1. Kanu kawa ni gaw ma ni hpe hpa karum ya mayu ai kun?

 YEHOWA hpe ma ni chye wa nna tsawra wa hkra, kanu kawa ni karum ya mayu ai hpe anhte chye ai. Raitim, Karai Kasang hpe n mu lu ai. Shi hpe gaja wa Nga Ai Wa hku mu wa nna, Shi hte ni htep wa hkra ma ni hpe gara hku karum ya lu ai kun?​—Yak 4:8.

2. Yehowa a atsam ningja ni hte seng nna ma ni hpe kanu kawa ni gara hku sharin ya lu ai kun?

² Ma ni Yehowa hte ni htep wa hkra karum ya lu ai ahkyak ai lam langai gaw, shanhte hte rau Chyum Laika hkaja ai hku nna re. (2 Tm 3:14-17) Kaga lam langai hpe mung, Chyum Laika hta tsun dan da ai. Hpan da lam hta mu lu ai Yehowa a atsam ningja ni hpe myit maju jung na matu, kawa langai gaw kasha hpe sadi jaw da ai lam Ga Shagawp Laika hta hti u ai. (Gsh 3:19-21) Hpan da lam ni hpe akyu jashawn nna Yehowa a atsam ningja ni a lam, ma ni hpe sharin ya lu ai lam nkau hpe bawngban mat na re.

3. Ma ni hpa hpe mu hkra kanu kawa ni karum ya ging ai kun?

³ “Shabyin da ai arai ni hpe tau yu yang, ginding aga lat kaw nna shi [Karai Kasang] a marai nsam . . . gaw, leng leng a dan nga ai” ngu Chyum Laika hta tsun da ai. (Rom 1:20) Kanu kawa ni, na a ma ni hte rau shinggan hta aten jahtum ai hpe ra sharawng na re. Dai aten laman, “shabyin da ai arai ni” hta Yehowa a mauhpa atsam ningja ni hpe mu hkra ma ni hpe karum ya u. Yesu a kasi kaw na kanu kawa ni hpa sharin la mai ai lam yu yu ga.

4. Hpan da lam hpe akyu jashawn nna sape ni hpe Yesu gara hku sharin ya ai kun? (Luka 12:24, 27-30)

 ⁴ Hpan da lam hpe akyu jashawn nna Yesu sharin ya ai hpe sadi yu u. U hka ni, hkalaw pan ni a lam myit yu na matu sape ni hpe Yesu tsun ai. (Luka 12:24, 27-30 hpe hti u.) Kaga dusat, kaga hpun langai ngai hpe ga shadawn jaw mai tim, sape ni atsawm chye ai hkalaw pan hte u hpe lata wa ai. U hka ni pyen nga ai, pa layang hta hkalaw pan ni tu nga ai hpe sape ni mu ga na re. Dai ni hpe madun nna Yesu sharin ya nga ai ngu shingran yu u. Dai hpang, sumsing kawa a n hpaw n ya jaw mayu ai myit, tsawra myit a lam sharin ya ai. U hka ni hpe jaw sha nna, nampan ni hpe shatsawm ya ai zawn, sadi dung ai mayam ni a malu masha a matu Yehowa madi shadaw ya na ngu ai hpe kam shangun ai.

5. Gara hpan da lam hpe kanu kawa ni akyu jashawn nna ma ni hpe Yehowa a lam sharin ya mai ai kun?

⁵ Kanu kawa ni, Yesu a sharin achyin ai lam hpe kasi la u. Ra dik htum dusat (sh) hpun, dai ni gaw Yehowa hte seng nna hpa madun nga ai lam, ma ni hpe tsun dan mai ai. Ma ni ra dik htum dusat hte hpun a lam hpe san mai ai. Shanhte myit lawm ai hta hkan nna Yehowa a lam sharin ya yang, grau myit maju jung nna grau madat na re.

6. Hkristohpa a kanu kaw na hpa sharin la lu ai kun?

⁶ Dusat langai (sh) hpun langai gaw Yehowa a lam hpa sharin ya ai hpe ma ni hpe tsun dan na matu kanu kawa ni aten grai jaw nna hkaja n ra ai. U hka ni gara hku sha ai, hkalaw pan ni gara hku tu kaba wa ai lam hte seng nna Yesu galu galang n sanglang dan ai. Shingra tara a lam hkaja ai hpe ma ni ra sharawng chye ai. Raitim, aloi sha sanglang dan ai, ga san san ai hte sha ma ni chye na lu ai. Hpunau Hkristohpa gaw ma kaji prat a lam ndai hku tsun dan ai: “Grupyin hta nga ai hpan da lam ni hpe manu shadan na matu, nu gaw chye na loi ai ga ni hte tsun dan wa ai. Ga shadawn, bum makau hta du taw yang, ‘dai bum ni gaw grai kaba ai, grai tsawm ai. Yehowa gaw grai mau na zawn i?’ ngu anu tsun ai. Panglai de bu hkawm ai shaloi, ‘dai hka leng kaba ni hpe yu dat u! Yehowa gaw grai atsam kaba ai’ ngu tsun ai. Dai ga ni gaw yu maya sha raitim, anhte law law myit wa hkra karum ya ai.”

7. Hpan da lam ni hpe myit na matu ma ni hpe gara hku shaman ya lu ai kun?

⁷ Na a ma ni kaba wa ai hte maren, Yehowa a lam grau sharin la na matu, hpan da lam ni hte seng nna grau myit yu na matu, shanhte hpe shaman ya mai ai. Hpan da lam langai hpe tsun dan nna, “Dai gaw Yehowa a lam hpa sharin ya ai kun?” ngu san mai ai. Ma ni a mahtai hpe na ai shaloi nang kabu nna mau mat na re.​—Mat 21:16.

8. Israela ni dinghku nawng “lam” hta bu hkawm ai shaloi hpa ahkaw ahkang lu ai kun?

⁸ “Lam” hkawm nga ai aten hta, ma ni hpe Yehowa a Tara ni sharin ya na matu Israela kanu kawa ni hpe hkang da ai. (Trj 11:19) Israela kahtawng dingyang lam hpaw da ai majaw, dusat ni, u ni, nampan amyu myu hpe mu lu ai. Israela ni dinghku nawng bu hkawm ai shaloi, Yehowa a hpan da lam ni hte seng nna tsun dan na matu kanu kawa ni ahkaw ahkang lu ai.  Dai ni aten na kanu kawa ni mung dai zawn ahkaw ahkang lu hkra galaw mai ai. Kanu kawa nkau dai hpe gara hku galaw wa ai hpe hkaja yu ga.

9. Punita hte Katya kaw na hpa chye lu ai kun?

⁹ India mungdan a mare kaba hta nga ai kanu langai re ai Punita ndai hku tsun ai: “Kahtawng hta nga ai jinghku ni hpang de sa chyai ai shaloi, Yehowa a mauhpa hpan da lam ni hte seng nna ma ni hpe sharin ya lu ai ahkaw ahkang re ngu sawn la ai. Masha ni, mawdaw ni kashuk kashak n byin nga ai majaw, hpan da lam ni hpe ma ni grau myit maju jung lu ai.” Kanu kawa ni, nanhte hte rau grai tsawm ai shara de sa chyai wa ai aten hpe ma ni galoi n malap ai. Modoba hta nga ai nauna Katya ndai hku tsun dan ai: “Ma kaji prat hta kanu kawa ni hte rau nam kahtawng de sa chyai ai hpe ngai grai dum ai. Hpan da lam ni hpe hkaja nna Yehowa a lam sharin la na matu, kaji aten kaw nna kanu kawa ni sharin ya ai majaw grai chyeju dum ai.”

10. Nam kahtawng de bu hkawm na matu n mai byin yang kanu kawa ni hpa galaw lu ai kun? (“ Kanu Kawa Ni A Matu Karum Shingtau” ngu ai lawk hpe yu u.)

¹⁰ Nam kahtawng de sa chyai na matu n mai byin ai nga yang gaw gara hku kun? India hta nga ai Amo ndai hku tsun ai: “Ngai nga ai shara hta kanu kawa ni gaw hkying hkum law law bungli galaw ra ai. Nam kahtawng de sa chyai na matu gumhpraw grai ma ai. Raitim, nampan sun kaw rai rai, nta kaw na sha rai rai, hpan da lam ni hpe yu nna Yehowa a atsam ningja ni hpe hkaja lu ai.” Na a nta grupyin hta ma ni hpe madun lu ai hpan da lam amyu myu nga ai. (Shk 104:24) U ni, latung ni, hpun ni hte kaga lam ni hpe madun nna sharin ya mai ai. Jamani kaw na Karina ndai hku tsun ai: “Anu gaw nampan ni hpe tsawra ai. Dai majaw ngai naw kaji ai shaloi arau lam hkawm shagu grai tsawm ai nampan ni hpe madun ai.” Uhpung kaw na shapraw da ya ai, hpan da lam hte seng ai laili laika ni, video ni hpe mung kanu kawa ni akyu jashawn mai ai. Nang gara kaw mi nga tim, hpan da lam ni kaw na ma ni sharin la na matu karum ya lu ai. Ma ni hpe sharin ya mai  ai Yehowa a atsam ningja nkau hpe bawngban yu ga.

11. Yehowa a tsawra myit a lam ma ni hpe gara hku sharin ya lu ai kun?

¹¹ Kashu Kasha ni hpe atsawm sha lanu lahku nga ai dusat dumyeng ni hpe madun nna, Yehowa a tsawra myit a lam ma ni hpe sharin ya mai ai. (Mat 23:37) Mauhpa hpan da lam amyu myu hpe mung madun mai ai. Shawng hta tsun wa ai Karina ndai hku tsun dan ai: “Anhte lam hkawm ai shaloi anu gaw, nampan langai hpra gaw kade daram laklai ai, Yehowa a tsawra myit hpe gara hku madun dan ai lam myit yu na matu sharin ya ai. Shaning ni na mat tim, nampan langai hte langai nsam, hkrang hte amyu hpan n bung ai hpe atsawm naw sadi yu hkrup ai. Dai ni gaw anhte hpe Yehowa kade daram tsawra ai lam dum shangun ai.”

12. Karai a nyan hpaji hpe chye na wa hkra, kasha ni hpe gara hku sharin ya mai ai kun? (Shakawn 139:14) (Sumla hpe mung yu u.)

¹² Yehowa gaw anhte hta grau nna nyan hpaji rawng ai hpe ma ni chye na hkra karum ya u. (Rom 11:33) Ga shadawn, summwi gaw hka ni salu rawt nna byin wa ai. Raitim, kade daram atsang sha shamu shamawt nga ai lam hpe tsun dan mai ai. (Yob 38:36, 37) Masha hkum hkrang a mauhpa hpan da lam hpe mung tsun dan mai ai. (Shakawn 139:14 hpe hti u.) Kawa langai re ai Baladima ndai hku tsun dan ai: “Lani mi hta nye kasha lagaw leng galau nna hpye mat ai. Nhtoi loi na ai shaloi mai mat ai. Se (cell) ni hpe shi hkrai shi bai gram lu ai atsam hte masha hpe Yehowa hpan da ai lam an la sanglang dan ai. ‘Masha ni galaw da ai arai ni hta, dai atsam n nga ai. Ga shadawn, mawdaw adawt ai majaw mawdaw hten mat yang, shi hkrai shi bai n kaja wa ai’  ngu tsun dan ai. Dai majaw, Yehowa a nyan hpaji hte seng nna an a ma grau chye na wa ai.”

13. Karai a atsam hpe chye wa hkra ma ni hpe gara hku sharin ya mai ai kun? (Esaia 40:26)

¹³ Shagan ni hpe shi shara hte shi tawn da lu ai mauhpa atsam hpe lamu de yu nna myit yu na matu, Yehowa anhte hpe saw shaga da ai. (Esaia 40:26 hpe hti u.) Na a ma ni hpe lamu de yu nna myit yu na matu sharin ya mai ai. Htaiwan kaw na nauna Hting Htin gaw shi a ma prat hte seng nna ndai hku tsun dan ai: “Kalang mi hta anu hte ngai bu hkawm ai, shana hta ginsum gap na nga ai. Myihprap wan n nga dai shara hta, shan na lamu hpe rau yu ai. Dai shaloi, manang ni a dip n-gun a majaw, Yehowa hpe sadi dung let nawku lu na kun, ngu myit tsang nga ai. Shagan ni hpe hpan lu ai Yehowa a atsam hpe myit yu na matu, ngai hkrum nga ai chyam dinglik lam ni hpe tawt lai lu na matu, dai atsam hte Karai Kasang karum ya na hpe dum na matu anu ngai hpe n-gun jaw ai. Bu hkawm nna bai wa ai shaloi, Yehowa a lam hpe grau chye hkra galaw mayu wa ai. Karai a magam gun mayu ai myit grau law wa ai.”

14. Yehowa hpe ngwi pyaw ai Karai hku nna ma ni mu wa hkra, hpan da lam hpe akyu jashawn nna gara hku sharin ya lu ai kun?

¹⁴ Hpan da lam ni hpe yu yang, Yehowa gaw ngwi pyaw ai Karai re ai, anhte hpe mung ngwi pyaw shangun mayu ai lam chye lu ai. U ni, nga ni hte hpawn, dusat law malawng gaw ginsup chye ai hpe, hpungtang hpaji du ni tam mu wa ma ai. (Yob 40:20) Dusat langai ginsup nga ai hpe mu nna, na a ma ni kabu ai kun? Nyau kasha langai ri hpe ginsup nga ai, gwi kasha ni gamu hkat nna ginsup nga ai hpe mu ga ai rai na re. Hpang kalang, ma ni dusat ni hpe yu nna kabu nga ai hpe mu yang, Yehowa gaw pyaw chye ai Karai re ai hpe alu sha sharin ya u. ​—1 Tm 1:11.

15. Ma ni a hkamsha lam hpe chye na matu kanu kawa ni hpe hpa galaw ra ai kun? (Ga Shagawp 20:5) (Sumla hpe mung yu u.)

¹⁵ Hkrum nga ai manghkang ni hpe ma ni n tsun dan ai majaw, kanu kawa ni yak chye ai. Hkamsha lam ni hpe ma ni n tsun dan yang, kanu kawa ni gaw shanhte tsun wa hkra galaw ra ai. (Ga Shagawp 20:5 hpe hti u.) Shingra tara hpe yu nna hkamsha nga ai shaloi, ma ni a hkamsha lam tsun dan wa hkra galaw na matu grau loi ai hpe kanu kawa nkau sadi hkrup ai. Hpa majaw kun? Ma ni hte kawa ni myit pyaw nga ai majaw re. Htaiwan kaw na kawa langai re ai Masahiko ndai hku tsun dan da ai: “Bum lung ai (sh) panglai makau hta lam hkawm nga ai shaloi, ma ni myit pyaw nga  ai. Dai zawn aten hta shanhte a hkamsha lam ni tsun dan wa hkra galaw na matu grau loi ai.” Shawng hta tsun wa ai Katya ndai hku tsun ai: “Jawng yu ai hpang, anu gaw nampan sun de woi sa chye ai. Dai kaw du yang myit pyaw mat ai majaw, jawng kaw hkrum wa ai lam ni, myit tsang hpa lam ni anu hpe tsun dan na matu grau loi ai.”

16. Hpan da lam ni gaw gara hku nna ngwi pyaw shangun ai kun?

¹⁶ Yehowa a hpan da lam ni gaw ngwi pyaw shangun ai, dinghku makyit sumri ngang kang shangun ai. “Mani ai aten” hte “ka manawt na aten” nga ai ngu Chyum Laika hta tsun da ai. (Hpj 3:1, 4) Pyaw hpa lam ni galaw na matu, grai tsawm ai shara ni hpe Yehowa hpan da ya ai. Nam kahtawng ni, bum ni, panglai ni de bu hkawm ai hpe dinghku law law ra sharawng ma ai. Nampan sun hta gat nna ginsup hkawm ai, dusat ni hpe yu ai, hka shi hka nu ni, panglai ni hta hka hpungyawt ai hpe ma ni ra sharawng ma ai. Yehowa a hpan da lam ni hta ngwi pyaw lu na ahkaw ahkang law law nga ai.

17. Hpan da lam ni hpe ma ni ngwi pyaw hkamsha na matu, kanu kawa ni hpa majaw karum ya ging ai kun?

¹⁷ Mungkan nnan hta rai yang, kanu kawa ni hte kasha ni gaw Karai a hpan da lam ni hpe kalang mi mung n lu ga ai ngwi pyaw lam hkamsha lu na re. Dai ni aten hte n bung ai sha, dusat ni hpe masha ni n hkrit ra ai zawn, dusat ni mung masha ni hpe n hkrit ra sai. (Esa 11:6-9) Yehowa a hpan da ai lam ni hpe htani htana hkamsha lu na re. (Shk 22:26) Raitim, kanu kawa ni, dai aten du hkra hkum la nga. Ya kaw nna, hpan da ai lam ni hpe akyu jashawn nna, ma ni hpe Yehowa a lam sharin ya u. Rai yang, ‘Madu [Yehowa] e . . . Na a amu zawn re ai n nga ai’ ngu, Hkawhkam Dawi zawn shanhte tsun wa na re.​—Shk 86:8.