1-2. Shingran Laika hpe myit lawm ging ai lam langai gaw hpa rai kun?

 MANANG langai a sumla ni hpe yu nga ai ngu saga. Sumla law malawng gaw, n chye ai masha ni hkrai rai nga ai. Sumla langai hpe chyawm gaw atsawm yu dat ai. Dai hta tinang lawm nga ai majaw re. Gara shara, gara aten hta, dem da ai hpe myit yu ai. Sumla hta lawm ai langai hpra hpe mung, kadai ni kun? ngu yu dat ai. Dai sumla gaw, na matu grai lachyum nga ai.

² Shingran Laika mung, dai sumla hte bung ai. Hpa majaw kun? Yawm htum lam 2 a majaw re. Langai, Shingran Laika hpe anhte a matu ka da ai re. Shawng nnan na daw kaji hta ndai hku ka da ai: “Ndai laika gaw Yesu Hkristu hpe Karai Kasang jaw ai shingran a lam ka matsing tawn ai laika re. Yesu hpe ndai shingran jaw ai lam gaw, gade n na yang byin wa na ra ai lam ni hpe Karai Kasang a shangun ma ni chye lu hkra madun dan na matu rai nga ai.” (Shr 1:1, JCLB) Dai majaw, Shingran Laika hta ka da ai lam yawng gaw, masha yawng a matu n re ai sha, ap nawng da ai Karai a mayam re ai anhte a matu ka da ai re. Dai Laika hta lawm ai myihtoi ga ni hpring tsup ai lam hta, anhte lawm nga ai hpe chye ai majaw, n mau ging ai. Lam mi hku tsun yang, sumla hta tinang nan lawm nga ai re.

3-4. Shingran Laika hku nga yang, myihtoi ga ni gara aten hta hpring tsup na kun? Dai gaw anhte yawng a ntsa gara hku akyu shabyin ging ai kun?

³ Lahkawng, myihtoi ga ni hpring tsup na aten a majaw re. Dai aten hte seng nna, asak kaba sai kasa Yawhan gaw, “dai Madu a nhtoi hta e Wenyi hta ngai nawng mat wa ai” ngu tsun ai. (Shr 1:10) Dai Laika hpe Yawhan ka ai A.D. 96 shaloi hta, “Madu a nhtoi” du  na matu grai naw na ai. (Mat 25:14, 19; Luk 19:12) Chyum Laika myihtoi ga hku nga yang, dai nhtoi gaw, sumsing lamu hta, Hkawhkam hku nna Yesu aya tang hkrum ai 1914 hta hpang ai. Dai shaning kaw nna Karai a amyu masha lawm ai Shingran Laika a myihtoi ga ni hpring tsup hpang wa ai. “Madu a nhtoi” hta, anhte ya, asak hkrung nga ai.

⁴ Grai myit kahpra hpa aten hta, anhte asak hkrung nga ai majaw, Shingran 1:3 hta lawm ai ndai ga ni hpe myit lawm ging ai: “Ahkying ladaw ni wa magang ra ai majaw, ndai ga hpe hti dan ai wa hte, ndai myihtoi ga hte hpe madat mara nna dai hta ka da mada hpe hkan galaw ai ni gaw, a lu ma ai.” Ndai myihtoi ga hpe “hti” ra ai, “madat mara” ra ai, “hkan galaw” ra ai. Dai myihtoi ga nkau gaw hpa ni kun?

5. Yehowa ra sharawng ai lam hte nawku ra ai lam Shingran Laika gaw gara hku ahkyak shatai tsun dan ai kun?

⁵ Nawku hpung ni hta, hpa byin nga ai hpe Yesu atsawm chye ai lam, Shingran Laika daw kaba 1 hpang ai hte anhte chye lu ai. (Shr 1:12-16, 20; 2:1) Asha Maina kaw na nawku hpung 7 hpang de ka ai shiga hta dai lam dan dawng ai. Yehowa ra sharawng ai lam hte nawku na matu Yesu tup hkrak lam matsun ya ai. Dai ga ni gaw, dai ni aten na Karai a mayam yawng hte mung seng ai. Hpa sharin la lu ai kun? Anhte a wenyi lam hpe ningbaw Yesu Hkristu atsawm chye ai. Yesu woi awn ai npu hta anhte nga nga ai. Yesu n mu ai hpa n nga ai. Yehowa a myi man matut lu na matu, anhte hpa galaw ra na hpe chye ai. Dai ni aten, anhte hkan sa ra ai gara lam matsun hpe Yesu jaw ai kun?

6. (a) Shingran 2:3, 4 hta lawm ai Yesu a ga ni hku nga yang, Ehpesu nawku hpung hta hpa manghkang nga ai kun? (b) Anhte hpa sharin la lu ai kun?

⁶ Shingran 2:3, 4 hpe hti u. Yehowa ntsa tawn ai anhte a shawng na tsawra myit n mai kawp ai. Mayak mahkak amyu myu a lapran, hkam sharang let Yehowa hpe matut nawku nga ai ngu Ehpesu nawku hpung hpe Yesu tsun ai. Raitim, shawng na tsawra myit kawp nga ai. Karai ra sharawng ai nawku dawjau lam byin na matu, dai tsawra myit bai nga ra ai. Ya aten hta mung, mayak mahkak ni hpe hkam jan nga ai hta n-ga, galaw ra ai. Myit majing hte hkamjan ra ai. Anhte hpa galaw ai ngu ai sha n-ga, hpa majaw galaw ai ngu ai myit jasat hpe Karai myit lawm ai. Dai gaw Karai a matu ahkyak ai. Shi hpe tsawra ai myit, chyeju dum ai myit hte nawku na matu myit mada ai majaw re.​—Gsh 16:2; Mrk 12:29, 30.

7. (a) Shingran 3:1-3 hku nga yang, Sardi nawku hpung hta gara manghkang hpe Yesu mu ai kun? (b) Anhte hpa galaw ra ai kun?

⁷ Shingran 3:1-3 hpe hti u. Anhte maja nna myit rawt nga ra ai. Sardi nawku hpung hta, manghkang langai nga ai. Lai wa sai aten hta, Karai a magam kaw myit rawt let shang lawm wa tim, angwi ngwi yawm wa ai. Dai majaw, “maja nga” na matu Yesu tsun ai. Hpa sharin la lu ai kun? Anhte galaw wa ai lam ni hpe Yehowa galoi  n malap ai. (Heb 6:10) Raitim, Yehowa a magam hpe lai wa sai aten hta galaw wa sai majaw, ya n galaw ra sai ngu n mai myit ai. Lai wa sai aten daram n lu galaw sai nga yang mung, “Madu a bungli” hta matut amu law nga ra ai, jahtum du hkra maja nna myit rawt nga ra ai.​—1 Ko 15:58; Mat 24:13; Mrk 13:33.

8. Shingran 3:15-17 hta Ladoki nawku hpung hpe tsun ai Yesu a ga ni kaw na hpa sharin la lu ai kun?

⁸ Shingran 3:15-17 hpe hti u. Myit rawt let myit masin mahkra hte nawku ra ai. Ladoki nawku hpung a manghkang langai hpe Yesu naw tsun dan ai. Shanhte gaw nawku dawjau lam hta, “lum” nga ai daram sha re. “Tsin-yam tsindam hkrum” nna, matsan mayan rai nga ai ngu Yesu tsun ai. Yehowa a matu, nawku dawjau lam a matu, bai myit rawt ra ai. (Shr 3:19) Hpa sharin la lu ai kun? Anhte myit rawt ai lam mat mat ai nga yang, Yehowa hte uhpung ntsa tawn ai chyeju dum myit law htam wa hkra galaw ra ai. (Shr 3:18) Grai kaja ai hku nga lu hkra shakut nga ai majaw, Karai a magam hpe nambat lahkawng shara hta tawn kau ai baw hkum galaw.

9. Pergamu hte Htuatira nawku hpung hpe tsun ai Yesu a ga ni hku nga yang, gara shoihpa hpe anhte sadi ra ai kun?

⁹ Makam masham htak ai ni a sharin achyin ai lam hpe nyet kau ra ai. Pergamu hpung masha nkau gaw, hpung garan nga ai ngu Yesu tsun ai. (Shr 2:14-16) Htuatira hpung masha ni hpe gaw, “Satan a sung htum ai lam” ni hpang de n lawm mat ai majaw shakawn ya ai. Tengman lam hpe “manat” da na matu n-gun jaw wa ai. (Shr 2:24-26) Shut shai ai sharin achyin ai lam ni hpang lawm mat wa ai Hkristan ni myit malai lu ra ai. Dai ni aten hta gaw gara hku kun? Yehowa a myit mang ai lam hte n htan shai ai sharin achyin lam yawng hpe nyet kau ra ai. Makam masham htak mat ai ni gaw, “tara hkungga ai htung hkan ma ti mung, dai hte seng ai hpung dagu hpe nyet kau ai ni rai nga ma ai.” (2 Tm 3:5) Chyum Laika hpe myit rawt let hkaja na nga yang, shut shai ai sharin achyin lam ni hpe chye ginhka nna, nyet kau na matu grau loi wa na re.​—2 Tm 3:14-17; Yud 3, 4.

10. Pergamu hte Htuatira nawku hpung hpe Yesu tsun ai ga kaw na hpa sharin la lu ai kun?

¹⁰ Hpye ai amu yawng hpe koi ra ai. Pergamu hte Htuatira nawku hpung hta manghkang langai naw nga ai. Hpung masha nkau gaw,  hpye ai amu galaw nga ai majaw, Yesu mara shagun ai. (Shr 2:14, 20) Hpa sharin la lu ai kun? Shaning law law magam gun wa ai, ya mung ahkang aya lu da ai majaw, hpye ai amu galaw yang, Yehowa ahkang jaw na re ngu n sawn la ging ai. (1 Sa 15:22; 1 Pe 2:16) Mungkan a tsang madang ni grai yawm nga tim, Karai a tsang madang ni hte maren anhte asak hkrung na matu Karai myit mada ai.​—Ehp 6:11-13.

11. Ya du hkra hpa ni chye wa sai kun? (“ Dai Ni Aten Na Anhte A Matu Sharin La Lu Ai Lam” ngu ai lawk hpe yu u.)

¹¹ Ya du hkra hpa ni chye wa sai kun? Yehowa ra sharawng ai lam hte nawku ra ai hpe chye wa sai. Karai n ra ai lama ma galaw nga ai nga yang, kalang ta galai shai ra ai. (Shr 2:5, 16; 3:3, 16) Nawku hpung ni hpe Yesu ahkyak shatai nna tsun ai lam langai naw nga ai. Hpa rai kun?

12. Samurna hte Hpiladehpi nawku hpung hpe Yesu tsun ai ga ni kaw na hpa sharin la lu ai kun? (Shingran 2:10)

¹² Samurna hte Hpiladehpi nawku hpung hpe Yesu tsun ai ga ni hpe matut bawngban yu ga. Jahtum du hkra sadi dung na nga yang, kumhpa lu la na re ai majaw, zingri zingrat ai lam hpe hkum hkrit ngu, dai Hkristan ni hpe Yesu tsun ai. (Shingran 2:10 hpe hti u; 3:10) Hpa sharin la lu ai kun? Zingri zingrat ai lam hpe myit mada da ra ai. Sharawng awng let hkam jan ra ai. (Mat 24:9, 13; 2 Ko 12:10) Dai zawn galaw na matu hpa majaw ahkyak ai kun?

13-14. Shingran Laika daw kaba 12 hta lawm ai mabyin ni gaw, Karai a amyu masha ntsa gara hku hkra machyi shangun ai kun?

¹³ “Madu a nhtoi” re ai dai ni aten hta asak hkrung nga ai Karai a amyu masha gaw, zingri zingrat hkrum na ngu Shingran Laika hta ka da ai. Karai Kasang mungdan hta, Yesu Hkawhkam byin ai hte kalang ta, sumsing lamu hta majan byin ai ngu Shingran daw kaba 12 hta tsun da ai. Mihkaela re ai Yesu Hkristu hte lamu kasa ni gaw, Satan hte nat ni hpe gasat ai. (Shr 12:7, 8) Karai a hpyen ni majan sum nna, ginding aga de kabai jahkrat hkrum ai. Mungkan ga hte shinggyim masha ni a matu gaw manghkang kaba re. (Shr 12:9, 12) Dai gaw Karai a amyu masha ntsa gara hku hkra machyi shangun ai kun?

¹⁴ Satan gara hku bai htang na ngu ai hpe Shingran Laika hta matut tsun da ai. Sumsing lamu de n mai lung sai majaw, Karai mungdan a shinggyim dat kasa ni, “Yesu a sakse ga lang ai ni” re ai ngam nga ai namman chya hkam ai ni hpe Satan grai masin pawt let gasat ai. (Shr 12:17; 2 Ko 5:20; Ehp 6:19, 20) Dai myihtoi ga gara hku hpring tsup nga ai kun?

15. Shingran Laika daw kaba 11 hta lawm ai “sakse yan lahkawng” gaw kadai ni hpe tsun ai kun? Shanhte hpa byin mat ai kun?

 ¹⁵ Mungdan shiga hkaw tsun ai bungli hpe woi awn nga ai namman chya hkam ai hpunau ni hpe gasat na matu, Karai a hpyen ni hpe Satan shadut ya ai. Shingran Laika hta lawm ai sat hkrum ai “sakse yan lahkawng” gaw, dai namman chya hkam ai ni hpe tsun mayu ai re. * (Shr 11:3, 7-11) 1918 hta, lit nga ai hpunau 8 gaw, n tara ai hku mara shagun hkrum nna, shaning law law htawng jahkrat hkrum ai. Masha ningmu hku yu na nga yang, dai namman chya hkam ai ni gaw, “sat hkrum” ai re.

16. 1919 hta gara laklai ai mabyin byin wa ai kun? Dai aten kaw nna Satan hpa matut galaw ai kun?

¹⁶ “Sakse yan lahkawng” gaw, kade n na yang, asak bai hkrung wa ai ngu, Shingran daw kaba 11 hta matut tsun da ai. Dai myihtoi ga hpring tsup wa ai. Namman chya hkam ai hpunau ni htawng jahkrat hkrum nna, hpang shaning hta laklai ai lam langai byin wa ai. 1919, March hta namman chya hkam ai hpunau ni htawng kaw na lawt wa ai. Dai hpang, tara shawk shawn da ai lam ni hpe mung dawm kau ya ai. Dai majaw, hpunau ni gaw, hkaw tsun bungli hpe kalang ta bai hpang ai. Raitim, Karai a masha ni hpe Satan gasat ai gaw n hkring mat ai. Dai aten kaw nna Karai a amyu masha yawng a ntsa, zingri zingrat ai lam ngu ai “hka nu” hpe Satan kawut shalwi dat ai. (Shr 12:15) Anhte yawng, “shakut sharang shara hte makam masham” nga ra ai.​—Shr 13:10.

17. Karai a amyu masha gaw, Satan a gasat hkrum ai aten hta n myit mada da ai gara karum shing tau lam lu wa ai kun?

¹⁷ Karai a amyu masha gaw, n myit mada da ai shara kaw na karum shing tau lam lu ai ngu Shingran daw kaba 12 hta matut tsun da ai. “Lamu ga” gaw, zingri zingrat lam re ai “hka nu” hpe mayu kau ai. (Shr 12:16) Dai hte maren byin wa ai. Kalang lang, Satan mungkan a tara upadi ni gaw, Karai a amyu masha hpe hkye la ai. Tara rung ni hta, Karai a amyu masha chyahkring hkring awng dang lam lu ai majaw, ram daw lawt na ahkang lu ai. Dai lawt lu ai lam hpe gara hku akyu jashawn ai kun?  Ahkaw ahkang yawng hpe hpring tup akyu jashawn nna, Yehowa ap da ai bungli hpe matut galaw ai. (1 Ko 16:9) Dai bungli hta hpa ni lawm ai kun?

18. Ndai hpang jahtum aten hta, anhte a matu ahkyak htum bungli gaw hpa rai kun?

¹⁸ Karai a amyu masha gaw, jahtum n du shi yang, mungkan ting hta, “mungdan a kabu gara shi ga” hkaw na ngu, Yesu tau hkrau tsun da ai. (Mat 24:14) “Dinghta ga ntsa e nga ai ni hte, amyu baw shagu, baw lakung shagu, ga amyu shagu hte masha mungdan shagu hpe, htani htana a kabu gara shi ga hkaw dan lu ai” lamu kasa langai (sh) lamu kasa hpung a madi shadaw lam hpe Karai a amyu masha lu nga ai.​—Shr 14:6.

19. Yehowa hpe tsawra ai ni gaw, gara shiga hpe ndau shana ra ai kun?

¹⁹ Karai a amyu masha gaw, Mungdan kabu gara shiga hpe sha, ndau shana nga ai n re. Shingran daw kaba 8 kaw na 10 hta lawm ai lamu kasa ni a bungli hpe mung madi shadaw nga ai. Dai lamu kasa ni gaw, Karai Mungdan hpe nyet kau ai ni hkrum na shoihpa lam hpe mung ndau shana nga ai. Dai majaw, Yehowa Sakse ni gaw, n hkru ai Satan mungkan hpe, Karai Kasang tara jeyang na shiga hpe mung ndau shana nga ai. Dai shiga hpe “sin hte awan” nga nna tsun da ai. (Shr 8:7, 13) Jahtum grai ni sai ngu ai hpe masha ni chye ra ai. Rai yang she, prat hpe galai shai lu nna, Yehowa a pawt sindawng ai nhtoi kaw na lawt lu na re. (Zep 2:2, 3) Raitim, dai shiga hpe masha ni n ra ma ai. Dai majaw, dai shiga ndau shana na matu nden marai ra ai. Ru tsang kaba laman, hpang jahtum tara jeyang ai shiga gaw, grau sawng na re.​—Shr 16:21.

20. Hpang na sumhpa 2 hta hpa lam bawngban na kun?

²⁰ Shingran Laika kaw na myihtoi ga ni hpring tsup ai lam hta, anhte nan lawm nga ai majaw, “ndai myihtoi ga” ni hpe madat mara ra ai. (Shr 1:3) Raitim, zingri zingrat hkrum ai aten hta gara lam hku nna sadi dung let hkam jan lu na kun? Ndai shiga ni hpe gara lam hku nna nden marai nga let matut ndau shana lu na kun? Lam 2 a majaw re. Langai, Karai a hpyen ni hte seng nna, Shingran Laika hta madun da ai lam a majaw, lahkawng, matut sadi dung na nga yang, htawm hpang hta lu la na shaman chyeju ni a majaw, anhte n-gun lu ai. Dai lam ni hpe hpang na sumhpa 2 hta bawngban na re.