Ndai sumla hta lawm ai myihtoi ga ni gaw aten langai kaw sha kalang ta byin na mabyin ni re. Dai ni gaw “amu htum ai aten” hta anhte asak hkrung nga ai hpe lam law law hte madun dan ai.—Dan 12:4.

• Chyum daw ni Shr 11:7; 12:13, 17; 13:1-8, 12

  Myihtoi ga “Matse labye” gaw mungkan hta shaning law law uphkang ai. Hpang jahtum nhtoi hta, matse labye a sanit ngu na baw ningma lu ai. Dai hpang, dai ningma mai tsai mat ai. “Mungkan ting” hta nga ai masha ni gaw matse labye a hpang hkan ma ai. Ngam nga ai ni hpe “gasat kau na” matu matse labye hpe Satan akyu jashawn ai.

  Hpring tsup ai lam Hka sha-u ing ngut ai hpang, Yehowa hpe ninghkap ai masha asuya paw pru wa ai. Tsa ban shaning ni na ai hpang, nambat 1 mungkan majan laman, Britin hkawseng mungdan gaw atsam yawm wa ai. Amerikan hte jinghku hku ai shaloi, atsam bai kaba wa ai. Laksan hku nna, hpang jahtum nhtoi ni hta Karai a masha ni hpe zingri na matu, mung masa hpe Satan akyu jashawn ai.

• Chyum daw ni Dan 11:25-45

  Myihtoi ga Hpang jahtum nhtoi ni hta, dingdung hkawhkam hte dingda hkawhkam ni shingjawng hkat ma ai.

  Hpring tsup ai lam Jamani hte Engalo-Amerikan gaw ahkang aya a matu shingjawng ma ai. 1945 hta, Sobiyet Munghpawm Mungdan hte jinghku mungdan ni gaw dingdung hkawhkam byin wa ai. 1991 hta, Sobiyet Munghpawm Mungdan hten run mat nna Rasha hte jinghku mungdan ni gaw dingdung hkawhkam byin wa ai.

• Chyum daw ni Esa 61:1; Mal 3:1; Luk 4:18

  Myihtoi ga Yehowa gaw Meshia Mungdan n gawgap shi yang, “lam lajang” ya na matu “kasa” hpe shangun dat ai. Dai kasa gaw “matsan mayan ni hpe kabu gara shi ga hkaw tsun” ai.

  Hpring tsup ai lam 1870 hpring ai aten kaw nna, C.T. Rase hte manang ni gaw Chyum Laika tengman lam ni hpe myit rawt let sanglang dan ma ai. Karai a mayam ni hkaw tsun na matu ahkyak ai lam 1881 hta chye na wa ai. “Hkaw Tsun Masha 1,000 Ra,” “Hkaw Tsun Na Matu Namman Chya Hkrum” ngu ai sumhpa ni hpe dip shapraw ai.

• Chyum daw ni Mat 13:24-30, 36-43

  Myihtoi ga Hpyen gaw hkauna hta tsing nli ni gat dat ai. Tsing ni tu kaba wa nna, mam hpe ka-up kau ai. Dan la ai aten hta, tsing hte mam hpe ginhka ai.

  Hpring tsup ai lam 1870 kaw nna jet ai Hkristan hte shut shai ai Hkristan ni shai wa ai. Hpang jahtum nhtoi ni hta, jet ai Hkristan ni kahkyin la hkrum nna, shut shai ai Hkristan ni hte ginhka da ai.

• Chyum daw ni Dan 2:31-33, 41-43

  Myihtoi ga Nhprang amyu myu hte galaw da ai sumla kaba a hpri hte ga kagam kayau da ai lagaw.

  Hpring tsup ai lam Ga kagam gaw Engalo-Amerikan Mungkan Daru Magam kaw lawm ai shawa masha hpe tsun ai re. Shanhte a majaw, asuya ni gaw hpri zawn ja ai ahkang aya hpe hpring tup n lu jailang ai.

• Chyum daw ni Mat 13:30; 24:14, 45; 28:19, 20

  Myihtoi ga “Mam” hpe “dum” hta mahkawng da ai. “Nta masha ni” a matu “sadi ai hte myit su ai mayam” hpe aya tang da ai. “Mungdan a kabu gara shi ga” hpe “mungkan ting hta” hkaw tsun hpang ai.

  Hpring tsup ai lam 1919 hta, Karai a masha ni a matu sadi dung ai mayam hpe aya tang ai. Dai aten kaw nna, Chyum jawng ma ni gaw hkaw tsun bungli hpe grau nna galaw ai. Dai ni aten na Yehowa Sakse ni gaw, mungdan 200 jan hta hkaw tsun nga nna, Chyum Laika hte seng ai laili laika ni hpe amyu ga 1,000 jan hte dip shapraw nga ai.

• Chyum daw ni Dan 12:11; Shr 13:11, 14, 15

  Myihtoi ga Nrung lahkawng tu ai matse labye gaw “matse labye a hkrang sumla” shachyaw ai hta woi awn nna, ‘hkrang sumla hta nsoi nsa bang’ ya ai.

  Hpring tsup ai lam Engalo-Amerikan Mungkan Daru Magam gaw Munghpawng Mungdan Hpung gawgap ai hta woi awn ai. Dai hpung hpe kaga mungdan ni madi shadaw ai. Dingdung hkawhkam mung dai hpung hta lawm ai. Raitim, 1926-1933 du hkra sha re. Dai hpung gaw shi a hpang hta paw pru wa ai Mungkan Wunpawng Hpung zawn, Karai a Mungdan sha lu ging ai shakawn shagrau ai lam hpe lu la wa ai.

• Chyum daw ni Dan 8:23, 24

  Myihtoi ga Nhkru ai myiman man ai hkawhkam gaw “jahten shabyak” ai.

  Hpring tsup ai lam Engalo-Amerikan Mungkan Daru Magam gaw jahten shabyak ai. Ga shadawn, nambat 2 mungkan majan laman Amerikan gaw, shingjawng manang a ntsa nyukaliya bawm lahkawng jahkrat nna jahten kau ai.

• Chyum daw ni Dan 11:31; Shr 17:3, 7-11

  Myihtoi ga Grai sung ai nhkun kaw na “hkyeng kabrim” nna, nrung 10 tu ai matse labye lung wa ai. Dai matse labye gaw 8 ngu na hkawhkam re. Dai hkawhkam hpe Daniela laika hta “jahten shabyak chye ai matsat shabat kumla” ngu tsun ai.

  Hpring tsup ai lam Nambat 2 mungkan majan laman, Munghpawng Mungdan Hpung n nga mat sai. Majan ngut ai hpang, Mungkan Wunpawng Hpung hpe “shadun da” ai. Dai hpung gaw moi na Munghpawng Mungdan Hpung zawn, Karai Mungdan lu ging ai shakawn shagrau lam hpe lu la ai. Nawku htung hpe Mungkan Wunpawng Hpung gaw gasat na re.

• Chyum daw ni 1 Hte 5:3; Shr 17:16

  Myihtoi ga “Ngwi pyaw ai hte asan apan rai nga ai” ngu mungdan ni ndau shana ai. “Nrung shi” hte “matse labye” gaw “shawa num” hpe gasat nna jahten kau ai. Dai hpang, mungdan ni jahten hkrum ai.

  Hpring tsup ai lam Mungdan ni gaw simsa hkra galaw lu sai ngu ndau shana na re. Dai hpang, Mungkan Wunpawng Hpung hpe madi shadaw ai mungdan ni gaw, shut shai ai nawku htung yawng hpe jahten kau ai. Dai gaw ru tsang kaba nnan hpang ai re. Hara Magedon hta, mungkan a masa lam yawng hten run mat ai hku nna, ru tsang kaba ngut mat na re.

• Chyum daw ni Eze 38:11, 14-17; Mat 24:31

  Myihtoi ga Karai a masha ni a mungdan hpe Goga gasat ai. Dai hpang, lamu kasa ni gaw “lata la sai ni” hpe kahkyin la ai.

  Hpring tsup ai lam Dingdung hkawhkam gaw ngam ai mungkan asuya ni hte arau, Karai a masha ni hpe gasat ai. Gasat hpang nna aten langai ngai hta, ngam nga ai namman chya hkam ai ni hpe sumsing lamu de shaga la na re.

• Chyum daw ni Eze 38:18-23; Dan 2:34, 35, 44, 45; Shr 6:2; 16:14, 16; 17:14; 19:20

  Myihtoi ga “Gumra ahpraw” hpe “jawn ai wa” gaw, Goga hte hpyen dap hpe jahten kau ai hku nna, tsep kawp “dang kau” na re. “Matse labye” gaw ‘wan nawng kata de jahkrat bang kau’ hkrum ai. Nlung langai mi gaw sumla kaba hpe adawt jahkrat dat ai.

  Hpring tsup ai lam Karai Mungdan a Hkawhkam Yesu gaw Karai a masha ni hpe hkye la ai. Yesu hte arau uphkang na 144,000 hte lamu kasa hpyen dap gaw, mungdan ga daga ni hte hpawng de da ai Satan a mung masa lam yawng hpe jahten kau na re.