mung nga ai. Shi hkalup hkam ai shaloi, Kawa a myit ra ai lam hpe galaw na ngu shi nan tsun ai. (Heb 10:7) Dai hte maren, Hkristu a hpang hkan ai ni mung, Yehowa Karai Kasang kaw shanhte nan apnawng da sai hpe madun na matu, shawa man hta hkalup hkam la ai. Shanhte a prat hpe shanhte a matu n re ai sha, Karai a myit ra ai lam hpe galaw ai hta myit maju jung ai. Dai gaw, Madu a kasi ningli hpe hkan sa nga ai re.

10. Yesu hpe tsawra ai myit gaw hkalup hkam na matu hpa majaw shadut ya ging ai kun?

¹⁰ Yesu gaw Yehowa a Kasha shingtai re ai, anhte hpe uphkang na matu Karai Kasang aya tang da ai Hkawhkam re ai hpe nang hkap la ai. Hkum tsup nna Kawa hpe kasi la ai shagrit shanem ai wa re ai hpe chye ai. Kaw si hpang gara ai ni hpe jaw sha ai, myit daw nga ai ni hpe shalan ya ai, machyi ai ni hpe shamai ya ai hpe mung nang chye sai. (Mat 14:14-21) Dai ni aten hta, nawku hpung hpe shi gara hku woi awn nga ai hpe mung nang chye wa sai. (Mat 23:10) Karai Mungdan a Hkawhkam hku nna htawm hpang hta grau nna galaw ya na hpe mung nang chye ai. Rai yang, shi hpe tsawra ai lam gara hku madun na kun? Shi a kasi ningli hpe hkan sa ai hku nna re. (Yhn 14:21) Yehowa kaw tinang hkum tinang apnawng nna, hkalup hkam la ai hku nna dai hpe galaw hpang lu ai.

11. Hkalup hkam la ai a ahkyak htum lam gaw hpa rai kun? Hpa majaw dai hku galaw ra ai kun?

¹¹ Hkalup hkam la ai a ahkyak htum lam gaw hpa rai kun? Karai Kasang hkang da ai ga ni kaw na ahkyak htum gaw hpa re ai hpe Yesu ndai hku tsun ai: “Dai Madu, na a Karai Kasang hpe, na a myit kraw lawang mahkra hte, na a myit masin mahkra hte, na a myit mang mahkra hte, na a n-gun lagaw mahkra hte, nang tsaw ra lu na ndai, nga ai ga gaw, grau kaba ai ga rai nga ai.” (Mrk 12:30) Karai Kasang hpe kade daram tsawra ai lam dai ga ni gaw madun dan ai kun?

12. Yehowa hpe nang hpa majaw tsawra ai kun? (Sumla hpe mung yu u.)

¹² Yehowa hpe tsawra na lam law law nga ai. Ga shadawn, Shi gaw “asak hka hpawk” re ai,  “Kaja ai kumhpaw nlang hte hte, hkum hkum re ai kumhpa yawng” Jaw Ai Wa re ai hpe nang chye na wa ai. (Shk 36:9; Yak 1:17) Nang lu da ai kaja ai lam yawng gaw, nhpaw n ya jaw ya ai, tsawra myit nga ai Karai Kasang kaw na re.

13. Gawng malai jahpu gaw hpa majaw mauhpa kumhpa re ai kun?

¹³ Gawng malai jahpu gaw anhte hpe Yehowa jaw ai mauhpa kumhpa re. Hpa majaw kun? Yehowa hte Shi Kasha a lapran na hku hkau lam hpe myit yu ga. Yesu ndai hku tsun ai: “Nye Wa ngai hpe tsaw ra” nna, “ngai nye a Wa hpe tsaw ra nga nngai.” (Yhn 10:17; 14:31) Shan gaw shaning wan hkying hku na hkra rau nga wa ai majaw, shan a hku hkau lam gaw grai ngang kang ai. (Gsh 8:22, 23, 30) Karai Kasang gaw Kasha hpe n ni n kri hkrum let si hkam na matu ahkang jaw ai shaloi, kade daram hkamsha na hpe myit yu ga. Yehowa gaw nang hte hpawn, shinggyim masha yawng hpe grai tsawra ai majaw htani htana asak lu la hkra, tsawra ai Kasha hpe sharawng awng let sak jaw wa ai. (Yhn 3:16; Gal 2:20) Dai gaw Karai Kasang hpe tsawra na matu ahkyak htum lam re.

14. Prat hta nang lata lu ai kaja htum bandung gaw hpa rai kun?

¹⁴ Yehowa a lam grau hkaja yang, shi hpe tsawra ai myit grau law htam wa na re. Shi hte ya mung, htani htana mung hku hkau mayu na re.  Gaja wa mung hku hkau lu ai. Shi a myit hpe shapyaw ya na matu, tsawra myit hte nang hpe n-gun jaw da ai. (Gsh 23:15, 16) N-gup ga hte sha n-ga, lailen hte mung galaw lu ai. Na a asak hkrung hkawm sa lam gaw Yehowa hpe teng sha tsawra ai lam madun nga na re. (1 Yh 5:3) Dai gaw prat hta nang lata lu ai kaja htum bandung re.

15. Yehowa hpe tsawra ai lam nang gara hku madun na kun?

¹⁵ Yehowa hpe tsawra ai lam nang gara hku madun na kun? Shawng nnan, langai sha rai nna tengman ai Karai hpe tinang hkum tinang akyu hpyi nna apnawng ai. (Shk 40:8) Dai hpang, na ai apnawng ai lam hpe, hkalup hkam ai hku nna shawa man hta madun ai. Lahta kaw hkaja wa sai hte maren, hkalup hkam ai gaw na a prat hta grai pyaw nna ahkyak ai aten re. Na a matu n re ai sha, Yehowa a matu prat nnan hte asak hkrung hpang ai. (Rom 14:8; 1 Pe 4:1, 2) Dai gaw dawdan lam kaba jahkrat ra ai zawn re. Gaja wa mung re. Raitim, dai gaw grai kaja ai prat lu na matu lam hpaw ya ai. Gara hku nna kun?

16. Shakawn 41:12 hta tsun da ai hte maren, Yehowa kaw tinang a prat hpe apnawng ai ni hpe Shi gara hku shaman chyeju jaw na kun?

¹⁶ Yehowa gaw nhpaw n ya jaw ya ai Wa re. Nang shi hpe hpa mi jaw tim, shi gaw ayan na grau kaja ai hpe bai jaw ai. (Mrk 10:29, 30) Ndai nhkru ai mungkan hta pyi, grau nna myit lawm hpa prat, kaja htum prat, myit dik lam lu ai prat hpe Shi jaw na re. Dai daram sha gaw n re. Hkalup hkam la ai kaw nna hpang ai prat hkrun lam gaw jahtum n nga ai. Tsawra ai Kawa hpe htani htana nawku lu ai. Nang hte Yehowa a lapran na tsawra myit gaw grau rawt jat wa na re. Shi htani htana asak hkrung ai zawn, nang mung teng sha hkrung lu na re.​—Shakawn 41:12 hpe hti u.

17. Yehowa hpe jaw lu ai lam langai gaw hpa rai kun?

¹⁷ Na a prat hpe Yehowa kaw apnawng nna hkalup hkam yang, Yehowa hpe manu dan ai lama ma jaw lu ai ahkang nga ai. Shi gaw nang lu da ai hta na mai kaja ai lam yawng, ngwi  pyaw ai lam yawng jaw da ai. Sumsing lamu hte mungkan ga a Madu hpe nang jaw lu ai lam langai gaw, sharawng awng let nawku dawjau ai lam re. Dai gaw nang jaw yang she, Shi lu la na re. (Yob 1:8; 41:11; Gsh 27:11) Dai gaw, na a prat hta galaw lu ai kaja htum lam re. Yehowa hpe tsawra ai gaw hkalup hkam la na matu kaja htum la re ai hpe kam u. 

18. Gara ga san ni hpe san ging ai kun?

¹⁸ Dai ga san hpe nang gara hku htai na kun? Nang hkalup hkam na kun? Nang sha lu htai na re. ‘Hkalup hkam na matu hpa majaw naw la na?’ ngu tinang hkum tinang san ai gaw karum shingtau lam lu na re. (Kas 8:36) Anhte myit yu mai ai lam 3 hpe matsing da u. Langai, tengman ai hte jaw ai hpe nang tsawra ai. ‘Masha yawng tengman ai ga hpe tsun nna, jaw ai hpe galaw na nhtoi hpe ngai mu mayu ai kun?’ ngu san yu u. Lahkawng, Yesu Hkristu hpe nang tsawra ai. ‘Karai a Kasha hpe anhte a Hkawhkam byin shangun mayu ai kun? Shi a kasi hpe ngai hkan sa mayu ai kun?’ ngu san yu u. Masum, ahkyak htum gaw Yehowa hpe nang tsawra ai. ‘Yehowa hpe nye a Karai hku nna nawku dawjau let shi a myit hpe ngai shapyaw ya mayu ai kun?’ ngu san yu u. Dai ga san yawng a mahtai gaw re ai nga yang, hpa majaw hkalup n hkam na? Hpa majaw naw la nga na?​—Kas 16:33.

19. Hkalup hkam na matu hpa majaw n htingnut ging ai kun? Ga shadawn tsun dan u. (Yawhan 4:34)

¹⁹ Hkalup hkam na matu nang htingnut taw yang, Yesu a ga shadawn langai hpe myit yu u. (Yawhan 4:34 hpe hti u.) Kawa ai myit ra ai lam galaw ai hpe, shahpa hte Yesu shingdaw wa ai hpe sadi yu u. Hpa majaw kun? Shahpa gaw anhte hpe akyu jaw ai. Anhte hpe Yehowa galaw shangun ai lam yawng gaw anhte hpe akyu jaw ai lam Yesu chye ai. Anhte hpe hkra machyi shangun ai lam ni hpe Yehowa n galaw shangun mayu ai. Yehowa a myit ra ai lam hta hkalup hkam ai mung lawm ai kun? Lawm ai. (Kas 2:38) Hkalup hkam u ngu ai hkang da ai ga hpe hkan sa ai gaw akyu nga ai hpe nang kam mai ai. Grai mu ai malu masha sha na matu n htingnut ai nga yang, hkalup hkam na matu hpa majaw htingnut taw na?

20. Hpang na sumhpa hta hpa lam chye lu na kun?

²⁰ Hpa majaw la nga ai? Masha law law gaw ndai hku htai ma ai: “Ngai garai n jin shi ai.” Yehowa kaw tinang hkum tinang apnawng nna hkalup hkam ai gaw, jahkrat wa ai dawdan lam ni kaw na ahkyak htum re. Dai majaw, jin jin rai na matu aten la nna atsawm myit yu na shakut ra ai. Raitim, hkalup hkam mayu ai myit nga yang, ya kaw na shajin na matu hpa galaw lu ai kun? Hpang na sumhpa hta dai ga san a mahtai hpe chye lu na re.