1-2. Masa ni galai shai mat ai shaloi, Chyum Laika npawt tara nkau gaw tinang a matu, lachyum grau nga wa ai lam hpe sanglang dan u. 

 HKUNG ran ai shani hta, num nnan hte la nnan gaw, Chyum Laika hta madung tawn ai, hkung ran mungga hpe atsawm madat la ai. Mungga hta lawm ai Chyum Laika npawt tara ni hpe shawoi mung na ga ai. Raitim, dai shani kaw nna, dai npawt tara ni gaw shan a matu grau lachyum nga wa ai. Chyum Laika npawt tara ni hpe shan tatut hkan sa ra sana re ai majaw re.

² Hkristan yan la ni kanu kawa byin wa ai shaloi hta mung dai zawn sha re. Shaning ni laman, kasha ni hpe bau maka ai hte seng ai mungga ni grai law hkra na ga ai. Raitim, ya gaw dai Chyum Laika npawt tara ni gaw, shanhte a matu grau lachyum nga wa sai. Tinang nan kasha hpe bau maka ra sana re ai majaw re. Lit kaba nan re. Masa galai shai mat ai hte maren, chye da ai Chyum Laika npawt tara ni mung grau lachyum nga wa ai. Dai majaw, Israela hkawhkam ni hpe hpyi shawn da ai zawn, Yehowa hpe nawku ai ni gaw, “hkrung nga ai prat dingsa” Chyum Laika hti nna myit sawn sumru ra ai.​—Trj 17: 20.

3. Ndai sumhpa hta hpa lam bawngban na kun?

³ Kasha ni hpe Yehowa a lam sharin ya ai ahkaw ahkang kaba hpe kanu kawa ni lu da ai. Kasha ni gaw Karai hpe chye ai daram sha n-ga, tsawra wa hkra karum ya mayu ai majaw re. Gara hku karum ya mai na kun? Ndai sumhpa hta, kanu kawa ni hpe karum ya lu ai Chyum Laika npawt tara 4 hpe  bawngban na re. (2 Tm 3:17) Hkristan kanu kawa nkau gaw, Chyum Laika hpaji jaw ga ni hpe tatut hkan sa ai majaw, akyu lu wa ai lam hpe mung bawngban na re.

4. Kasha ni Yehowa hpe tsawra wa na matu, sharin ya ai hta kanu kawa ni hpe karum ya lu ai Chyum Laika npawt tara langai gaw hpa rai kun? (Yaku 1:5)

⁴ Chyum Laika Npawt Tara 1: Yehowa a lam matsun hpe tam u. Kasha ni Karai hpe tsawra wa hkra, karum ya na matu ra ai nyan hpaji hpe Yehowa kaw hpyi u. (Yaku 1:5 hpe hti u.) Kaja htum hpaji jaw ga hpe Karai jaw lu ai. Lam law law nga ai kaw nna, lahkawng hpe myit yu ga. Langai, Yehowa gaw mahkrum madup nga dik htum kawa re. (Shk 36:9) Lahkawng, Karai jaw ai nyan hpaji gaw galoi mung akyu lu shangun ai.​—Esa 48:17.

5. (a) Kanu kawa ni hpe karum ya na matu, Yehowa a uhpung hpa ni hkyen lajang da ai kun? (b) Video hta lawm ai hpunau hte nauna Amorim a kasha ni hpe bau maka ai lam kaw nna hpa sharin la lu ai kun?

⁵ Kasha ni Yehowa hpe tsawra wa hkra bau maka ai hta, kanu kawa ni hpe karum ya lu ai lam ni hpe Chyum Laika, uhpung hku nna Yehowa hkyen lajang da ya ai. (Mat 24:45) Ga shadawn, shaning ni laman, Dum Hprang! magazin hta lawm wa nna, ya website (Myen) hta lu mai ai “Dinghku A Matu Karum Shingtau” ngu ai daw matut sumhpa ni hta, tatut re ai nyan hpaji ni tam mai ai. jw.org hta lawm ai video ni gaw, kasha bau maka ai shaloi, Yehowa a nyan hpaji hpe tatut hkan sa na matu, kanu kawa ni hpe karum ya ai. *​—Gsh 2:4-6.

6. Yehowa a uhpung kaw na lu la ai lam matsun ni hte seng nna kawa langai gara hku hkamsha ai kun?

⁶ Uhpung kaw nna Yehowa hkyen lajang ya ai karum shingtau lam ni a matu, kanu kawa ni chyeju dum ai lam tsun ma ai. Kawa langai re ai Jo ndai hku tsun ai: “Kasha 3 hpe tengman ai tara hta nga lu hkra, bau maka na matu n loi ai. Karum ya na matu, Yehowa kaw an ayan akyu hpyi ai. Hkrum nga ai masa hpe hparan na matu, sumhpa langai, video langai aten hkrak pru wa ai ngu chyahkring hkring hkamsha ai. Yehowa a lam matsun hpe an galoi mung tam ai.” Dai sumhpa ni, video ni gaw kasha ni hpe  Yehowa hte hku hkau wa shangun ai ngu Jo yan hkamsha ai.

7. Kanu kawa ni kasi kaja madun na matu hpa majaw ahkyak ai kun? (Roma 2:21)

⁷ Chyum Laika Npawt Tara 2: Kasi kaja madun u. Kasha ni gaw kanu kawa ni hpe yu nna kasi la chye ai. Hkum tsup ai kanu kawa ngu ai gaw n nga ai. (Rom 3:23) Raitim, hpaji rawng ai kanu kawa ni gaw kasha ni a man hta, kasi kaja madun na matu, dang lu ai daram shakut ai. (Roma 2:21 hpe hti u.) Kasha ni hte seng nna kawa langai ndai hku tsun ai: “Kasha ni gaw hpa hpe raitim chyup la ai pasi hte bung ai. Anhte gaw tsun ai hte maren tatut n galaw yang shanhte tsun wa na re.” Dai majaw, kasha ni Yehowa hpe tsawra wa hkra, anhte nan Karai ntsa tawn ai tsawra myit ngang kang ra ai.

8-9. Endru hte Ema a ga ni kaw na hpa sharin la lu ai kun?

⁸ Yehowa hpe kasha ni tsawra wa hkra, kanu kawa ni sharin ya lu ai lam law law nga ai. Asak 17 ning re ai Endru ndai hku tsun ai: “Akyu hpyi na matu ahkyak ai hpe nu yan wa ayan sharin ya ai. Shana shagu ngai hkrai akyu hpyi ngut yang pyi, awa sa nna rau akyu hpyi ya ai. ‘Yehowa kaw kade lang raitim, akyu mai hpyi ai’ ngu sharin ya ai. Dai majaw, akyu hpyi ai gaw nye matu ahkyak wa ai. Akyu hpyi ai hpe grai lit li ai ngu n hkamsha ai. Yehowa hpe tsawra myit nga ai kawa hku nna mu wa ai.” Kanu kawa ni e, Yehowa ntsa tawn ai nanhte a tsawra myit gaw, kasha ni ntsa grai shingkang ka-up ya lu ai hpe dum u.

⁹ Ema a mabyin hpe yu yu ga. Kawa gaw, hka n wa ai sha, nta masha ni hpe kau da mat ai majaw, kanu gaw hka wa ra mat ai. Ema ndai hku tsun ai: “Anu hta, ja gumhpraw manghkang chyahkring hkring byin ai. Raitim, mayam ni hpe Yehowa kade daram lanu lahku nna, madi shadaw ya ai hpe anu ayan tsun dan ai. Dai lam hpe anu tsep kawp kam ai lam, anu a prat hpe yu nna chye lu ai. Anu gaw sharin ya ai hte maren asak hkrung ai.” Hpa sharin la lu ai kun? Yakhkak ai masa hta pyi, kanu kawa ni kasi kaja madun nna kasha ni hpe sharin ya lu ai.​—Gal 6:9.

10. Kasha ni hte ga shaga na matu, Israela kanu kawa ni hta, gara ahkaw ahkang ni nga ai kun? (Tara Jahprang 6:6, 7)

¹⁰ Chyum Laika Npawt Tara 3: Kasha ni hte ayan ga shaga u. Kasha ni hpe Karai a lam ayan sharin ya na matu, moi Israela ni hpe Yehowa matsun ai. (Tara Jahprang 6:6, 7 hpe hti u.) Israela kanu kawa ni gaw, kasha ni hte ga shaga na matu, Yehowa hpe tsawra wa hkra karum ya na matu, lani mi laman, ahkaw ahkang law law lu ai. Ga shadawn, Israela la kasha gaw mam hkai na matu, mam dan na matu, kawa hpe karum ya ai. Num kasha gaw, kanu hte rau, rai chywi ai bungli, nta bungli ni galaw ra ai. Dai zawn, rau bungli galaw ai aten ni hta, kanu kawa ni gaw, kasha ni hpe ahkyak ai lam ni tsun dan lu ai. Ga shadawn, Yehowa a mai kaja ai atsam ningja ni a lam, dinghku hpe Karai madi shadaw ai lam ni tsun dan mai ai.

11. Kasha ni hte Hkristan kanu kawa ni ga shaga lu ai ahkaw ahkang langai gaw hpa rai kun?

¹¹ Prat masa gaw galai shai mat sai. Mungdan law law hta, kanu kawa ni gaw bungli sa nna, kasha ni mung jawng sa ra ai majaw, kanu kawa ni hte kasha ni shani tup rau nga na aten n nga sai. Dai majaw, kasha ni hte ga shaga na matu, kanu kawa ni ahkaw ahkang tam ging ai. (Ehp 5:15, 16; Hpl 1:9, 10) Ahkaw ahkang langai gaw dinghku nawku galaw ai aten re. Ramma hpunau Alekzenda ndai hku tsun ai: “Awa gaw dinghku nawku  lamang a matu ayan hkyen lajang ai. Hpa lam a majaw mung n hprai ai. Nawku ngut ai hpang hta mung anhte rau ga shaga ai.”

12. Dinghku nawku hte seng nna dinghku a baw gaw hpa hpe dum ging ai kun?

¹² Dinghku nawku hpe kasha ni pyaw hkra dinghku a baw hpa galaw lu na kun? Htani Htana Ngwi Pyaw Ai Prat! ngu ai laika buk nnan hpe hkaja mai ai. Dai laika buk gaw kasha ni hte rau atsawm ga shaga na matu, ahkaw ahkang lu shangun ai. Kasha ni hpe hkamsha lam, myit tsang ai lam ni tsun dan shangun mayu yang, dinghku nawku galaw ai aten hta, sharin shaga ai baw hkum galaw. Chyum Laika npawt tara hte nhtan shai ai, myit jasat langai ngai hpe kasha ni tsun wa yang, lai lai jan jan hkum htang. Dingman ai hku tsun dan ai hpe sha, chyeju dum u. Hpang de mung, dai hku tsun dan na matu n-gun jaw u. Kasha ni a hkamsha lam hpe chye yang she, kaja htum karum ya lu na re.

13. Kasha ni Yehowa hte hku hkau wa hkra, kanu kawa ni naw karum ya lu ai ahkaw ahkang langai gaw hpa rai kun?

¹³ Kanu kawa ni e, Yehowa hte hku hkau wa hkra, kasha ni hpe karum ya na matu ahkaw ahkang tam u. Chyum Laika sharin na aten du hkra n la ra ai. Nu num Lisa ndai hku tsun ai: “Hpan da ai lam ni hpe akyu jashawn nna, Yehowa a lam kasha ni hpe sharin ya ai. Ga shadawn, nta na gwi kasha ni galaw ai lam lama ma a majaw, ma ni pyaw ai nga yang, Hpan Madu gaw ngwi pyaw ai Karai re ai, masha ni ngwi pyaw lam hkamsha lu hkra hpan da ai lam, kasha ni hpe sharin ya ai.”

14. Manang hpe hpaji rawng ai hku lata chye na matu kasha ni hpe kanu kawa ni hpa majaw karum ya ra ai kun? (Ga Shagawp 13:20)

¹⁴ Chyum Laika Npawt Tara 4. Manang kaja lata na matu kasha ni hpe karum ya u. Manang gaw tinang ntsa kaja ai hku, n kaja ai hku shingkang ka-up chye ai ngu Chyum Laika hta  asan sha tsun da ai. (Ga Shagawp 13:20 hpe hti u.) Kanu kawa ni e, tinang a kasha ni a manang ni hpe chye ai kun? Mu ga ai kun? Kanawn yu ga ai kun? Yehowa hpe tsawra ai ni hte kasha ni manang byin wa hkra, gara hku karum ya lu ai kun? (1 Ko 15:33) Yehowa hte hku hkau lam kaja ai ni hte kasha ni kanawn byin hkra lajang ya ai hku nna karum ya mai ai.​—Shk 119:63.

15. Kasha ni manang kaja nga wa na matu, kanu kawa ni gara hku karum ya mai ai kun?

¹⁵ Wa la Toni a lam hpe yu yu ga. Manang kaja tam na matu, kasha ni hpe shan yan gara hku karum ya wa ai lam hpe tsun dan ai. Shi ndai hku tsun ai: “Asak, shingdu labau amyu myu nga ai hpunau nauna ni hpe nta de saw shaga ai. Rau lu sha ai. Dinghku nawku mung galaw ai. Dai gaw Yehowa hpe tsawra nna, kabu gara let magam gun nga ai ni hte hku hkau shangun ai. Ninghtawn hpung kawan ni, sasana magam gun ni, hpunau nauna ni hpe nta kaw manam shangun ai. Shanhte a mahkrum madup, myit rawt ai lam, sak jaw ai lam ni gaw kasha ni a ntsa grai akyu shabyin ya ai. Yehowa hte hku hkau wa shangun ai.” Kanu kawa ni e, kasha ni manang kaja nga wa hkra karum ya na matu dawdan da u.

16. Yehowa hpe n nawku mayu ai ngu kasha ni tsun wa yang gara hku kun?

¹⁶ Dang lu ai daram shakut nna sharin ya tim, Yehowa hpe n nawku mayu ai ngu kasha ni tsun wa yang gaw gara hku kun? Tinang lit n kang ka ai majaw re ngu hkum myit. Karai hpe nawku na kun? N nawku na kun? ngu ai hpe kasha ni hte hpawn, anhte yawng hpe wanglu wanglang lata na matu Yehowa ahkang jaw da ai. Tinang a kasha ni Yehowa hpe kau da mat ai nga yang pyi, lani mi hta bai wa na re ngu matut myit mada nga u. Mat mat ai kasha ga shadawn hpe dum u. (Luk 15:11-19, 22-24) Dai kasha gaw, shut ai lam de du mat tim, hpang jahtum hta bai wa ai. “Dai baw gaw maumwi ni hta sha nga ai. Tatut hta mai byin na kun?” ngu nkau myit hkrup na re.  Mai byin ai lam, ramma I-li a mahkrum madup hpe yu yu ga.

17. I-li a mahkrum madup gaw hpa majaw n-gun lu shangun ai kun?

¹⁷ Kanu kawa ni lam, I-li ndai hku tsun ai: “Yehowa hte Chyum Laika hpe tsawra na matu, kanu kawa ni dang lu ai daram sharin ya ma ai. Raitim, asak shi ning jan hta ngai loi mi myit n su wa ai.” I-li gaw kanu kawa ni a man hta myu mi, shingdu hta myu mi asak hkrung ai. Wenyi lam kaja hkra kanu kawa ni karum ya ai hpe n hkap la ai. Nta kaw na pru wa ai hpang, n kaja ai lam ni galaw ai. Raitim, manang langai hte kalang lang Chyum Laika lam bawngban byin ai. I-li ndai hku tsun ai: “Manang hpe Yehowa a lam tsun dan magang, tinang mung Yehowa a lam grau myit hkrup magang re. Kanu kawa ni shakut nna, nli gat wa ai Chyum Laika tengman lam nli gaw, nye a myit kata hta angwi ngwi tu kaba wa ai.” Hpang jahtum hta, tengman ai lam de bai du wa ai. * Yehowa hpe tsawra wa na matu, kaji ai aten kaw nna shakut sharin ya wa ai majaw, shi a kanu kawa ni kade daram kabu na hpe shingran yu u.​—2 Tm 3:14, 15.

18. Kasha ni Yehowa hpe tsawra wa na matu, shakut sharin ya nga ai kanu kawa ni hte seng nna nang gara hku hkamsha ai kun?

¹⁸ Kanu kawa ni e, Yehowa hpe nawku dawjau wa na kashu kasha ni hpe bau maka lu ai ahkaw ahkang nanhte lu da ai. (Shk 78:4-5, 8) Loi ai lit n re ai majaw, nanhte a shakut shaja ai lam hpe shakawn ai. Yehowa hpe tsawra wa na matu, Karai a sharin achyin ai lam, lam matsun ni hpe madat na matu, kasha ni hpe dang lu ai daram matut karum ya u. Rai yang, sumsing Kawa gaw nanhte a majaw kabu nga na re.​—Ehp 6:4.