Hkaja Na Sumhpa 14
“Nanhte Nye A Sape Ni Rai Nga Myit Dai Gaw, Masha Yawng Mayawng Chye Lu Na”
“Shing rai nanhte shada tsaw ra ai myit rawng nga myit yang gaw, nanhte nye a sape ni rai nga myit dai gaw, masha yawng mayawng chye lu na ma ra ai.”—YHN 13:35.
Mahkawn 106 Tsawra Myit Hpe Shalat Ai Lam
Sumhpa Hta Lawm Ai Lam a
Yehowa a amyu masha ni madun ai tsawra myit hpe mu lu ai gaw, Sakse Hkam n re ai ni hpe gara hku akyu shabyin ya ai kun? (Laika pang 1 hpe yu u)
1. Myit lawm ai ni shawng nnan zuphpawng sa lung ai shaloi hpa hpe sadi hkrup ai kun? (Sumla hpe mung yu u.)
YEHOWA Sakse ni a Nawku Htingnu de, yan la langai shawng nnan zuphpawng sa lung ai ngu shingran yu u. Hpunau nauna ni alum ala hkap tau ai, shada da tsawra myit madun ai hpe yu nna, myit hta grai matsing mat ai. ‘Yehowa Sakse ni gaw gaja nan laklai ai’ ngu, madu wa hpe madun jan tsun ai.
2. Nkau mi hpa majaw ahtu kataw mat ai kun?
2 Yehowa a amyu masha ni a lapran hta nga ai tsawra myit gaw grai laklai ai. Gaja nga yang, Yehowa Sakse ni mung n hkum tsup ai ni re. (1 Yh 1:8) Dai majaw, shada da a lam grau chye magang, gawngkya lam ni hpe mu wa magang re. (Rom 3:23) Yawn hpa gaw, kaga ni a n hkum tsup ai lam ni a majaw, nkau mi ahtu kataw mat ai.
3. Yesu a sape ajet ni a masat dingsat gaw hpa rai kun? (Yawhan 13:34, 35)
3 Ndai sumhpa a madung chyum daw hpe sadi yu u. (Yawhan 13:34, 35 hpe hti u.) Jet ai Hkristan ni a masat dingsat gaw hpa rai kun? Tsawra myit re, hkum tsup ai lam n re. ‘Nanhte nye a sape ni rai nga myit dai gaw, nang chye lu na’ ngu Yesu n tsun ai. “Masha yawng mayawng chye lu na” ngu nna tsun ai. Shada da tingkyeng akyu n tam ai tsawra myit madun ai hpe mu yang, Yesu a sape ajet re ai hpe Hkristan ni mung, Hkristan n re ai ni mung chye na ngu Yesu tsun nga ai re.
4. Jet ai Hkristan ni hte seng nna nkau hpa chye mayu ai kun?
4 ‘Tsawra myit gaw jet ai Hkristan ni re ai hpe gara hku chye shangun ai kun? Kasa ni hpe Yesu tsawra myit gara hku madun ai kun? Yesu a kasi hpe hkan sa na matu mai byin ai kun?’ ngu nna, Yehowa Sakse n re ai masha nkau san chye ai. Sakse Hkam ni pyi, dai ga san hpe myit yu ging ai. Rai yang, kaga ni galaw shut ai shaloi, tsawra myit madun na matu karum ya na re.—Ehp 5:2.
Tsawra Myit Gaw Jet Ai Hkristan Ni Hpe Hpa Majaw Ginhka Ya Ai Kun?
5. Yawhan 15:12, 13 hta lawm ai Yesu a ga ni hpe sanglang dan u.
5 Yesu gaw shi hpang hkan ai ni shada da laklai ai hku tsawra myit madun na lam asan sha tsun ai. (Yawhan 15:12, 13 hpe hti u.) “Ngai nanhte hpe tsaw ra ma de ai zawn, nanhte shada da tsaw ra nga mu” ngu htet da ai lam hpe sadi yu u. Hpa lachyum kun? Ra wa yang, kamsham shada a matu si hkam ai du hkra, tingkyeng akyu n tam ai tsawra myit hte tsawra na matu, tsun nga ai ngu Yesu matut sanglang dan ai. b
6. Tsawra myit gaw grai ahkyak ai lam, Chyum Laika hta gara hku ahkyak shatai tsun da ai kun?
6 Tsawra myit gaw grai ahkyak ai lam, Chyum Laika hta ahkyak shatai tsun da ai. “Karai Kasang gaw tsaw ra ai myit rai nga ai.” (1 Yh 4:8) “Na a htingbu wa hpe, na a hkum hte maren nang tsaw ra lu na ndai.” (Mat 22:39) “Tsaw ra ai myit gaw, yubak mara law law hpe magap da lu ai.” (1 Pe 4:8) “Tsaw ra ai myit gaw galoi mung htak chye ai n rai.” (1 Ko 13:8) Dai chyum daw ni hte kaga chyum daw ni gaw, tsawra myit nga na matu, madun na matu kade ahkyak ai hpe asan sha tsun dan ai.
7. Masha shada da tsawra hkra, kahkyin gumdin hkra Satan hpa majaw n lu galaw ai kun?
7 ‘Jet ai nawku htung hpe gara hku ginhka lu na kun? Nawku htung yawng tengman ai lam sharin ya ai ngu tsun tim, Karai a lam sharin ya ai gaw n bung ma ai’ ngu masha law law myit hkrup chye ai. Masha ni myit shuk mat hkra, shut shai ai nawku htung law law paw pru wa hkra Satan galaw da ai. Raitim, shada da tsawra ai mungkan grup hpunau uhpung byin wa hkra gaw Satan n lu galaw ai. Yehowa sha lu galaw ai. Jet ai tsawra myit a Npawt gaw Yehowa re ai majaw re. Chyoi pra ai wenyi hte shaman chyeju lu ai ni sha, shada da jet ai tsawra myit hte tsawra lu ai. (1 Yh 4:7) Dai majaw mung, tingkyeng akyu n tam ai tsawra myit gaw, sape ajet re ai hpe chye shangun na ngu Yesu tsun ai re.
8-9. Yehowa Sakse ni hta mu lu ai tsawra myit gaw, masha law law hpe gara hku akyu shabyin ya ai kun?
8 Yesu tau hkrau tsun da ai zawn, shada da jet ai tsawra myit hte tsawra ai hpe mu nna, jet ai Hkristan ni hpe masha law law chye wa ma ai. Ga shadawn, hpunau Iran gaw, nta makau na ginsup pa hta galaw ai zuphpawng kaba hpe, shawng nnan sa lung ai aten hpe naw matsing nga ai. Zuphpawng n sa lung shi ai shata loi mi hta, dai ginsup pa kaw ginsup shingjawng poi sa yu byin ai. Raitim, “Ndai zuphpawng kaba hte grai shai ai. Sakse Hkam ni gaw, sumnung shingdi nna sari rawng ai hku bu hpun ma ai. Ma ni mung myitsu ai. . . . Grau nna gaw, shanhte hta ngai lu mayu wa ai myit dik lam hte simsa lam nga taw ai zawn re. Dai shani hta, hpa mungga jaw mat ai hpe n matsing tim, Sakse Hkam ni a lailen hpe gaw, tsep kawp n lu malap ai” ngu tsun ai. c Shada da jet ai tsawra myit hte tsawra ai majaw, dai zawn lailen nga nna tsawra myit hte hkungga ai hku kanawn mazum ma ai re.
9 Hpunau Jon mung, nawku zuphpawng ni lung hpang ai aten hta, dai zawn hkamsha ai. “Dai kaw nga ai masha shagu gaw, hku hku hkau hkau kanawn mazum ai hpe . . . ngai matsing ai. Karai Kasang hpe shanhte hkrit hkungga ai gaw mauhpa re. Shanhte hta jet ai tsawra myit nga ai majaw, jet ai nawku htung hpe mu sai ngu ngai kam mat ai” ngu tsun ai. d Yehowa a amyu masha gaw, jet ai Hkristan ni re ai lam sakse madun ai dai zawn mahkrum madup ni grai law hkra nga ai.
10. Laksan hku nna, gara aten hta Hkristan tsawra myit madun na matu ahkaw ahkang lu ai kun? (Lawu matsing hpe mung yu u.)
10 Sumhpa nnan hpang ai hta tsun wa ai hte maren, anhte yawng n hkum tsup ma ai. Kalang lang, myit hkra machyi hkra tsun hkrup, galaw hkrup chye ai. e (Yak 3:2) Laksan hku nna, dai aten hta tinang a bai htang ai lam hte Hkristan tsawra myit madun na matu ahkaw ahkang lu ai. Ndai lam hta, Yesu kaw na hpa sharin la mai ai kun?—Yhn 13:15.
Kasa Ni Hpe Yesu Tsawra Myit Gara Hku Madun Ai Kun?
Kasa ni chyahkring hkring galaw shut ai lam ni nga tim Yesu tsawra myit madun (Laika pang 11-13 hpe yu u)
11. Yaku hte Yawhan hta n htap htuk ai gara akyang lailen ni nga ai kun? (Sumla hpe mung yu u.)
11 Yesu gaw, shi hpang hkan ai ni kaw na hkum tsup ai lam hpe n myit mada ai. Karai a myiman lu na matu, shanhte hta nga ai n htap htuk ai akyang ni hpe tsawra myit hte shading sharai ya ai. Kalang mi hta, mungdan hta ahkyak ai shara jaw na matu, kasa Yaku hte Yawhan gaw kanu hpe Yesu kaw tsun ya na matu hpyi shawn wa ai. (Mat 20:20, 21) Yaku hte Yawhan hta, gumrawng ai, yaw shada lam kaba ai zawn re ai n htap htuk ai akyang ni nga taw ai.—Gsh 16:18.
12. Yaku hte Yawhan hta sha n htap htuk ai akyang nga ai kun? Sanglang dan u.
12 Yaku hte Yawhan hta sha, n htap htuk ai akyang nga ai n re. “Ndai lam hpe kaga ngam ai sape marai shi na mu yang shanhte dai shan nau hpe yu pawt da mu ai.” (Mat 20:24, JCLB) Yaku, Yawhan hte ngam ai kasa ni, dang rang hkat nga ai hpe shingran yu u. ‘Mungdan hta gumhkawng ai shara hpyi ai gaw, nanhte hkum nanhte hpa shadu nga ai kun? Nanhte sha Yesu hte rau galaw ai kun? Tsun ga nga yang, anhte mung laksan ahkaw ahkang ni lu ging ai re’ ngu kaga kasa ni tsun chye ai. Hpa mi raitim, dai kalang hta, shanhte shada da kahpu kanau tsawra myit n madun byin mat ai.
13. Kasa ni a gawngkya ai lam hpe Yesu gara hku bai htang ai kun? (Mahte 20:25-28)
13 Masa hpe Yesu gara hku hparan wa ai kun? Shi gaw, masin n pawt ai. ‘Grau kaja ai, grau shagrit shanem ai, shada da tsawra myit ayan madun ai kasa ni hpe sha wa tam sana’ ngu n tsun wa ai. Kasa ni hta kaja ai myit jasat nga ai hpe chye ai majaw, myit galu let sawn dinglik dan ai. (Mahte 20:25-28 hpe hti u.) Kadai gaw grau htum ai rai kun ngu chyahkring hkring dang rang hkat tim pyi, tsawra myit matut madun ai.—Mrk 9:34; Luk 22:24.
14. Yesu a kasa ni gara zawn grupyin hta nga kaba wa ai kun?
14 Kasa ni a shingdu labau hpe Yesu myit shalawm ya wa na re. (Yhn 2:24, 25) Shanhte nga kaba wa ai grupyin hta nawku htung ningbaw ni gaw ahkang aya hpe grai ahkyak shatai ai. (Mat 23:6) Tinang hkum tinang ding hpring ai ngu nna mung masat da ma ai. f (Luk 18:9-12) Dai zawn grupyin hta nga kaba wa ai majaw, kasa ni hta dai myit jasat nga ai hpe Yesu chye na ai. (Gsh 19:11) Kasa ni tsep kawp mara n nga ai ni byin na matu, Yesu n myit mada ai. Shut ai lam galaw ai shaloi, lai lai jan jan bai n htang ai. Shanhte hta kaja ai myit jasat nga ai hpe chye ai. Dai majaw, gumrawng ai, yaw shada lam kaba ai zawn re ai n htap htuk ai akyang ni mat mat hkra, tsawra myit madun chye hkra myit galu let karum ya ai.
Yesu Hpe Gara Hku Kasi La Mai Ai Kun?
15. Yaku, Yawhan ni a mabyin kaw na hpa sharin la lu ai kun?
15 Yaku, Yawhan ni a mabyin kaw na law law sharin la lu ai. Mungdan hta ahkyak ai shara lu na matu hpyi shawn ai shan lahkawng mung shut ai zawn, kahkyin gumdin lam hpe hkra shangun ai ngam ai kasa ni mung shut ai. Raitim, kasa 12 ting hpe Yesu matsan dum myit, tsawra myit hte tsun shaga ai. Hpa sharin la lu ai kun? Kaga ni hpa galaw dat ai ngu ai sha ahkyak ai n re. Anhte gara hku bai htang ai ngu ai mung ahkyak ai. Hpunau nauna langai ngai a majaw, myit hkra machyi yang tinang hkum tinang ndai hku san mai ai: ‘Dai hpunau nauna galaw ai hpe ngai hpa majaw dai daram pawt nga ai kun? Ndai gaw, ngai galai shai ra ai n htap htuk ai akyang kun? Ngai hpe masin pawt hkra galaw ai hpunau hta myit n pyaw hpa lama ma nga ai majaw kun? Masin pawt na zawn raitim pyi, ahkyak n la ai sha ngai tsawra myit madun lu ai kun?’ Kaga ni hpe tsawra myit madun magang, Hkristan ajet re ai hpe sakse madun lu magang re.
16. Yesu kaw na hpa naw sharin la lu ai kun?
16 Yesu a kasi ningli gaw, kamsham shada hpe chye na ya na matu mung sharin ya ai. (Gsh 20:5) Kaga ni a myit masin hpe Yesu chye ai zawn, anhte n chye lu ai. Raitim, anhte hpe hpunau nauna ni myit hkra machyi hkra galaw ai shaloi myit galu ya lu ai. (Ehp 4:1, 2; 1 Pe 3:8) Shanhte a shingdu labau hpe chye da yang, hkam sharang na matu grau loi ai. Ga shadawn langai hpe yu yu ga.
17. Hpunau langai a lam grau chye mat ai majaw, hpung kawan gara hku akyu lu ai kun?
17 Kanawn yak ai hpunau langai a lam hpe, Sinpraw Ahprika hta magam gun ai hpung kawan hpunau naw matsing nga ai. Hpung kawan hpunau hpa galaw ai kun? “Dai hpunau hpe koi na malai, shi a lam grau chye hkra galaw na matu dawdan kau ai” ngu tsun ai. Nga kaba wa ai shingdu labau a majaw, kaga ni hpe dai zawn kanawn mazum ai re ai hpe chye dat ai. “Kade daram yak yak hkak hkak galai shai ra wa ai, kade daram galai shai nga sai ngu ai hpe, chye lu ai majaw yu kaba mat ai. Ya, shi hte manang kaja ni byin nga sai” ngu hpung kawan tsun ai. Hpunau nauna ni hpe chye na ya magang, tsawra myit madun na matu grau loi magang re.
18. Hpunau nauna langai tinang hpe hkra machyi hkra galaw ai shaloi, tinang hkum tinang gara ga san ni san mai ai kun? (Ga Shagawp 26:20)
18 Tinang hpe masin pawt hkra galaw ai hpunau nauna hte myiman chyaw hparan yang she mai na ngu hkamsha ai aten ni nga chye ai. Shawng nnan, tinang hkum tinang ndai hku san u: ‘Lam yawng hpe ngai chye ai kun?’ (Gsh 18:13) ‘N yaw shada ai sha shi tsun hkrup, galaw hkrup ai kun?’ (Hpj 7:20) ‘Ngai gaw n shut ga ai kun?’ (Hpj 7:21, 22) ‘Sa hparan yang she manghkang grau kaba mat na kun?’ (Ga Shagawp 26:20 hpe hti u.) Dai ga san ni hpe aten la myit yu na nga yang, shut ai lam hpe ahkyak n shatai na matu, tsawra myit gaw shadut ya lu ai lam chye na wa na re.
19. Nang hpa dawdan da ai kun?
19 Shada da tsawra myit madun ai hku nna, Yehowa Sakse ni gaw Yesu a sape ajet re ai lam, uhpung nawng sakse madun nga ai. Langai hpra hku nna mung sakse madun nga ai. Shanhte gaw hkum tsup ai ni n rai tim, tingkyeng akyu n tam ai tsawra myit madun ai. Dai hku madun ai hpe mu ai majaw, kaga ni jet ai nawku hpung hpe ginhka chye wa na re. Tsawra myit nga ai Yehowa Karai Kasang hpe anhte hte rau nawku wa na re. Dai majaw, jet ai Hkristan ni a masat dingsat re ai tsawra myit hpe matut madun mat na matu dawdan da ga.
Mahkawn 17 ‘Ngai Hkraw Nngai’
a Masha law law gaw anhte madun ai tsawra myit hpe mu ai majaw, tengman ai tara de lau la hkrum ai. Raitim, anhte gaw n hkum tsup ai majaw, kalang marang hpunau nauna ni hpe tsawra myit madun na matu yak chye ai. Shada da a n hkum tsup ai lam ni hpe hparan ai shaloi, Yesu a kasi ningli hpe gara hku hkan sa lu ai lam, tsawra myit gaw hpa majaw grai ahkyak ai lam hkaja lu na re.
c 2012, November 1, Sin Langchyi (Myen) laika man 13-14 hta lawm ai “Hpang Jahtum Gaw Nye Prat Yaw Shada Lam Nga Wa Sai” ngu ai sumhpa hpe yu u.
d 2012, May 1, Sin Langchyi (Myen) laika man 18-19 hta lawm ai “Nye Prat Gaw Hkum Tsup Taw Ai Zawn” ngu ai sumhpa hpe yu u.
e Ndai sumhpa gaw, 1 Korinhtu 6:9, 10 hta madun da ai, myitsu salang ni hparan ra na mara kaba ni a lam hpe bawngban nga ai n re.
f “Mungkan ntsa hta, Abraham daram ding hpring ai wa yawm htum marai 30 sha nga chye ai. Marai 30 nga yang, lahkawng gaw ngai hte nye kasha. Marai 10 nga yang, lahkawng gaw ngai hte nye kasha. Marai 5 nga yang, lahkawng gaw ngai hte nye kasha. Marai 2 nga yang, dai gaw ngai hte nye kasha. Marai langai sha rai yang, dai gaw ngai re” ngu rabai langai tsun ga ai.
