“Jinghku wa” gaw Ruhta hpe hkungran la yang, sali wunli ga “jahten” ai hte bung na tsang ai ngu hpa majaw tsun ai kun? (Rut 4:1, 6, NWT)

Chyum Laika prat na dinghku la langai ma n lu ai sha si mat yang, ‘shi madu ai sali ga hpa byin mat na kun? Shi a htinggaw mying prat tup mat mat na kun?’ ngu ai ga san ni pru wa ai. Mawshe a Tara hta dai ga san ni hte seng nna mahtai jaw ai.

Masha langai si mat yang (sh) matsan ai majaw sali ga dut kau ra yang, shi madu ai dai sali ga gaw hpa byin mat na kun? Dai sali ga hpe kahpu kanau (sh) jinghku daw ai wa gaw, bai mari la na ahkang nga ai. Dai hku nna, sali ga gaw dai htinggaw sha matut madu nga na re.​—Jaw 25:23-28; Bhk 27:8-11.

Dai gaw, si mat ai wa a htinggaw mying n mat na matu gara hku karum ya ai kun? Ruhta a mabyin zawn, kagu, karat kaw num bai wa ai htung lai hku nna re. Gaida byin mat ai karat hpe bai la yang she, si mat ai wa a mying hte sali ga hpe madu na kasha lu wa na re. Tsawra myit lawm ai ndai lamang kaw nna gaida ni mung akyu lu ai.​—Trj 25:5-7; Mat 22:23-28.

Naomi a lam hpe myit yu u. Madu wa Elimelek hte kasha lasha 2 si mat ai hpang, shi hpe gawn na kasha n lu sai. (Rut 1:1-5) Yuda mung de bai du ai shaloi, Bua hpe sali ga bai mari la shangun na matu kanam Ruhta hpe tsun ai. Bua gaw Elimelek a jinghku re. (Rut 2:1, 19, 20; 3:1-4) Raitim, Bua htan jinghku grau daw ai wa naw nga ai. Chyum Laika hta shi hpe “jinghku wa” ngu nna sha tsun da ai. Shi gaw, sali ga mari na, n mari na hpe shawng dawdan ra ai.​—Rut 3:9, 12, 13.

Shawng nnan hta, dai “jinghku wa” gaw karum ya mayu ai. (Rut 4:1-4) Elimelek a lamu ga hpe gumhpraw hte mari ra na raitim, dai ga hpe madu na kasha shangai na matu, Naomi gaw asak grai kaba sai hpe shi chye da ai. Dai majaw, Elimelek a lamu ga hpe madu lu nna, shi a lamu ga tai mat na hpe chye ai. Akyu grai lu na lam re.

Raitim, Ruhta hpe la ra na ngu ai hpe chye ai shaloi myit galai shai mat ai. “Dai rai yang gaw ngai n mari lu na nngai; mari yang mung, nye a sali ga jahten na tai ai” ngu shi tsun ai. (Rut 4:5, 6) Shi hpa majaw myit galai shai mat ai kun?

Dai jinghku wa (sh) kaga langai ngai, Ruhta hpe la nna lasha shangai wa yang, Elimelek a sali ga hpe dai ma lu na re. Jinghku wa a “sali ga” hpe “jahten” ai hte gara hku bung ai kun? Chyum Laika hta n tsun da tim, byin mai ai lam nkau hpe yu yu ga.

• Langai, Elimelek a lamu ga hpe shi n re ai sha, Ruhta a kasha lu na re ai majaw, lamu ga mari da ai gumhpraw majoi tai mat na re.

• Lahkawng, Naomi yan Ruhta hpe mung bau ra na re.

• Masum, shi lu da chyalu ma ni hte Ruhta hte lu wa na ma ni gaw sali wunli ni hpe garan la ra na re.

• Mali, lama na, dai jinghku wa hta kashu kasha n lu yang, Ruhta shangai ai lasha gaw Elimelek a lamu ga hpe mung, dai jinghku wa a lamu ga hpe mung sali wunli lu na ahkang nga ai. Dai rai yang, shi si mat ai shaloi, shi a lamu ga gaw shi a mying hte n re ai sha, Elimelek a mying hkam la da ai ma a mying hte ngam mat na re. Dai majaw, Naomi hpe karum na matu shi a sali ga hpe sak jaw n gwi ai. Shi zawn bai mari na ahkang nga ai Bua hpe ahkaw ahkang jaw kau ai. ‘Si ai wa a sali ga hta shi [si ai wa] a amying madat da na matu’ Bua sharawng awng wa ai.​—Rut 4:10.

Jinghku wa gaw, shi a mying hte sali ga matut byin nga na matu grau myit lawm ai gaw dan dawng nga ai. Shi gaw tinang a akyu hpe sha myit ai. Shi mying lu na matu kade shakut wa tim, shi kadai re ai hpe anhte n chye ai. Shi gaw, grai kaja ai ahkaw ahkang re ai, Meshia a jiwoi jiwa byin lu na ahkang hpe sum mat ai. Dai hpe Bua lu mat ai. Karum shingtau ra kadawn nga ai ni hpe, tingkyeng myit a majaw n karum ai sha koi ai a akyu re.​—Mat 1:5; Luk 3:23, 32.